إلى موظفيــــــــــن قطـــــر فاونديشــــــــن وتوابعها ....

[رهج السنابك]

؛

السلام عليكم ورحمة الله وبركاته

؛

موظفين كيو اف الاعزاء عندي استفسارات بخصوص التوظيف

ماهي الامتيازات اللي تقدمها المؤسسة للموظفين من ناحية كم فترة التدريب للخريج الجديد

واللي عندهم خبرة سابقه هل يحسبونها لهم؟

هل فيه تطوير وخطة تدريب للموظف ؟ ولا مايدربون ولا يعطون دورات؟

بالنسبة حق دوحة لاند كيف رواتبهم للسينير؟
والسدرة كم يعطون الخريج الجديد بدرجة سينير؟

هل تحسون بسيطرة الاجانب على كل الوظائف ام القطري له امتيازات معينه؟

وامممممم كم يوم اجازة في السنة؟


؛

واللي مايحب يجاوب على العام ممكن الخاص مب مشكلة

[اوف ليميت]

1- انسى دوحه لاند الا اذا انت بنت

2- انسى سدره..لا بنت ولا ولد .. يبون خبراء وبس حاليا
بيردون عليك بسرعه بصراحه..سدره..بس ردهم هو (حاليا نبي خبراء عشان يطورون ويقومون بالعمل .. وان شاءالله بعد هذا هم بيختارون قطريين وبيطورونهم) يبقى قابلني..
حتى لو انت خبره وشغال بوظيفه سابقه 10 سنين..بيقولون لك هذا مش مجالنا
ياخي جسستني ان سدره كلها دوائر كهربائيه نمشي عليها في كل شبر
في ادارات
وفي سكرتاريه وفي اعلام وفي وفي وفي ... مئات الاشياء اللي ممكن حتى خريج اعداديه يتحرك فيها وبكل فعاليه
فمابالك بشخص شغال بمجال قوي فالبزنز او الهندسه او البنكي..ويقول ماعندي مانع اشتغل ادار سكرتير...اتهقى ماراح يعرف؟
بس هم يبون اجانب وبس عشان يحلى الجو للمجموعه القطريه المسيطره منذ البدايه

3- مافي خطه صريحه للتطوير..يعني تتوظف بمسمى متدرب لمدة (سنتين) وانت نفسك بنفسك تروح وتتعب وتدور وين في شغل وتراقب وتحاول بنفسك تشتغل اذا تقدر وبين كل فتره وفتره يجونك يختبرونك ها شنو تعلمت وشنو سويت وبس

4- السيطره للاجانب..القطري موجود ك اسم (قطري اداري او مدير للكل في قسك معين) لكن اليد بالتوظيف والتحكم للاجنبي..هنود وانجليز..والاغلبيه هنود
القطري اتحسه هناك بس عشان لى صار شي اعلامي او نشاط او معرض وكذا يعني..يتم احضاره للتعليق والتحدث ويكون فالواجهه

:]

[رهج السنابك]

اي واضح لأي حد يروح يتمشى في قطر فاونديشن وتوابعها ان الاجانب هناك مسيطيرين ومستعمرين المكان الراقي وكل الخدمات متوفرة لهم مكاتب على ارقى مستوى مكان يفتح النفس بيئه مريحة رواتب مجزية

لكن ليش القطريين هناك مايسعون للتقطير فيه كفاءات وايد أولى بالعمل

الوظائف البسيطة الجينير من سكرتارية وارشيف ليش بعد كلها هنود واجانب!! انا اتكلم من خارج المؤسسة من اللي اسمعه والاحظه لكن بانتظار افادة موظفين من قلب المؤسسة وقريبين جداً منها للافادة حول اسئلتي المطروحه اعلاه

[.. الكاش ..]

الله المستعان

[alsoq]

الاجني في المقام الاول
وابن البلد في المقام الثاني
الدوله مهمشه القطرين وكان الشغل ما راح يمشيه الى الاجنبي اللي لا حصل منصب وظف طوايفه كلهم وطرد القطري

وصدقوني لو يسون تحقيق راح تحصل لكل واحد صله قرابه

[lady bird]

هل تقصدون الاجانب يعني هنود واروبيين ولا يشملهم العرب
لاني كذا مرة قدمت على هذه الشركات بالذات وما في امل بقوليلي التوظيف للقطريين فقط

[qews]

ممكن افيدك لان اشتغلت في هذه الشركتين..

