من يذكر لي كلمات اندثرت ومعانيها؟

[معماري قطري]

عندنا كلمات كثيرة في اللهجة القطرية إندثرت أو قليلة الإستخدام .. كبداية مثل " جوله أو شوله " من يتذكرها ويعرف معناها؟ متأكد إن الكثيرين ما يذكرونها وكلمات أُخرى كثيرة أترك المجال لكم الكل يعطينا كلمة من اللي يتذكرهم مع نبذة مختصرة عن هذي الكلمة.

[بصمة قطرية]

الجولة :
فرن الطبخ الصغير :nice:
اخبر كانت عندنا وحدة زرقة مدورة :victory:

[(محمد)]

طمبحله

[(محمد)]

دعله..

[بوعلي2]

دثوي

شهست

ماميش

[بوعلي2]

شحقه هلون

هدالله تالي

[بوعلي2]

غرتالله عليك. --> الظاهر متعقد من طفولته

[بوعلي2]

الدجه

قاعد ف العاير

هوري

[بوعلي2]

غنااااااااتيه

[حميداني]

... حوسه

[@north_star@]

شلاخ:nice:

[بن غيث]

نزر ..

[عاهد بن علي]

حيصي
____________

[بوعلي2]

شووله

[معماري قطري]

دعله..

ههههههه دعله ذي آذكرها بس طمبحله غريبه علي .. وبعدين لازم تختلف بعض الكلمات بإختلاف القبائل القطرية إختلاف قليل .. دعله اظن معناها غبي .. وصج كلمه انقرضت من قاموسنا.

[معماري قطري]

شووله

ما ادري هذي تعني إشله أو وشو له أو جوله اللي هي للطبخ = موقد نار؟

[معماري قطري]

حيصي
____________

كلماتك صعبه علي أخ عاهد .. أرجوك عطني المعنى لأني هشكل باحيص ولا بفاهمها

[معماري قطري]

شلاخ:nice:

صح بدأت تندثر كلمة شلاخ بس أحس انها موجوده.

زين من يتذكر هذي الكلمات اعتِلِه .. مِشطاب .. عِلْب؟

[معماري قطري]

نزر ..

كلمات لول تضحك .. نزر جنها سبه لطيفه .. ما ادري شتعني بالضبط

[معماري قطري]

الجولة :
فرن الطبخ الصغير :nice:
اخبر كانت عندنا وحدة زرقة مدورة :victory:

اللي عندكم كشخه عيل انا اللي أذكرهم في بيت يدي الله يرحمه بدون لون حليان.

[معماري قطري]

دثوي

شهست

ماميش

هست هذي كلمة فارسية وصج صج اندثرت

[بصمة قطرية]

اللي عندكم كشخه عيل انا اللي أذكرهم في بيت يدي الله يرحمه بدون لون حليان.

خخخخخخخخخ :secret:
لا لا احنا مودرن :tease:

[معماري قطري]

غرتالله عليك. --> الظاهر متعقد من طفولته

بو علي 2 انا تعقدت ما شاء الله عندك كلمات وايد بس حلو لو تحط الكلمه ومعناها علشان الكل يستفيد .. شرايك؟

[(محمد)]

ههههههه دعله ذي آذكرها بس طمبحله غريبه علي .. وبعدين لازم تختلف بعض الكلمات بإختلاف القبائل القطرية إختلاف قليل .. دعله اظن معناها غبي .. وصج كلمه انقرضت من قاموسنا.

اسمع الصوت بالاول


http://www.7achy.com/wp-content/uploads/2010/03/6omba7lah.mp3




وهذا معناها


المعنى
لقب يطلق على الشخص السمين كنايةً عن سمنته.

مثال
بسك أكل يالطمبحله

أصل الكلمة
عربي المطبح السمين.



ويقال ان الطمبحلة هو البليد








هذا ماوجدته :nice:

[الحريّه]

غرتلله يقصد : = غارة الله عليك
الغارة معروفه , يعني يصيبك الله بغارة , يمكن غضب ولا حجارة من سجيل :rolleyes2:

سِيَمْ = سرير من الخشب مرتفع عن الأرض - حفظاً من الدواب و الهوام - كان الأولين يصنعوه للنوم في الحوش .
سمعت في أغنية بحرينية يسمونه السجم .
مِعْتَرْ , تحمل معنيان . معتر أي مائل السير . و تقال للطفل إذا كان مزاجه متغير .
زَلْغْ = كشط طفيف في الجلد
زيران :tease: = لمن ترك الجان الشقه و سكنوا فيه :tease:
فيقال = فيه زيران , أي سكنه الجان ( بسم الله :omen2: )
تخ = جذر
المَدّه = فرش يوضع على الأرض مصنوع من الخوص , الحصير = فرش للأرض مصنوع من سعف النخل
إيحَله / إجحله ببعض التبيدي :rolleyes2: = وعاء يوضع فيه الماء , و الصغير يسمى حِبْ
تحياتي

[qatarshark]

صاهد :ارتفاع درجة الحرارة ( السخونة)

[سهم..]

شوف أخوك تحت الشبرية

[معماري قطري]

اسمع الصوت بالاول


http://www.7achy.com/wp-content/uploads/2010/03/6omba7lah.mp3




وهذا معناها


المعنى
لقب يطلق على الشخص السمين كنايةً عن سمنته.

مثال
بسك أكل يالطمبحله

أصل الكلمة
عربي المطبح السمين.



ويقال ان الطمبحلة هو البليد








هذا ماوجدته :nice:

ما قصرت إخوي محمد وبعد بالصوت .. ههههههه المشكله الحروف ما فيه تفاهم بينها.

تذكرني بكلمة خمبغه وخمبغها .. تعني خربطها أو يبي يكحلها عماها.

[معماري قطري]

شوف أخوك تحت الشبرية

أظن الشبريه لها معنى ثاني عند اليمنيين اللي هو الخنجر اللي طوله شبر، وعندنا السرير الحديد بو شبك اللي يصرصر.

[معماري قطري]

غرتلله يقصد : = غارة الله عليك
الغارة معروفه , يعني يصيبك الله بغارة , يمكن غضب ولا حجارة من سجيل :rolleyes2:

سِيَمْ = سرير من الخشب مرتفع عن الأرض - حفظاً من الدواب و الهوام - كان الأولين يصنعوه للنوم في الحوش .
سمعت في أغنية بحرينية يسمونه السجم .
مِعْتَرْ , تحمل معنيان . معتر أي مائل السير . و تقال للطفل إذا كان مزاجه متغير .
زَلْغْ = كشط طفيف في الجلد
زيران :tease: = لمن ترك الجان الشقه و سكنوا فيه :tease:
فيقال = فيه زيران , أي سكنه الجان ( بسم الله :omen2: )
تخ = جذر
المَدّه = فرش يوضع على الأرض مصنوع من الخوص , الحصير = فرش للأرض مصنوع من سعف النخل
إيحَله / إجحله ببعض التبيدي :rolleyes2: = وعاء يوضع فيه الماء , و الصغير يسمى حِبْ
تحياتي

ما شاء الله صج كلمات تراثية شبه منسية

ذكرت المده والحصير ونسيت إخوهم العسو .. ما ادري من وين يجيبون هالأسامي قبل؟

[معماري قطري]

