مشكله بخرسانة العمود

[MAZEN37]

الاتفاق مع المقاول نوع الخرسانه المستخدمه لصب العمدان ان تكون خرسانه 30نيوتن جابرو
المهم وقت الصب جاب البمب ردي مكس وبداء يصب اول عمود لكن المفاجاءه انه اكتشفت انه الخرسانه فعلا 30 نيوتن لكن الحجر ليم ستون. يعني مهب جابرو
وتم وقف الصب فورا لكن كان صاب نص العمود
تم كنسلت الخرسانه والمهم جاب الخرسانه الجابرو وكمل صب باقي العمود وتكملة كل العمدان
سؤالي هل سوف يتاءثر العمود الي نصه ليم ستون ونصه جابرو من حيث المتانه والتجانس او مافي مشكله
يهمني اراء المختصين

والحمدلله

[هدوء العاصفة]

خله يكسر القديم ويسويه مرة ثانية دام انه ليم ستون

[معماري قطري]

أخ مازن 37 كيف حالك؟

انا يا اخوي وجهة نظري الغابرو حق أغراض بناء ثانية من أهمها الطرق والجسور وبعض الإحتياجات الخاصة لخرسانة قوية، وهو ميزته إنه ما يتفتت ويقاوم بعض الكيماويات في التربة.. بس سووا له دعايه أكبر من حجمه لأغراض تجارية، وخصوصاً لأغراض الطرق استخدموا الغابرو ونسوا الأهم اللي هو نوعية القار، وخلط القابرو بقار أي كلام ويهتري ويتحلل من عوامل الجو يخلي القابرو يطلع كقطع كاملة ويخترب الطريق .. وتستوي كنك يا زيد ما غزيت.

للبيوت العادية حتى لعمارات عشر وعشرين دور ما تحتاجه نهائياً، وعندنا بنايات قديمة نقدر نقول عنها أكل عليها الدهر وشرب ومبنية بحجر جيري وهي للحين واقفة ولا فيها مشاكل خرسانة.

عادي الوضع عندك تطمن وحتى لو كانت الخرسانة ضعيفة ما عندك مشكلة .. وصدقني مستحيل يكون فحص الخرسانة 30 بالضبط .. هي عينات عينة تجيك يمكن 25 وثانية 27.5 وغيرها غير بس كمعدل تجي قريبة من المطلوب.

[شموخ دائم]

,

,

مرحبا

يصبحك بالخير اخوي مازن
انا بس حبيت اصبح عليكم
مشاكلك كثيره مع العمود اخوي مازن ليه مزعلينك
مره العمود ما يل ومره العمود صاب نصه
ههههه

اخوي معماري قطري ماقصر بالرد
وتوكل على الله امورك طيبه وما عندك مشكله

,

,


اخوك

شموخ دائم

[معماري قطري]

مقاولك عنده ذمه اللي وقف الصب وحتى الإستشاري ما دام انهم انتبهوا لهالشيء .. وإحتمال يكون " Big Show " لأن المفروض يصبون عينة ويسون إختبار القمع ويشوفون شكثر تنزل الخرسانة قبل الصب ومنها يبين القابرو رمادي واضح.. خلاصة الكلام لتهتم وخلهم يكملون ولو من البداية طالب لايم ستون بيكون أرخص لك وبيمشي الحال لمئة سنة جدام إذا سووا الشغل صح.

[MAZEN37]

اشكر هدوء عاصفه كلامك صح بس قلت ان تمشي التعاون زين
واشكر معماري قطر براءيه النير وكلامه المنطقه. هو صحبح اول يبنون فيه وبرمل صبخه بعد لكن فكرت بالتجانس بينهم اهو صح لكن شكلك اقنعتني وبالنسبه للمقاول الله بالخير انا الي اكتشفت الخطاء خلها على ربك
واشكر استادنا شموخ والله ياخوك مدي هالعمود شسالفته تصدق انه نفس العمود بالبدايه كانت قواعده غلط وكانت اصغر
شكلي بجيب استشاري وبكع لانه مشاكل المقاولات كثير

[بن غيث]

السلام عليكم جميعا ..


