المرأه العامله وساعات الدوام الطويله .....

[omabdulla]

السلام عليكم ورحمة الله وبركاته،،

اليوم تكلمت حدى الخوات في برنامج وطني الحبيب صباح الخير عن ساعات الدوام الطويله ومايترتب عليها من امور ..

وانا اضم صوتي لصوتها واحييها بصراحه على طرحها للموضوع الهام ..

والسموحه مااعرف انزل روابط هي مداخلتها في الجزء الثاني الدقيقه 47 تقريبا ..

واتمنى تجاوب الاعضاء واراءهم بوضع حلول او اقتراحات بخصوص هالموضوع ..

[الصغيره]

واضم صوتي لكم واقول بعد نبي ساعات دراسيه حتى نعدل من شهاداتنا او يسمحون لنا بالانتساب نسال كل مسؤول ان ينظر للمراه القطريه العامله بعين العطف

ونطالب برواتب للنساء القطريات الاتي بحثن عن عمل وتعدن السن القانوني للعمل لان وزارة لعمل ما وجدت لهن عمل

وشكرا

[راجو قطر]

يرجال يبون تفكك اسري ويبون تزيد حالات الطلاق بلعربي يبون بنات قطر يقدون مصخره

[observer]

من اللي يبي تفكك اسري وتزيد حالات الطلاق ويقدون مصخرة يا راجو

وضح كلامك :telephone:؟ وبلا نغزات

[بـن عدوان]

صار لي سنة اشكي حق الناس .. ليش المرأة المتزوجة دوامها طويل ؟

ياخي تعب عليها

[Rashid554]

ياجماعه الي مايبي يشتغل يقعد في بيته سواء موظف او موظفه
محد اغصبه وقاله تعال اشتغل
عاجبك الشغل ياهلا ومرحبا وبتاخذ حقك اخر الشهر
مو عاجبك الشغل اقعد في بيتك لان الشغل مو اجباري على المواطنين
عدد ساعات العمل في قطر اسبوعياً من 40 الى 48 ساعه ولكن الي يفرقنا عن غيرنا كثرة الاجازات التي نملكها عكس الدول الاخرى .

[حواي الفريج]

ياجماعه الي مايبي يشتغل يقعد في بيته سواء موظف او موظفه
محد اغصبه وقاله تعال اشتغل
عاجبك الشغل ياهلا ومرحبا وبتاخذ حقك اخر الشهر
مو عاجبك الشغل اقعد في بيتك لان الشغل مو اجباري على المواطنين
عدد ساعات العمل في قطر اسبوعياً من 40 الى 48 ساعه ولكن الي يفرقنا عن غيرنا كثرة الاجازات التي نملكها عكس الدول الاخرى .



كفيت ووفيت طال عمرك
لكن حب لفلوس قاطع قلوبهم

باسثناء من هو او هي بحاجة الوظيفه

[الوان]

موضوع طيب جزاك الله خير

[كازانوفا]

بالفعل الساعات طويله وظلم للابناء

[حسن]

الحمدلله اني مفتك من هل الامور المره في البيت وهذا كان هدفي من الزواج

لكن مايمنع انه المراءه تشتغل وتودي دوركبير ومهم في المجتمع
بس المفروض يكون دوامها اكثر شي الساعه 12 على الاقل واساسا كذاب من يقول هناك في انتاجيه عند الوزارات
الصراحه لازم يسون لها حل وانا استغرب كيف الام تهتم بالزوج بالعيال بالبيت مستحيل تقول اقدر

[بصمة قطرية]

ياجماعه الي مايبي يشتغل يقعد في بيته سواء موظف او موظفه
محد اغصبه وقاله تعال اشتغل
عاجبك الشغل ياهلا ومرحبا وبتاخذ حقك اخر الشهر
مو عاجبك الشغل اقعد في بيتك لان الشغل مو اجباري على المواطنين
عدد ساعات العمل في قطر اسبوعياً من 40 الى 48 ساعه ولكن الي يفرقنا عن غيرنا كثرة الاجازات التي نملكها عكس الدول الاخرى .

كفيت ووفيت أخوي ..
بالفعل الشغل إختياري مش مجبورة الوحدة تشتغل
و قبل لا تشتغل تعرف ساعات العمل ..!!!

[عليه العوض]

الي محتاجه للشغل تستحمل الشغل والي مو محتاجه للشغل وللراتب تقعد في البيت عند الاولاد وتراعي زوجها
افضل من العمل

[فلتة زمانها]

ادا المرأه العاملة قعدت فالبيت بتصير مشاكل اسرية وينهار البنك المركزي

[غيمة مطر]

الموضوع له اكثر من جانب ...

