العلاج في تايلند... استفسار

[شسالفة...؟]

بسم الله الرحمن الرحيم

أخواني الكرام...

عندي الوالدة تعاني من مشاكل في العامود الفقري والأخوان في حمد الطبية مقررين عليها عملية وإحنا الصراحة مش متطمنين من تشخصيهم وخصوصاً انها مسوية عملية في العامود الفقري في لندن من 19 سنة تقريبا وهالعملية الثاني مب بسيطة لذلك قررت أوديها تايلند وحبيت استشيركم من واقع خبراتكم.

أولاً ايش الأفضل للعامود الفقري المستشفى الأمريكي ولا المستشفى الملكي؟

ثانياً هل احتاج إلى حجز مسبق أم أدش عليهم بالمستشفى مباشرة وهم بيدخلونا؟

ثالثا ايش احسن فندق عائلي (مافيه خرابيط) ويكون جنب المستشفى؟

رابعاً هل تنصحوني بالشركات السياحية اللي هناك عشان يخلصون كل شي ولا السالفة ما تحتاج؟

خامساً هل تعتقدون ان فترة اسبوع كافية لعمل فحوصات كاملة ؟


جزاكم الله خير مقدماً ولا تبخلون علينا بالنصيحة والدعاء للوالدة

[بونووف]

اخوي مادري بالظبط اي مستشفى يالملكي ولا الامريكي منه وفيه فندق على كلام واحد من الشباب ..!!

ولله يشفيها يارب وتقوم بالسلامه

[سارا البدر]

المستشفى الملكي ويسمونه بانكوك هوسبيتل وووايد زين

ومايحتاج تحجز قبل تروح لهم على طول وعندهم مترجم لو تبي ويسوون لك كل الفحوصات اللي تحتاجها سواء نفس اليوم او اللي بعده

وفي فندق قريب للمستشفى انا ناسيه اسمه بالضبط بس هم راح يدلونك عليه وفي شقق سكنيه قريبه بعد اسمها ( دار زايد ) وفيها مواصلات مجانيه للفندق اذا تبي

وفترة اسبوع لعمل فحوصات على حسب الحاله احيانا تكفي واحيانا تحتاج تقريبا اسبوعين


ماتشوفون شر

[زمان الصمت]

وعليكم السلام ورحمة الله وبركاته

اخوي اولا الله يشافي الوالده ثانيا العمليه بسيطه جدا وماتحتاج كل هالأستفسارات عندي فوق 8 حالات نفسة

حالة والدتك وكلهم من الاهل والاقارب ورحت معاهم اولا انصح وبقوه بالامريكي تروح هناك الطابق العاشر

كلهم يتكلمون عربي فيه موظفه اسمها فوزيه وموظف اسمه سرايفو انصح بالتعامل معاهم اشرح

لهم الحاله وبنفس الوقت بيعملون لك تحويل وموعد مع لالدكتور المختص وانصح بدكتور اسمه بيسان

بروفسور مخ واعصاب وغالبا ماتكون حالات العمود الفقري والمفاصل مرتبطة بطب المخ والاعصاب بيشوفكم

وبيعمل لها اشعه وبيشوف اذا العلاج عنده ويخصه بيسنعكم واذا لا بيحولك بالتقرسير المفصل علي الدكتور المختص

وميزتهم اخر شي يفكرون فيه العمليه بيعملون لها علاج طبيعي وعقب بيشوفون الحاله

اذا على حسابك كل الي ذكرته مع الاشعه والالترا ساوند وام اري والدكتور كله مايكلف 2500 ريال

ولو حولوكم علاج طبيعي الجلسه ماتتعدا 150 ريال ولو لا قدر الله تعمقتو في العلاج والمصاريف روح المكتب الطبي وبيرتبون لك علاج عليهم كمواطن الجماعه مايقصرون

وبالنسبه للسكن عندك شقق شامه 5 نجوم وممتازه جنب الماريوت انصح فيها للعائلات بقوه

مافيها خرابيط ومافيها الا عائلات الغرفتين وصاله حدود 700 ريال او اقل بعد

في تايلاند انصح بالشقق وهي قريبه من المستشفى وحواليك شارع العرب والمطاعم العربيه والصرافين

وشرايح التلفون وكل حاجه تبيها والله يوفقك

[زمان الصمت]

السفريات الي عندها اسعر ممتازه وتعاملت معاها الرحله القطرية شارع الخليج مقابل الرحله السعيده والديره

ولالاخوان بيبفيدونك لو جربو حد ثاني

[الدوسري قطر]

اخوي انا بنصحك من واقع تجربه لنفس الحاله كانت عندي مشكلة في العمود الفقري بسبب حادث وفالدوحة قالولي الفقرات متحركه وتحتاج علاج طبيعي وسوالف كثيرة بس ما استفدت منهم

رحت تايلاند للمستشفى الامريكي مقابل شارع العرب مسافة دقيقتين مشي منه وسكنت في جي دبل يوم ماريوت وهو فندق عائلي وراقي وهادي ومافيه اي نوع من الخرابيط نهائيا ويبعد عن شارع العرب مسافة دقيقتين مشي
يعني تطلع من الفندق لين المستشفى مشي خمس دقايق اما اذا بتروح بسيارة بتتاخر يمكن ثلث ساعة لان شوارعهم زحمه ويطلع من فوق لي فوق

اول ما وصلت في نفس اليوم رحت فتحت ملف عندهم واخذت موعد للفحص الشامل ولفحص ظهري ثاني يوم على طول من فتح الملف

