مساعدة لمشروع مكتب عقاري أو مكتب تصميم داخلي ..

[بنت شرق]

يعطيكم العافية ...
بغيت استفسر شنو افضل بالربح مكتب التصميم الداخلي أو المكتب العقاري ..
وكم رأس المال المطلوب وعدد العمال ...واجراءات فتح المحل ...والافضل المهندسين
بالخارج أو الي عندهم خبره بالشغل بقطر ...مع العلم ماعندي تجربة بفتح المكاتب ..

[المليونير الفقير]

والله ياختي اذا عندج علاقات جيده سوي مكتب عقاري وحطي الموظفين حريم ويكون متخصص للنساء واذا ماعندج علاقات فهالمجال مانصحج لانه يعتمد بالدرجه الاولى على العلاقات ومشروع التصميم حلو بس ماعتقد ينفع للحريم هذا واتمنالج كل التوفيق

[بو علاوي]

يعطيكم العافية ...
بغيت استفسر شنو افضل بالربح مكتب التصميم الداخلي أو المكتب العقاري ..
وكم رأس المال المطلوب وعدد العمال ...واجراءات فتح المحل ...والافضل المهندسين
بالخارج أو الي عندهم خبره بالشغل بقطر ...مع العلم ماعندي تجربة بفتح المكاتب ..

بالنسبة لمكتب العقارات اكثر الناس اللي فاتحين مكاتب هم اصلا عندهم عقارات لهم يديرونها والملاك يعرفون بعضهم وصعب الواحد يدخل بينهم كمكتب جديد.
والتصميم سالفته طوووويلة
انصحج نصيحة وفري فلوسج وشوفيلج مصلحة تكوني انتي فاهمة فيها.
وبالتوفيق

[بنت شرق]

تكسير مجاديف ..من اولها
عندي مصممة مصرية ...بس مشكلتي بالعلاقات العامة وطريقة جلب الزباين ...

[بو علاوي]

تكسير مجاديف ..من اولها
عندي مصممة مصرية ...بس مشكلتي بالعلاقات العامة وطريقة جلب الزباين ...

بالتوفيق

[المليونير الفقير]

تكسير مجاديف ..من اولها
عندي مصممة مصرية ...بس مشكلتي بالعلاقات العامة وطريقة جلب الزباين ...
اختي ممكن تجربين المشروع مدام عندج مصممه والزبائن يجون بالاعلانات فالوسيط او اهني فالمنتدى وبالتوفيق

[بنت شرق]

يعطيكم العافية للمرور والله يسهل الي فيه الخير

[معماري قطري]

تكسير مجاديف ..من اولها
عندي مصممة مصرية ...بس مشكلتي بالعلاقات العامة وطريقة جلب الزباين ...

الله يسهل أُمورج .. صدقيني يمكن مشروع تجاري بسيط ربحه مضمون أكثر .. مشكلتنا أوقات نتفق مع شخص يعطينا آمال كبيرة ويبينا نتحمل أي خسارة وهو خارج الحسبة في الخسارة وداخل الحسبة في الربح، وبعدين صعبه تتحكمين في نشاطهم بالكامل الا يكون وقت معين للدوام وتكونين متابعه أول بأول.

ومشكلة المكتب العقاري إن هناك شركات عقارية كبرى ماخذه حيز كبير من السوق وهناك مكاتب متأسسه من زمان ولها زبائن وماخذين الجزء الباقي تقدرين تقولين.

نرجع للمكتب الهندسي .. يحتاج راسمال كبير وإن يكون على مستوى من حيث الموقع والإعداد والإدارة التخصصية والموظفين من مهندسين ورسامين وحاسبين كميات ومشرفين، حتى التصميم الداخلي وقت التنفيذ يحتاج إشراف دقيق متعب.. والمشكله إن كثير موجودين دخلاء على شغلة التصميم الداخلي ويعتبرونه موضوع سهل ويصممون في بيوتهم ويديرون مشاريع التنفيذ والشراء بعمولات لهم وهم غير مختصين في الشغلة والكثير من العملاء ينخدع بهم ويتجه لهم ويتركون المكتب المؤسس بترخيص وأُسس تجارية صحيحه.

لو المهندسة موجودة في قطر وتقدر تستجلب شغلات كبيرة مؤسسات مثلاً .. محلات تجارية وغيرها من اللي تحتاج تصميم فعلي وبتفاصيل دقيقة .. ولو كانت صاحبة تخصص في شغلتها وعندها ترخيص من لجنة تصنيف المهندسين ممكن تبدون بشراكة معينة بينج وبينها وتؤسسون مكتب بسيط بدايةً وتطورونه مع الوقت .. تحتاجون أقل شيء رسام مختص ويوضح رسومات الإنترير بمقاطع شبه ثلاثية الأبعاد .. وتحتاجون حاسب كميات وممكن هذا يشرف على التنفيذ ويسعر المشاريع .. والمهندسة يكون واجبها التصميم وانتي الإداره العامه.

[بنت شرق]

المهندسة لها خبرة جيدة بمصر ..لكنها جديدة بقطر ،قررت اصرف نظر عن الموضوع بعد مداخلتك
يعطيك العافية

[معماري قطري]

المهندسة لها خبرة جيدة بمصر ..لكنها جديدة بقطر ،قررت اصرف نظر عن الموضوع بعد مداخلتك
يعطيك العافية

الله يعافيج إخت بنت شرق

كنت أفكر في الموضوع فيه حل ثاني بسيط وممكن .. اللي هو إنكم تفتحون مع مكتب متمكن وله وضعه وموقعه في السوق .. يعني مكتب إستشاري معماري وإنتوا تستلمون شغل التصميم الداخلي .. وكثير مكاتب محتاجة لهذا الفرع فيها وهذا التخصص .. وخلوا فترة الشراكة تجريبية ولمدة سنه وحددوا كل شيء في عقد متكامل وبالتوفيق لكم.

[بنت شرق]

اقتراح وجيه اشكرك عليه

[بنت شرق]

اسمحوا لي اقول مخاوفي ، شفت كذا فيلا معروضة للبيع ولاحظت التالي ، الي يبنون لاغراض
تجارية مايهمهم من عمليات الديكور الاالصبغ وتركيب السيراميك وكله مكررات سخيفه ورخيصة
وبعضها مافيها لا جودة ولا ابداع ، حتى السقف مسطح و مافيه تجويف ولا رغبة لوضع اي لمسة
جمالية ، وفقط فلل قليلة ومعظمها مجمعات لربعنا حاطين كم لمسة جمالية بالفلل بالديكور الداخلي
واذا كان غالبية المعروض هو للإيجار وليس للبيع ، شنو الي بيستفديه من يرغب بفتح مشروع
تصميم داخلي اذا وضع الفلل تشطيب عادي وبائس واكيد سيبحث عن المكتب الارخص ، فبهالطريقة ساكون
معرضة للخسارة من دفع ايجار ورواتب موظفين وعمال في شغل مش جايب همه مثل ما يقولون ،
وحتى لو توجهنا للجمهور العادي الي يمتلك منازل معروف موسم التغيرات هو بالاعياد ثم بالصيف
فتصير العملية مالها افق ، باستعادة رأس المال للمشروع خلال 5-6 سنوات
وسيتحويل مكتب الديكور الداخلي لمكتب تشطيبات يعني تغير مضمون فكرة العمل بكبرها
ما ادري اذا في كلامي شي غلط بس امبين الشغله ماراح تجيب همها
والسلام عليكم