مشيرب العقاريه ( سابقا دوحه لاند) شركه تابعه لقطر فونديشن وغالبا كل الشركات التابعه لقطر فونديشن تخضع لبكج معروف ومتناول بين كل الشركات تحت كيو اف..
التقطير في مشيرب ممتاز وعدد القطرين فيها ممتاز ونعم نسبه البنات فيها القطريات الله يبارك كثيره وهذا شي جيد ولا يجود في اي خجل العمل مع بنت او غيرها ( مع احترامي للعضو السابق ) .. بس في بعض الاقسام يكون فيها اكتفاء فهذا هو السبب عدم القبول او عدم الرد على المقدمين ..

والان سدره .. سدره هو عباره عن مستشفى ابحاث ويطلب قطرين بشكل خيالي بشرط تكون دكتور او حامل هذه الشهادات الصحيه .. ويبعث الطلاب بشرط دراستهم طب عام اسنان و و و و
اما بخصوص التقطير قليل ولاباس فيه واغلب الموظفين القطريين ذات خبره 7 سنوات على الاقل وممكن في اقل

اما بخصوص الجانب من ضمنهم العرب اغلبهم ذو خبره في شركات عريقه بين 15 سنه على الاقل وانا اشهد انهم هم من يمشون هذه الشركات ( باختصار وانا اعرف كذا شخص ان قدم استقالته صعب يقبلون الاستقاله بهذه السهوله )
الخلاصه الشركتتين تابعات لقطر فونديشن
مشيرب العقاريه كبيره والتوظيف فيها اسهل من سدره ..

في النهايه اذا انت موظف ذو خبره هذه الشركتين ترحب فيك وفي بكج ممتاز وكل التوفيق والحترام

[غايه الطواش]

صديقتي. توها مشتغله في سدره ومن غير واسطه قدمت واقبلوها بعد شهرين

[رهج السنابك]

ممكن افيدك لان اشتغلت في هذه الشركتين..

مشيرب العقاريه ( سابقا دوحه لاند) شركه تابعه لقطر فونديشن وغالبا كل الشركات التابعه لقطر فونديشن تخضع لبكج معروف ومتناول بين كل الشركات تحت كيو اف..
التقطير في مشيرب ممتاز وعدد القطرين فيها ممتاز ونعم نسبه البنات فيها القطريات الله يبارك كثيره وهذا شي جيد ولا يجود في اي خجل العمل مع بنت او غيرها ( مع احترامي للعضو السابق ) .. بس في بعض الاقسام يكون فيها اكتفاء فهذا هو السبب عدم القبول او عدم الرد على المقدمين ..

والان سدره .. سدره هو عباره عن مستشفى ابحاث ويطلب قطرين بشكل خيالي بشرط تكون دكتور او حامل هذه الشهادات الصحيه .. ويبعث الطلاب بشرط دراستهم طب عام اسنان و و و و
اما بخصوص التقطير قليل ولاباس فيه واغلب الموظفين القطريين ذات خبره 7 سنوات على الاقل وممكن في اقل

اما بخصوص الجانب من ضمنهم العرب اغلبهم ذو خبره في شركات عريقه بين 15 سنه على الاقل وانا اشهد انهم هم من يمشون هذه الشركات ( باختصار وانا اعرف كذا شخص ان قدم استقالته صعب يقبلون الاستقاله بهذه السهوله )
الخلاصه الشركتتين تابعات لقطر فونديشن
مشيرب العقاريه كبيره والتوظيف فيها اسهل من سدره ..

