استفسار عن العضم والبلستر

[Bo M7med]

السلام عليكم ورحمه الله وبركاته

اخواني حبيت اسئلكم

انا اتفقت معا المقاول على انه يبني لي عضم وبلستر فقط والتشطيب يكون علي

الكهرب والماي عندي من يركبهم وافكر اجيب الكهرب من الامارات لانه سعر الانقليزي في الدوحه دبل

فحبيت استفسرعن دفعات لنك التنمية كيف اقدر استلمها خصوصا انه دفعات مؤخره ؟؟

و توجيهكم من ناحية التشطيب شاللي اركبه قبل يعني بلستر وعقب كهرب وماي والا مهرب وماي عقب بلستر

ومن ناحية التشطيب نصيحتكم عن تسلسل التشطيب من صبغ وبلاط وسيراميك وديكور

قواكم الله

[اللوز]

يشرفني ان اكون أول الاعضاء الذين يردون عليك في موضوعك

انت تتكلم هنا عن بناء بيت كامل وهناك مواضيع في هذا القسم تتكلم عن نفس موضوعك

نصيحتي اعطي فقط المقاول
عظم + بلاستر + كهرباء + مجاري ppr

وباقي عليك التشطيب
السبب الرئيسي لان تصير اخطاء من الكهربائي فينسى ان يعمل تمديد لمكيف ومن ثم يقوم المقاول بعمل خرسانة للسقف
او ان عمال المقاول يقومون بالخطأ على دوس بايبات الكهرباء ويقومون بكسر البايبات التي قام بها الكهربائي

السبب الثاني توفير لك مبلغ محترم على الاقل 150 ألف ريال
واهم شي في البيت العازل من شركة محترمة من شركة المسند للعازل
فلا تستهين بالعازل
وبخصوص الكهرباء نوع انجليزي عندك محل الخوري بجانب اشارات المجنون عندهم وايرات انجليزية
وبالتوفيق
واحنا حاضرين لك بالخدمة

[Bo M7med]

رحم الله والديك اخوي

وبخصوص دفعات البنك كيف نظامها ؟؟ بما انها تندفع بعد اتمام المرحلة؟؟

[شموخ دائم]

,

,


مرحبا


اخوي الكريم

راح اجاوب على سؤالك
لكن تذكر كلامي هذا زين كل واحد يشطب بيته لوحده وبعد ما يدخل هذي التجربه
يحرم يعيدها مره ثانيه من كثر التعب من العمال والاخطاء الي بيرتكبها في بيته وخاصه الكوالتي بالعمل
:)

عموما اخوي

اخوي الكريم انت لازم تسوي عقد ( تشطيب مع المقاول )
هذا العقد تقدمه للبنك

وتعمل عقد ثاني مع المقاول من بينكم ان انت تعمل عظم معاه وفيه كل
الامور المتفق عليها

في ( فورمه ) لبنك التنميه موضح فيها الدفعات والانجاز
هي عباره عن 10 دفعات
وكل دفعه مكتوب شنو تنجز حتى تستحق هذا الدفعه تطمن الموضوع سهل

المشكله ان انت ما تقدر تنزل الدفعه الا بتوقيع ( المقاول ) و ( ولاستشاري ) على فورمه البنك
وراح تحتاج المقاول الى اخر دفعه
تتفق معاه ان بعد العظم تبيه يوقع لك كل طلبات الدفعات ال 5 الباقيه
وتخلي طلب الدفعه عندك حتى وصول موعدها تقدمه للبنك

احيانا الاستشاري ما يوافق يوقع حتى يشوف ( المشروع والمرحله الي واصل لها )
لان هذي مسئوليه عليه امام الدوله والقانون

بالتوفيق لك



,

,

اخوك


شموخ دائم

[Bo M7med]

اخوي شموخ دائم

بخصوص الكوالتي تقدر تقول تعلمت من اخطاء اخواني والربع اللي بنوا قبلي

وما خاب من استشار ولا ندم من استخار

وبخصوص الدفعات عندي خبر في طريقتها و المقاول سويت معاه عقدين واحد للبنك و واحد اللي الشغل عليه