الجانب الاول
ساعات الدوام الطويله --- اعتقد اي موظفه قبل ماتتوظف تعرف ساعات العمل لو هي مب محتاجه للوظيفه محد يجبرها تشتغل
اليهال وهم يهال وبالابتدائيه يقومون 5 للمدارس ويداومون من 7 لين 1 ونص يوصلون بيوتهم 2 وطالع
والام اعتقد صحتها واستطاعتها اكثر من هاليهال
اذا محتاجه للعمل لازم تستحمل
مثل مالطفل نجبره على دوام طويل عشان تحصيله العلمي ...
واذا المراه مب عاجبها تتوظف بوظيفه تقعد فيها للساعه 2 محد بيجبرها ابد ... تقعد فالبيت وتربي عيالها ...

الجانب الاخر

اللي يقول الام العامله مقصره في بيتها
طيب في كثير نساء غير عاملات
قاعده فالبيت
لكن ياراقده يا عالبي بي يا عالتلفزيون واليهال في يد ميري وليزا وغيرهم
وفي موظفات ترجع البيت وكل وقتها الباقي لبيتها وعيالها وزوجها

انا توظفت واخذت اجازه من غير راتب واشوف وضعي بالاهتمام بعيالي نفس الشي
لان المساله كيف وليست كم

والخلاصه اقولها

المرأه العاقله المتزنه تعرف تدير وقتها وترتبه بحيث تعطي كل ذي حق حقه
الشغل العيال الزوج ونفسها

هذا رايي من واقع مجتمعنا

[ام علي1981]

اصبح العمل ضروري للمرأة والرجل لكن تحتاج المرأة لساعات دوام اقل

[مشاكل]

غريب امر بعض النساء !!؟؟
يطالبن بالمساوة بالرجل عندما يتعلق الأمر بالفلوس !!!
ويطالبن بالتفرقة عن الرجل عندما يتعلق الامر بالراحات والسهالات !!!

[لمعة الالماس]

الحياة في الوقت الحالي تتطلب عمل المراة ومساعدة الزوج في البيت والمستقبل وانا اقترح انه يكون دوام الامهات لين 12 بس بشرط انها ما تطلع من الدوام الا مخلصة اشغالها وبصراحه الشغل ياخذ من وقتي يوميا ساعة إلى ساعتين وباقي الوقت قاعدة اقرى جرايد وننتظر نوقع ونرجع بيوتنا فبدال الوقت اللي نقضيه بلا شغله ليش ما يعيدون النظر في مسالة الدومات ويعدلون التوقيت مب عشان كسل والا شيء بس عشان الاطفال ونقعد معاهم

[omabdulla]

وجهات النظر تختلف واحترم رأي كل عضو

[Super Cool]

هههههههههههههه

اشكر فن الدلع....إي والله شغلوني و عطوني نفس الراتب و نفس المهام بس لا أبي أمشي بدري.....مب مهم مصالح الناس تتعطل....مب مهم الشغل يوقف....مب مهم البلد يخسر و المؤسسة تتعطل....أهم شي أنا أكون مرتاح

والله عقليات مادري اشلون....المهنية في صوب و انتوا في صوب!!!!

[حميداني]

المرونه مطلوبه علشان نرقى بالمجتمع ورقيه يبتدي في البيت بالاسره
شخصياً مع ان المرأه يكون لها عدد ساعات أقل تلتزم فيها
والمعاش ممكن ينخصم منه على عدد ساعات العمل نفسها , فتنحل المشكله
مب لازم تاخذ معاش 8 ساعات وهي ما تشتغل الا 6 ساعات
فهذا حل اشوفه وسط

[omabdulla]

ياجماعه الي مايبي يشتغل يقعد في بيته سواء موظف او موظفه
محد اغصبه وقاله تعال اشتغل
عاجبك الشغل ياهلا ومرحبا وبتاخذ حقك اخر الشهر
مو عاجبك الشغل اقعد في بيتك لان الشغل مو اجباري على المواطنين
عدد ساعات العمل في قطر اسبوعياً من 40 الى 48 ساعه ولكن الي يفرقنا عن غيرنا كثرة الاجازات التي نملكها عكس الدول الاخرى .