صاهد :ارتفاع درجة الحرارة ( السخونة)

صاهد جديدة علي .. لكن أتذكر متضعضع ومتسودن

[بوعلي2]

ما ادري هذي تعني إشله أو وشو له أو جوله اللي هي للطبخ = موقد نار؟

تعني اشله

حسب المناطق بقطر :shy:

[بوعلي2]

بو علي 2 انا تعقدت ما شاء الله عندك كلمات وايد بس حلو لو تحط الكلمه ومعناها علشان الكل يستفيد .. شرايك؟

يعني حسبي الله عليك هههههه

غرتالله عليك ملعون الوالدين ----> يوميا اسمع هالكلام :weeping:

عيايزنا يسبونا واحنا صغار :shy: شياطيين :victory:

[بوعلي2]

كرفايه

نمليه

فترينه

[بوعلي2]

دوشق دواااشق خخخخخ

[بوعلي2]

برنوص

مير = درج

[معماري قطري]

برنوص

مير = درج

ما شاء الله عليك سكتتني كنت متخيل اني باتذكر أكثر يوم صار الصج نسيت

[رجل الجزيرة]

الروشن.

[الدوحة قطر]

كرفاية = سرير

زنجفرة = فانيلة = تي شيرت هاهاي

كشمة = نضارة

وايد بس ذول الي يحضروني حاليا

[معماري قطري]

كرفاية = سرير

زنجفرة = فانيلة = تي شيرت هاهاي

كشمة = نضارة

وايد بس ذول الي يحضروني حاليا

تعال الحين فانيلة إنقرضت وكشمه صح بعض الدول العربية تسميها عوينات ... لازم حد مختص يسوي قاموس لهذي الكلمات ومعانيها وأصلها.

[معماري قطري]

الروشن.

اتذكر الإفاله بعد

[الأصيلة]

مقّصر = عبارة عن قميص واسع من القطن يلبسه الرجال الكبير في السن تحت الثوب
ولما يرجع البيت يفصخ الثوب ويقعد بالمقّصر ...

الأدب = الحمام

القطيع = شبه حمام في الغرفة ( مقطوع من طرف الغرف )
للأستحمام فقط والوضوء.وباللهجة الإماراتية يسمى ( الزووٍّية )
الفرخة = الباب الصغير والقصير وهو جزء من بابا كبير
فقط هو لخروج الأشخاص حتى أن الشخص يُنزل رأسه عند الخروج منه لقصره...

مُفوحّه = إناء لطبخ الشاي أو الحليب ( يعني يفوح فيه )

المكاه = المغرفة التي تصنع فيها القهوة ويتقهون الأسرة فيها وياكلون فيها ..

الصخّام = الفحم ( بلهجة أهل الإمارات )

[qatarshark]

عكاسه = كيمرا

[al wafi]

الهيس الاربد :unsure:

[al wafi]

مقّصر = عبارة عن قميص واسع من القطن يلبسه الرجال الكبير في السن تحت الثوب
ولما يرجع البيت يفصخ الثوب ويقعد بالمقّصر ...

الأدب = الحمام ( الكطيع )

القطيع = شبه حمام في الغرفة ( مقطوع من طرف الغرف )
للأستحمام فقط والوضوء.وباللهجة الإماراتية يسمى ( الزووٍّية )
الفرخة = الباب الصغير والقصير وهو جزء من بابا كبير
فقط هو لخروج الأشخاص حتى أن الشخص يُنزل رأسه عند الخروج منه لقصره...

مُفوحّه = إناء لطبخ الشاي أو الحليب ( يعني يفوح فيه )

المكاه = المغرفة التي تصنع فيها القهوة ويتقهون الأسرة فيها وياكلون فيها ..

الصخّام = الفحم ( بلهجة أهل الإمارات )





,,,,,,,,,,,,,,,,,,,,,,,,,,,,,,,

[((بوحسن))]

يارووف
شبريه
خنه
عتوي

[معماري قطري]

ههههههههههه ضحكتني الهيس الأربد كنت باكتبها بس ما تجرأت

[معماري قطري]

يارووف
شبريه
خنه
عتوي

شبريه = سرير صغير حديد

خنه = عطر والباقي ما عرفتهم نبي المعنى بوحسن لو تفضلت

[معماري قطري]

عكاسه = كيمرا

ايه والله عكاسه وكشمه للنظاره

[البحار00]

شولة

تعني بعد

اسم طير مهاجر يتواجد في قطر في الربيع

[معماري قطري]

مقّصر = عبارة عن قميص واسع من القطن يلبسه الرجال الكبير في السن تحت الثوب
ولما يرجع البيت يفصخ الثوب ويقعد بالمقّصر ...

الأدب = الحمام

القطيع = شبه حمام في الغرفة ( مقطوع من طرف الغرف )
للأستحمام فقط والوضوء.وباللهجة الإماراتية يسمى ( الزووٍّية )
الفرخة = الباب الصغير والقصير وهو جزء من بابا كبير
فقط هو لخروج الأشخاص حتى أن الشخص يُنزل رأسه عند الخروج منه لقصره...

مُفوحّه = إناء لطبخ الشاي أو الحليب ( يعني يفوح فيه )

المكاه = المغرفة التي تصنع فيها القهوة ويتقهون الأسرة فيها وياكلون فيها ..

الصخّام = الفحم ( بلهجة أهل الإمارات )

مشكوره إخت الأصيلة

وإذا بندخل في قاموس كلمات أهل الإمارات بنضيع .. واللي يعجبني كثير من الكلمات يستخدمونها ووايد منها بعد مشتركة بيننا وبينهم.

الأدب والفرخه أتذكرهم صح خصوصاً الفرخه للباب الخشب الكبير .. أتذكره في بيت يدي كان لفترة بسيطة موجود وشلوه ركبوا حديد مكانه.. باسئل خالي عنه والله باب تراثي خشب ومطعم بالحديد.

على فكره الأدب إسم حلو للحمام تكرمون وفي أمريكا يسمونه بيت الراحه "Rest Room "

[(محمد)]

عتوي كاشخ

http://farm4.staticflickr.com/3314/3550389885_8243d9fe36.jpg

[عاهد بن علي]

عاهد ///////
زمان اول كانوا يسمون عاهد بن شداد بس الحين انتهت هذه التسميات الرنانه

[qatara]

مثل هذه الكلمات لم تكن من التراث القطري قد تكون دخلت المجتمع متاخره واختفت

فالدارج بالهجه القطريه مكتوب باللون الاحمر



الطمبحلة هو البليد
^
الثور الخداي الهيس الاربد

فيقال = فيه زيران
^
ملبوس

المكاه = المغرفة التي تصنع فيها القهوة ويتقهون الأسرة فيها وياكلون فيها ..
^
غرفة لقهوه

[بوNasser]

بالدي
طرطنقي
طبيشة
سحاره
صرناي
ليلام
chيت ارناق
قلم شكر
صفر او مو
سيّوره أو عرّوانه

طبعا هذي الكلمات كانت متداولة لكن بعضها من كلمات قطرية او عربية اصلا
مثل لين انقول : واير ، ريوس، كنديشن، عنفلوص .....وغيرها

[معماري قطري]

عتوي كاشخ

http://farm4.staticflickr.com/3314/3550389885_8243d9fe36.jpg

مصدق نفسه هالقطو تحصله بيكشخ على ربعه

[معماري قطري]

عاهد ///////
زمان اول كانوا يسمون عاهد بن شداد بس الحين انتهت هذه التسميات الرنانه

صح والله بس فيه أسماء قديمة وقد تكون غريبة متمسكين بها بعض القبايل ... شقصة عاهد بن شداد علمنا ما دمنا نتكلم في التراث.