يجب ..

أزالة هذا العمود فوراً .. وصبه من جديد لانه واضح ان المقاول غاش من البداية

من المواصفات الفنية للبناء بقطر (q.n.b.s) والملحقات المكملة من اشغال ووزارة البلدية وكهرماء

** الحصى: (عينة جابرو لكل الأعمال) ويتم استخدام الحصى متدرج الحبيبات الخالي من المواد العضوية والشوائب .. ويتم غسله قبل استعماله بأربع وعشرون ساعة .. ويجب أن يكون مطابقـاً للمواصفات البريطانية رقــم (812) .

** الخرسانات:

(1) يجب اعتماد مصنع الردى مكس من المهندس المشرف الذى يحق له رفض أى مصنع دون إبداء الأسباب . . وتكون كل أعمال الخرسانات من الحصى الجابرو.
(2) يتم عمل الخرسانة المسلحة ( قواعد –جسور – أعمدة – أسقف ) من الخرسانة الجاهزة وبقوه لا تقل عن (30) نيوتن ومعالجتها حسب ما يرى الاستشاري

[معماري قطري]

السلام عليكم جميعا ..

مع أحترامي لجميع الردود السابقة من الاعضاء الاعزاء

لكن ..

يجب أزالة هذا العمود فوراً .. وصبه من جديد لانه بداية الغش من المقاول والاستشاري

من المواصفات الفنية للبناء بقطر (q.n.b.s) والملحقات المكملة من اشغال ووزارة البلدية وبافي الهيئات

** الحصى: (عينة جابرو لكل الأعمال) ويتم استخدام الحصى متدرج الحبيبات الخالي من المواد العضوية والشوائب .. ويتم غسله قبل استعماله بأربع وعشرون ساعة .. ويجب أن يكون مطابقـاً للمواصفات البريطانية رقــم (812) .

** الخرسانات:

(1) يجب اعتماد مصنع الردى مكس من المهندس المشرف الذى يحق له رفض أى مصنع دون إبداء الأسباب . . وتكون كل أعمال الخرسانات من الحصى الجابرو.
(2) يتم عمل الخرسانة المسلحة ( قواعد –جسور – أعمدة – أسقف ) من الخرسانة الجاهزة وبقوه لا تقل عن (30) نيوتن ومعالجتها حسب ما يرى الاستشاري

عليكم السلام بن غيث

يا خوي في دول عديدة يبنون مباشرةً على الطابوق عندنا وايد يبالغون .. وجزء كبير من المبالغة إستجلاب الغابرو من مناطق أُخرى بالباخرات .. قلت لو حق الطرق أوكي بس بعد بقار جيد علشان تكون خلطة الأسفلت متماسكة وما ينفصل منها الغابرو ... حق أبراج مرتفعة بعد زين لكن ينفرض فرض لكل المباني هنيه الخطأ.

زين سين سؤال .. ما دام المواصفات القطرية مانعة استخدام الحجر الجيري ليش مقاولنا قدر يحصل ردي مكس جيري؟ التكلفة الزايدة ندفعها احنا بغالي والربح يروح لتجار حطوا كل تبريراتهم للمحافظة على البيئة ولمتانة المباني .. ومبانينا تخطيطياً تحتاج إزالة بعد ما تكمل ربع عمرها الإفتراضي.

جدي الله يغفر له بنى مجلس وبيت قديم من 50 سنة .. والبيت هدموه من زمان والمجلس باقي شامخ لا شلوخ ولا كسور ويتحدى الزمن وبدون غابرو .. ومنازل كثيرة تبنى هالأيام بغابرو وتارسينها حديد يبني عمارة كاملة في دول أُخرى تحسب الدرهم قبل الريال .. هذي المنازل كلها شلوخ وبلاوي.

عن تجاوزات المقاول هذي أكيد مشكلة وخصوصاً إذا العمل يتم بدون استشاري.

