استشارة بخصوص بيوت التركيب

[أخت الكل]

بسم الله الرحمن الرحيم


أخواني الموضوع هو إن فيه مهندسة معمارية مدحت بيوت التركيب او الخرسانة الجاهزة

خصوصا اذا كانت البيوت راح تنعرض للتاجير تقول ان فيها متانه وقوة وان سعرها ارخص

من البيوت العادية وان سرعه التنفيذ اسرع ....

ابي رايكم بالموضوع واذا تعرفون شركة في الدوحة متخصصة

[طيف عابر]

هالتقنية معمول بها من20سنة في المانيا والصين وماليزيا وامريكا والباكستان وإلى الان لم يلحظوا عليها اي مشاكل

وهناك اربع تقنيات

أولا:بخصوص تقنية البناء الصينية ، أفيدكم بأن الفلل الصينية هي فلل صينية مسبقة الصنع من الواح خشبية ضد الرطوبة والحرارة وتقلل ما نسبتة ستون بالمئه من فاتورة الكهرباء والجدران من الخارج تلبس بالسراميك الذي يشبه حجر .
ثانيا:تقنية البناء بتقنية الفوم الرغوي الماليزي ويكون الصب في موقع العمل وتقلل فاتورة الكهرباء وتحتفظ بدرجة برودة الغرف ولا قدر الله في حال الحرائق تقاوم لاكثر من سبع ساعات وسماكة الجدران عشرة سم والواجهات الخارجية بالسراميك والابواب خشب حديدي والنوافذ من البيفي سي وللادوار المتكررة تكون الاعمدة خرسانة طبيعية تكلفة المتر اقل من السوق الحالي بنسبة ثلاثون بالمئة.
ثالثا:البناء بالحوائط مسبقة الصنع من الصين نيو وول متيرال وبمواصفات عالية وتحمل اعلى شهادات المواصفات والمقاييس العالمية واسعار البناء بها اقل من الموجود بنسبة عشرون بالمئة.
رابعا:التقنية الالمانية فهي حوائط بلاستيكية مضغوطة وجدرانها تملأ بالفوم الخرساني وبنفس المواصفات وتحتاج الي مصانع او توريدها من المانيا وسعر المتر اقل من التكاليف الحالية

وان شاء الله اكون فدتك بالموضوع
اذا حبيت يوجد واحد من الربع عنده شركة تنفيذ الرجاء التواصل عبر الخاص

[khaldoon]

انا اعرف انها اغلى ......لو ارخص و افضل ليش الناس ما تلجأ لها

[معماري قطري]

بنى الوالد بيت من الخرسانة الجاهزة من شركة العطية-كابريفاب .. وهي شركة محلية متضامنة مع شركة فرنسية، وهي نفسها الشركة اللي بنت بيوت الدفنة اللي طلعت فيها مشاكل كثيرة من حرارة وتشققات وغيره.

وبيت الوالد هذا سكنت فيه من 93 إلى 2006 وكان مبني في 1988 وهو بيت صغير مساحته تقارب ال 110 أمتار وتكلفته ذاك الوقت كانت 100 ألف ريال، وهذا النوع من البناء هو النوع المحسن من السابق .. والحمد لله البيت للحين موجود وصراحة درجة العزل الحراري فيه كثير عالية .. صيف بارد وشتاء دافي والمكيفات دوم تشتغل براحتها والكمبريسور يشتغل شوي ويرتاح ما عليه ضغط كبير.

ما ادري عن الشركة في الوقت الحالي بس آخر شغل عرفته لهم تركيب حوائط جاهزة للمدينة الطبية المقابلة لمستشفى حمد.

وفيه الخرسانة الخفيفة أو الفراغية واللي فيها مسامات تجعلها خفيفة وعازلة للحرارة والصوت، وهذي موجودة عند شركة العلي للمشاريع ويبنون منها بنيان تجاري لمجمعات كبيرة توصل ل 500 منزل، عندي رقم مهندسين الشركتين بس ما اعتقد الأول موجود أكيد رجع بلاده والثاني ممكن تغير رقمه من زمان ما كلمته.

[بن غيث]

معظم شركات المقاولات الكبرى تقوم ببناء المباني الجاهزة
لكن .. مشاريع فقط
اعرف شركة اسبانية تقوم حاليا بمشروع حكومي .. مباني تركيب .. لكن أنا متأكد ان اسعارهم ليست ارخص من بناء منزل عادي

بتكلم شخصياً عن الاسقف الجاهزة ... افضل من صب الاسقف العادية واقوى ولا تحتاج لعمل بلاستر ولا توجد بها اي عيوب لتغطيتها ..
السور الخارجي .. ايضا افضل واقوى على ان لا يزيد عرضة عن 5 امتار .. للمنازل العادية وليس القصور او المباني الكبرى

[khaled1]

البيوت التركيب افضل من جميع النواحي

[أخت الكل]

أخوي طيف عابر

الله يجزيك الجنه ع الرد الكافي الوافي وإن شاء الله اذا اعتمدنا الطريقة هذي في البنا راح اتواصل معك

[أخت الكل]

أخوي khaldoon

سئلنا هالسؤال وقالت هو أرخص في قطر لانه مو معروف كثير ولا عليه طلب رغم أنه هو الاجود

لكن في مصر هو الاغلى لأن الإقبال عليه هناك أكثر

[أخت الكل]

أخوي معماري قطري

يعني أخوي دامك من أهل الإختصاص هل تشجع على اعتماد الطريقة هذي في البناء ولا لا ؟

شكرا لطيب مرورك

[أخت الكل]

أخوي بن غيث

رد قيم جزاك الله جنة عرضها السماوات والارض أخوي

[أخت الكل]

أخوي khaled1

ياليتك تبرر لي ردك لان الهدف من طرحي للموضوع هو الاستفادة من خبراتكم في هـ المجال ...

