فاتوره المواقف كالمطار والستي سنتر ؟!!

[حمد 2002]

السلام عليكم ورحمه الله وبركاته

عندي ملاحظه على الموظفين الاجانب الي يشتغلون بهالمواقف انهم مايرونك الشاشه يعني كم المبلغ الي عليك ، يعني بس ايقولون عليك المبلغ الفلاني . ومايعطونك الفاتوره بعد !!! . وهالطريقه سهله لخداع مرتادي المواقف !! لاني مره وقفت بموقف المطار وماخذيت وقت وايد وقالي الموظف عليك 10 ريال مع العلم انه مارواني الشاشه ولا عطاني فاتوره . وبنفس الشهر راحيت مواقف المطار مره ثانيه وقالي الموظف عليك 4 ريال !!! يعني احس بالسالفه نصب والموظفين ايحطون الاسعار على كيفهم :anger1:

[Rashid554]

اخوي عادي اطلب منهم الفاتورة :)

[Dexter]

لا مايحطون الأسعار على كيفهم، وفي الستي سينتر لازم تكون عندك فاتورة.. بدونها شلون بيعرف من متى انت موجود وكيف يحاسبك الريال؟ والفاتورة تاخذها من اول ماتدخل المواقف في مكينة تعطيك فاتورة قبل لا تفتح لك البوابة

[مضاد]

اخوي عادي اطلب منهم الفاتورة :)

عادي جداً :)

[الزعفراني]

ما يحتاج فاتورة اخوي .. التيكت اللي تاخذه اول ماتدخل المواقف فيه الوقت اللي دخلت فيه المواقف .. وعقب ما تطلع شيك ساعتك وبتعرف كم ساعه تميت .. وتسعيرة المواقف تقدر تسال عنها الموظف اللي تحاسبه

[.. الكاش ..]

ماضنتي محتاج فاتوره

[كازانوفا]

اطلب الفاتورة

[khaldoon]

من الفاتورة اللي تطلع من الجهاز اول ما تدخل يبين الوقت مثل ما قالوا الاخوان و انتبه انه اي دقيقة بعد الساعة تعتبر ساعة اضافيه

[السكين]

تاريخ الدخول مسجـل بس شوف اي مواقف توقف ؟

لو مواقف القادمون أو المغادرون الساعة بـ 5 ريال وأول ربع ساعة مجانية.

لو مواقف التأشيرات والخروجيات وتمديد الزيارات السياحية والأعمال اللي صوب فندق روتانا الساعة بـ 2 ريال ولو وقفت نص دقيقة تحسب عليك ساعة .

بس ببساطة انت اطلب فاتورتك وهي تعطيك ..

[azaz147]

السلام عليكم ورحمة الله وبركاته

اعتقد في لوحة قبل المواقف مكتوب فيها التسعيرة

بالاضافة الى الوقت مطبوع على الكرت وانت اتعرف كم المبلغ

[النابلسي]

بالنسبة للمطار، ممكن تستخدم جهاز الدفع الموجود في المواقف، اسهل و اسرع :victory:

[sahrleel]

السلام عليكم ورحمه الله وبركاته

عندي ملاحظه على الموظفين الاجانب الي يشتغلون بهالمواقف انهم مايرونك الشاشه يعني كم المبلغ الي عليك ، يعني بس ايقولون عليك المبلغ الفلاني . ومايعطونك الفاتوره بعد !!! . وهالطريقه سهله لخداع مرتادي المواقف !! لاني مره وقفت بموقف المطار وماخذيت وقت وايد وقالي الموظف عليك 10 ريال مع العلم انه مارواني الشاشه ولا عطاني فاتوره . وبنفس الشهر راحيت مواقف المطار مره ثانيه وقالي الموظف عليك 4 ريال !!! يعني احس بالسالفه نصب والموظفين ايحطون الاسعار على كيفهم :anger1:


كلامك صحيح اخوي ومنطقي 100%

وانا لاحظت نفس الشئ وكنت بكتب بخصوص هذا الموضوع

ويمكن التلاعب بالمبلغ بكل سهولة لانه لا شاشة تشوفها ولا فاتورة ولا وصل يعطيك لك

[معماري قطري]

ممكن التلاعب بسهولة وحتى لو طلبت فاتورة بيكون محضر فاتورة جاهزة غير حد ثاني ما طلبها

[The Watcher]

بالنسبة للمطار .. ممكن انك تدفع عن طريق الجهاز قبل التوجه للبوابة .. اضمن

[أكتتاب]

يالربع ليش مايحطون جهاز ومن غير موظفين .. الواحد يشخط بالبطاقه اللي يتم تعبئتها

وبلا موظفين

اعتقد ان في دول تعمل بهذا النظام .. مثل امريكا

[catqat]

الموضوع مايحتاج له موضوع، مثل ماقال الاخوان اطلب الفاتورة وخلص الامر، لان بالاول والاخر الغلط عليك انك ماطلبت اتشوف بعينك :)

[شبح الصمت]

يعطيك العافيه اخوي حمد

أمس رايح مطار الدوحة القآدمون المهم دخلت كنت ابي شغله ما خذت منـي 5 دقايق جيت ابي امشي زحمة نقعت فيها حروت الـ ساعه والله يوم وصلت الا يقولي ادفع 10 ريال ..

