مطر وقت صب الخرسانه

[MAZEN37]

اللهم صيبا نافعا والله يبارك ويزيد لا يخفى اليوم يوم ممطر ومستمر يزيد ويخف الحاصل
تم صب خرسانه لسقف وسط هذه الاجواء المباركه
والسؤال هل هناك تاثير سلبي على الخرسانه لاني ما اعتقد جفت لتجمع مياه المطر فوقها
رجاء الي يعرف معلومه لا يبخل علينا

[بومحمد المطاوعه]

ليش صبووو الخرسانات في هالجو

مايعرفون ان مطر ..؟

اعتقد له تأثير ياخوي

ان شاءالله الاخوان يفيدونك اكثر

[قطري قديم]

المطر يؤثر سلباً على الطبقات العليا من الخرسانة (السطح والطبقة التي تليه) بحيث أن نسبة W/C ترتفع في هذه الطبقات ما يؤدي بالضرورة إلى انخفاض قوة الخرسانة Strength ومتانتها Durability.

أيضا مع المطر تتكون ظاهرة الـ Surface Scaling والتي تعني ان وجه الصبيه الخارجيه ينمسح ويبان الحصي والكنكري ويكون السقف الخارجي مرقع لذلك ياخوي حاول تغطيها بنايلون شيت بعدين ياخوي المهندس الي عندك في الموقع لازم يحط في باله هالشي موب خلاص عشان طلبناخرسانه لازم نصب لا ياخوي عموما حاول تغطيه والله يوفقكك هناك حلول :
1-امكانيه رش السقف الخارجي كامل ببودره اسمنيه
2- معالجه السقف كامل بالكيميكال
وانشاء الله الاخوه المهندسين مايقصرون

[معماري قطري]

الصب في مثل هالحرارة زين بس المشكلة المطر إذا زود ميوعة الخرسانة يضعفها .. والمفروض تنحط قطع خيش وتنرش بالماء ثاني يوم .. شوف الأهم في الوقت الحالي تجفيف الخرسانة من فوق من الماي الزايد .. ودقق في الخرسانة بعد اسبوع واسبوعين وثلاثة وتأكد من إنها ما فيها تشققات، ولا يقولون لك التشققات بتنرقع بمادة معينة لأن السقف وضعه غير ولا بد يكون متماسك وينصب كقطعة وحده، وظهور شقوق واضحة معناها مشكلة كبيرة، لكن القشور البسيطة والدوائر المحفورة بسيطاً هذي حلها بصبية تجميلية وتعديلية بسيطة.

وبالتوفيق لك إن شاء الله.. ومبروك المطر على الجميع.

[بن غيث]

مثل ما أذكروا الاخوان .. لكن المقاول يفترض منه أنه يعرف في هذه الحالات شيسوي ..

[Bozizoo]

صار موقف مشابه لهذا الموقف
بس كان التصرف بسرعه وضع نيلون على السقف بالكامل