في النهايه اذا انت موظف ذو خبره هذه الشركتين ترحب فيك وفي بكج ممتاز وكل التوفيق والحترام


ايه فعلا سمعت ان مشيرب والسدرة اغلب العاملين فيهم بنات وهذا الشي المشجع في الموضوع :nice: وحده قالت لي بين كل عشرين بنت موظف واحد مسكين :tease:


ارسلت لك بعض الاستفسارات على الخاص اخوي؛

[رهج السنابك]

صديقتي. توها مشتغله في سدره ومن غير واسطه قدمت واقبلوها بعد شهرين


غاية الخاص مغلق كنت برسل لج رسالة :(

؛

اممممم شنو رايها تمدح المكان ؟ مرتاحه فيه؟ يهتمون بالقطريين ؟ من ناحية التدريب والتطوير او الاجانب مسيطرين على المكان؟ والراتب حلو ولا ضعيف

[غايه الطواش]

اختي هي توها مشتغله بس كلموها اذا تبي تكمل ماستر راح يعطونها منحه بس هي ماعندها محرم

وتقول مرتاحه وكلن في حاله تقول بس مافي مكان كامل

اما الراتب ماسالتها استحيت
والتوظيف ماسكينه قطريين

[غايه الطواش]

بس التوظيف يخلتف القسم الاداري عن الطبي

[أنت]

اذا لقيتي واسطه لج ودي اوراقي معاج

[ريتويت]

الله المستعان وربي يوفق الجميع بلا استثنا

[الصغيره]

لا تعليق الا الله كريم

[MoHaMmEd114]

قدام عيني


لبناني جاي قطر زيارة عائلية اقل من شهر توظف في قطر فاونديشن

وتوه مقدم

اعتقد وأكاد اجزم الخطة

يعني العبه مكشوفه

[FCB 82]

في وين التقديم حق مشيرب العقاريه

[رهج السنابك]

اخ محمد كل شي نصيب يمكن ربي كاتب له رزقه اهني

بس بعد توظيف اللبنانيين والاجانب بشكل عام اسهل لان اللي ماسكين اغلب الوظايف في قطر فاونديشن هم الاجانب ويساعدون بعضهم


واحد من شباب قطر الغيور ومدير عود منصبه وايد كبير جزاه ربي كل خير قابلته مره قال لي انا لو شفت سي في قطري او قطريه ما اخلي سكرتيرتي تتصل عليهم انا اقوم بالاتصال بنفسي على المرشح يقول اخاف تتعذر وتقول دقيت وماردوا علي!! او تقول خطه مقفول يقول ادري بهم

ترا احيانا هل قطر يحبون يساعدون بس بعض الاماكن نشوف مافيها تقطير ونقول ليش ماينادونا يطلع الخلل من وين؟ من السكرتاريه او الاتش ار يجيهم السي في محترم وكله شهادات ومؤهلات ووينرمي في الزبالة واذا سأآل المدير وين القطريين وين سي فياتهم يقولون له مافي حد مناسب او لقينا شخص لكن مب قادرين نتصل له تلفونه مقطوع!


ياليت كل شباب قطر نفس هالمدير اللي قابلته اللي قلبه صج على هل قطر وبنفسه يتصل بالناس ويناديهم يقابلهم جزاه ربي كل خير

[رهج السنابك]

اللي سأل عن التوظيف في مشيرب اهني كل وظايفهم المطروحه

http://careers.msheireb.com/msheireb/vacancysearch.aspx


او روح لهم في برج الترنيندو

[رهج السنابك]

ااااااااااااااب

[رهج السنابك]

اذا لقيتي واسطه لج ودي اوراقي معاج

ههههههههههههههههههههههههه


بروحي يبي لي واسطه :) :)


يلا اللي عنده واسطة يصير كريم ويوظفنا ويكسب اجر شوفوا الللبنانيين والاجانب يتوسطون حق بعضهم

وهل قطر اولى

لو كل مدير قطري ينفض ادارته من الاجانب ويعطي الاولوية لاهل قطر ماكان عندنا بطالة

بس الله كريم

[بنت امي]

وقت الدوام من كم لين كم ؟

[رهج السنابك]

اعتقد لين 3

[غموضي محيرهم]

بما اني مبرمجه وقطريه والله ودي اشتغل هناك يقولون رواتبهم زينه !


ابي اسأل الشغل هناك مريح ؟

[الدوحه1]

سمعت ان في "قطريين" فنشوا من "الجزيره للاطفال" والسبب ان الجزيره قامت بتخفيض رواتبهم الاساسيه؟؟؟
ممكن حد يأكد هالمعلومه؟؟
مع العلم ان الجزيره للاطفال تابعه لقطر فاونديشن..