ثاني يوم رحت سويت الجيك اب كامل وطلعت النتايج اليوم اللي بعده ما تاخرت كلش ويوم رحت استلمها دخلت على الدكتور بوجود مترجم شرح لي كل النتايج وما كلفتني الف ريال

اما بالنسبة لظهري دخلت عالدكتور وشرحت له الحاله وعلى طول طرشني اسوي اشعه لظهري خلصت من الاشعه رحت للدكتور الا الصور واصلته عالكمبيوتر قبلي ههههههههه التطور عندهم ماعليه كلام

في نفس الوقت شاف ظهري وعرف مناطق الالم بالظبط وشرح لي نوع الالم اللي احس فيه ومتى احس به وكان نفس كلامه صح 100% وقالي الفقرات مافيها شي سليمه انت بس العضلات كلها فيها شد قوي عليك بالسباحة ووصف لي حبوب سبحان الله في نفس الاسبوع فج الالم كله بعد معاناة تقريبا سنة
علاج ظهري مع الاشعه والكشف ماكلفني 300 ريال قطري


هذا اسم المستشفى bumrungrad Hospital ابحث عنه في النت


أولاً ايش الأفضل للعامود الفقري المستشفى الأمريكي ولا المستشفى الملكي؟
عن واقع تجربة اشوف الامريكي افضل لان في نفس الوقت ربعنا راحو للملكي وتاخرت نتايجهم وما عجبتهم المعاملة

ثانياً هل احتاج إلى حجز مسبق أم أدش عليهم بالمستشفى مباشرة وهم بيدخلونا؟
طبعا مثل ماذكرت تفتح الملف وتاخذ موعد ثاني يوم تدخل على الدكتور باذن الله

ثالثا ايش احسن فندق عائلي (مافيه خرابيط) ويكون جنب المستشفى؟
جي دبل يو ماريوت

رابعاً هل تنصحوني بالشركات السياحية اللي هناك عشان يخلصون كل شي ولا السالفة ما تحتاج؟
ما تحتاج اي شركة سياحية او مترجم وان الله لا يقول احتجت ترا مدير الفندق اردني والموظفين بعضهم عرب و لاصق في الفندق مجمع صغير فيه سوبرماركت ومطعم لبناني ومحلات صغيره وفرع من سفريات الديرة القطرية وهي تنظم وتساعد في الامور السياحية تقدر توصل للمجمع من الفندق من الدور الثاني في ممر يربط بينهم

خامساً هل تعتقدون ان فترة اسبوع كافية لعمل فحوصات كاملة ؟
اي نعم انا اشوفها كافية اذا استغليت الفرصة من اول يوم , لو انك رحت على طيارة الليل بتوصل عندهم الضحى تريح شوي وتقدر تروح تفتح الملف وتاخذ مواعيد وتحتاج الجواز او البطاقة الشخصية


وان شاء الله ماعليها شر الوالده وباذن الله تطمنا عليها وتروحون وترجعون بالسلامة
اي خدمه ماعليك الا تستفسر على الخاص وبرد عليك وان شاء الله تكون المعلومات وافية
وان احتجت ارقام محلات شركات مطاعم عناوين سائقين ترا عندي كروت كل الي تعاملت معاهم

[Rashid554]

انا عن نفسي جربت الاثنين ولكن عمليتي سويتها في الملكي
الفحوصات سويتها في الأمريكي وعطاني خيار واحد لنوع العمليه
وقبل موعد عمليتي بيوم رحت الملكي وعطاني تشخيص مختلف وخيرني بين عملتين
والحمدالله سويتها وحطوني في طابق كله قطريين عاد مادري هو بالصدفه كله قطريين أو هم مخصصينه للقطريين لأن الطابق الي تحننا كلهم اماراتيين
والحين الحمدالله أحسن ومازلت في مرحله الاستشفاء
وسلامة الوالده ان شاءالله

[شسالفة...؟]

جزاكم الله خير جميعاً وبيض الله وجيهكم ولا أراكم الله مكروها في احد تحبونه

[الدوسري قطر]

وجهك ابيض يا الشيخ

اجمعين يارب *

[alsndbad-q8]

ماتشوفون شر ياخوي.

[المسعف]

في واحد عراقي عندة مكتب صغير روحلة وبضبطلك كل شي المكتب بيكون بالقرب من فندق قريس في نان اشتيشن (شارع العرب) واذا لقيت رقمة بكتبة لك في الموضوع
الله يشفيها وخليها لكم

[بوخالد911]

ما تشوفون شر


كنا هناك من 3 سنوات لعلاج الوالد الله يرحمه

شووف توقيعي نزلت تقرير عنه

والله يسهل عليكم

[العقل الحر]

افضل مستشفى للعظام في تايلاند هو ويشتاني وليس بانكوك او الامريكي

وهو الاغلى بينهم

وكذلك يوجد مستشفى تجميل الذي يعمل به الممثلين والمشاهير حول العالم ولا يحضرني اسمه حاليا واذا حبيت تعرفه ارسل لي رساله واطلعه لك

اما مستشفى بانكوك هو الافضل من ناحية القلب والسرطان وخاصه القلب على المستوى الدولي

وجميعهم على مستوى عالي جدا من التطور

اما العظام والتجميل فاكيد ليس مستشفى بانكوك او الامريكي مستشفيات اخرى في تايلاند

[Abdullah_89]

ماتشوف شر الوالده ويارب تقوم بالسلامه


المستشفى الملكي افضل من الامريكي عن تجربه شخصيه

الامريكي صاير مادي جدا


توكل على الله المستشفى الملكي وان شاء الله الوالده ماعليها شر

[Melamode]

اسال الله ان يشفي والدتك من كل شر