((((( أكتشف عجائب وارقام طريق الاحلام ))))).... 22 فبراير

[بومتعب]

هل تعلم ....

- هل تعلم أن طريق الحرير (22 فبراير) يحتوي على 31 مدخل ومخرج في كلا الجانبين.

- هل تعلم أن الطريق المؤدي من جسر الشمال الى دوار التضامن يحوي فقط على 17 مدخل ومخرج، وفي المقابل هناك 14 مدخل ومخرج على الطريق المقابل له.

- هل تعلم أن معدل مخارج ومداخل طريق 22 فبراير هي مدخل ومخرج واحد تقريبا لكل كيلو.

- هل تعلم أن حادث وحد على طريق 22 فبراير يتسبب في شلل كامل يصيب الطريق بأكمله.

[مساهم الشبكه]

دوووم يذكرني هالشارع بخط سيلين القديم

[بوحمد111]

حقائق واقعية ولكن ما باليد حيله والقادم اصعب وامر

[مشاكل]

- هل تعلم انه مالا يقل عن 30 حادث على هالخط بشكل يومي
- هل تعلم ان اكثر من 70% من الموظفين يتأخرون عن دواماتهم والسبه هالخط
- هل تعلم ان هذا الخط اصبح اخطر من الزقاير حيث اكتشف علماء الذرة انه احد اهم اسباب امراض الضغط والسكر والشرايين والتشنجات العصبية

[كبير المتداولين]

هل تعلم ان اليوم الزحمه واقفه عند جسر الخريطيات

هل تعلم ان انشاء دور ثاني للخط الحل الوحيد لتفادي المشكله

[يوسف0]

لا تلومهم التجربة الاولى الي يسوون فيها شارع على قولتهم هاي واي
خذت منهم سنين طويلة ايحطون الشارع لا عقبها ايشيلونه بالكامل ويسوونه مرة ثانية!
عشان البعض يعبي مخباته ومخابي اهله وجيرانه تدري المراقب غشيم
الله يستر من القادم

[بن غيث]

وبعد .. هل تعلم ان تكلفة انشائه تجاوزت المليار ريال قطري
هذه التكلفة الي اندفعت بعد هبوط الشارع بعد افتتاحه باشهر قليلة

[Aaziz]

موضوع و حقائق و ارقام مذهلة ....

[boamir]

هل تعلم أنه إذا حصل حادث حتى ولو بسيط جدا
يصيب شارع 22 فبراير بشلل كامل حتى من الجهة المقابله

[لـبـيـه]

هل تعلم انه الشارع هذا مسوينه ليخدم البلد 20 سنه قدام تقريبا يعني

نغني يالليل مطولك

[khalid Qtr]

هذا الشارع المفروض يكون 5 مسارات في كل اتجاه اضافة الى مداخل ومخارج كبيرة ..

ولكن ..!

[mr.hamouda]

- هل تعلم انه مالا يقل عن 30 حادث على هالخط بشكل يومي
- هل تعلم ان اكثر من 70% من الموظفين يتأخرون عن دواماتهم والسبه هالخط
- هل تعلم ان هذا الخط اصبح اخطر من الزقاير حيث اكتشف علماء الذرة انه احد اهم اسباب امراض الضغط والسكر والشرايين والتشنجات العصبية

فعلا ههههههههههههههههههههههههههه

[برويقن]

لازم بوشعر اصفر وعيون زرق يتعرض لحادث خشن في طريق22 فبراير

عشان يتحركون الجهات ويعدلون الطريق بسرعه

[BUHASSEN]

لو يشلونه ويرجعون الخط القديم ابرك الله يرحم دوار الجوازات تكفي تعال

[حلم الطفولة]

الله المستعان

:anger1:

إن كنت لا تدري فتلك مصيبة ****** وان كنت تدري فالمصيبة أعظمُ

[BoAof]

هل تعلم انه كلكم بتتكلمون ولا احد بيسمعكم لان الطيور طارت الفلوس في مخابيها

[BoAof]

وهل تعلم بدال الجبال اللي حزرت عند دوار جسر الشمال لو يهدمونها ويسوون طريق فرعي اللي يبي ياخذ الدوار يمين انحلت زحمه دوار الشمال

[moh5773]

هل تعلم ان كل شوراعنا تخطيطها غبي ؟ :)

[FCB 123]

هل تعلم بأني طالع اليوم الصبح الساعة 6.10 من البيت ( الوكرة ) .. وصلت الشغل في قطر فونديشن الساعة 8 لو راكب طيارة ورايح دبي وصلت قبل هاي الوقت هههههههههههه