[المرحب]

الاجني في المقام الاول
وابن البلد في المقام الثانيالدوله مهمشه القطرين وكان الشغل ما راح يمشيه الى الاجنبي اللي لا حصل منصب وظف طوايفه كلهم وطرد القطري

وصدقوني لو يسون تحقيق راح تحصل لكل واحد صله قرابه



:eek5:


زين والله صار في المقــام الثــاني .. يعنــي فيـه أمل ينتبهـون لـــه


:nice:

[khaldoon]

قدام عيني


لبناني جاي قطر زيارة عائلية اقل من شهر توظف في قطر فاونديشن

وتوه مقدم

اعتقد وأكاد اجزم الخطة

يعني العبه مكشوفه

انا مصدقك تماما لانهم يحبون اللبنانيين

انا قدمت و لا احد افتكر يرد علي... اللي يقول انه الاجنبي واسطته قويه ... و فرصته احسن اتمنى يساعدني بايجاد وظيفه حكومية ... انا اتكلم بجدية على الاخر ما امزح ....و له جزيل الشكر سلفا

[مهرة]

حبيبتي قطر فاونديش مثل ماتفضل البعض للأجانب الشقر الخضر الي شهاداتهم الله بالخير ويجيبووون معاهم اهلهم وعيالهم والاستايت كله وعمدتهم بعد المتقاعد هناك يلاقي شغل عندنا بحلى وظيفة واحلى راتب والنثريات يطرشها حق احفاده >>> هذي حق الأجانب

حق بعض العرب بجوازات احنبية لاعبينها صح ومستفيدين من كل صغيرة وكبيرة كنهم هنوووود واخس ..!

نجي حق القطريين الأكفاء مالهم مكان الا ماندر وبالغلط ..! اما الي عليهم اقواااس مثل هذي (( ؟؟؟؟؟)) هم الي يتوظفوون ويوظفووون عيال عيال جيرانهم ..! والله انه اعرف ناس مشتغلين بالواسطة وشهادتهم ثانوية منازل من العام بس وراتبهم 20 الف وهو توه تدريب مش بيرمننت ..! ولاااااا بعد الحين يشربووون كوفي في هاروودز بحجة ابتعاثهم للجامعة المرموقة الي بتاخذ مستوى ثانوية منازل ..؟؟؟؟؟؟؟؟

والله مابغيت اكدر خاطرج اختي ولا اثبط من معنوياتج بس هذي الحقيقة ..! الله يرزقج بالي اخير منها ان شاءالله

[رهج السنابك]

بما اني مبرمجه وقطريه والله ودي اشتغل هناك يقولون رواتبهم زينه !


ابي اسأل الشغل هناك مريح ؟

تصدقين انا ماهمني الراتب حتى لو يعطوني 4000 ريال راضية؛ حتى لو اشتغل بوظيفة ماتناسب مؤهلاتي هم راضية المهم عندي اكون في مكان يرضي طموحي انا احب المجال التعليمي وهالمؤسسة رائدة في مجال التعليم؛

هالمكان بالنسبة لي حلم حلـــــــــم جميل اتمنى يتحقق :(

بس ماعندي واسطة للاسف

ولا الشهادات ولا المؤهلات تشفع لاحد :(

؛

الله كريم دعواتكم

[رهج السنابك]

حبيبتي قطر فاونديش مثل ماتفضل البعض للأجانب الشقر الخضر الي شهاداتهم الله بالخير ويجيبووون معاهم اهلهم وعيالهم والاستايت كله وعمدتهم بعد المتقاعد هناك يلاقي شغل عندنا بحلى وظيفة واحلى راتب والنثريات يطرشها حق احفاده >>> هذي حق الأجانب

حق بعض العرب بجوازات احنبية لاعبينها صح ومستفيدين من كل صغيرة وكبيرة كنهم هنوووود واخس ..!