في اسلوب ارقى في الرد من هالاسلوب مانبي عنصريه وتعصب وتشدد ماله داعي

[omabdulla]

هههههههههههههه

اشكر فن الدلع....إي والله شغلوني و عطوني نفس الراتب و نفس المهام بس لا أبي أمشي بدري.....مب مهم مصالح الناس تتعطل....مب مهم الشغل يوقف....مب مهم البلد يخسر و المؤسسة تتعطل....أهم شي أنا أكون مرتاح

والله عقليات مادري اشلون....المهنية في صوب و انتوا في صوب!!!!

بعد في فن اسمه فن الرد والتعامل مع الغير ولوعلى العقليه ترا العقول تتدرج في التفكير

على الاقل احنا اشتغلنا في كل الوظايف من والى ماقلنا لا مب ماسكين مثلا كونتر ولا ارشيف ولا غيره واذا ادينا شغلنا اناديه على اكمل وجه وماقلنا نبي الراتب نفس الشي ينحسب على حسب ساعات العمل

[ANONYMOUS]

والمعاش ممكن ينخصم منه على عدد ساعات العمل نفسها , فتنحل المشكله
مب لازم تاخذ معاش 8 ساعات وهي ما تشتغل الا 6 ساعات
فهذا حل اشوفه وسط

عيل ابشرك ولا وحده بتداوم اقل من 8 ساعات

يارجل الحين الحريم يداومون في العيد عشان اوفر تايم تجي تقول ساعات اقل وراتب اقل تبيهم ينجلطون

طبعا البعض عشان التعميم مازين :p

[حميداني]

يا ريت لو كان عندنا مرونه بموضوع عدد الساعات هذي علشان لا احد يتعذر

[مشاكل]

عيل ابشرك ولا وحده بتداوم اقل من 8 ساعات

يارجل الحين الحريم يداومون في العيد عشان اوفر تايم تجي تقول ساعات اقل وراتب اقل تبيهم ينجلطون

طبعا البعض عشان التعميم مازين :p

ياعزيزي الموظفات عندنا يعتبرون التاخر فالدوام والخروج بدري حق مكتسب واذا جيت تكلمهم الشغل متعطل من سبتكم ،،، مب احسن لك يسوون اضراب
طبعاً البعض مب الكل لان التعميم مازين ههههههه

[كروشيه]

[center]المرأه في هذا الزمن اصبحت الضغوط عليها من كل حدب وصوب ، هي تعمل بدوام كامل ، و بعد عودتها للبيت يبدأ دوامها المنزلي من تدريس الابناء ومراعاة حاجاتهم والسهر وتربيتهم وتلبية احتياجات الزوج - أنا أعني هنا المرأه التي لا تركن للمدرسين الخصوصين والخادمات لمراعاة شؤون الأبناء _ ، بينما الزوج يرجع للمنزل ومسؤولياتها تكون اقل من مسؤولية المرأه ، استغرب من البعض الذين يلقون بالكلام جزافا ، هناك نساء في حاجة للعمل لانه ضغوطات الحياة المادية وغلاء المعيشة لا يكفيها راتب الزوج - انا اعني العيش في حدود المعقول- دون رفاهية زايده لانه المعيشه اصبحت غالية لا يستطيع احد ان ينكر ذلك، وهناك نساء مطلقات أو ارامل ويسعون على رزقة ابناءهم وفي نفس الوقت بعد انتهاء ساعات الدوام الطويله ترجع للمنزل لتقوم بدورها كأم ، في مثل هذه الحالات لا أعلم كيف سهلت على البعض قول عليها ان تتحمل ، تتحمل ماذا ظروف الحياه الصعبه التي دفعتها لتعمل أم تتحمل مسؤوليتها كأم تخاف الله وتحاول أن تؤدي دورها على أكمل وجه في حق اسرتها، وبعد كل ذلك بكل بساطه عليها ان تتحمل وهي في بادئ الأمر على أساس أنها على علم بساعات العمل ، نعم على علم والحاجة هي اللي دفعتها للقبول ولكن الأم لا يستطيع كائن من كان أن ينكر دورها الذي يفوق الأب أهمية في تربية النشأ وتلعب دور كبير ورئيس في إنشاء أسره سويه، والله اني اعلم نساء كثيرات بعشرة رجال مطلقات وارامل وتعمل وترجع إلى البيت وتمارس دورها كأم تربي وتسهر وتدرس وتقوم بدور الأب أيضا، بس في النهاية نقول الرحمة مطلوبة ، ومن حق المرأه القطرية أن تراعى وتقلل ساعات العمل لانه هناك ساعات عمل أخرى لا تنتهي في إنتظارها في المنزل