وكلمته وقال لي بوقع لك على الدفعات و الله يعينك معا الاستشاري اذا بيوقع والا لا

واحد من الربع شار علي باني اجيب عرض سعر للاغراض اللي ابيها وتنصرف لي الدفعه ؟؟

[شموخ دائم]

,

,


مرحبا


اخوي الكريم

موفق ان شاء الله

كل مرحله تعملها وتنتهي منها خل الاستشاري يمر يعاين ( وبيوقع )
وانصحك نصيحه لوجه الله

خل الاستشاري حقيقي وليس مجرد استشاري صوري
لحمايه بيتك اصرف زياده على الاستشاري كل ريال تصرفه راح يحميك من مشاكل كثيره

ترى الغش من العمال فوق ما يتخيله عقل وجراءه عجيبه فيهم

تخيل بس ( حقاره ) بعض العمال كيف تكون

انت واقف تراقب العمل بنفسك وتجيب لهم ( فطور ) وبيبسي وعصير
وهم حاطين لك خلطه الاسمنت قليله يوفر بالاسمنت وانت ما تعرف بهذي السوالف
وما يعمل منسوب صحيح ولا ميول بالتركيب

لما تسكن تلاقي الماي ناقع بالحمام لانه مافي ميول

لانه ما يبي يتعب نفسه ويبي يركب بسرعه وياخذ حسابه ويطلع وانت ما تعرف الا لين سكنت بعد سنه
تشوف الاخطاء

تخيل انه يلعب ( بسماكه ) الخرسانه اذا هي 40 سم يسويها 30
او اذا هي 15 يسويها 10 سم

وانت تجيب لهم غداء وبارد
:)

انا ما اخوفك انا ابي الجميع يعرف ان اساليب العمال
مايقدر يكتشفها الا استشاري او مقاول ( مغبر ) قديم في المهنه

( حتى مقاولين هذي الايام الي بس في المكتب ) ما يفهم هذي الامور للاسف

للاسف مافي ذمه ولا ضمير نهائيا كل هذا يسويه العامل والفورمن
لانه اعطاك ( سعر ارخص ) ويبي يعادل المربحه عنده
بهذا الاسلوب

الاستشاري ضروري ولازم استشاري جيد يزور الموقع اسبوعيا



والله يوفقك يارب


بالتوفيق لك



,

,

اخوك


شموخ دائم

[Bo M7med]

لا الحمدلله الاستشاري مضبوط وغير الاستشاري عندي عمي خبره فالبنيان و راعي مقاولات وبالعكس مدح لي الشغل والمقاول مجربينه من قبل

والله يجزاكم خير انا متابع مواضيعكم اللي تطرحونها من زمان من مرحلة تصميم الخريطه تقريبا من سنتين
والحين البيت واصل البنت هاوس والحمدلله احاول قد ما اقدر اني اتجنب الاخطاء اللي شفتها وسمعت عنها

قواك الله

[Bozizoo]

ياخي اذا عمك مقاول أمورك طيبه
لا تحاتي ان شاءالله مايقصر وياااك

[ميلاف]

الله يوفقك

[jassimqtr]

عندي استفسار بسيييييييييييييييييييييييط جدا جدا ومحيرني وايد
اذا عمك مقاول ليش ماتبني عنده ؟
على الاقل بيهتم في بيتك اكثر من الغريب
سؤال وجيه ؟
من ناحية السعر اكيد بيعطيك سعر اقل من السوق او جوده وتنفيذ ودقه افضل ,

[Bo M7med]

اللي يسال ليش مابنيت عند عمي

انا افضّل اني ابتعد عن القريب خصوصا في مسائل البنيان لان مشاكل البنيان واجد

والله يكتب اللي فيه الخير

[اللوز]

اللي يسال ليش مابنيت عند عمي

انا افضّل اني ابتعد عن القريب خصوصا في مسائل البنيان لان مشاكل البنيان واجد

والله يكتب اللي فيه الخير

1000000 %
كلامك صحيح
ابتعد عن المشاكل