مانقول إلا .. حسبنا الله ونعم الوكيل

[الزعفراني]

هل تعلم أن صور الحوادث في هذا الشارع تصدرت قائمة أكثر الصور تداولا في تويتر :omen2:

[بن موسى]

هل تعلمون بان الحل يكون في تباعد الرادارات وزيادة سرعة الطريق وتوسيع المخارج

لان اغلب السواقين على اتم الاستعداد لارتكاب حادث ولا يدفع راتبة للمرور

[مستثمر111]

هل تعلم ان الوقت الوحيد الي تقدر تسوق السياره على هذا الشارع بعد الساعه ١٢ بالليل

[يوسف0]

هل تعلم ان الوقت الوحيد الي تقدر تسوق السياره على هذا الشارع بعد الساعه ١٢ بالليل

صحيح :)

[عليه العوض]

واين شارع 22 فبرا ير من اين يبداء واين ينتهي وكم طوله وكم عرضه وهل هو مهم لهذه الدرجه وما في طريق غيره

[PGR]

هل تعلم بسبة هالخط بديت اخاالف واتجاوز من اليمين من القهر والزحمة والتاخير

[مزعله النساء]

الله يعين بعد ما تخلص المولات الي على الشارع
الزحمه راح تكون مظاعفه وحتى رجال الشرطه راح يوقفون لتسيير المركبات
للا توزيع صح للمولات ولا تخطيط سليم للشارع والمخارج والجسور داخل البلد

[كبير المتداولين]

واين شارع 22 فبرا ير من اين يبداء واين ينتهي وكم طوله وكم عرضه وهل هو مهم لهذه الدرجه وما في طريق غيره


ما انصحك تعرفه او تتعرف عليه لانه يجيب الضغط والسكر

[بوطويشم]

السلام عليكم

هالمشروع فاشل

التخطيط فاشل

المسؤول فاشل

ذي نهاية البوق

يجب على الدولة ان تتحرك بسرعة عشان ما تكون فاشله!!!!

[bu 3li]

بدال مايهدمون الاسواق والبيوت اللي على اطراف الشارع ويوسعون الشارع ( بما انهم ابتلشوا الحين ) قاعدين يزيدون من هالمولات والمحلات !!!!

ياليت فيه خط بديل او محاذي له مثل خط الخور اللي مخفف اشوي من الازمه على خط الشمال
او على الاقل شارع خارجي ( حتى لو بعيد ) لكنه يكون مخصص للباصات والشاحنات
يمكن وقتها مانشوف زحمه وسيايير يمشون بسرعة ( نص ) كيلو متر

والادهى والامر من هاي كله .. الحوادث ( السخيفه ) اللي تصير واصحاب السيايير يوقفون مثل الاصنام يطالعون السيايير اخرتها شمخ ولا ليت مكسور وناطرين المرور ومسببين زحمه مالها اول ولا تالي !!!

سمعنا عن قانون يخالف اللي مايتحركون ويسببون ربكه في حركة السير 1500 ريال
لكن مانشوف حد تخالف من قبل ويمكن الاغلبيه مايعرفون الا مخالفة رادار و جوال و حزام في قطر


ماننكر ان المشاريع الزايده فالبلاد سبب تكدس العماله عندنا واللي يعتبرون سبب رئيسي في ازدحام اغلب شوارع البلاد .. لكن عدد السكان يكبر والمشاريع مب خالصه في يوم وليله ليش نسوي شارع على قدنا ونقول هاي بيخدمنا عقب لي راحوا ؟؟!! لهالدرجه ضاربنا القحط والفقر ومب قادرين ندفع عشان نطور بلادنا ؟؟

ماقول غير ( اييه عليج يا دبي وعلى شوارعج وانفاقج والجسور والابراج ) الواحد من كبر الشارع هناك يرتبك مايعرف وين يروح ولا على اي خط يسوق .. واحنا نتهاوش على الخط السريع مع ناس يمشون ببطئ شديد
((( ياخوفي يجي يوم القى واحد نازل يدز السياره بدال مايسوقها عشان مايكون متجاوز السرعه المحدده )))

[sahrleel]

هل تعلم انك كل ما استخدمت شارع 22 والشوارع المشابهة
فانت معرض لامراض ضغط الدم والكوليسترول وامراض القلب والرئة
بالاضاف للموت البطئ بسسب القهر واليأس وانفصام في الشخصية

[PGR]