ويكفينا وصية الرسول عليه الصلاه والسلام عندما اوصى بالنساء في خطبة الوداع الأخيرة قبل وفاته لعلمه بالدور الذي تقوم به المرأه (اسْتَوْصُوا بِالنِّسَاءِ خَيْرًا فَإِنَّهُنَّ عِنْدَكُمْ عَوَانٍ )[/color][/size]

[بوخالد911]

هلا

الحريم يصلح لهن دوام الوزارات
والشركات الخاصة او شبة الخاصة تعب عليهن

[جفى الجوارح]

خلاص الي تبي تطلع بدري خل تتنازل عن جزء من راتبها
مايصير الريال يقعد يجحت من الصبح لين العصر وهي تطلع وتاخذ نفس راتبه

بعدين الي مايبي يشتغل لا يشتغل محد ضرب حد وقاله اشتغل غصب
بس بعد دوام لين الساعه 3 العصر وقت مبالغ فيه كثير
اشزينه دوام قبل لين 1 او 1 ونص
بعدين من المتفيج الي بيروح يخلص اموره في الوزارات الساعه 2 او 3

[بـن عدوان]

ياجماعه في حريم مجبورين انتوا ماتدرون بظروفهم !!

احنا كمجتمع لازم نقدم تضحيات حق بعض ونساعد بعض

مايصير نقول تبين ٨ ساعات ولا قعدي في البيت !!

نبي نطلع اجيال احسن من الاجيال الحالية

نبي عيالنا يطلعون احسن ناس

[الصغيره]

ياجماعه في حريم مجبورين انتوا ماتدرون بظروفهم !!

احنا كمجتمع لازم نقدم تضحيات حق بعض ونساعد بعض

مايصير نقول تبين ٨ ساعات ولا قعدي في البيت !!

نبي نطلع اجيال احسن من الاجيال الحالية

نبي عيالنا يطلعون احسن ناس

صح لسانك

وبارك الله فيك الصرااحه فيه ردود ما تعرف ان به نساء مجبورات على العمل وفاتحات بيوت ويكدن على ايتام


لكن وش نقول الله يكون بالعون وبس

[ANONYMOUS]

ياعزيزي الموظفات عندنا يعتبرون التاخر فالدوام والخروج بدري حق مكتسب واذا جيت تكلمهم الشغل متعطل من سبتكم ،،، مب احسن لك يسوون اضراب
طبعاً البعض مب الكل لان التعميم مازين ههههههه

علا الطاري ذكرتني بوحده تطنش للدوام ويوم كلمها المسؤول الجديد نادت له زوجها يهاوشه

شدعوه لحين في ناس كذا

مسكين والله هالماسول انكسرت شوكته بدري

[الزعفراني]

المرأه العامله اللي مب قد الشغل المفروض تقعد في البيت :)

[l0o0rd-qtr]

موب تبون مساواه عيل هذي المساواه تكرفون مثل الرجال

[ريتويت]

الشغل مهم والكل محتاج الشغل لغلاء المعيشه

[لمعة الالماس]

المراة تشتغل اكثر من الرجل في الغالب

وشغلها ادق ومنظم وتنجز اكثر وشغلة اسبوع عندهم المراه تخلصها في يوم

[أسد الجزيرة]

المراة تشتغل اكثر من الرجل في الغالب

وشغلها ادق ومنظم وتنجز اكثر وشغلة اسبوع عندهم المراه تخلصها في يوم

مب صحيح الانتاجية ما تعتمد على ريال او مرة تعتمد على الشخص نفسه اذا مجتهد او لا

[أسد الجزيرة]

اقترح انه دوام الحريم يخلص الساعة وحدة الظهر
و تستلم راتب ٦ ساعات فقط

[MAZEN37]

انا ضد عمل المراءه الا للضروره
ومحد حدها عاى الشغل والطلعه عقب مطالبات بتقلبل الدوام
قعدوا في بيوتكم اذا انتوا مب قد الشغل

[حسن]

سبحان الله

[ام ناصر1]

ما ندري شنو رد المسؤولين ع هالاقتراح ...

[حسن]

مرفوض مقدما

[برشلوني قطر]

المراة تشتغل اكثر من الرجل في الغالب

وشغلها ادق ومنظم وتنجز اكثر وشغلة اسبوع عندهم المراه تخلصها في يوم


:eek5::eek5::eek5:

يمكن النسبه 1%

[ام ناصر1]

مرفوض مقدما
افا ..ليش...