[معماري قطري]

بالدي
طرطنقي
طبيشة
سحاره
صرناي
ليلام
chيت ارناق
قلم شكر
صفر او مو
سيّوره أو عرّوانه

طبعا هذي الكلمات كانت متداولة لكن بعضها من كلمات قطرية او عربية اصلا
مثل لين انقول : واير ، ريوس، كنديشن، عنفلوص .....وغيرها


ما شاء الله إضافات جديدة بعضها اعرفها بس 1 ومن 7 لين 10 ما عرفت معناهم.

[عاهد بن علي]

مجرد مزحه يا استاذي الكريم

[بوNasser]

ما شاء الله إضافات جديدة بعضها اعرفها بس 1 ومن 7 لين 10 ما عرفت معناهم.

السلام عليكم ورحمة الله

انا اقول لك

بالدي : المستخدم لشرب الماي " الكوب المعدن"

شيت ارناق او جيت ارناق (chيت ارناق) : بياع الخلاجين جديدة او مستعملة وكنا بعد نسميه الدوار لانه شايل بقشته ويدور في الفرجان والسكيك.

قلم شكر: هو قصب السكر

صفر / مو : هو معدن النحاس كانوا يقولون مواعين صفر او مواعين نحاس ويمكن منها اشتقت صفار الجدور. واحيانا نقول: هذا مب حديد هذا مو

سيورة او عروانه: الشي المكرر، يعني اذا ولدك طلبك فلوس وعقب شوي بعد طلب اتقول له: وراه سويتها سيورة طقة وتعويده تبي فلوس.

تحياتي للجميع

[معماري قطري]

السلام عليكم ورحمة الله

انا اقول لك

بالدي : المستخدم لشرب الماي " الكوب المعدن"

شيت ارناق او جيت ارناق (chيت ارناق) : بياع الخلاجين جديدة او مستعملة وكنا بعد نسميه الدوار لانه شايل بقشته ويدور في الفرجان والسكيك.

قلم شكر: هو قصب السكر

صفر / مو : هو معدن النحاس كانوا يقولون مواعين صفر او مواعين نحاس ويمكن منها اشتقت صفار الجدور. واحيانا نقول: هذا مب حديد هذا مو

سيورة او عروانه: الشي المكرر، يعني اذا ولدك طلبك فلوس وعقب شوي بعد طلب اتقول له: وراه سويتها سيورة طقة وتعويده تبي فلوس.

تحياتي للجميع

مشكور يا بوناصر ما قصرت

مرت علي الكلمات كلها اللي ذكرتها بس ناسي كنت معانيها وحتى يمكن ناسيها والحين تذكرت مع شرحك الوافي.

[آنا غيــر]

صاهوووود :p

[معماري قطري]

صاهوووود :p

صاهوود على وزن ميهود بس ما اعرف شتعني علميني لو سمحتي.

[معماري قطري]

شرايكم في مزلاج - كزمه - هيب - جص أو يص - روشنه - بادغير - خوص - دنجل مرزام .... حد يتذكر معانيهم؟

[بن غيث]

المقاولات مأثرة عليك .. معماري
يعطيك العافية على هذا الموضوع الممتع

[معماري قطري]

المقاولات مأثرة عليك .. معماري
يعطيك العافية على هذا الموضوع الممتع

هههههههه هذي مقاولات أول

[بن غيث]

http://www13.0zz0.com/2012/10/22/23/750432600.jpg

[معماري قطري]

http://www13.0zz0.com/2012/10/22/23/750432600.jpg

هههههههههه وبعد يتتن ما يستحي :omg:

على طاري الهيب مره كنت احفر وانا صغير 8 سنين يمكن .. وعندي هيب حلي حده ومتحمس أكثر من اللازم وأضرب رجلي فوق الأصابع ويدخل من فوق ويطلع من تحت .. وزين لحقوا علي وعلاج فترة بس للحين الضربة تبين واتذكرها.

[مسباح عاج]

تنعز عنه

زر عنه

وتعني ابتعد عنه

[يوسف0]

في قلعة وادرين : وين بتودينا قلعه وادرين؟.
كسافه : هاي الإنسان كسييف
عنزروت:صايرلي مثل لزقة عنزروت
بخت: يابختييييييه
هَمجِة : بل عليه عنده همجة فلوس
جُك بُك: جك بك والا احنا حاجزين حق طهران والفندق
تيزاب : تيزاب في بطنك قول انشاء الله
بلبول : تعال خل اقص بلبولك لا بارك الله فيك

والسموحه

[(راشـد)]

دعبول
ميعان
حبَان << :nice:

ملًه

[الأصيلة]

جسوة : قطعة قماش 4 أمتار..
وار : متر للقطعة..
حيامّه : اللي ادور علي البيوت وتبيع لهم شوي أغراض وتحجم الحريم ..
تبيع كريم ومشابيص وديرم وأمواس ومقاصة وخيوط وأبر خياطة وفازلين أخضر
http://upload.traidnt.net/upfiles/mxB76784.jpg (http://upload.traidnt.net/)

[معماري قطري]

جسوة : قطعة قماش 4 أمتار..
وار : متر للقطعة..
حيامّه : اللي ادور علي البيوت وتبيع لهم شوي أغراض وتحجم الحريم ..
تبيع كريم ومشابيص وديرم وأمواس ومقاصة وخيوط وأبر خياطة وفازلين أخضر
http://upload.traidnt.net/upfiles/mxb76784.jpg (http://upload.traidnt.net/)

ذكرتيني بالحيامه كنا نجننها واحنا صغار وتركض ورانا بزنوبتها وعباتها تطير .. ووار وجسوة أو كسوة كلمات كثيرة إندثرت نتمنى الصغار يقرونها ويتعلمونها.

[معماري قطري]

دعبول
ميعان
حبَان << :nice:

ملًه

حي الله راشد

ما قصرت يا اخوي بس انا ولا اتذكر كلمة من اللي قلتهم على الأقل علمني معانيهم.

[معماري قطري]

جسوة : قطعة قماش 4 أمتار..
وار : متر للقطعة..
حيامّه : اللي ادور علي البيوت وتبيع لهم شوي أغراض وتحجم الحريم ..
تبيع كريم ومشابيص وديرم وأمواس ومقاصة وخيوط وأبر خياطة وفازلين أخضر
http://upload.traidnt.net/upfiles/mxb76784.jpg (http://upload.traidnt.net/)

تعالي الأصيلة الكريم ذيه الأخضر من وين مطلعة صورته هذا اندثر من زمان .. لتكونين خاشه منه كميات للبيع في مزاد علني على انه قديم وأثري .. كلاسيك.

