قرار جديد من المجلس الأعلى .. ما أدري وش أقول (قهر)

[العطار قطر]

كالعادة قرارات ما يندرى من وين تطلع وش هدفها ... الله أعلم

المهم القرار هي عدة قرارات ولكن باختصار (بيستانسون عيالكم في المدارس المستقلة) أهمها :

ممنوع إخراج الطلاب لأي رحلة ترفيهية بشتى أنواعها

ما اتلاحظون بعض المدارس مكتوب عليها سجن تايم ؟؟؟ (يعني اعمل رحلة في المدرسة وطلعهم في الملعب الخارجي وخلهم يشوفون المناظر الخلابة ويستمتعون)

وش الهدف من ها القرار ؟؟؟؟

إذا الطالب ما اتطلعه من المدرسة يشوف العالم اتكافأه على جهوده اتوديه رحلة يغير جو شلون تبيه ينتج ؟؟؟؟؟؟؟؟؟؟؟؟؟؟؟؟

كيف تبي الطالب يحب المدرسة لو يكون وجوده فيها مثل السجن ؟؟؟

وفي نفس الكتاب الي وصل أشياء ثانية اتضحك (وش ممكن اتسمي ها القرار الشجاع؟؟؟)

حسبي الله ونعم الوكيل بس

[بصمة قطرية]

يحليلهم عيالي بيتحطمون ..
ينتظرون الرحلات على نار ..
مادري شالهدف من هالقرار ..!!!!

[عاهد بن علي]

يمكن في ازمة تكاسي وباصات

[العطار قطر]

يمكن في ازمة تكاسي وباصات


هههههههه لا في أزمة ولا شي

الباصات الي اتوصل لطلاب اتم في المدرسة مع سواقينها إلى نهاية الدوام

ولكن الي جالس ورا الكرسي ويطلع قرار بها الشكل دليل انه ما يعرف حال المدارس وبعيد عنها كل البعد

[PrivateHeart]

انا مؤيد لهذا القرار
لانا كأولياء امور اصبحنا نخاف على اولادنا من هذه الرحلات من كثر المشاكل والحوادث اللي تصير في الرحلة وعدم وجود حقيقي لتحمل المسؤولية وما ينتج عنه من اهمال
ثانيا الرحلات الان اصبحت ترفيهية بعيدة كل البعد عن المجال التربوي فرفهوا ابنائكم بانفسكم .
ولا تنسو حادثة البنت اللي صابها ارتجاج في الراس من طيحة البطبطة .

*

[مضارب دوسري]

انا اشوفه قرار صائب
لان بصراحه اغلب الرحلات ينتج عنها مشاكل الا طالب ضايع وتعال يا مدرس دور عليه
الا طالب يلع في لعبه خطيره والمسؤوليه تكون عالمدرس اللي معاهم
ف ليش كل هالموضوع قطع الرحلات حل مناسب
واغلب الطلاب اذا جات رحله خلاها اجازه وقعد فالبيت
وبعض اولياء الامور مايبي عياله يروحون مع المدرسه يخاف عليهم
ف ليش كل هالتضخيم
انا اشوفه قرار مناسب جدا
ويختزلون الرحلات انها تكون للمتميزين ال ٥ من كل صف
عشان تخلي الطلاب يشدون حيلهم

[khalid525]

ممكن يبون ينظمون القوانين حق هالرحلات

[بصمة قطرية]

اللي يخاف على عياله يرفض ذهابهم
الذهاب للرحلة مش اجباري
يرسلون ورقة لولي الأمر يوقعها
موافق
أو غير موافق

كم مرة رفضت ان عيالي يروحون رحلات ..!!!

