سؤال لك ايها القطري والمقيم !!!

[PGR]

السلام عليكم ,,, سؤالي للقطري والمقيم ,,, هل انت من الناس اللي ترمي المخلفات من السياره في الطريق؟

انا اكتب لكم هالموضوع بسبب كثرة هالظاهره سواء من القطريين او الاجانب واكثر شي يقهرني لما اشوف القطري يسوي هالشي ,, ليش؟ هل لو هو بيتك بترمي وبتوصخ بيتك ؟ وبعدين وين دور البلدية وقانونهم المخالفه بقيمة 10 الاف ريال ليش ما يفعلون هالقانون ؟ هذا غير ظاهرة البصق في الشوارع من قبل الجنسيات المعروفه ,, ارجوا انه يكون في حل سريع لهالشي

اخوكم/ بومحمد

[chillis]

كل شي يهون الا لما واحد يفر سيجارته وانت وراه قمه الخطوره ولا واقف عند الاشاره يفتح الباب ويتفل وانت بكرامه فعلا هذولي يحتاجون مخالفات قويه حتى ما يكررونها

[حسن]

الله مكثر هل الاشكال وفي ازدياد للاسف وانا اعتبرها وقاحه وقل تربيه

[السكين]

يمكن ما يمرّ عليّ يوم من دون ما يستفزني شخص بهالحركة خاصة الاسيويين ، وكل مرة اوضح لهم الخطأ مرة بعصبية ومرة بالذوق حسب قوة الموقف والمزاج .

الله يعينهم على نفسهم ..

الاجابة على سؤالك : مليون بالمية لا ، سواءاً في قطر ولا بره قطر ولا أي بلد .

[تاجر كشخة]

يا كثرهم عند مطاعم الكرك سيارة كشخة والرجال طول وشنب يفتح الدريشة ويقط الوسخ مثل العنز تاكل وتوسخ مكانها

[alnoida]

لا - العلم في الصغر كالنقش في الحجر

[الـقـاسـي]

والله انا كنت اسويها من زماااان لكن الحمد لله الحين احاسب كثير جدا جدا

[اوف ليميت]

يا كثرهم عند مطاعم الكرك سيارة كشخة والرجال طول وشنب يفتح الدريشة ويقط الوسخ مثل العنز تاكل وتوسخ مكانها

1- الشباب عند محلات الكرك..اغلبيتهم (اذا مش كلهم) مايقطون شي من الدريشه..يفتحون الباب ترى ويقطونه دام واقف
وحتى بالنسبه للكرك..لو مليان (بيفتح الباب وبيكت منه شوي) مابيقدر يكت منه شوي من الدريشه عشان لايوصخ السياره
واذا فاضي تقريبا بعد ياخليه داخل عنده يا يفتح بعد الباب..مش الدريشه لان ممكن في شوية كرك وبيطير عالموتر

2- الكثير منهم يمشي لاقرب مكان فيه زباله او مافيه حد ويقط لوصاخه والسبب مش قلة ادب منهم .. فقط لان المكان للمهملات وتلاقيها يا فل..ياوصخه ولاتقدر تمشي 3 امتار يمها لا مشي..ولا بالسياره ماتدري فيه مسامير وللا شي..وانت تقول سياره كشخه..بدش فيها يعني؟

3- كل محل من محلات الكرك لو بتلاحظ..كفيل بأنه ينظف ماحول محله ... ويشيل اللي يشيله...هذا غير عمال النظاقه التابعين للبلديه..بس خلهم على جنب..اللي يشتغلون بالمحل هم نفسهم من مهاهم ومأمورين انهم ينظفون ما حولهم وامامهم
لان في تعليمات تجبرهم على هالشي او بيتخالفون

4- نفس الشخص اللي تشوفه يقط شي يم محل من هالمحلات..بتلاقيه في مكان ثاني عام نظيف وراقي مايقط فيه شي..ولا بعد يحطه في جيبه
ليش؟
لانه احترم ماقدموه له فالمكان النظيف
وحافظ عليه
وحس على دمه

بعكس البعض..كل ماطب مكان رمى وصاخته فيه

والحمدلله..كثروا نوعية الشباب هاليومين اللي يدور على قمامه ويمر من جنبها ويقط فيها ويحرك
وفي نوعيه اخرى تشوف الشاي فموتره وحاط فيه كلينكس وتسأله قطه يقول لا..خليته هني وبنزله عقب .. مابي اقطه ويقولك عيب
هو يستحي
بس ينسى يقطه ف يمسك نفسه ويجبر روحه يحطه بالسياره لمن يطلع مره ثانيه