[معماري قطري]

تنعز عنه

زر عنه

وتعني ابتعد عنه

هههههه الكلمتين يضحكون باجرب مره باقولهم للصغار باشوف ردة فعلهم.

[معماري قطري]

في قلعة وادرين : وين بتودينا قلعه وادرين؟.
كسافه : هاي الإنسان كسييف
عنزروت:صايرلي مثل لزقة عنزروت
بخت: يابختييييييه
هَمجِة : بل عليه عنده همجة فلوس
جُك بُك: جك بك والا احنا حاجزين حق طهران والفندق
تيزاب : تيزاب في بطنك قول انشاء الله
بلبول : تعال خل اقص بلبولك لا بارك الله فيك

والسموحه

هههههههه انت تتذكر الكلمات والمواقف معاها

[(راشـد)]

حي الله راشد

ما قصرت يا اخوي بس انا ولا اتذكر كلمة من اللي قلتهم على الأقل علمني معانيهم.

الله يحييك على فضله اخوي معماري

:nice: ولايهمك بقولك معانيها

ميعان= إناء
مله= ميعان
دعبول= ابله
حبان= عاد هذي يقولونها للي قلبه خضر :shy:

[يوسف0]

هههههههه انت تتذكر الكلمات والمواقف معاها

تذكرت الكلمات يوم قريت كتاب التراث(الفاظ دخيله ومعربه) فيه كلمات وايد بس اغلبها تستخدم يوميا

[qatarshark]

أهيع = تقال للشخص كثير الحركة

[معماري قطري]

أهيع = تقال للشخص كثير الحركة

هههههههههه هالكلمة كم مرة انقالت لنا .. إهيع يالهيس الأربد :weeping: ألحين بس عرفت انها سبة على خفيف

[معماري قطري]

دعبول
ميعان
حبَان << :nice:

ملًه

صحيح عرفت مله وطاسه بعد بس شالفرق بينهم ما ادري

[حلم الطفولة]

خماجير : وهي عبارة عن مجموعة من الأدوات او الاشياء القديمة الغير مرتبه واللتي اختلطت ببعضها وقد تكون غير صالحه للاستعمال


غمنده : كلمة بمعني اتفاق سري لتنفيذ عمل ما ربما يكون للشر أقرب مثال جاسم وسلوم بينهم غمنده مادري شخططون عليه

[شموخ]

الليوان - الحوش - العسو- الدنجل -المحماس - المرطبان- الاسقا- القطيع- الشاطوحة - الزمزمية -البالدي -

[معماري قطري]

الليوان - الحوش - العسو- الدنجل -المحماس - المرطبان- الاسقا- القطيع- الشاطوحة - الزمزمية -البالدي -

هلا إخوي شموخ الليوان والحوش والدنجل للحين يستخدمونهم لكن الباقي صح شبه منسيين ... الشاطوحة كلش ما اذكرها شتعني ذي؟

[معماري قطري]

خماجير : وهي عبارة عن مجموعة من الأدوات او الاشياء القديمة الغير مرتبه واللتي اختلطت ببعضها وقد تكون غير صالحه للاستعمال


غمنده : كلمة بمعني اتفاق سري لتنفيذ عمل ما ربما يكون للشر أقرب مثال جاسم وسلوم بينهم غمنده مادري شخططون عليه

ألحين عرفنا وشي الغمنده .. خماجير تنقرى خما ch ير صح؟

ما شاء الله صدتي كلمتين محد ذكرهم كلش.

[معماري قطري]

على طاري خماجير فيه بعد شماطيط .. ما ادري ليش تضحك هالكلمة.

[حلم الطفولة]

على طاري خماجير فيه بعد شماطيط .. ما ادري ليش تضحك هالكلمة.

شماطيط كلمه تضحك ..ماذا تقول عن هذه الكلمات:)

ليلام ...يعني البضاعه الرخيصة اثناء التنزيلات

تمردق.. عندما يحتاج الحيوان ان يحك ظهره يقوم بحركة المردقه و هي حك الظهر بالارض
و الانثى تمردقت


ساتول.. تعني طابور,, ساتول من العمال

[حسن]

بل صج طلعتو مغبرين انا اول مره اسمع هل المسطلحات

طلعتو من جيل القرنبع

[حلم الطفولة]

بل صج طلعتو مغبرين انا اول مره اسمع هل المسطلحات

طلعتو من جيل القرنبع

هههههههههههههه جيل القرنبع ...لا وانت الصاج سنة الطبعه
omen قول ما شاء الله

[حسن]

مشاء الله والحمد لله وانشاء الله العمر كله لى ولكم ولكل مسلم

[الحياة الخالدة]

هلا إخوي شموخ الليوان والحوش والدنجل للحين يستخدمونهم لكن الباقي صح شبه منسيين ... الشاطوحة كلش ما اذكرها شتعني ذي؟


الشاطوحة أعتقد هي سرير الطفل اللي يدزونه يروح و يجي غير المنز السرير الثابت

[معماري قطري]

مشاء الله والحمد لله وانشاء الله العمر كله لى ولكم ولكل مسلم

حي الله الشيخ حسن

ما شاء الله وإن شاء الله لك ولنا طولة العمر ولكل مسلم

[معماري قطري]

بل صج طلعتو مغبرين انا اول مره اسمع هل المسطلحات

طلعتو من جيل القرنبع

ههههههههه انت اللي طلعت توك فرش .. صج في أي صف ألحين اعترف.

[معماري قطري]

شماطيط كلمه تضحك ..ماذا تقول عن هذه الكلمات:)

ليلام ...يعني البضاعه الرخيصة اثناء التنزيلات

تمردق.. عندما يحتاج الحيوان ان يحك ظهره يقوم بحركة المردقه و هي حك الظهر بالارض
و الانثى تمردقت


ساتول.. تعني طابور,, ساتول من العمال

زين ألحين حسن خذ عنا فكرة إننا وصلنا التسعين .. مع إني للحين ما وصلت السبعين ربيعاً .. ليلام صح أذكرها وتمردغ حتى لين تهاوشنا واحد يقول للثاني بامردغك في الأرض ألحين .. لكن ساتول ما اذكرها كلش.

[بوNasser]

الكلمات التالية كلها ذم:

1- هدقه
2- رطرط
3- عي
4- دعله
5- كودنه
6- دثوي
7- بيسري
8- لهوطه
9- حبنتي


محشومين يالربع
تحياتي للجميع

[معماري قطري]

الكلمات التالية كلها ذم:

1- هدقه
2- رطرط
3- عي
4- دعله
5- كودنه
6- دثوي
7- بيسري
8- لهوطه
9- حبنتي


محشومين يالربع
تحياتي للجميع

تسلم يا اخوي ولك الحشمة دنيا وآخرة بإذن الله

صج والله تتذكر كلمة في مجال معين توصل لكلمات وايد غيرها وذي كلمات تضحك .. شوف ما شاء الله أوصاف لأشخاص وصلت 9 كلمات ... ههههه بيسري تضحك وأتذكر بعد سرسري وتبي الصراحة ما اعرف شالمعنى بالضبط بس أكيد وصف مب زين للشخص كمثلاً غبي وغيره، والحشمة للجميع.