[خالد العمادي]

وانا أشوف القرار صائب وأعتقد الأهالي مب عيزانين يطلعون عيالهم

والرحلات المدرسيه مافيها شي مفيد يعني يودونهم جنغل زون ولا الستي ولا مادري وين يعني شي مب ذو أهميه

يعطيكم العافيه

[نوار قطر]

ليش شفتو ان هالقرار حرمان للطالب من الوناسه الصراحه عقب حريق فيلاجيو صرنا نخاف نودي عيالنا رحلات يمكن المجلس اتخذ هالقرار من باب الحرص على سلامة الطالب واذا على الطلعات مب مقصرين اليهال يطلعون مب محبوسين وناطرين رحلة المدرسة صج انهم يستانسون بس سلامتهم اهم

[Cooki]

في فتره الصيف كنت في تركيا وكل ما اروح مكان سياحي او ترفيهمي اشوف مجموعه من الطلاب
( مره كانوا اطفال 7-9 سنوات في حديقه الحيوانات ) ( ومره كانوا مراهقين في حديقه لمعالم العالم)
و معاهم بعض المدرسين .. ومستحيل انسى وجوه الطلاب والفرحه اللي كانت تقفز من عيونهم وهم يضحكون ويسولفون مع بعض .. سالت السواق عنهم قال لي هذي رحلات صيفيه تنظمها المدارس حق الطلاب .. حتى وهم في اجازه في رحلات وتجمعات وتواصل مستمر مابين المدرسه والطلاب ..

من وجهة نظري الخاصه الرحلات المدرسيه مهمه جداً لتدعيم العمليه التربويه ونجاحها وربط وتوسعه مدارك الطالب..

والمفروض هناك رحلات تعليميه ورحلات ترفيهيه .. مب يلغونها خير شر ..

اكيد بالنسبه للمجلس الاعلى الهروب افضل من المواجهه وتسخير القدرات لتحمل المسؤوليه على اكمل وجه

واللي مايحب عياله يشاركون الله لا يهينه يرفض وكان ىالله غفوراً رحيما...

وقدر الله وماشاء فعل

دمتم بود

[لاجل QT]

ماايد الرحلات عقب سالفة فيلاجيو

نخاف على عيالنا

[روح الاطلس]

وعقب سالفة الغاريه مدري سيلين اللي طاحت بنت من السياره

لا اؤيد الرحلات المدرسيه وكل ولي امر عليه هو بنفسه يطلع عياله ويعلمهم بنفسه كل شي ماشا الله كل واحد عنده وقت يطلع مع ربعه يقدر يدبر وقت لعياله ويوديهم
وللاسف رحلات المدارس كلها خرابيط مجمعات والعاب مب رحلات تثقيفيه

[العطار قطر]

مع احترامي الشديد للآراء ولكن للأسف صار زود الخوف على عيالنا يخلينا نتغافل عن أشياء أخرى مهمة مع انه يقدر الواحد يحط ضوابط للرحلات كأن يكون مع عدد معين من الطلاب مشرف مرافق لهم ووو الخ ....... أما اتكنسل الرحلات الترفيهية خير شر هذا موب حل

أولاً الرحلة مش إجبارية وما يطلع الولد إلا بموافقة ولي أمره ليش تمنع غيرك عشان أنت ماتبي ولدك يطلع ؟؟؟

ثانياً حط نفسك مكان الولد .. لا اتشوف للأمور من نظرتك فقط
الولد يقعد في المدرسة أكثر من سبع ساعات مع الكتب والمدرسين (خبرك لو عرفوا الطلاب انه ما في رحلات بزيد حبهم للمدرسة ؟؟؟؟؟؟)
المدرسة موب تعليم وبس .. اتعبي راسه معلومات وبس .. المدرسة تربية والرحلات الي يطلعونها الطلاب لو في مشرفين تربويين عليها تغرس أشياء كثيرة في نفس الطالب (يسمونها تربية بالمواقف)

وبعدين شايفين الرحلات كل يوم والثاني .... الطالب يمكن ما تطلعله رحلتين بالكثير في الفصل وما يطلع إلا المجتهد حتى اتكون عامل تحفيز لهم

