ابغي مشورتكم للتشطيبات

[شيزكيك]

السلام عليكم ورحمة الله وبركاته

الصراحه ابغي منكم المساعدة والمشورة في تشطيبات الدور الثاني

احنا بيتنا دور واحد وحاليا نبني الدور الثاني وبما ان الدور الارضي الغرف والصالة والميلس كله سراميك حبيت نغير في الدور العلوي وبختار الزل هل القرار صائب

بالنسبة للسلم هل نختار له رخام وممكن تذكرون لي افضل محلات الرخام وتقريبا كم يكلف السلم

بالنسبة للمكيفات افضل نوعية سبلت وما ينقط ماي تبهدلنا مع الي عندنا وخرابهم وايد وماكنا بنحط سبلت بس قالوا هالقرار لازم يتنفذ بالنسبة للغرف الي بتكون في واجهة البيت
افضل محلات الابواب الخشب واسعاره تكون جيده
افضل محلات النوافذ والي يكون فيها زخارف وبكم المتر تقريبا
افضل محلات الحمامات مفكره اروح نابينا والعاصمه وكافود نبي جودة
وبعد ابي اغير الابواب الالمنيوم واحط الابواب الي خشب وعليه زخارف من الحديد وين افضل المحلات والتكلفه

وشكرا جزيلا لكل من قرا الموضع ولكل من بيرد علي

[بن غيث]

موفقيين أن شاء الله

[معماري قطري]

انا رايي إن السجاد مع أندرلي .. اللي هو رغوة ماصة للصدمات تحت .. للغرف يكون إختيار جيد .. وللأرضية تحت لو ما ركبتوا بلاط خلوه اسمنت مع رمل مخلوط بخلاط عادي مهب رديمكس يمكن يكون أوفر ويؤدي الغرض .. بس فيه خيوط فايبر تخلط مع الصبية وتعطيها تماسك وتخليها ما تتكسر وحتى لو الماي كثير والصبية مايعة تستوي تلقائية الإستواء " self leveling " وتركب فيها طبقة الأندرلي ثم السجاد .. السلم يعجبني اللي أطرافه تكون غرانيت نوع غالي .. بس الأطراف والوسط بعد سجاد مع قضبان نحاس تثبت السجاد الخاص بالدرج هذا لو كان مفتوح وبمكان مكشوف .. لو كان مخفي بس سجاد عادي يمشي معاه.

السبلت جنرال أو فوجي أو متسوبيشي .. بس مهم يكون تصريف الماي والبايب المركب صح إذا إنسد طبيعي بيسرب على داخل .. وانا أنصح الكل بعمل بايبات إحتياط تنزل على خارج البيت الحديقة مثلاً بالإضافة للي تروح في صرف الحمام.

عن الأبواب بدون وجع راس أبواب ونعلات من عند المتحدة للتجهيزات .. والأبواب تجي مصبوغة صبغ حراري في المصنع وجودة تصنيع عالية، وعندهم أشكال وايد .. انا غامرت ورحت للمناجر المحلية والشغل المكلف بس غلطت مرة ثانية ما لي الا المُصَنَع والجاهز .. وتركيبه سهل لو الفتحة أكبر يصغرونها يوضع ألواح خشب وتثبيت الفريم عليها.

أفضل النوافذ هي اليو بي في سي .. وممكن يسون الخارج اللون الأبيض لأنه يقاوم أشعة الشمس والداخل خشبي أو أي لون آخر، وفيه زخارف معدنية بين طبقتي الزجاج، ومروا على قطر يو بي في سي قرب مطعم تشاو تشاو الايطالي ومقابل تقريباً محطة بترول التيسير في طريق سلوى .. ومقابله محل المتحدة للتجهيزات .. وغيره بعد الإختيار الألماني في العزيزية ورا عيادة العلاج الطبيعي للجيش.

بالنسبة للأبواب الخارجية ركبي يو بي في سي بعد أفضل عزل صوت وغبار وحرارة.

[شيزكيك]

موفقيين أن شاء الله

يوفق الجميع

[MAZEN37]

الله يعطيك العافيه معماري
وبعد اذن صاحبة الموضوع بسال معماري
بالنسبه لنصيحته بتركيب بايب اضافي لين بره شلون يعني ما فهمت ممكن توضح لو سمحت