لو تقدر إخوي ما عليك أمر ترسل لي معانيها على الخاص لأن تقريباً كلها صعب أحصل لها معنى بالضبط ولو فيها إحراج إنسى هالطلب.

[بن غيث]

تسلم يا اخوي ولك الحشمة دنيا وآخرة بإذن الله

صج والله تتذكر كلمة في مجال معين توصل لكلمات وايد غيرها وذي كلمات تضحك .. شوف ما شاء الله أوصاف لأشخاص وصلت 9 كلمات ... ههههه بيسري تضحك وأتذكر بعد سرسري وتبي الصراحة ما اعرف شالمعنى بالضبط بس أكيد وصف مب زين للشخص كمثلاً غبي وغيره، والحشمة للجميع.

لو تقدر إخوي ما عليك أمر ترسل لي معانيها على الخاص لأن تقريباً كلها صعب أحصل لها معنى بالضبط ولو فيها إحراج إنسى هالطلب.

ههههه
ذكرتني بكلمة أبلق .. تنقال للشخص قليل الفهم

[معماري قطري]

ههههه
ذكرتني بكلمة أبلق .. تنقال للشخص قليل الفهم

تنقال للحول .. اللي عيونه حوله

[فنجان قهوة]

الدورفة = المرجيحه
هلجان = جوعان
بروي= لعبة اطفال
ميهود = مريض
دش = ادخل او تفضل

[بيتي بوب 23]

هههههههههههههههههههههه ابلق يعني حول ومفهي

سبحان الله مع ان الكلمه ابلق شكلها برستيج

[معماري قطري]

الدورفة = المرجيحه
هلجان = جوعان
بروي= لعبة اطفال
ميهود = مريض
دش = ادخل او تفضل

الأُولى والأخيره للحين نقولهم بس الثلاث الوسطيين نسينانهم تقريباً أشكره الموديلات الحديثة ما يعرفون معناهم.

من يذكر ماي خريج .. خَريْج .. تعني غير مستساغ خصوصاً لمياه الآبار الغير صالحة للشرب يكون مالح شوي.

[معماري قطري]

هههههههههههههههههههههه ابلق يعني حول ومفهي

سبحان الله مع ان الكلمه ابلق شكلها برستيج

ههههههه ضحكتني ببرستيج انا أذكر كنا نقولها للحول .. اللي عيونه حوله

[غايه الطواش]

جخه = كشخه
زبره = كشخه
حمسان=زعلان
روشن =ميره البيت
يلم= مقص
زمران =زعلان
سرسوف= يعني يعني سرسوف ههههههه
يمرخونه = يدهنونه ويمسدونه
عاير = عاير البيت زاويه

[معماري قطري]

جخه = كشخه
زبره = كشخه
حمسان=زعلان
روشن =ميره البيت
يلم= مقص
زمران =زعلان
سرسوف= يعني يعني سرسوف ههههههه
يمرخونه = يدهنونه ويمسدونه
عاير = عاير البيت زاويه

عاد سرسوف اللي تعني سرسوف ما عرفت شمعناها انا ... بس صج يلم ويمرخونه وعاير كلمات جديده في الموضوع وزبره بعد .. هههههه زبره على بايق .. مثل سمعته من قبل.

[غايه الطواش]

السرسرف شي في راس المعده يقولون الياهل طايح مادري مرتفع سرسورفه ويودونه حق مساده تمرخه هاي الي اتذكره عاد

[السهم الشمالي]

سحه = تمر
سرود = الإناء اللي يوضح فيه التمر
ضك = أزحم
إيوارج = يصير
رنق = لون
أم بريد = يقط
شلاني = عيش أبيض
مرقه = صلونه
صفو = مرقة الذبيحة يرشون بها العيش .

[نوار قطر]

مزوزي او مزوزيه

تمقّل او تمقّلي

[معماري قطري]

سحه = تمر
سرود = الإناء اللي يوضح فيه التمر
ضك = أزحم
إيوارج = يصير
رنق = لون
أم بريد = يقط
شلاني = عيش أبيض
مرقه = صلونه
صفو = مرقة الذبيحة يرشون بها العيش .

هلا السهم الشمالي

سرود غريبة علي وأم بريد أما الباقي كلهم أذكرهم .. رنق أظن كلمة فارسية الأصل

[معماري قطري]

مزوزي او مزوزيه

تمقّل او تمقّلي

تضحك كلمات لأول مزوزي تعني متكيسل أو مريض تعبان .. تمقل = بقق عيونك.

مشكوره على الإضافة .. انا سمعت كلمة عقط .. من يعرفها؟

[غايه الطواش]

تضحك كلمات لأول مزوزي تعني متكيسل أو مريض تعبان .. تمقل = بقق عيونك.

مشكوره على الإضافة .. انا سمعت كلمة عقط .. من يعرفها؟

اعقطه يعني فلعه
اعقطه بشي يعني اضربه بشي

[احمد1]

جفجان تعني من غير العاده ... جفجان طالع اليوم بدري
وبعد... كلمة ... جوكم ... مثلا نقول : اذا ماسمع ترى جوكمه على ظهره ... يعني ذنبه علي جنبه
والوالده الله يحفظها كله تقول ... بوك شدعوه

[نوار قطر]

عق الشي... عقه .. عقيه..

بصرك

:shy:

[نوار قطر]

تضحك كلمات لأول مزوزي تعني متكيسل أو مريض تعبان .. تمقل = بقق عيونك.

مشكوره على الإضافة .. انا سمعت كلمة عقط .. من يعرفها؟


عقط :rolleyes2: مااعرفها بسأل امي عنها:shy:

[معماري قطري]

جفجان تعني من غير العاده ... جفجان طالع اليوم بدري
وبعد... كلمة ... جوكم ... مثلا نقول : اذا ماسمع ترى جوكمه على ظهره ... يعني ذنبه علي جنبه
والوالده الله يحفظها كله تقول ... بوك شدعوه

انا لين سمعتهم يقولون بوك اقول قولوا كتاب نفهم لكم أسهل هههههه

[معماري قطري]

اعقطه يعني فلعه
اعقطه بشي يعني اضربه بشي

إيوا صح ألحين تذكرتها بعد عق وقل وإحذف كلها تقريباً نفس المعنى.

[معماري قطري]

عقط :rolleyes2: مااعرفها بسأل امي عنها:shy:

مثلاً فلان عقط فلان بحصاه يعني حذف حصاه صوبه مب شرط أصابه بفلعه مباشرةً.