الله ينور دربك أخوي الكريم ويسعد قلبك

[معماري قطري]

أخوي معماري قطري

يعني أخوي دامك من أهل الإختصاص هل تشجع على اعتماد الطريقة هذي في البناء ولا لا ؟

شكرا لطيب مرورك

أكيد اشجع وبكل قوة خصوصاً بمادة السيبوريكس خفيفة الوزن، وسمعت من فترة بيسون لها مصنع في قطر وما ادري شصار لو بدوا الإنتاج لازم بيكون فيه إعلان.

بس الصعوبة إختي في الشركات صحيح ما تبني حق حد .. انا سنة 1999 جهزت خرايط كاملة لعمارة وطلبت من مالك يسعر لي على أساس تكون خرسانة جاهزة، وهو من شيابنا الطيبين وتميت وراه أنطر تسعيره وهو كله يوعدني خير ولا شفت شيء منه لين عرفت انهم مشغولين في مشاريع كبيرة ورحت للبناء التقليدي.

وشركة العلي للمشاريع اللي مسوين كم مجمع بمادة السيبوريكس وهي خرسانة اسفنجية خفيفة حاولنا فيهم مرة لمشروع حكومي تهربوا حتى من التسعير لأنهم مشغولين.

غيرهم موجود في السوق على ما اعتقد جامكو، واتوقع شركة ناصر بن خالد دخلت هالمجال .. إنتي اسئلي وعلمينا شالتطورات.

[معماري قطري]

نسيت أقول بعد فيه شركة عالمية متعاونه مع بروة تسوي مباني تركيب من مواد ثانية .. أعتقد خشب وغيره ونظامهم يختلف.

[معماري قطري]

كإتجاه آخر عندج بعد مصنع قطر للخرسانة الجاهزة يسوون أسقف مجوفة خفيفة وجاهزة للتركيب، وتنفع على بنيان عادي ولا على أعمدة وقواعد بعد جاهزة الصب وتتركب في الموقع، بس بعدين القواطع تستخدمون أما طابوق عادي للداخل وللخارج نظام طابوق معزول أو طابوق السيبوريكس أو ألواح السيبوريكس.

وهذي اتوقع أي مقاول يسويها ومتوفره بسهولة في قطر.

[بن غيث]

نسيت أقول بعد فيه شركة عالمية متعاونه مع بروة تسوي مباني تركيب من مواد ثانية .. أعتقد خشب وغيره ونظامهم يختلف.

لالالالالالالالالالالالالالالالالالالالالالا
نظامهم تعيس وكله مشاكل فنية

[khaldoon]

نسيت أقول بعد فيه شركة عالمية متعاونه مع بروة تسوي مباني تركيب من مواد ثانية .. أعتقد خشب وغيره ونظامهم يختلف.

اكيد ما ننصح بالخشب لانه غير مقاوم للحريق و بعدين ما اعرف اشلون بالنسبة للعزل الحراري و المائي و الصوت

[معماري قطري]

لالالالالالالالالالالالالالالالالالالالالالا
نظامهم تعيس وكله مشاكل فنية

انا والله شفت شرح مبسط لبنائهم ولمقطع من الحايط ما تعمقت عدل .. عيل مباني بروة مكلفة وبتفشل خلال كم سنة شالفايدة؟ وين مهندسين الكهربه الأفذاذ اللي يعرفون الحوا وعروقها.

[معماري قطري]

اكيد ما ننصح بالخشب لانه غير مقاوم للحريق و بعدين ما اعرف اشلون بالنسبة للعزل الحراري و المائي و الصوت

هي الأرضيات على ما اعتقد خرسانية والأعمدة لكن الحوائط ... زين انا مستعمل خشب تكرم في الحمام له 7 سنين ورش ماي عليه ورطوبة ولا مركب عليه بلاط والحمد لله للحين تحس إنه طوفة مب بارتشن خشب، وفي أغلب حمامات البيت، وفيه خشب معالج ضد الحريق نهائياً ما يشتعل وتقدر تستخدمه في البحر حتى ما يتأثر بالماي.

شوف المارين بلايوود البني الغامق البلجيكي أو الماليزي من أحسن الأنواع خصوصاً حق السآب فريم للأبواب، ما تمشي فيه الارضة نهائياً وبعد البلاط مال الأرضية تركب فوقه فريم الباب.