قلت له ادفع ليش انا ما تميت 5 دقايق والزحمة مالتكم اهي الي اخرتني .. عقب فكرت قلت هذا اش له خص اصلا يبه خلني ادفع وريح بالي ، ولو بنزل وبرجع للإدارة صج السالفه ما تسوى بس فيها قهر قهر قهر لانها مهب سالفة فلوس سالفة حق . .

[sahrleel]

لا وقمة المصخرة انا رحت المطار من اسبوع تقريبا ورحت قبل يومين بعد والجهاز الي عند بوابة الدخول ما يشتغل وفيه عند البوابة رجل امن يكتب لك الوقت بالقلم على ورقة بيضة صغيرة والقهر انه وانت طالع زحمة وايد وناس فوق بعض وتنتظر اكثر من 20 دقيقة ويضيع الوقت وما في الا 2 شباك ويحاسبك الموظف الفلبيني حسب مزاجه وطبعا ما في سيستيم ولا كمبيوتر ولا شي والا يضحك انه لما دفعت له المبلغ وانا طالع طلب مني 10 ريال فانا طلبت منه فاتورة فطبعا الاخ جاهز عنده ورق صغير اخذ ورقة وكتب عليها 10 وعطاني ايها طبعا مب فاتورة رسمية وما فيها اي كربون نسخة للتدقيق او المحاسبة يعني ما اعرف ويش اقول

[الخزرجي قطر]

الواحد يتاكد قبل الدفع مايحتاج فاتوره

[blackjacket]

كلامك صح و الصراحة انا ماعرفت حق مواقف الستي
مرة رحت تقريبا ثلاث ساعات دفعوني 13 ريال
ورحت مت يومين قعدت 3 ساعات و عندي فاتوره كارفور يعني اول ساعتين بلاش ، تخيلو دفعت 13 ريال و قلتلها هاي بعد الخصم قالتلي ايه
فاتورتك 18 ريال و خصمنا منك ساعتين والساعه الباقيه تدفها والي هي 13 ريال ، انا دفعت و يوم حركت حسبتها و حسيت انها غشتني
و قلت بتصل اتاكد من الاسعار
تخيلو بداله كارفور الرئسيه مايقدرون يحولونك علي اي قسم
و اذا عندك مرضوع لازم تروح لهم
قلت حق المموطف معقوله اذا ابي استفسر عن شي اضرب لي خط و اجيكم
قال هاي النظام عندنا ومانقدر نحول
الصراحة غريبه نظامهم فاشل عشان محد يشتكي

[R 7 A L]

المفروض فية شاشة برا الكونتر يشوفها السواق
ويطلع فيها المبلغ المستحق

[لاجل QT]

نتمنى يلغون نظام الدفع للمواقف

الجمعة..قعدت مع اليهال 7 ساعات ب 48 ؟؟

يعنى غير اللى اندفع داخل الستى على المشتريات ...

صرنا وين مانروح ندفع ....كل شي صاير منشار..ينشر في حلالنا

[هجمة مرتدة]

الفلبينيات في المطار تغانوا من وراء استغفال الناس . .
دخلوا رواتبهم أضعاف مضاعفة على حساب خلق الله !
المواقف في هذا الزمن أحدث طريقة للنصب والإحتيال . .
طبعاً والسيتي سنتر حدث ولا حرج !
معروف أن صاحبه مادّي من الطراز الأول وهمه الأول والأخير جمع المال . .
وكأنه بحاجة ماسّة لهذه الرسوم . .
ابن آدم طمّاع ولو جمّع مال قارون . .
فالأسعار في السيتي سنتر فلكية وغير منطقية أبداً أبداً مقارنة بباقي المواقف المدفوعة سواء في قطر أو الإمارات . .
أذكر عندما قرر صاحب السيتي سنتر اضافة رسوم على المواقف كان الهدف هو "حجب المواقف عن موظفي الشركات والمؤسسات المحيطة بالمجمع" . .
اذن لماذا لا يتم احتساب الرسوم في اوقات الدوام الرسمي فقط ؟
وبعد ذلك تكون المواقف لعامة الناس ؟

ومع ذلك نعلم تماماً أنه ،
لا حياة لمن تنادي . !