[بن غيث]

قوه معماري.. انا عدلت في الكلام تجنباً لاي حساسية ممكن تكون او ينفهم غلط ..

كلامك صحيح .. لكن راح يتمادى المقاول في الغش

[حسن]

يا مازن مافيها شي كمل بس وروح

[MAZEN37]

قوه معماري.. انا عدلت في الكلام تجنباً لاي حساسية ممكن تكون او ينفهم غلط ..

كلامك صحيح .. لكن راح يتمادى المقاول في الغش

صحيح كلامك بن غيث المقاولين يبيلهم انتباه واشكرك عاى التوضيح القانوني

[MAZEN37]

يا مازن مافيها شي كمل بس وروح

هلا بحسن وينك من زمان ترفع معنوياتي
احلى شي عندك بكل ردودك انه الحياه حلوه ههه حبيبنا حسن بس مافي هامور الايام

[معماري قطري]

قوه معماري.. انا عدلت في الكلام تجنباً لاي حساسية ممكن تكون او ينفهم غلط ..

كلامك صحيح .. لكن راح يتمادى المقاول في الغش

بالعكس يا اخوي انا أأيدك الرأي إذا بنطبق العقد يكون يعرف المقاول إن وراه متابعين .. ولا عندي أي حساسيه من كلامك إنت تقول الحق ووجهة نظرك صحيحة .. وانا اقول إن العملية من أساسها ما تحتاج من بداية العقد واللي حددوا هالشيء في المواصفات القطرية المفروض عندهم سلطة إنهم يمنعون اللايم ستون بالكامل.

الله يعين اللي يتعامل مع مقاولين مثل ذيه بيتعب .. المقاول اللي يبي يغش عنده أساليب وايد وثغرات في كل شيء ... والمقاول الجاهل أو العليمي عدو نفسه وغيره تحصله طبعه يسوي كل شيء غلط ... والمقاول الشاطر بيسوي شغله صح وبيزيد شوي عليه والفاشل لو جبت 10 استشاريين يدققون عليه ويفهمونه شيسوي بيطفشهم واحد ورا الثاني.

انا كل اللي قصدته إنه ممكن وما فيها شيء إستخدام خرسانة اللايم ستون وحتى خلطها مع الغابرو لكن يفترض تكون فيه إجراءات ضد المقاول ومتابعة ومراقبة لكل اللي يسويه، ولو كان المقاول قاصد هالشيء ومخالف العقد صح يزيل الخطأ ويسوي الصح كإجراء عقابي له حتى ما يكرر سوالفه ويتحمل هو الخسارة.

[معماري قطري]

اشكر هدوء عاصفه كلامك صح بس قلت ان تمشي التعاون زين
واشكر معماري قطر براءيه النير وكلامه المنطقه. هو صحبح اول يبنون فيه وبرمل صبخه بعد لكن فكرت بالتجانس بينهم اهو صح لكن شكلك اقنعتني وبالنسبه للمقاول الله بالخير انا الي اكتشفت الخطاء خلها على ربك
واشكر استادنا شموخ والله ياخوك مدي هالعمود شسالفته تصدق انه نفس العمود بالبدايه كانت قواعده غلط وكانت اصغر
شكلي بجيب استشاري وبكع لانه مشاكل المقاولات كثير

شوف طلبية المقاول للخرسانة بتحصل نسخة عنده ونسخة عند الردي مكس وانا متأكد بتحصله طالب لايم ستون علشان يوفر على نفسه .. ومقاول مثل ذيه إحذر منه أساليب الغش وايد يبي لك استشاري شاطر يصيد كل لعبه قبل ليكملها .. وفي هالحالة إزالة العمود وبناءَه ضرورية .. واحتمال سوى كل الباقي لايم ستون وانت دافع قيمة الغابرو .. وهذا حذرت منه في ألاعيب الاستشاريين والمقاولين حتى مقاسات الأساسات والأعمدة وصبيات الأسقف يوفرون فيها على حساب المالك، وأوقات توفير يوصل إلى 30% وأكثر.

من يدقق في حجم الأساسات والأعمدة والصبيات؟ حتى بعض الاستشاريين تمر عليهم.

[هدوء العاصفة]

يا جماعة اذا تساهل الحين المقاول بيتمادى .. اذا رص عليه على الاقل بيعرف ان هذا الشخص ممكن يلعوزه ويخسره فبيتفادى الاخطاء المتعمدة والغبية وبيكون حريص اكثر ..

اللايم ستين يضعف من قوة الخرسانة خصوصا لايم ستون قطر الله بالخير .. وياخوي معماري بيوت قطر قبل ما تستحمل تعيش اكثر من عشرين سنة مع ان المفروض ان المبنى تكون مدته ستين سنة وفوق .. وكلامك صحيح في عوامل ثانية مش بس اللايم ستون اللي يقصر العمر لأن بعض المباني القديمة جدا مازالت قوية ..

[معماري قطري]

يا جماعة اذا تساهل الحين المقاول بيتمادى .. اذا رص عليه على الاقل بيعرف ان هذا الشخص ممكن يلعوزه ويخسره فبيتفادى الاخطاء المتعمدة والغبية وبيكون حريص اكثر ..

اللايم ستين يضعف من قوة الخرسانة خصوصا لايم ستون قطر الله بالخير .. وياخوي معماري بيوت قطر قبل ما تستحمل تعيش اكثر من عشرين سنة مع ان المفروض ان المبنى تكون مدته ستين سنة وفوق .. وكلامك صحيح في عوامل ثانية مش بس اللايم ستون اللي يقصر العمر لأن بعض المباني القديمة جدا مازالت قوية ..

الله يسلمك من وين جايب هالمعلومة؟ بيت الوالد له قريب 35 سنه وممكن يعمر أكثر ولايم ستون وبنيانه غش لكن متماسك ... وفيه مباني قديمة طلعت لجنة تستلمها من حوالي 25 إلى 30 سنة وكانت مبنية من حول 15 سنة قبل استلام اللجنة لها .. والمباني حكومية واللجنة قررت إن المباني آيلة للسقوط ولوقتك المباني تستخدم وما فيها شيء .. يعني الحين كملت 50 سنة.

فيه مباني مبنية من مئات السنين وكثير منا يعيش فيها إذا راح لندن ومبنية بمواد أولية بسيطة .. بس طبيعي المباني هذي تحتاج صيانة واهتمام والأهم محد يحاول يهدمها .. عندنا مباني تراثية حصى وطين كثير منها شبه متهدمة ومهملة وتجي سيارات تدفع حوايطها وتكسرها .. بدون تخريب وباهتمام وعناية وتنظيف وعزل عن المطر محد يقدر يقدر عمر المبنى الإفتراضي.

[بن غيث]

صحيح معماري كلامك .. بيتنا في الدوحة من الاربيعينات .. ومثل ما هو ..
لكن الصيانة هي الاساس ..ومشكلتنا في قطر عدم الاهتمام في صيانة البيوت . رغم اهميتها لضمان طول عمرها ..

[Bozizoo]

من دراسات من المواصفات و المقاييس القطريه
خرسانة الأيم ستون عمرها الافتراضي ٢٥ سنه
واكثر من كذا يكون البيت يكلف صيانة اكثر ومن الافضل ازالته

[معماري قطري]

من دراسات من المواصفات و المقاييس القطريه
خرسانة الأيم ستون عمرها الافتراضي ٢٥ سنه
واكثر من كذا يكون البيت يكلف صيانة اكثر ومن الافضل ازالته

انا قصدي صيانة واهتمام للبيت مب إهمال تام

ما قصدت نهائياً صيانة جذرية للهيكل الإنشائي .. يدخل في الصيانة صيانة عازل الماء للسطح لأن مشكلة اللايم ستون يتفاعل مع الماء ويخرب خلطة الخرسانة .. تعال باراويك بيت حصى وطين تمت صيانته بطرق بسيطة وللحين عايش ومسكون وما انسكن الا بعد 40 سنة من بناءِه.. وصار له حول 15 سنة أو أكثر مسكون .. المواصفات والمقاييس يعدونها مهندسين ويفترضون فرضيات بس عيل بيتي ألحين سكنته 7 سنين باقي في الرصيد بس 18 سنة وهو بخرسانة لايم ستون مهدد بالإنقراض .. هههه ديناصور مب بيت .. قبل لأخلص قرض الحكومة.

مثال ثاني شفت عمارة قديمة بنيان أول شاريها راعيها في بداية السبعينات وهي كانت مستعملة ومبنية ومسكونه قبل .. وصيانتها تقدر تقول ما تنصان وهي 4 أدوار والبايبات اللي للصرف حديد النوع القديم ومتكسرة ومصدية وتسرب ماي .. هذا كان حالها من 10 سنين والحين للحين عايشة لا وفيها عمال كل شقة يمكن 10 عمال .. تقديري لعمرها 50 سنة وكنت أقول لصاحبها سو لها صيانة شاملة واطرد اللي فيها واستغلها استغلال صح ذي خلاص بتطيح .. وتمت 10 سنين وبتتم أكثر وين اللي أعدوا المواصفات القطرية عنها؟

[معماري قطري]

صحيح معماري كلامك .. بيتنا في الدوحة من الاربيعينات .. ومثل ما هو ..
لكن الصيانة هي الاساس ..ومشكلتنا في قطر عدم الاهتمام في صيانة البيوت . رغم اهميتها لضمان طول عمرها ..

ما شاء الله يعني سبعين سنة الله يعطيه طولة العمر .. ليش بن غيث ما تصوره انا باحاول أصور دكاكين ابوي إذا موجوده للحين شكلها هدمتها الحكومة لأن قصوها من كم سنة .. وهذي بعد كانت موجودة من بداية الأربعينات .. لا وفوقها شقق...

سهل إننا نقول هالمبنى عمره الإفتراضي انتهى .. وإحنا نقول إفتراضي يعني نفترض مب متأكدين .. لكن صعب نعاينه ونتأكد من حالته ونقول بيعمر أقل شيء 10 سنين ما لم تحدث كارثة كزلزال أو فيضان أو إعصار قوي يهدمه.

[jassimqtr]

انا اقول ترجع للاستشاري ويقرا العقد بند الخرسانه الجاهزه الردي مكس هل هي جابرو ام حجر جير وبناء عليه تفاهم مع المقاول لان المقاول يطبق المواصفات المطلوبه منه لانك دافع له مبلغ مقابل بناء حسب العقد المتفق عليه لانك اذا طلبت زياده في المواصفات طالبك بالفرقات وانت الان تطالبه بتطبيق العقد والبنود المذكوره في كل بند , انا لا احرض على المقاول ولاكن انت مالك ودفعت ملبغ وقدره للمقاول وتدفع مبلغ اخر للاستشاري مقابل الاشراف ومتابعة المقاول من ناحية تطبيق المخططات والمواصفات المطلوبه منه . والمحاسبة تكون للطرفين المقاول والاستشتاري .

[MAZEN37]

رفع للفائده

[معماري قطري]

رفع للفائده

نبي نعرف شسويت ونتابع مع بنيانك ولتبخل علينا بالتصوير

[MAZEN37]

المشكله اعرف اصور بس ما عرف انزل الصور
عموما جبتلهم استشاري عطي الخباز خبزه والبنيان عالم فيه اسرار
صحيح ابشرك سويت السكاي لايت نفس الهرمي الي عندك

[معماري قطري]

المشكله اعرف اصور بس ما عرف انزل الصور
عموما جبتلهم استشاري عطي الخباز خبزه والبنيان عالم فيه اسرار
صحيح ابشرك سويت السكاي لايت نفس الهرمي الي عندك

خطوة إن شاء الله بترتاح إنك سويتها والله يوفقك