الحل الوحيد من وجهة نظري المتواضعه بناء جسور فوق الجسور الحاليه للناس اللي تبي تروح خط الشمال ويبتدي الجسر من اشارات التضامن لين خط الشمال باربع مسارات عشان تخف الزحمة على الخط الحالي لانه وايد ناس وانا من ضمنهم كل يوم اروح الشغل ومالي شغله امر على التقاطعات كلها فلو عندي هالجسر بستخدمه عشان على طول اطلع على خط الشمال
http://www.al-madina.com/files/imagecache/node_photo/1009_3.jpg

[عليه العوض]

ما انصحك تعرفه او تتعرف عليه لانه يجيب الضغط والسكر

اسمع عنه بس ما استخدمه كثير لا ني ساكن خارج الدوحه ويمكن يكون الشارع الي يمر مقابل نادي قطر الرياضي وبدايته من دوار الدفاع المدني او اني غلطان نورني بارك الله فيك

[الامير]

هل تعلم انه لي خطط المشروع كان راقد

[أسد الجزيرة]

اقتراحي يسون شارع جديد بس للهنود و شرط انه بتخف الزحمة في الدوحة

[فااارس قطر]

اه يالامارات

[المبرمج صلاح]

اسمع عنه بس ما استخدمه كثير لا ني ساكن خارج الدوحه ويمكن يكون الشارع الي يمر مقابل نادي قطر الرياضي وبدايته من دوار الدفاع المدني او اني غلطان نورني بارك الله فيك

شارع 22 فبراير يبدا من اشارة التضامن وانتا قادم من المطار متجه الي الشمال والخور وتمر في طريقك علي نفق المدماك وجسر الجوازات والاند مارك وجسر الشمال والخ :secret: المشكله كلها تكمن بين اشارة التضمان او دوار العبيدلي وجسر الشمال



هل تعلم بان هذه المسافة يوميا 6-8 صباحا ومن 5-8 مساءا يكون قلب الطريق ميتا ومتوقف عن العمل والسيارات تكون متوقفة تماما طول هذه المسافة

[الجوكر90]

السلام عليكم
ياجماعه لازم نعرف الفرق بين قطر ودبي
احنا عندنا الارضيه حجريه ودبي رمليه
يعني هم يسون الشارع فسنه واحنا نحتاج سنتين
لان الارضيه صلبه من قلب
انا مادافع عن الي خطط هالمشروع لان يبين تفكيره محدود وع قده

وبخصوص الحوادث ابسط شي يخالفون الي يدعم او الغلطان ٣٠٠٠
ادري وايد بس هاي من غباءه احنا نتاخر لازم شي يردعهم لان تحصل الموتر لاصقه بعض مجرد واحد يدوس بريك مفاجئ تحصل ٣ دشوا فبعض
واتمنى ان الدوريات متوزعه بدرجات كل ٢ او ٣ كيلو عشان يوصلون بسرعه ويمشون السيد
وبالتوفيق

[meandme]

فعلا شي يقهر....شوارع جنيف بسويسرا جدا صغيرة وعندهم سياحة وكثافة عالية من السكان...لكن ماتشوف ازمة بسبب التخطيط الرائع عندهم...برأيي نظام الإشارات نظام فاشل ...بعد كل هل تعب وسنين الانتظار دوار الشمال وتقاطع اللاند مارك والتضامن والمول عليها اشارات سخيفة...لوكل التقاطعات تكون مثل دوار الجوازات جسر من صوب ونفق من الصوب الثاني ودوار للي يبي يروح يسار فقط....ومسرب للي يبي يروح يمين ومسرب لليوتيرن...كان انحلت كل الأزمه...واذا الجسر ياخذ وقت يسوو نفقين فوق بعض مثل الدول المجاورة ...النفقين اللي فوق بعض في الأردن وفوقهم دوار ياخذون 3 شهور فقط!!!

[sahrleel]

هل تعلم ان شارع 22 فبراير استغرق انجازه 7 سنوات بعد تغيير المقاول اكثر من مرة
اعتقد ان 7 سنوات في دول ثانية ينجزون فيها مدينة كاملة بابراج وعمارات وشوارع وجسور معلقة وانفاق و...

[احلام الدوحة]

هل تعلم ان الاشارات فيها محسوبية بعد اللي يبغي يكمل خطه الاشارة تخليه على راحته بس اللي يبغي يروح اليسار ينذل وابسط مثال اشارة المول اللي متجه صوب اللولو وقت الاشارة مفتوح وعادي توصل اكثر من دقيقة بس تعال شوف اللي يبغي يروح جهة اليسار مايمديه يتحرك الا الاشارة صارت حمرة والمشكلة خط 22 فبراير بعض الحوادث تكون بسيطة بس كل واحد راكب راسه ومايبغي يتحرك