نجي حق القطريين الأكفاء مالهم مكان الا ماندر وبالغلط ..! اما الي عليهم اقواااس مثل هذي (( ؟؟؟؟؟)) هم الي يتوظفوون ويوظفووون عيال عيال جيرانهم ..! والله انه اعرف ناس مشتغلين بالواسطة وشهادتهم ثانوية منازل من العام بس وراتبهم 20 الف وهو توه تدريب مش بيرمننت ..! ولاااااا بعد الحين يشربووون كوفي في هاروودز بحجة ابتعاثهم للجامعة المرموقة الي بتاخذ مستوى ثانوية منازل ..؟؟؟؟؟؟؟؟

والله مابغيت اكدر خاطرج اختي ولا اثبط من معنوياتج بس هذي الحقيقة ..! الله يرزقج بالي اخير منها ان شاءالله


والله ان كلامج قمة في الاحباط :(

انا مابي الراتب راضية اشتغل ببلاش ( تطوع) بس المهم اني احقق حلمي واكسب الخبرة والمعلومات الي ابيها واشتغل في مجال احبه

الحب بالنسبة لي يعني ابداع

ابي اطلع مواهبي وابداعاتي في مجال احبه

[رهج السنابك]

انا مصدقك تماما لانهم يحبون اللبنانيين

انا قدمت و لا احد افتكر يرد علي... اللي يقول انه الاجنبي واسطته قويه ... و فرصته احسن اتمنى يساعدني بايجاد وظيفه حكومية ... انا اتكلم بجدية على الاخر ما امزح ....و له جزيل الشكر سلفا

كيف قدمت؟ مجرد اوراق وخلاص؟ ماتعرف حد هناك؟ مافي واسطة خلاص انسى :(

؛

الله كريم

؛

[khaldoon]

كيف قدمت؟ مجرد اوراق وخلاص؟ ماتعرف حد هناك؟ مافي واسطة خلاص انسى :(

؛

الله كريم

؛

مثل ما قلتي ما اعرف احد هناك.. حطيت السي-في على الكاونتر عند السيكوريتي و ما احد رد......اللي يزعلني و يحز بنفسي انه اللي يجي امس على الدوحة يتوظف بأحسن الوظايف مهما كان دينه و الا جنسيته و الا مؤهلاته و انا اللي طول عمري بالبلد مب محصل شغل بالحكومة

[رهج السنابك]

جربت تروح للاماكن اللي تناسب تخصصك؟ على حد علمي انت مهندس ومجالك في المعماري

في شركات تابعه لقطر فاونديشن مثل مشيرب العقارية مكانها في برج الترناندو جربت عندهم؟

لان يمكن قطر فاونديشن كادارة مايحتاجون تخصصك

؛

الله يكتب لك ولي وظيفة تحقق طموحاتنا :(

[Abdulla Al.F]

جربت تروح للاماكن اللي تناسب تخصصك؟ على حد علمي انت مهندس ومجالك في المعماري

في شركات تابعه لقطر فاونديشن مثل مشيرب العقارية مكانها في برج الترناندو جربت عندهم؟

لان يمكن قطر فاونديشن كادارة مايحتاجون تخصصك

؛

الله يكتب لك ولي وظيفة تحقق طموحاتنا :(

مبتعث من قطر فاوديشن كمهندس معاري، يحتاجون مهندسين مثل المعماريه و المدنيه و الحاسب و مكذا تخصص.

[رهج السنابك]

سمعت ان في "قطريين" فنشوا من "الجزيره للاطفال" والسبب ان الجزيره قامت بتخفيض رواتبهم الاساسيه؟؟؟
ممكن حد يأكد هالمعلومه؟؟
مع العلم ان الجزيره للاطفال تابعه لقطر فاونديشن..

اللي اعرفه الناس تتذابح على الجزيرة للاطفال :) ماسمعت حد تفنش!


؛

واممممم بس فيه سيطرة لجالية معينه ( التوانسة والمغاربة) فيها سمعت انهم اكثر جالية تشتغل ومحصلة مناصب فيها واقارب :)

[المرسى الأخير]

السلام عليكم

حاسة فيج و بمعاناتج عزيزتي انا مثلج حلم حياتي اتوظف بهالمؤوسة لانها تتوافق مع طموحي و رغبتي بمنفعة المجتمع و صدقيني لازم تحاولين اكثر من مرة و بكل المراكز الي تبغين تشتغلين فيها مباشرة

الحمدلله بعد محاولات حثيثة قدرت اتوظف عندهم

و التدريب على حسب الخطة ممكن تكون الفترة 3 او 6 شهور و ممكن تكون سنتين على حسب الوظيفة الي بيتثبت عليها