تخيل ماشاءالله في نوعيه غريبه عجيبه من الشباب
اذا انت وياه..وتشرب كرك ورميته فالشارع
عادي توقع يهاوشك + محاضره + يهدك ويروح
تعال تسامح منه على هالشي عاد
وصج والله يحليلهم عايشين بينا هههههه
الله يحفظهم

(فقط عشان ننصف الشباب)

:]

[بصمة قطرية]

كل إنسان يمثل نفسه بهالتصرفات
يعني اللي يرمي 100٪
انسان قذر و تعود على الوصاخه
الله يكرمكم ..
النظيف نظيف في كل مكان
خصوصاً في الشارع ..

أتمنى لو بيدي أخالف كل من يرمي المخلفات ..
اكره هالشي و اتنرفز لمايصير قدامي ..

[مونتانا]

يجب ان نفعل القوانين اللي تحمينا وتحافظ على نظافة البلد
قانون النظافة
قانون التدخين في الاماكن العامة
قوانين المرور
وجميع القوانين الا خرى
اذا مافي قانون صارم ورادع ماراح تنحل المشكلة ،لاحد يقولي لازم نصير قدوة و نكلم هالناس اللي ترمي ولاتدخن ولاتخالف
يجب على الحكومة ان تبدأ من جديد من خلال حملة توعوية وراها مباشرة قانون صارم لكل مستهتر من ماكان يكون. في الغرب حطوا القوانين وطبقوها والان عندهم ثقافة احترام القانون.
غير هالشكل ،. مالك الا تشوف هالمناظر و......................

[mr.hamouda]

الحمد لله انا ما ارمي شي من السياره ولا اتفل عند اشاره ولا شي

بس الصراحه إذا بروح الدكان الصوب بيتنا مشي ولا اي مكان بس مشي لازم اتفل من مرتين ل ثلاث مرات وقاعد احاول اوقف والله المستعان

[سهم..]

بارك الله فيك
يقولون من أمن العقوبة أساء الأدب
الحمدلله لا أرمي شي ولا أخلي العيال يرمون شي
الله يصلح الأحوال

[khalid525]

اخبر قلت حق واحد دوم يقط الوسخ وهو يسوق : انت لو في بيتك بتقط الوساخة في بيتك ، قالي ايه انا دايما اقط الزبالة على الارض والخدامة تجي عقب وتنظف ، ككككك حسيت ان هالشخص يبيله علاج خاص مب مخالفة

[عليه العوض]

هذا تخلف كبير انا عن نفسي ما قط رميت شي من السياره حتى اذا شربت شي في السياره ما اقطه اتركه في السياره حتى اروح البيت وارميه في الزباله الي امام البيت او اقر برميل زباله وانا ملاحظ ناس ترمي مخلفات من السياره ومن حرتي اعمل له هرن يمكن يفهم ويستحي على نفسه

[لولو2022]

تاته تاته .. تونا بنتعلم النظافه :tooth:

[نوار قطر]

انا مايقهروني الا الهنود والاسيويين بشكل خاص لين الله يعز القارئ تفلو والله لو ياخذون على هالحركه من كل واحد ريال جان بنكد خير من وراهم !!!!! امي لي شافت هندي سوى هالحركه تزقره وتفشله ،،،،،،لو كل واحد تعود وعود عياله من صغرتهم ان يجمع القراطيس في كيس وينطر للي البيت او يوقف عند اقرب حاويه يقط هالكيس جان ماصار حالنا جذي

[@north_star@]

فعلا وللأسف لا زالت هالعادات السيئة والتصرفات الغير أخلاقية تتكرر بشكل ملحوظ ونتمنى انه القانون يردعهم

[نوار قطر]

تاته تاته .. تونا بنتعلم النظافه :tooth:

اسمحيلي اختي لولو على المداخله بس اخوي بومحمد مايقصد ان تونا نتعلم النظافه وايد ناس قرطاس مايقطونه في بيتهم بس في الشارع سهالات عندهم :discuss:

[زهرة بنفسجية]

اكيييد لا
طبعا تصرف غير حضاري
و يدل علئ تريية الشخص و عدم حبه لوطنه
انا اذا حبيت هالوطن اسعئ دائما لتطويره و تحسينه
بعدين ما يستحي اللي يرمي الوسخ او اكرمكم الله يبصق!!
و الله شي يخجل
و مقزز
.!!!.
انا حاطة كيس بالسيارة نجمع فيه النفايات اكرمكم الله و نرميه باقرب حاويه

اعلم عيالي علئ النظافه مش جوا البيت بس لا كمان برا
و اكيد من شب علئ شيئ شاب عليه

[Ahmed25]

ذاك اليوم و انا فزحمه مواقف الستي عند المدخل ، و الله العظيم بدون مبالغه واحد هندي فتح الباب و تفل على الارض أكثر من 10 مرات !!!

