بخصوص تأجير الايدي العاملة

[واقعية]

السلام عليكم ور حمة الله و بركاته

بغيت اسأل بكم يتم تأجير العمال ( للعقود الشهرية و السنوية )

انا حاليا احاول اني اسوي جدوى لشركة تاجير ايدي عاملة و اتمنى من ذوي الخبرة انهم يساعدوني في اخباري بكم تكون العقود

و شكرا للجميع

[طيف عابر]

هلا اختي انا طرشلتلك رقم رجال يسوي دراسات الجدوى وهو مستشار مالي من 20 سنة بقطر ومشروعك جدا مربح والله يوفقك

[واقعية]

هلا اختي انا طرشلتلك رقم رجال يسوي دراسات الجدوى وهو مستشار مالي من 20 سنة بقطر ومشروعك جدا مربح والله يوفقك

جزاك الله خير

انا عندي نموذج و احاول اقلده ,,, علشان اوفر :secret:

بس كنت محتاجة اعرف كم يكون التاجير حتى ارتب الموضوع

خالص الشكر

[طيف عابر]

من حقك يا اختي توفرين لكن في ناس متخصصة بهدا المجال وممكن تفيدك اكثر والله يوفقك

[شموخ دائم]

,

,


مرحبا

انا بتكلم عن ( تاجير العمال للشركات )

الشغله هذي تحتاج الحذر والتعامل مع الشركات المعروفه والكبيره قطر
واهم شي عقود ( الدفع كل شهر ) لان الشركات الكبيره تدفع كل شهرين
مما يسبب تاخير الرواتب وبالتالي اضراب العمال عن العمل

عموما

اذا موفرين السكن والمواصلات
يصير العقد الساعه 12 ريال او 13 ريال

واذا السكن والمواصلات عليهم
يصير السعر 6 او 7 ريال بالساعه


عندك مصاريف ( الاقامه 1210 ) لكل عامل

وعندك ( تذكره السفر ) كل سنتين

وعندك ايجار سكن العمال ( ضروري )

وجود مكتب ( مرخص ) وتواجد موظف فيه لمتابعه امور العمال
من تخليص معاملات ومن تجيد الاقامات ومراجعه وزاره العمل

هناك عمال ترفض او تعمل مشكله بمكان العمل ويتم ترجيعهم
وبالتالي تحتاجون سكن لعمالكم

مشاكل الشغله

1- تاخير المستحقات من الشركات ما تصرف لك الفلوس مما يترتب عليه تاخير الرواتب

2- مشاكل العمال في السكن من ( هوشات ) ومن ( شرب الخمر )

3- مشاكل شكاوي العمال في وزاره العمل من تاخير الرواتب

4- العمال ما يشتغلون زين ويهملون العمل لانهم يعرفون انهم شغالين لشركه اخرى بالساعه
مما يتوجب وجود فورمن لمتابعه العمال هناك وتحديد فترات الاكل والاستراحه
وتنظيم دخولهم وخروجهم

5- هروب العمال كل شهر يهرب 2 او 3 من العمال للبحث عن رواتب افضل
بعد ما يفهمون الشغل والسعر للساعه واماكن الطلب عليهم


الخلاصه

الربح بهذا النشاط يعتمد على ( عدد العمال ) اذا عندك 10 عمال غير عن الي عنده 40 عامل
وغير عن الي عنده 100 عامل والي عنده 300 عامل

هنا يكمن سر المربحه بهذا النشاط
:)
وكل عدد عمال وله مشاكله الي تختلف عن العدد الي اقل منه
وكل ما زاد عدد العمال ( زاد الربح ) وزاد ( المخاطره )



,


,


اخوك


شموخ دائم

[ميلاف]

بس هل هو حلال ولا حرام ؟

واذا كان حلال بس فيه شوائب من الحرام ؟

[شموخ دائم]

,

,

مرحبا

اخوي الكريم

توفير قوى عامله للشركات الكبيره عمل مافيه أي شبه لاسمح الله وما يخالف القانون

وعمل مهم في البلد ومهم جدا ان يكون هناك من يوفر العماله للمشاريع

هناك مشاريع مدتها شهرين او 4 شهور

وما تسوى يجيبون عمال وتذاكر وعمل اقامات وسكن ومواصلات

لذلك وجدت مكاتب توفير العماله او ما يسمى ( مسانده المشاريع ) بالقوى العامله

وهذه المكاتب تتعاقد مع العمال من الهند والنيبال والفلبين ترسل لهم ( عقد العمل )
وتحدد الراتب للعامل 1000 ريال او 1200
وتوفر له السكن والمواصلات والرعايه الطبيه ومستلزمات العمل من لبس وخلافه
وبدل اكل

لايوجد أي اخلال ببنود العقد مع العامل

وهذه الشركات تتحمل ( المخاطره ) اذا ما وجدت شركات تريد هذه العماله
العمال ياخذون رواتبهم وهم بدون عمل في السكن
لان العقد ينص على ذلك


الحرام ان ( تباع الفيز ) او ياخذ الكفيل ( اموال ) من مكفوله وهو تاركه في الشارع
ياكل عرقه

هناك فرق كبير بين هذا وذاك



,

,

اخوك


شموخ دائم

[Aigner]

بس نصيحه أختي اول ما تجبينهم لا تنسين تسوين تأمين لهم
ولازم راس لشركة لان الشيكات اطول


وأخوي شموخ ما قصر ذكر كل شئ وموقفه

[بو علاوي]

تاجير العمال شغلة ماوراها الا المشاكل لان فيه تعامل مع البشر وكل واحد منهم عنده رأي ونفسية شكل ومزاج وقانون وسالفة طوووويلة
من حوالي 4 سنوات استاجرت عمال لمدة اسبوع فكانت الشركة تاخذ 75 ريال مني عالعامل
بالنهاية وقفتهم لان مامنهم فايدة وكله راقدين

انا اعرف شركات توفر tea boys للهيئات الحكومية او الشركات الخاصة او حراس او من هالقبيل وشغلتهم مريحة واربح من سالفة العمال

وبالتوفيق

[captin]

Big Headache Avoid it

[واقعية]

اخواني الافاضل :

اشكر لكم مشاركتكم لي برأييكم

طيف عابر: خالص الشكر لك

شموخ: كفيت و وفيت كالعادة ... الله يبارك لنا فيك

ميلاف: اشكر لك التذكير بس اعتقد مثل ما قال اخوي شموخ .. احنا بنوفر لهم كل متطلبات المعيشة و مطلوب منهم اداء العمل

aigner, اكيد نقطة التأمين مهمة و حاطتها ف الحسبة

بوعلاوي: فعلا انا مفكرة في موضوع الحراس و التي بوي بعد مثل ما تفضلت .. شاكرة مشورتك لي

captin : ما في شي بدون وجع راس ... اللي يبي يبني شي لازم يتعب .. خالص الشكر

انا فعلا عزمت اني أبدأ شوي شوي و بنسبة ربحية قليلة لين اتعلم