كيف ارفع الجي اكس أر ؟

[خوي الدرب]

السلام عليكم ورحمة الله
أيها الأحبة الـ جي أكس أر 8 سلندر
أرى أنها من الأمام أطأ من الخلف
كيف لي أن أرفع مقدمة السيارة كي تتساوى مع مؤخرة السيارة
وهل سبق لأحد منكم التجربة في ذلك
لأن هنالك شخص قال لي أن 8 سلندر ترفيعها من الأمام يكون صعبا جدا وأن وجد فأنه قد يسبب تبعات للسيارة غير محمودة
ولا أعلم عن صحة ما قال .
وكذلك لدي سؤال هل يمكن لي تركيب شاشة في الـ جي أكس أر ؟ وهل لو وجدت هل ستعمل بفاعلية وكأنها الموجودة في سيارة vx_r
كذلك السيارات مديل 2013 للأسف لم أجد بها حساسات وكذلك الشركة تقول أنها لم تعد تتعامل مع الشركة التي كانت تتعامل معها لتركيب الحساسات .
كذلك هل يمكن لي أن أجد حساسات كي أركبها في السيارة لأني حقيقة تعودت على الحساسات وتنبيهها خصوصا عند الرجوع للخلف .
وأسف على الإطالة

[الكبير الله]

اما ما يخص الترفيع في طريق سلوى من دوار عين خالد وانت رايح دوار الصناعية اول فتحة على اليمين فيه محلات لترفيع السيارات في بداية المحلات جنب اللي يركبون القزوزات

الشاشة والحساسات تحصل في محلات الزينة طب وتخيير او اذا حصلك فرصة تروح الحسا ترا ارخص من قطر

[Northqatar]

السلام عليكم

بالنسبة للترفيع عندى ملاحظة

بعد ماترفع الموتر على القياسات التى تعجبك

حط بالك على ارتفاع الأنوار الأمامية و ميزانيتهم عشان ماتكون مبهرة للسيارات الجاية على الطريق الثاني

تقبل مرورى

[al-obaidly]

اشترلك كت كامل ابركلك

[كتكوت الوحش]

الشيخ تقدر تشتري طيات صفر احسن لك وارفع للموتر ويمتصون الصدمات
اما انك ترفع الموتر بالربلات اتوقع كلام فاضي وموب سيفتي

[Mody]

اخوي ترفيع السيارة بالربلات عند هالكراجات بيخرب التوازن من الامام .. اسأل مجرب

واحيانا يخلي الستيرنغ شوي على صوب واصلحلك مثل ما قالك اخونا كتكوت

وبالنسبه للشاشه مع الحساسات خذلك كت كامل وبيضبط 100%

[فقط قطر]

خوي الدرب.....السيارة ماخذها جديدة والا مستعملة....

[تمون]

شوف يالغالي عندك كذا طريقة للترفيع

اما انك تركب ربل حجمه ٢ او ٢ ونص فقط لاتركب اكبر من هالرقم

او انك تركب الجامبينات الي تجي على الونش بترفع سيارتك ٢ سم وسعر الواحد ٨٠٠ ريال فالوكاله

طبعا ملاحظه مهمه الشغل على ترفيع او تنزيل السياره من الامام متعب وياخذ وقت قلبك بيعورك على موترك وانت تشوفهم يبطلون و يضربون بصباين وحاله
لكن من الخلف فك وتركيب بسيط جدا وسعر الجمبين الواحد ٨٠ ريال ( فرق فالسعر بين الامامي و الخلفي )

وانصحك انك ماتغير شي فالسياره لانها جديده و اكيد مع الايام ومع التحميل بيصير ارتفاع السياره مظبوط انطر عليها شهرين وبتلاحظ بنفسك

بالنسبة للشاشه افضل شاشه هي فلاي اوديو او رود روف شوف الاي انسب لك وكلهم نفس المواصفات بس انا استخدم رود روف
فيها نظام الخرائط و فيها وصله للفلاش يو اس بي و فيها وصلة للايبود و الايفون وبلوتوث و كاميرا خلفيه وتقدر تضيف لها كاميرا اماميه تصير سيارتك كامرتين
واذا ركبت الشاشه هذي ماتحتاج للحساسات بتكون الكاميرا موجوده

بالتوفيق

[خوي الدرب]

ألف ألف شكر وتقدير لكم أخوتي الكرام على توجيهكم ونصحكم
سؤال عن الشاشة
ما أفضل نوع في الشاشات وماهي المحلات المحترمة التي تقوم بتركيبها في السيارة دون مشاكل ومن كان له تجربة في ذلك
وكم سعر الشاشة مع التركيب أو بدونه
شكرا لكم مرة أخرى