والطالب من ضغط الدراسة يطلع حرته في المدرسين والطلاب الثانيين
وما أحد يحس بالكلام الي أقوله إلا الي يشتغلون في المدارس المستقلة

والغريب في بعض الردود من الأخوة الكرام انهم استشهدوا بحادثة صارت أو ثنتين وتقاضوا عن الكم الهائل من الرحلات اليومية الي يطلعها الطلاب خارج المدارس

عشان حالة يمكن يكون فيها تقصير أمنع كل الرحلات عن كل المدارس ؟؟؟؟؟؟؟؟؟؟؟

نفس منطق (دام طيارة وحدة طاحت ومات فيها 200 واحد كنسل شي اسمه طيارة لأن حياة الناس أهم) هل هذا منطق معقول ؟؟؟ أم هناك حسبة لكل موقف وكل قرار ؟؟؟؟؟؟؟

[مدرسة]

مافي شي

الا منكر جديد من مناكرهم

يحسبون الرحلات هي اللي منزلة مستوى الطلاب في الدولة

يعني يفضون الطلاب بس للدراسة السنة ،،

مادري منهو الذكي اللي طرا له هالطاري ،، بالأحرى منهي الذكية ؟؟؟

[qatara]

ابرك قرار
هم رايحين يدرسون ولا رحلات استجمام
وكل فتره نسمع مصيبه

[mr.hamouda]

اشوفها عادي مافيها شي

[Bo jassim 33]

الله اكبر الله اكبر


اذان المغرب



ما عرفنا لكم


اذا المدرسه طلعةا عيالنا وبناتنا رحلات : قلتوا ما نبي
واحنا جايبينهم يدرسون مب يطلعون رحلات وخرابيط

واذا طلع قرار بمنع الرحلات حسب كلام العضو العطار
قلتوا : ليش ما يطلعونهم
وكأنهم عايشين بسجن
ولازم يترفهون




ارسوا لكم على رأي


زهقتونا من مواضيع المجلس الاعلى


اخاف ادش مجلس احد من الربع احصله مكتوب عليه :

المجلس الاعلى

[ZURICH]

قرار جميل ومناااااسب

عند المشاكل كنا نقول مانبي رحلات وصولات وجولات

واللحين نقول قهر ..

بالعكس الأفضل الواحد ياخذ عياله بنفسه ويمشيهم ويكونون تحت عينه ...

المدرسه للدراسه وتحسين السلوك .. واللعب له وقته

[النهار]

احسن قرار سمعته حتى الان انا مؤيد لهذا القرار مره شفت احد المدارس الخاصه ماخذين الاولاد في رحله داخل احدى المجمعات والمشرفه تراكض من مكان لمكان تدور على اليهال تركض وراء واحد وهاده البقيه جابت واحد اثنين اختفوا عاد هذه حاله احنا مش عيزانين نودي عيالنا ونرفه عنهم

[نتفـه]

انا بعد اؤيد منع الرحلات :)

[cavok]

ولسى ما شفنا شئ بعد

[محاسب]

هذا قرار صائب وشجاع ..............
لكل رحله مدرسيه عــــــــــــــــــــــــــوامل مهمه جداااا
من أهمها عامل الأمن والسلامه ,,,,,,,,,,,,,,,,,,,أخواني وأخواتي الأعضاء
__من أبسط الأمور المهمه هو الباص الأحتياطي للرحله ,,, لوتعرض باص الرحله لحادث أوعطل؟؟
هل هو متوفر ,,,,,,,,,,,,,,,,,,,,,, سلامتكم والي له علاقه في المدارس يتأكد بنفسه
يعني ممكن ينتظرون عيالكم ساعات لحل المشكله؟؟؟
وغيرها من المشاكل ...................
القرار الشجاع والحكــــــــــــــــــــــــــــــيم ,الثاني والأهم منه وكل يوم أنتظره,,,,بتعديل وقت الأنصراف من 1.30 الى 12.45