[$QTR$]

عيل خذ هذي يامعماري اذا تتذكرها .. (يتغلغل) .. يعني يتحرك مب ثابت , مثل الي يقول لك ضرسي يتغلغل بيطيح

[غايه الطواش]

يتغلغل كلمه عربيه
يمكن تقصد يتقلقل يعني يرقل

[$QTR$]

صحيح ياغاية

[لاجل QT]

ابي همزة عيش= تكوير العيش (مجبوس بريانى الا هو) باليد يستوي مثل الاسطوانة ههههه وعلى طول على الحلج

[نوار قطر]

بزخه ::: بابزخك بزخه على سابعتك :rolleyes2:

[dm styal]

وووي غميضة الحين (يسمونها سج اشدخل لوووعو جبدي هالبنات من كثر مايقولونها اشدخل اشدخل )

[نوار قطر]

وووي غميضة الحين (يسمونها سج اشدخل لوووعو جبدي هالبنات من كثر مايقولونها اشدخل اشدخل )

غميضه مالها خص بشدخل :secret:

غميضه يعني حسافه :nice:

[dm styal]

ادري اختي نوار بس عيالنا وهذا الجيل يطلقون عليها كلمة اشدخل

[غير البشر]

احنا الاصغار نستفيد منكم ياشيبان وعجايز المنتدى :shy:

[نوار قطر]

ادري اختي نوار بس عيالنا وهذا الجيل يطلقون عليها كلمة اشدخل

لا حبيبتي الكلمه مالها خص في معناها

شدخل معناها مثلا لما نقول حق شخص ...شيخص هالشي في اللي تقوله..

غميضه مثلا لما نقول كنت ابي اشتري هالشي بس غميضه ماحصلته:rolleyes2:

[نوار قطر]

احنا الاصغار نستفيد منكم ياشيبان وعجايز المنتدى :shy:


:omg: :omg: ال صغار ال :anger1:

[غير البشر]

:omg: :omg: ال صغار ال :anger1:



ال شنو :eek5:

[نوار قطر]

ال شنو :eek5:

قال بس بالمصري :secret:

[معماري قطري]

ابي همزة عيش= تكوير العيش (مجبوس بريانى الا هو) باليد يستوي مثل الاسطوانة ههههه وعلى طول على الحلج

إيه والله همزه كلش نسيناها .. شكلج تذكرتيها وقت الأكل .. الحين معلقين على لقمه لا واختربنا صرنا نستعمل القفشه.

[معماري قطري]

بزخه ::: بابزخك بزخه على سابعتك :rolleyes2:

بل من زمان ما انبزخت :eek5: .. ألحين كلمتين بزخه وسابعه :nice:

[معماري قطري]

احنا الاصغار نستفيد منكم ياشيبان وعجايز المنتدى :shy:

غير البشر لتصغر نفسك أمس داخل الخمسين :)

[معماري قطري]

وووي غميضة الحين (يسمونها سج اشدخل لوووعو جبدي هالبنات من كثر مايقولونها اشدخل اشدخل )

صج هذي جديده

[معماري قطري]

يتغلغل كلمه عربيه
يمكن تقصد يتقلقل يعني يرقل

يتقلقل ويرقل كلها نستخدمها بس قليل

[نوار قطر]

غير البشر لتصغر نفسك أمس داخل الخمسين :)

صباااحكم ورررد

زين جذي فضحك معماري :secret:

[نور الحور]

احدرني = نزلني
الخضرة = الفواكه ..وبعد احيانا يسمونها ميوه ههههه جنها قطوة أعتقد أصلها فارسي
ميت من الهلاج(الهلاك) = ميت من الجوع
ميهود(مجهود) = مريض
ادناة الدون = أقل القليل
أدناة يوم = أحد الأيام القريبة
ما يوارج = ما يناسب أو ما يصير
أحسها كلمات خلاص اندثرت ..ولولا يداتنا الله يحفظهم كان مالها وجود .. أنا اضطر اترجم لبنتي لما تتكلم مع يدتي:rolleyes2:

[نوار قطر]

وذى يوذيك :secret:

وذى بمعنى الاذى يعني اذى يأذيك:rolleyes2:

[الحياة الخالدة]

عنقيشة , طَعّـــامة
صلوم
صَوّاية , صرناي
سَيّـــورة , عرّوانـــــة

[R 7 A L]

روشن - للتموين

خرمس - الظلام الدامس

[نوار قطر]

الشبريه :nice: يعني السرير

والعثره دعوه معناتها العثره :rolleyes2:

غوازي يعني فلوس

جسّوه من الكسوه يعني قطعة قماش م :discuss:

[مرت محمد]

العمبلوص : سياره الاسعاف

قميضه : خساره

شربت : عصير

الهقوتي : يمكن

نترياكم : ننتظركم

بيتنا كروه : بيت بالاجار

الدختر . الدكتور

سبيتار : المستشفى

الدوحه : يعني رايحين السوق

[بوحمد111]

انا ما شفت الكلمات اللي تم ذكرها في ردود الشباب وعندي كلمه سألت عيالي عنها امس ولا احد عرف معناها وانا الحين بكتبها وعليكم بالبحث عنها اذا ما تعرفونها وعن نفسي الى الآن وانا استعملها وارددها وكل من يسمعها مني يقول من وين طلعت هالكلمه

والكلمه هي

راجس وجمعها رواجس

تحياتي

[الحياة الخالدة]

انا ما شفت الكلمات اللي تم ذكرها في ردود الشباب وعندي كلمه سألت عيالي عنها امس ولا احد عرف معناها وانا الحين بكتبها وعليكم بالبحث عنها اذا ما تعرفونها وعن نفسي الى الآن وانا استعملها وارددها وكل من يسمعها مني يقول من وين طلعت هالكلمه

والكلمه هي

راجس وجمعها رواجس

تحياتي


راجس معروف هو المغناطيس :nice:

[الزعفراني]

مسلبت

انضح

معبول

تدبي

تتقرفص

وديه

تغفي

قرطات مفردها قرط


أترك لكم مهمة معرفة معاني هالكلمات :shy:

معضمها مستخدم إلى اليوم :nice:

[بوحمد111]

مسلبت

انضح (اركد ) مش متأكد

معبول اول مره اسمع بها

تدبي تتمشى شوي شوي

تتقرفص اول مره اسمع بها

وديه على ما اعتقد تودي الشي من مكان الى مكان ثاني

تغفي تنود وبتنام اي بتاخذ غفوه

قرطات مفردها قرط ما مرت علي من قبل


أترك لكم مهمة معرفة معاني هالكلمات :shy:

معضمها مستخدم إلى اليوم :nice:

وهذا الي عندي

[نور الحور]

هههه جات على بالي كلمة ..
قريضة << يعني شوي

[معماري قطري]

انا ما شفت الكلمات اللي تم ذكرها في ردود الشباب وعندي كلمه سألت عيالي عنها امس ولا احد عرف معناها وانا الحين بكتبها وعليكم بالبحث عنها اذا ما تعرفونها وعن نفسي الى الآن وانا استعملها وارددها وكل من يسمعها مني يقول من وين طلعت هالكلمه

والكلمه هي

راجس وجمعها رواجس

تحياتي

ما شاء الله عليك هذي كلمه يديده أول مره تمر علي في هذا الموضوع .. ألحين يقولون مغناطيس .. اف كلمه طويله تعور الحلج

[معماري قطري]

هههه جات على بالي كلمة ..
قريضة << يعني شوي

قريضة وبعد عويزه .. من يعرف عويزه؟

[معماري قطري]

مسلبت

انضح

معبول

تدبي

تتقرفص

وديه

تغفي

قرطات مفردها قرط


أترك لكم مهمة معرفة معاني هالكلمات :shy:

معضمها مستخدم إلى اليوم :nice:

عيل إسمع هالكلمه " متعضرط " حروفها كلش ما فيه بينها تفاهم وبعد " متعومس و مزوزي "

قرطات هي الجمع لشجر القرط اللي مفردته قرطه على ما اذكر.