[khaldoon]

هي الأرضيات على ما اعتقد خرسانية والأعمدة لكن الحوائط ... زين انا مستعمل خشب تكرم في الحمام له 7 سنين ورش ماي عليه ورطوبة ولا مركب عليه بلاط والحمد لله للحين تحس إنه طوفة مب بارتشن خشب، وفي أغلب حمامات البيت، وفيه خشب معالج ضد الحريق نهائياً ما يشتعل وتقدر تستخدمه في البحر حتى ما يتأثر بالماي.

شوف المارين بلايوود البني الغامق البلجيكي أو الماليزي من أحسن الأنواع خصوصاً حق السآب فريم للأبواب، ما تمشي فيه الارضة نهائياً وبعد البلاط مال الأرضية تركب فوقه فريم الباب.

بارك الله فيك على التوضيح.... طيب و بخصوص العزل الصوتي و الحراري؟

[أخت الكل]

أخواني الكرام

وفقكم الله وزداكم في العلم بسطه

[مضارب دوسري]

اللي اعرفه يا اختي ان بيوت التركيب اجارها اقل بكثير من البيوت العاديه
يعني صحيح تكلفتها اقل ولكن ايضا اجارها اقل بكثير

انا انصح بالبيوت العاديه عالاقل متى ما فكرتي تبيعين بتلقين السعر اللي يرضيج

[معماري قطري]

بارك الله فيك على التوضيح.... طيب و بخصوص العزل الصوتي و الحراري؟

بالنسبة لمباني بروة شكل ما عرفت كانت درجة العزل أحسن بكثير من المباني التقليدية، لأنه نظام بناء من طبقات وفيه عوازل، ومن جرب هذي المباني أكيد بيقدر يفيدنا.

[khaldoon]

من النقاش اللي صار في هذا الموضوع الجميل واضح انه غالبية اللي يبنون البيوت ما عندهم فكرة كاملة عن البيوت التركيب و غير مقتنعين فيها مع اني اشوفها رائعه و سريعة و ربما سهلة النقل.....واضح انه فكرة هذه البيوت ما تبلورت بعد عندنا و اقل طلبا و انتشارا و رغبة

[khaldoon]

بالنسبة لمباني بروة شكل ما عرفت كانت درجة العزل أحسن بكثير من المباني التقليدية، لأنه نظام بناء من طبقات وفيه عوازل، ومن جرب هذي المباني أكيد بيقدر يفيدنا.

اللي اذكره انه الحوائط الخارجية لمباني بروه عبارة عن جبس و فيها Rockwool


يا ريت لو احد جربها يخبرنا عن العزل ... مع اني صراحة مب مقتنع فيها كحوائط خارجية

[بن غيث]

كان المفروض يتم بنائها بأستعمال تقنية خرسانة القوالب المعزولة (icf) في كافة الإنشاءات
حسب ما عرفت من معرض المباني الخضراء
لانها تقنية صديقة للبيئة وموفرة وأقوى من البناء التقليدي
لكنهم استعانوا بشركات رديئة وقيام البناء بالواح الجبس مبطنة بالصوف الحراري

[معماري قطري]

كان المفروض يتم بنائها بأستعمال تقنية خرسانة القوالب المعزولة (icf) في كافة الإنشاءات
حسب ما عرفت من معرض المباني الخضراء
لانها تقنية صديقة للبيئة وموفرة وأقوى من البناء التقليدي
لكنهم استعانوا بشركات رديئة وقيام البناء بالواح الجبس مبطنة بالصوف الحراري

خطر وايد الصوف الحراري ويسبب أمراض خطيرة ووقت الحريق يكون كارثي غازاته سامة

[معماري قطري]

عن تجربتي في البيت اللي من خرسانة جاهزة كان وايد قوي وحوايطة الخارجية من طبقتين من الخرسانة وبينهم فوم محقون في التجويف كقطعة وحده، التكييف بسهولة يستوي بارد ويشتغل براحته، البرد وقت الشتاء برا يكون قوي واتفاجأ به لأن البيت دافي، الصوت ودرجة عزله زينه ولو بعد مركبين له درايش يو بي في سي بيكون قمة في العزل الحراري والصوتي.. ألحين شبه مهجور في بيت الوالد ويحتاج لصيانة للحمامات والمطبخ، لكن بسهولة ممكن يُسكن والهيكل الإنشائي خالي من العيوب ولا سرب مطر طول هالفترة من 1988 إلى الآن .. 24 سنة.

التكلفة أقل من ألف ريال للمتر تقريباً 900 ريال بس في سنة 1988، وألحين سووا مشروع القرية الطبية وهي العمارات الموجودة شرق مستشفى حمد قبل 2006 وتبين لي ما فيها مشاكل، وحسب ما عرفت تم الإستنجاد بهم بعد فشل شركة سعودية في تنفيذ العمل المطلوب.

وللعلم شركة العطية كابريفاب وشركة رادكو بينهم تعاون مستمر في الخرسانة الجاهزة، بس اتوقع يبنون للمشاريع مثل ما ذكر الأخ بن غيث، وهذا ما يمنع من السؤال يمكن يبنون خاص.