[العلم]

سبحان الله ...!! ،،،، عجبا لبعض الإخوة


أصبح لدينا تفكير لا أعرف ماذا أطلق عليه ... الآن إذا صارت أي مشكلة في أمر نروح نلغيه ،،،


لماذا لا تكون القرارات في إطار ترشيد الرحلات المدرسية ، وفي زيادة الرقابة على الطلاب في مثل هذه الرحلات ، ويكون هناك آليات تسهم في إنجاح أي رحلة مدرسية من خلال تنويع الرحلات الدرسية وليست مجرد رحلات ترفيهيه .... الخ


يجب أن يكون هناك رحلات للوزارات وللمصانع القطرية وللجامعات ،، مب يتخرج الطالب مايعرف شيء عن بلده ... ولاتكون عنده نظرة شمولية للجهات التي يمكن أن يعمل فيها ،،،،




وفي النهاية أنا من معارضين هذا القرار واعتبره من قرارات المجلس الأعلى المتخلفة المعتادة

[mrs.spoon]

مااعتقد القرار صحيح لانه احنا في مدرستنا الطالبات يروحون رحلات لكذا مكان ، يمكن رحلات ترفيهيه مثل المجمعات لكن بالنسبه للاماكن الثانيه زيارات ميدانيه موجوده ولم يتم الغائها

[مرشد الاخوان]

بالعكس ي شيخ هذا افضل قرار للمجلس الاعلى بعد توحيد الكتب
احنا. مرسلين اعيالنا يتعلمون ولا مرسلينهم للرحلات وهي رحلات تافهه بلا معنى وتعليم .. حتى الرحلات يجب ان تكون مدروسه وذات فائده وقيمه وليست لهو كما هو حاصل.. في الاسبوع الماضي رفض المشرف اداخل ابني المدرسه بحجة التأخير جا مشرف ثاني وقال للطالب وبما ان ولدي معرووف شوي تعال نرووح رحله تطوعيه والساعه. تسع نرجع. و بيدخلونك
وفي اليوم كذالك نفس الحركه وين التعليم يا صاحبي في هالحاله والشي هذا مو جديد بالمدارس على ادنات الشي قالوا رحله ..سلام

[ام ناصر1]

اشوفه قرار صائب جدا ...بشرط أن يكون بدلا عنه يوم مفتوح ...بالانشطة بالمدرسة ...
فيما عدا الاماكن الهادفة كمعرض الكتب وما شابهها ما يصير يهملونه

[العـوا]

قرار صائب

[بريق الحق]

يازين الحكومه سناء وحديقة الحيوانات والمتحف والله ايام

[الأصيلة]

الله يبشركم بالخير ننتظر ها القرار من زمان...
وش فايدة الرحلات الترفيهية غير الحوادث وضياع الوقت
ماشاء الله الأهل مب مقصرين في عيالهم كبار وصغار
طول الاسبوع رحلات...
المفروض يستبدلونها بالرحلات العلمية اللي الأهل مايفكرون يودون عيالهم لها...
متاحف / مصانع / جمعيات خيرية / معاهد/ معارض فنية / مساجد...الخ
أما رحلات لفيلاجيو والبنات يتسرمحون هنا وهناك ..
وإلا لاند مارك أو جنغل زون...
بالعكس القرار صائب ولو إنه متأخر شوي...