[EUPHORIA]

كل وحده وظروفها ..

يمكن هي صج محتاجه الشغل وماعندها خدامة او حد يساعدها يالله شنو كراف فالدوام وكراف فالبيت ؟؟

انا خدامتي شردت من شهر وللحين ماوصلت خدامتي الثانيه لحد يكلمني :"(

[معماري قطري]

إحنا نقلنا عن الغرب أشياء كثيرة .. وتركنا أو تناسينا أشياء مهمة منها إن كثير من الوظائف تركز على الإنتاج وليس الدوام .. سواءً للرجل أو للمرأه .. مثلاً لو بنتكلم عن التدريس وهذا شيء انا شفته بعيني .. للمدرس ساعات تدريس معينة وله ساعات مكتب لمراجعة طلابه له وبس .. يعني ممكن المدرس يدرس مادة معينة 6 ساعات موزعة على 5 أيام في الأُسبوع أو ثلاث أيام كل يوم فيها يعطي حصتين مثلاً، وبعدها أو قبلها تكون فيه ساعة مكتب يكون هو متواجد للطلبة أو لإجتماع معين وباقي الوقت هو يقضي أما شغل ثاني وحتى ممكن في مدرسة ثانية أو في مجال آخر.

حد منا سئل نفسه شكثر يخلص من شغل فعلي؟ وكم ساعة أو دقيقة يشتغل هو فعلياً؟

ما دمنا في خير والحمد لله وعندنا كثير من اللي يدورون شغل ليش ما تكون وظيفة معينه يشغلونها إثنين كل واحد/ وحده يداوم نص دوام، وهذا ما دام فيه حاجة لإنتاج متواصل لكن إذا أوقات وتيرة العمل بالسالب المفروض أما يكون فيه شغل لوقت الموظف بتطويره أو حتى بترفيهه شوي بحيث يروح يخلص شغلة معينة أو يرتاح باقي وقته.

بعض المؤسسات الحديثة تسوي أماكن للإسترخاء في حيز العمل .. وأماكن ترفيه وأُمور كثيرة .. رحت مره مصنع في منطقة صناعية في بلجيكا .. تمنيت يكون بيتنا فيها .. كانت مرتبة لأبعد الحدود والمصنع كان شيء خيالي .. فيه بحيرة صناعية ومكان خارجي على البحيرة وآخر داخلي تمر خلاله البحيرة للإسترخاء .. وقرب البحيرة غرفة زجاجية فيها أكلات خفيفة وشاي وقهوة .. واحنا بعض مقرات عملنا يُرثى لها من كل النواحي.. أو تكون برج مكدسين فيه المكاتب ما تقدر تدل طريقك وين ولا مخرج الطواريء وقت الحريق وين وهذا شفته في مبنى التخطيط العمراني.

[محمد سعيد]

الحرمة مكانها البيت

تحملوا اذا مشيتوا عكس التيار

[الخيالة]

لو ماكنت مشغوله ماكنت بشتغل مايهمني الفلوس بس مجبوره ومضطره اشتغل مؤ بس ثمان ساعات الي 10 ساعات ومرات 12 ساعه بعد

[مبارك سعد]

الحرمة مكانها البيت

تحملوا اذا مشيتوا عكس التيار

صح مكانها البيت و يبون يتساون بالرجل وعند الشغل يبون وقت اقل من الرجال سبحان الله مااضعف الحرمه عند الشغل وما اقوها عند الراتب تاخذ الفلوس وتروح السوق ماتجي الافي الليل وعند الشغل تشتكي طول الدوام0

[مبارك سعد]

استغرب اذا المره تبي دوام اقل وهي تشتغل في اماكن مخطلطه او هي في فرع والرجال في فرع اشلون لوكان دوامها اقل مثلا لين الساعه 11والرجال لين الساعه 2 او3بتعطل المعاملات كذا0 فرضا جاء واحد من المراجعين يبي يكمل معاملته صوب الحريم انقوله تعال بكره المره
خلص دوامها ويش هذا التعطيل فكرو بعقل0

[Bo jassim 33]

الزبده :

هذا دوام رسمي ..

اللي يطالب بتخفيض ساعات العمل :

يطلب للجنسين : الذكور والاناث

مع العلم اننا في الوقت الحالي :

الذكور يطلبون المساواة

المساااااااواه مع الاناث

ما نبي الا المساواااااااه