استفسار بخوص عمود الداخلي للفله

[وحش الصناعات]

مرحبا يا اخوان
استفساري ما هو افضل ارتفاع للعمود الدائري في حال كان جاي على شكل عمودين متقابلين المسافه بينهم اربعه ونصف متر او اكثر شوي ويتوسطهم ارج ومع العلم بان ارتفاع السقف الصافي سيكون 4.30 من غير الجبس ومكيفات الدكت سبلت .
*
وماهو الأحسن الآرج من الحديد او من الجبس في مثل الحاله التي ذكرتها.

واتمنى أني وصلت الفكره بشكل صحيح، ولكم جزيل الشكر على كل من يثرينا ويثري المنتدى من افكار وملاحظات لأعمال البناء وغيره. *

[معماري قطري]

يا اخوي إنت لازم حد ينسق لك كل هالأشياء ... التكييف والدكتات وهي الأهم بعدها تجي الأسقف والأقواس .. وهذي لازم يسويها استشاري مختص وبالتنسيق مع التكييف وغيره.

بعض العمال وقليلين الخبره بيحاولون يأثرون عليك بآراء غريبه هم مب متأكدين منها بس بعضهم خصوصاً العربي منهم ما يقول ما اعرف أو باسئل لك، وتحصله يفتي إعملها خرسانه أأوى وأحسن وتتورط انت بعدين ما تحصل مكان تتمرر منه دكتات التكييف.

أربعه متر ولا حتى 10 متر بكل سهولة يسونه من الجبس وبرخيص وايد وحتى مجوف من داخل .. خلص الدكتات أول والتكييف وبعدها سو الجبس، والآرش " القوس " إذا إحتاج تدعيم لكبر المسافة فتدعيمة بحديد تيوبات بسهولة يتم ويترابط حوله الجبس بسهولة.

[وحش الصناعات]

مشكور اخوي معماري ع التوضيح

وكل الي قلته تفاديته وعملت احسابه بس كان قصدي الاستفسار عن ارتفاع العمود فقط وباقي الاشياء عملت حسابها وتوزيع بايبات مكيف الدكت بعيده عن العمود.

وعساك على القوه اخوي. *

[معماري قطري]

الله يقويك الغالي

العفو يا اخوي والله اتذكر موضوعك من زمان وكل اللي وصلت له كان زين ووالله يوفقك

ما ادري بس ما فهمت شتقد بإرتفاع العمود .. طبيعي يكون العمود واصل من الأرض للسقف، وبالنسبة للأقواس المفتوحة شوي تكون أرفع من الباب اوكي يعني كتف القوس يكون في ارتفاع الباب أو أنزل بشوي يعني انت ذكرت إن العمودين بينهم 4.5 متر وفي هالحالة يكون القوس جزء من دائرة كبيرة shallow arch فهمت قصدي؟ يعني ارتفاع كتف أو بداية القوس يكون مثلاً 1.8 متر وارتفاع قمة القوس أو وسطه يكون حسب باقي العمود ومستوى الجبس النازل، وأسهل بوايد وأحلى لو تسويه من جبس بعدين.

[وحش الصناعات]

تسلم اخوي معماري على إثرائك ومعلوماتك الطيبه الي استفدت بها الآن وسابقا.

وصراحه شرحك عين العقل ، وهذا الي ذكرته اخوي هو الي كنت ابيه وجزاك الله خير.

ودمت انت واعضاء المنتدى بكل خير. *