[بوخالد911]

رضى الناس غاية لا تدرك

صعب ان يجتمع الناس ع رأي واحد

[مشهور]

قرار صائب وكايد تم دراسة الموضوع أكثر من جانب والله يجيب الي فيه الخير لنا وعيالنا واحفظهم يارب

[وحش قطر]

الله يرحم أيام سميسمه صج كانت رحلات

الله يعطيك الصحه والعافية يا عبدالله بن سعد الكبيسي

[العطار قطر]

احترامي للأخوة المؤيدين
(يوم كنت طالب ما استفدت اي شي من رحلات المدرسة ؟؟؟؟؟؟؟) إذا كان لا .. اتوقع كنت سرحان في الرحلة

صج الي رجله في النار موب نفس الي رجله في الماي

ما حد يعرف تأثير هذي الرحلات على الطلاب إلا من يعمل في المستقلة

احنا نحاج قرارات تنظم هذي الرحلات .. موب إلغاءها (الإلغاء حيلة العاجز) يبي يطلع نفسه ويهرب من تحمل المسؤولية

]ومن يعتقد ان المدرسة للتعليم فقط معلش يسمحلي بالكلمة (مايعرف معنى مدرسة)[/b]

[ضوى]

قرار صائب ، خاصة مع كثرة شكاوي اولياء الامور هنا في المنتدى بالذات من رفضهم لهالرحلات

يستبدلونها برحلات ميدانية لاماكن مفيدة وذات جدوى

[dream~qa]

أولا متى طلع هالقرار وين المصدر ؟؟؟ لين الأسبوع الماضي كان في رحلات

ثانيا : القرار ما طلع من حادثة أو حادثتين فقط أكيد كانت في دراسة للموضوع شافو فيه أصدار هالقرار لصالح الطلاب .

ثالثا : الطلاب ينطرون يوم الرحلة علشان يغيبون واللي ما يدري يطرشون له بالبي بي أن بكرة اجازة .

رابعا : وهو المهم أولياء الأمور سعيدين بهذا القرار إن صح لسلامة أبنائهم .

[القطو السمين]

يمكن علشان مافيه حديقة حيوان وفيلاجيوا احترق لاتوهجون المجلس مع عيالكم انتوا ودوهم

[الزعفراني]

الان مع التطور التقني والعلمي الرحلات اهي اللي تجي للمدرسة يعني ممكن يرتبون في كل مدرسة غرفة او قاعة للنشاط الترفيهي التعليمي .. اذكر مره في الستي مسوين عرض للفضاء والكواكب عبر تصميم مجسم وشاشات وتلبس نظارة وتتخيل نفسك تسبح في الفضاء وانت واقف ع الارض وتتعرف على الكواكب واسماءهم وترتيبهم ... إلخ

انا اتكلم عن جانب الرحلات الترفيهيه العلمية اما الرحلات الترفيهية للعب في جنغل زون مثلا ومادري وين .. فأنا لا أفضل هالشيء أولا لان المسؤولية تغيب عن المشرفين بحكم العدد الكبير للطلاب وعدم قدرتهم على السيطرة عليهم .. وثانيا لان مثل هالرحلات تكون مع الاسرة افضل .

[نورهان88]

الله المستعان

[بوخالد911]

الله يرحم ايام قبل
يا دخان
ولا
فويرط
او
الغارية
او
الزبارة
وبسسسسسسسسسسسس

[بصمة قطرية]

ولدي راح رحلة اليوم
و في رحلات جاية ..!!!

[الشيخة شيوخة]

المجلس االاعلى خربطه مو عارف كوعه من بوووووعه

[أنت]

اذا كان القرار صحيح اشكر راعي القرار بيض الله وجهه

لان في مدرسات اذا راحو الرحله خل كم مدرسه مع اليهال وراحو يتسوقون ويتقهون في المجمع

[*^*محمد*^*]

ليش شفتو ان هالقرار حرمان للطالب من الوناسه الصراحه عقب حريق فيلاجيو صرنا نخاف نودي عيالنا رحلات يمكن المجلس اتخذ هالقرار من باب الحرص على سلامة الطالب واذا على الطلعات مب مقصرين اليهال يطلعون مب محبوسين وناطرين رحلة المدرسة صج انهم يستانسون بس سلامتهم اهم




عين العقل وجواب مقنع أشكرك