هالنوعيات للاسف ما تتأدب الا بالمخالفات !

[بـن عدوان]

الحمدلله .. انا من النوع حتى الفاين ما احذفه برع

اجمعهم في سيارتي واشوف اقرب زبالة الله يعزكم ..

المفروض تكون عقوبة هالمخالفة قوية لانه تشوه صورة البلاد

[بـن عدوان]

اخبر قلت حق واحد دوم يقط الوسخ وهو يسوق : انت لو في بيتك بتقط الوساخة في بيتك ، قالي ايه انا دايما اقط الزبالة على الارض والخدامة تجي عقب وتنظف ، ككككك حسيت ان هالشخص يبيله علاج خاص مب مخالفة

هههههههههههههههههه

[بـارود]

كل شي يهون الا لما واحد يفر سيجارته وانت وراه قمه الخطوره ولا واقف عند الاشاره يفتح الباب ويتفل وانت بكرامه فعلا هذولي يحتاجون مخالفات قويه حتى ما يكررونها

بالنسبة لراعي السيجارة

أتم ماشي وراه وأكبسله واحرق عينه عشان ما يسويها مرة ثانية مع غيري :rolleyes2:

أدري في هناك 50 ألف طريقة غيرها

بس هاذي الأحسن :tease:

[PGR]

يعطيكم العافيه الجميع على الردود ,, بالنسبه لمحلات الكرك بعد ماله حق الشخص انه يقط عند المحل بسبب انه الله يعزكم الزباله مليانه ,, انا من النوع اللي اجمع الوصخ في السياره لين ما اوصل البيت افضي كل اللي عندي في الزباله ,

السؤال هني ليش القانون موجود ومايطبق؟؟؟

ارجو سرعة تفعيل القانون عشان الناس يعتبرون ويكون في شي يردعهم

[كازانوفا]

لا ااااا مستحيل اسويهاا الحمدلله البلديه موفره كل شي مقابل ان نحافظ على نظافة البلد

[العنيده]

كل شي يهون الا لما واحد يفر سيجارته وانت وراه قمه الخطوره ولا واقف عند الاشاره يفتح الباب ويتفل وانت بكرامه فعلا هذولي يحتاجون مخالفات قويه حتى ما يكررونها

يقطون السيجاره والسياره تمشي وعادي تطير تاخذ لها لفه وعاد احنا وحظنا ماتضرب السياره :rolleyes2:

ياريت يفعلون قانون المخالفات على هالتصرفات بدل التركيز على مخالفات ثانيه :tease:

[ms-qtr]

للأسف من فتره
جفت سيارة فزعة
واقفة عند معصرة
خذوا طلبهم و بدوا يفلعون القراطيس في الشارع وحركوا !!!!
اذا اصحاب القانون لايلتزمون شتتوقع من باقي المواطنين

[نورالهدى]

للأسف من فتره
جفت سيارة فزعة
واقفة عند معصرة
خذوا طلبهم و بدوا يفلعون القراطيس في الشارع وحركوا !!!!
اذا اصحاب القانون لايلتزمون شتتوقع من باقي المواطنين

:omg:


:weeping:


:secret:

[7llo]

دوم ربعي يسوون هل الحركه لما يركبون معاي اسوي لوك على الدرايش عشان مايتفحون الدريشه ويقطون برع تهاوشت معاهم كذا مره بس مافي فايده

[ضوى]

مستحيل اسوي هالحركة ، واحتقر جدا اللي يسويها لانه يدل على البيئة الوصخة اللي عايش فيها ، عيالي وهم عيالي ازفهم زف اذا يقطون ورقة كلينكس عالكميدونو والا عالارض ويحصلون مرادم ،

لما احد يسوي هالحركة وخاصة لما احد يبصق وهو واقف في السيد او ننتظر الاشارة واكون انا وراه والله اهرن لين يستخف وابيه ينزل لي عشان اقوله انت وقح

[عديـل الـروح]

للأسف من فتره
جفت سيارة فزعة
واقفة عند معصرة
خذوا طلبهم و بدوا يفلعون القراطيس في الشارع وحركوا !!!!
اذا اصحاب القانون لايلتزمون شتتوقع من باقي المواطنين

هم بالاول والاخير :

من عامه الشعب

بغض النظر عن اماكن عملهم ..