و الرواتب تقريبا مثل قانون الموارد البشرية الفرق بالعلاوات الحكومة عندهم اكثر و الكيو اف عندهم الاساسي افضل بس صج الموظفات القطريات هم المظلومين بالعلاوات مقارنة بمثيلاتهم بأماكن ثانية

و بالنسبة لتشجيع القطريين او محاربتهم و من هالكلام يعتمد عالمركز او القسم الي انتي فيه

و المحاربة و التشجيع تسير من المسؤولين القطريين و غير القطريين على حد سواء



الله يوفقج الغالية و تحققين احلامج :)

[رهج السنابك]

؛

عطيتيني دفعة أمل

حلو ان اصرارج بالاخير خلاج توصلين الحمدلله علميني التكتيكات ههههه

اهم شي ماندمتي ومبسوطة الحين بالعمل وياهم

الله يوفقج ويارب يكتب لنا نصيب

انا تجاربي معاهم لغاية الان بس من خلال موقعهم والوظايف المعروضة ماجربت اروح لهم بس شكلهم مايفتحون الموقع :( ؛ كلش مافي رد مع انها مؤسسة يفترض انها عالية الاحترافية ويهتمون بموقعهم ويتابعونه

[المرسى الأخير]

؛

عطيتيني دفعة أمل

حلو ان اصرارج بالاخير خلاج توصلين الحمدلله علميني التكتيكات ههههه

اهم شي ماندمتي ومبسوطة الحين بالعمل وياهم

الله يوفقج ويارب يكتب لنا نصيب

انا تجاربي معاهم لغاية الان بس من خلال موقعهم والوظايف المعروضة ماجربت اروح لهم بس شكلهم مايفتحون الموقع :( ؛ كلش مافي رد مع انها مؤسسة يفترض انها عالية الاحترافية ويهتمون بموقعهم ويتابعونه

شوفي هي مؤوسسة كبيرة فيها الادارة نفسها و فيها مراكز تابعة لها بعضها لها أقسام موارد بشرية و توظيف خاصة و بعضها التوظيف يكون من خلال الموارد البشرية في الادارة الام

تصيدينهم في المعرض المهني و الايام المفتوحة الي يسوونها بالمدينة التعليمية و باقي الجامعات فالدولة

مهم تعرفين من المسؤول فالمكان الي حابة تشتغلين فيه و مهم تعرفين قبل كيف تتكلمين عن مؤهلاتج و خبرتج
*الوظايف الي فالموقع هذي تكون من اقسام مختلفة و على حسب الطلب يسوون مقابلة

خلج متفائلة و ان شالله الله بيرزقج الافضل

[رهج السنابك]

؛ ً



يعطيجً الف عافيه اختي المرسى الاخير على الاضافات المفيده في الموضوع

وياليت لوًعندج اضافات بعد تفيدينا فيها

مثلا سمعنا عن واحة العلوم والسدرة انها افضل مكانين تابعين لهم من نواحي وايد هل صحيح هالكلام؟

ومشكوووووره وايد اختي الغاليه ع اثراء الموضوع

[المرسى الأخير]

؛ ً



يعطيجً الف عافيه اختي المرسى الاخير على الاضافات المفيده في الموضوع

وياليت لوًعندج اضافات بعد تفيدينا فيها

مثلا سمعنا عن واحة العلوم والسدرة انها افضل مكانين تابعين لهم من نواحي وايد هل صحيح هالكلام؟

ومشكوووووره وايد اختي الغاليه ع اثراء الموضوع


الله يعافيج الغالية :)

اذا قصدج افضل من ناحية رواتب يمكن السدرة افضل بحكم ان لهم سلم رواتب مختلف و قسم موارد بشرية خاص فيهم و واحة العلوم تابعين لسلم رواتب الكيو أف لأنهم غير مستقلين إداريا عنها مثل السدرة

بس من ناحية بيئة عمل و أوقات دوام و راحة نفسية ما أسمع وايد يمدحون فيهم

بشكل عام المراكز المستقلة إداريا عن المؤسسة رواتبها تكون مختلفة و دواماتها و إجازاتها تختلف مثل افرع الجامعات بالمدينة التعليمية

يعني لازم تشوفين ايش الجهات الي حابة تتوظفين فيها و تتواصلين معاهم اكثر من مرة

و أي استفسار أنا جاهزه :shy: