قصة معبرة - مراسلنا الفقير

[تركي محمد]

السلام عليكم


عندنا مراسل هندي كبير فالسن ،، وصار له سنين على وظيفته ومشهود له بحسن الخلق
و الانضباط و الالتزام بكل شئ في حياته

قرر هالسنة يروح الحج ،، و قعد طول هالسنه وهو يجمع من راتبه لين ما وصل المبلغ الي اجمعه 40 الف ريال .

مراسلنا كان مقرر يروح من قطر للهند ،، ياخذ امه معاه و من الهند للسعودية

قرر يسافر يوم السبت قبل الحج باسبوعين تقريباً

يوم الخميس اللي هو قبل موعد السفر بيومين ،، طلع الصبح من السكن و اخذ المبلغ معاه يحطه في البنك ،، وبحكم وظيفته كمراسل قرر انه يخلص الشغل وبعد مايخلص يروح للبنك

كان واقف عند احد الجهات الحكومية وقافل السيارة و نازل يودي المراسلات

رجع السيارة وقرر انه يروح البنك ،، شيك على الدرج حتى ياخذ المبلغ و يتفاجا ان المبلغ بالكامل غير موجود !!!

كلمنا و هو حزين نوعا ما ومب عارف ايش يسوي !! ولا عرفنا طريقة السرقه كيف تمت

احتمال حد من الي ساكنين معاه متابعه من فتره و اخذها من السيارة فنفس اليوم

المهم ان المبلغ انسرق بالكامل

وسبحان الله بعد ما نعرف الموضوع في الجهه الي يشتغل فيها مراسلنا ،، قرر احد الاخوة بجمع تبرعات بشكل سريع جدا حتى يساعدون بها المراسل قبل سفره حتى وان كان نصف المبلغ المسروق

وخلال 48 ساعه ( الخميس + الجمعه )

وفي صباح يوم السبت تم تسليم مراسلنا الفقير مبلغ ( 44 الف )

لدرجة ان هذا المراسل كادت الدموع ان تقتله

وكأن الله سبحانه يريد ان يجازيه بمبلغ اكثر من المبلغ اللي قام بجمعه طول هذه الفترة
بان يبتليه بسرقه وان يكافاه بعدها بيومين بمبلغ اكثر من المبلغ المسروق .

:nice:

[R 7 A L]

لدرجة ان هذا المراسل كادت الدموع ان تقتله


:cry2:

[السهم الشمالي]

وعليكم السلام ورحمة الله وبركاته

الحمد لله رب العالمين
هل قطر وأيضا اللي عايشين على تراب قطر فيهم خير ولله الحمد .

[ضوى]

سبحان الله

الله يسخر عباده لبعضهم البعض

[حبر وقرطاس]

يــــــــــا اللـــــــــــــــــــــــــــــــــــه


جــــــــــــاه العوض من رب ماتنام عينه رحـــــــيــــــم عظـــــــــــيــــــم كــــــــــــــــريم

وكيف لا والله ارحم الراحمين

الله يبارك له في حجه وعساه ذنب مغفور وحج مبرور يا رب وعسى لكم كلكم ياللي تبرعتوا
نفس اجر الحج وعسى الله يزيدكم من خيره ويبارك لكم في انفسكم واموالك وعيالكم واهلكم ويشفي مرضاكم ويقضي دينكم

[الزعفراني]

جزاكم الله خير ، ونيته طيبه هالمراسل لذلك الله كتب له ان يعوضه عن المبلغ اللي انسرق .

[BoFahed]

حسن الخلق والامانة هو اللا خلا الناس تقط له

[كازانوفا]

كان صادق ورب العالمين ادرى بالنفوس سبحانه

[الحياة الخالدة]

الحمـــــد لله رب العالمين
إنما الأعمال بالنيات .. و الله سبحانه عطاه على قــــد نيته

[باراكودا]

عكس مندوبنا العربي يقعد يجمع من المال الحرام وبعدين يروح الحج .

[ام ناصر1]

سبحان الله ...اعطاه الله على قد نيته ...وفي ثوابكم وثواب والديكم إن شا الله للي ما قصروا وساعدوه ...

[BoFahed]

عكس مندوبنا العربي يقعد يجمع من المال الحرام وبعدين يروح الحج .

هههههههههههه شر البلية ما يضحك يا ما ناس جذي عباله بانه الحج بيمحي اللي سواه ويتناسى بانه اللعه يغفر الذنوب جميعا الا الشرك وحقوق عباده

[alzween]

هذه هي قطر كما عرفناها وهذا هو الشعب القطري بطيبته وعطفه على المساكين ، نسأل الله أن يجازي من جبر خاطره وأن يجزيه خيرا في الدنيا بكثرة المال والأولاد والصحة والسعادة وأن جزيه في الآخرة بجنة الفردوس وأن ينفس عنه كربات القيامة يا رب ، وأن تظل قطر حكومة وشعبا من حسن إلى أحسن