وديه ما ادري شتعني.

[لاجل QT]

قصيرتنا = جارتنا

قيصيرنا = جارنا

:shy:

[معماري قطري]

عيل إسمع هالكلمه " متعضرط " حروفها كلش ما فيه بينها تفاهم وبعد " متعومس و مزوزي "

قرطات هي الجمع لشجر القرط اللي مفردته قرطه على ما اذكر.

وديه ما ادري شتعني.

اللي ما عرف شتعني متعضرط يسئل حد من هل الشمال معناها مب سيء لهالدرجة.

[معماري قطري]

قصيرتنا = جارتنا

قيصيرنا = جارنا

:shy:

الحين خلاص الواحد ما يعرف جيرانه الا القليل.

[بن غيث]

معماري.. معظم الكلمات الي أذكروها الاعضاء لا تزال تستخدم ..
يمكن بالنسبة للشباب الصغار اندثرت ...!!

[نور الحور]

قريضة وبعد عويزه .. من يعرف عويزه؟


عويزة يعني هدية :nice:

[الدمعه]

عجبني موضوعكم ونسني من المواضيع اللي احبها ،،،

يلم = مقص

كرخانه = مكينة الخياطة

سراي = فنر بس شوي غير. اقرب للشمعه

المجدح = اعتقد المحش اللي يحشون فيه الحشيش

عنقيشة = طعّام

شطوحة = منز = سرير الطفل

ييم = اكل السمج اللي ينحط في الميدار

عجفة = عجفه :nice:

عقصة = مغص في البطن

الواردة = ثورة المدفع

التفق = التفك = المسدس

الصبان = قلم البحر والحصى الصغير اللي عالسيف

طبيشة = صدفة

جليب = بير

الحوطة = الزريبة

البش = البط والوز

الدبش = الحيوانات

الملفع = غطاء الرأس

البطولة = غطاء الوجه

الديرم = الروج

الفرية = فتحة في الطوفه

الروشنة = رف في الجدار

السكة = الشارع

داعوس = الطريق الضيق

الفرخة = الباب الصغير في الدروازه

جربالة = chربالة = إطار الباب

الدعون = نوع من أغصان الشجر مثل أغصان البمبون إذا صح التعبير

الطبقة = مصنوعه من الخوص لحفظ التمر

شغاب = حلق

مغمشة = يعني مضببة ( عيني مغمشة )

قش = قشار ( شيلي قشج وطلعي من بيتي ) :tease:

مرود = العود اللي يتكحلون فية

زهًّب = جهز

لبق = رتب

الجابلة = بكرة

زمران = زعلان

المسيان = بين العصر والمغرب

لين طرأ لي شي بقول لكم.

[معماري قطري]

ما شاء الله أُخت الدمعه كلمات وايد جبتي بس كثير منها مكررة وأكيد فيه منها جديد .. انا بروحي نسيت شاللي مرينا عليه.

صح كلامك بن غيث بس قلة من الكلمات شبه مندثرة للكل.

نور الحور عويزه يدتي الله يرحمها كانت تقولها لي وايد وصح هديه.

وأخيراً كلمة متعضرط .. مصطلح من أهل شمال قطر .. وتعني الإنسان المستهتر .. بايعها يعني شكل ما نقول بالعاميه.

[حسن]

محقان يعني محقان

[نوار قطر]

محقان يعني محقان


هههههه صج محقان شنو تفسيرها ،،، محقان شس يحطونه فالغرشه عشان اذا نبي نصب شي وسط الغرشه نصبه بسهوله فهموتو :rolleyes2:

فعلا ذكرتوني بكلمة عويزه يدي الله يرحمه كان دايما يخصني من بد احفاده بعويزه :weeping:

[لاجل QT]

الحين خلاص الواحد ما يعرف جيرانه الا القليل.

اي والله ..الدنيا وشقاها لهونا:(

متحوب = متروس

[نور الحور]

هههههه صج محقان شنو تفسيرها ،،، محقان شس يحطونه فالغرشه عشان اذا نبي نصب شي وسط الغرشه نصبه بسهوله فهموتو :rolleyes2:

فعلا ذكرتوني بكلمة عويزه يدي الله يرحمه كان دايما يخصني من بد احفاده بعويزه :weeping:



قمع يعني ؟؟ :secret:

[ام حمادي]

مرقد : فراش النوم

هجور : وجبة العصر > للخين اقولها الكل يستغرب منها :(

دسوس : دلاغ و قفاز

برقيه : رساله وتقال للشخص نقال الكلام مثلا فلان برقيه لحد يقوله شي ههههه

قدووع : ملة التمر

ام بريد : لبن مفيوح وياخذونه متكتل يؤكل مع التمر وبعض المناطق يسمونه كرثي

غبوق : اظن شربة من اللبن

كرفايه : سرير

متفندي : يقلد الاجانب يعني صاير فندي هههههههه

مطيوش : مفيووح

هذا الي ف بالي واحس محد قالها

[بنت قطريههه]

لا تنسون كلمة روزنه وهى نافذه تعمل من الجص في البيت والبشتخته وهي صندوق خشبي والجدوم وهو مثل الفأس والرحى وهي لطحن الحب والصوفر يه إناء واسع للرز والمحماس لحمس القهوه والخرج لوضع الأغراض فيه

[معماري قطري]

مرقد : فراش النوم

هجور : وجبة العصر > للخين اقولها الكل يستغرب منها :(

دسوس : دلاغ و قفاز

برقيه : رساله وتقال للشخص نقال الكلام مثلا فلان برقيه لحد يقوله شي ههههه

قدووع : ملة التمر

ام بريد : لبن مفيوح وياخذونه متكتل يؤكل مع التمر وبعض المناطق يسمونه كرثي

غبوق : اظن شربة من اللبن

كرفايه : سرير

متفندي : يقلد الاجانب يعني صاير فندي هههههههه

مطيوش : مفيووح

هذا الي ف بالي واحس محد قالها

بس كرفايه إنقالت الباقي أحسهم جداد.

[معماري قطري]

لا تنسون كلمة روزنه وهى نافذه تعمل من الجص في البيت والبشتخته وهي صندوق خشبي والجدوم وهو مثل الفأس والرحى وهي لطحن الحب والصوفر يه إناء واسع للرز والمحماس لحمس القهوه والخرج لوضع الأغراض فيه

قصدج روشنه صح؟

[Miss]

لا تماحقين على عمرج :secret:

[حسن]

مرقد : فراش النوم

هجور : وجبة العصر > للخين اقولها الكل يستغرب منها :(

دسوس : دلاغ و قفاز

برقيه : رساله وتقال للشخص نقال الكلام مثلا فلان برقيه لحد يقوله شي ههههه

قدووع : ملة التمر

ام بريد : لبن مفيوح وياخذونه متكتل يؤكل مع التمر وبعض المناطق يسمونه كرثي

غبوق : اظن شربة من اللبن

كرفايه : سرير

متفندي : يقلد الاجانب يعني صاير فندي هههههههه

مطيوش : مفيووح

هذا الي ف بالي واحس محد قالها

الهجور اعتقد هي الريوق اخبر الصبح انقوله تهيرت ولا لا
وام بريد هي اليقط عندنا

[الدمعه]

الهجور اعتقد هي الريوق اخبر الصبح انقوله تهيرت ولا لا
وام بريد هي اليقط عندنا


صح كلامك

الهجور = الهيور = تهيرت = تريقيت الصبح

وأم بريد = اليقط

[الدمعه]

لا تنسون كلمة روزنه وهى نافذه تعمل من الجص في البيت والبشتخته وهي صندوق خشبي والجدوم وهو مثل الفأس والرحى وهي لطحن الحب والصوفر يه إناء واسع للرز والمحماس لحمس القهوه والخرج لوضع الأغراض فيه


الروشنة قصدج.