وبخصوص اللي يقط سيجارته من السياره وهو ماشي ..

اخذ رقمه اولا ..

ثم اوقفه ..

واذا اعتذر : نسامحه

وبالغالب اغلبهم يعتذرون لانهم يعرفون انهم على على خطأ ..

[ms-qtr]

هم بالاول والاخير :

من عامه الشعب

بغض النظر عن اماكن عملهم ..



وبخصوص اللي يقط سيجارته من السياره وهو ماشي ..

اخذ رقمه اولا ..

ثم اوقفه ..

واذا اعتذر : نسامحه

وبالغالب اغلبهم يعتذرون لانهم يعرفون انهم على على خطأ ..

اخوي هم من عامة الشعب

لكن لازم يحترمون الزي والسيارة الي هم فيها

هؤلاء سواء حسوا او لا فهم قدوة في اتباع القانون

[PGR]

للأسف من فتره
جفت سيارة فزعة
واقفة عند معصرة
خذوا طلبهم و بدوا يفلعون القراطيس في الشارع وحركوا !!!!
اذا اصحاب القانون لايلتزمون شتتوقع من باقي المواطنين

اخوي جان خذت رقم الدورية واتصلت على المرور وبلغتهم عشان يعتبر مره ثانيه

[الحال مايساعد]

لأن ثقافة الشباب محدودة من حيث النظافة كل همه سيارته نظيفة!!
وترى قدام الكرك البلدية ماتخالف راعي السيارة إلا تخالف راعي المحل
عندك مثلا عند الشيراتون تحصل معيننين واحد مخصص للنظافة هذا غير عامل البلدية

[عديـل الـروح]

اخوي هم من عامة الشعب

لكن لازم يحترمون الزي والسيارة الي هم فيها

هؤلاء سواء حسوا او لا فهم قدوة في اتباع القانون


كلامج سليم .. ولا غبار عليه ..

ولكن ليسوا فقط رجال الفزعه من يقومون برمي المخلفات في الشوارع

عندج المعلم

المهندس

التربوي

ورئيس القسم

ومساعد المدير

والمدير

و ...


اكتفي لمسمى الوظيفة / مدير

:secret:


كلهم من عامة الشعب .. ولا من من الالتزام

[عديـل الـروح]

بخصوص كرك االنعيمي اللي صوب اللاند مارك :


من اول الصبح لنهاية الدوام :

وحمله التنظيف مستمره .. واشوفهم والله يكسرون الخاطر ..

في اعتقادي :

اذا ما تم تنظيف المكان لاكثر من نص ساعه :

بتصير كارثه مزبليه رهيبه ..


والله المستعان ..

[حميداني]

اي والله يا بي جي ار ... المشكله لما تفضل نظافتك الشخصيه وموترك وتنتهك بها الناس
مثل اللي ياخذ الزباله الله يعزك علشان ينظف بيته ويقطها قدام بيت جاره

فعلاً فئات جاهله , نوعيه ما تربت
يا ليت يشدون المخالفات على هالاشكال المستهتره بحقوق الغير , لازم يكون لهم حد
ونبغي نشر الثقافه والوعي لهالظاهره المنتشره اللي تعكس صوره قبيحه عنا

[Bo jassim 33]

فعلا اشوف رجال التنظيف في كل مكان واقول في نفسي : لهذه الدرجه حنا وصخين ؟؟
خاصه في ايام الاعياد والمناسبات والاحتفالات الوطنية


اذكر مره اللجنه الاولمبيه نظمت يوم لتنظيف شارع الكورنيش عقب ما صار مزبله بكل ما تحتويه الكلمه بس مادري صار ولا ما صار

[Abdullah_89]

البصق في الشوارع

رمي المخلفات


رمي السيجاره


وفي ناس ماتكمل السندويش اللي طالبيه ويرمونه عالرصيف على اساس ان ماتدوسه سياره يعني ( قمة الجهل والتخلف )


قانون البلديه كلام فاضي ولم يتم تطبيقه

المخلفات من السياره ممكن تنحط المخالفه على رقم السياره


اما البصق في الشوارع كيف يتم مخالفه المشاه خصوصا يوم الجمعه في شارع حمد الكبير وفي منطقة الاسواق ( سوق الجبر )


الله يعين بس