يستعملونها أكثر شي حق الخنه والمرشات هاي اللي اعرفه

[نوار قطر]

قمع يعني ؟؟ :secret:


ههههههههه اي بالضبط :nice:

[حسن]

كلك =تعني سطل

[حسن]

دقله = يعني شبيه بالبالطو

[حسن]

بروه تعني ملكيه البيت

[حسن]

سويج تعني مفتاح

[حسن]

بيرق تعني علم

[حسن]

مرود الكحل تعني مرود

[الزلزال]

ادثوي

ههههههههههههه

[أسد الجزيرة]

مين يعرف الربعة

[حسن]

مين يعرف الربعة

وحده وزن في ذاك الوقت قبل الكيلو

لكن من يعرف الوار

[نوار قطر]

وحده وزن في ذاك الوقت قبل الكيلو

لكن من يعرف الوار

وحدة قياس نفس المتر:nice:

[حسن]

وحدة قياس نفس المتر:nice:

وانتي صح:thumbup:

[حسن]

الجوله او الكوله وشي

[سيناتورنايف]

الشلفا - نوع من الرماح

[سيناتورنايف]

التمبة - الشاطر يجاوب

[نوار قطر]

الجوله او الكوله وشي

احلف حسن والله جان زين اسئلتك عليها جوايز:tease:

الجوله الفرن الصغير :secret:

[نوار قطر]

التمبة - الشاطر يجاوب

الكوره :tease:

[حسن]

احلف حسن والله جان زين اسئلتك عليها جوايز:tease:

الجوله الفرن الصغير :secret:

حلو هل الاسم فرن صغير
اييه ذكرتيني ياما ضربت بمب وياما فتحت عينها بالابره

الله يرحم عهد القاز قاتل القمل

:victory:

[نوار قطر]

حلو هل الاسم فرن صغير
اييه ذكرتيني ياما ضربت بمب وياما فتحت عينها بالابره

الله يرحم عهد القاز قاتل القمل

:victory:

حسن :omg: انت من الطيبين

[نوار قطر]

وين جائزتي :playball:

[حسن]

حسن :omg: انت من الطيبين

للاسف اي اللي ماله حظ في زمن الشريين:weeping:



وين جائزتي :playball:

ابشري كبون غداء ولا عشاء من مطعم الشيف مرحباني لشخصين وطفل

:victory:

[نوار قطر]

للاسف اي اللي ماله حظ في زمن الشريين:weeping:






ابشري كبون غداء ولا عشاء من مطعم الشيف مرحباني لشخصين وطفل

:victory:

لا لا اقصد الطيبين مال اول الي شسمه ذي :secret:

مابي انا اعرف اطبخ يعني شبعانه من طباخ البيت غير الجائزه:whistling:

[سيناتورنايف]

وين جائزتي :playball:

الجائزة كورة بعد

[نوار قطر]

الجائزة كورة بعد

مابي كوره شاسوي بها :omg:

[سيناتورنايف]

مابي كوره شاسوي بها :omg:

خلاص طلي اصغير

[نوار قطر]

خلاص طلي اصغير

اوكى :nice:

[معماري قطري]

ما شاء الله فاتني وايد وكل اللي كنت أحسبهم صغار طلعوا عداداتهم قالبه مثل عدادي :tease:

[حسن]

ما شاء الله فاتني وايد وكل اللي كنت أحسبهم صغار طلعوا عداداتهم قالبه مثل عدادي :tease:

الحمدلله انا توني في التمرين:)

[بنت قطريههه]

بعد لا تنسون المده وهي للجلوس ألجصه لوضع التمر السراج للإنارة فنر للإنارة الصكيك اي الشوارع العسو للكنس تكرمون أيضاً المخمه الدهليز اي الممر التر يك للإنارة سمنديقه والأشطر اللي يعرفها

[نور الحور]

بعد لا تنسون المده وهي للجلوس ألجصه لوضع التمر السراج للإنارة فنر للإنارة الصكيك اي الشوارع العسو للكنس تكرمون أيضاً المخمه الدهليز اي الممر التر يك للإنارة سمنديقه والأشطر اللي يعرفها

سمنديقة يعني لوح ..تمثال.. أي شي بدون فايدة ..دايما أسمع يدتي تقول عن الدريول انه سمنديقة :secret:

[معماري قطري]

الحمدلله انا توني في التمرين:)

من قلت تمشي يمين الشارع وحدك 60 عرفت كم عمرك بس مب معلم :) ذكرتني بالوالد كان يقول لي أول ما بديت أسوق أتعجب وانا أشوفك تطلع من الدوار سيده ماخذ يسار .. ما يدري إن بساتن السياره كانت تستغيث.

[معماري قطري]

بعد لا تنسون المده وهي للجلوس ألجصه لوضع التمر السراج للإنارة فنر للإنارة الصكيك اي الشوارع العسو للكنس تكرمون أيضاً المخمه الدهليز اي الممر التر يك للإنارة سمنديقه والأشطر اللي يعرفها

الدهليز لغة عربية فصحى إحنا ما عندنا الا الدواعيس والسكيك

[معماري قطري]

سمنديقة يعني لوح ..تمثال.. أي شي بدون فايدة ..دايما أسمع يدتي تقول عن الدريول انه سمنديقة :secret:

هههههههه صمنديغه هندي غريغا .. الحين بيزعلون الهنود بيشتكون عند حقوق الإنسان

[بنت قطريههه]

الدر وأزه والمجبه وهي الغطاء الجامعة وهي توضع فيها آيات قرانيه المحو وهي يعمل من الزعفران الألعاب الموجودة كانت من الأعواد تلبس ويعمل لها قماش وتصبح عروسه والجنجفه وهي الورق والقصه وهي لعبه من الحصى الخطه الدورفه الغميضه

[معماري قطري]

الدر وأزه والمجبه وهي الغطاء الجامعة وهي توضع فيها آيات قرانيه المحو وهي يعمل من الزعفران الألعاب الموجودة كانت من الأعواد تلبس ويعمل لها قماش وتصبح عروسه والجنجفه وهي الورق والقصه وهي لعبه من الحصى الخطه الدورفه الغميضه

صحيح الدروازه أصلها فارسي على ما اظن ويقولون درفازه .. ومنها مشتقة كلمة دريشه.