مشكلتي مع شركة تويوتا

[tawareq]

تم شراء سيارة من وكالة تويوتا قسم المستعمل النوع لكزس اي اس 350 موديل 2008 في سنة 2010 مرجعة قاطعه تقريبا 400 كم فقط وتم الاتفاق على السعر وبعد مراجعه كمبيوتر الشركة وملف السيارة على انها بدون اي حوادث واكد لنا الموظف المختص في المبيعات ان السيارة نظيفة وبدون حوادث ، لانها قاطعه 400 كم فقط وما يحتاج فحص السيارة .

تم استعمال السيارة من قبل الاهل وحاليا السيارة قاطعه 8500 كم فقط لقلة الاستعمال ، علما بأنه تم تغير الصدام الامامي فقط في الوكالة في عام 2010 نظرا لحدوث خدوش بسيطة في الصدام لاحتكاكه بعمود المواقف في احدى المستشفيات.

وتم عرض السيارة الان للبيع ، حيث بينا للمشتري ان الصدام الامامي تغير من الوكالة نظرا لخدوش بسيطة.
وعند فحص السيارة من قبل الفحص الفني في طريق سلوى تبين ان السيارة مصبوغه الصدام والرفرف والليت الامامي والبانه.
فتفاجائنا في الموضوع حيث انه تم شراء السيارة من الوكالة على انها سليمة وبدون حوادث نهائيا وتاكيد موظف المبيعات على ذلك بعد مراجعته سيستم الوكالة والملف .

طبعا السعر تغير بعد الفحص ووقنا بيع السيارة حتى نستفسر من وكالة تويوتا بالامر
وعند مراجعة مسؤول العلاقات العامة السيد/ رضوان وافادته بما حصل وبعد مراجعته لملف السيارة والسيستم في الوكالة لم يظهر شي وعند مراجعته للملف في كراج الصناعية تبين فعلا بوجود حادثين للسيارة

الحادث الاول : قبل شرائنا السيارة من قبل المشتري الاول الصدام الامامي + الرفرف _ الليت الامامي + البانة

والحادث الثاني بعد استلامنا السيارة : الصدام الامامي فقط

وقال السيد/ رضوان انهم ما يدرون ان السيارة فيها حادث
وقلتله ان الموظف جاب الملف وشيك على النظام وان السيارة نظيفة بدون حوادث
شلون طلع لحين ان السيارة فيها حادث وليش ما علمنا
طبعا هذا خطاء من وكالة تويوتا ان للسيارة اكثر من ملف وليس خطائ والشركة تتحمل هذا الخطاء ، حيث اني اتعامل مع الشركة وليس مع فرد .

وحاولت اقابل الدكتور ناصر عبدالغني وشرح الموضوع الانه رفض مقابلتي وحولني الى المدير التنفيذي اسمه/ كريم
وبعد المناقشة مع المدير التنفيذي في الامر بحضور السيد/ رضوان ريئس قسم العلاقات العامة وبحضور رئيس قسم المبيعات افادوا بعدم حصولي على اي تعويض وان الخطاء خطائ لعدم فحص السيارة وان الموضوع من سنتين.
كما ان مسؤول المبعات السابق تغير
قلت لهم ان اتعامل مع شركة ولا اتعامل مع فرد معين في الشركة
كما اعترف المدير التنفيذي بحصول هذه الحوادث في الشركة وفي الكراج لكثرة الزحام الشديد .
على العموم ما حصلت ايه نتيجة منهم واتصلت في حماية المستهلك وكلمني موظف وشرحتله الموضوع بالكامل
فرد علي : هل خذت من عندهم ورقة بان السيارة سليمة عند شرائك السيارة
فقلت له اي ورقة هذه اي شركة تعطيك ورقة رسمية ان السيارة ما فيها عيوب
المتعارف في قطر ان اي سيارة تشتريها من الوكالة ما يعطيك ورقة فنية او كتاب رسمي بان السيارة بدون عيوب بس يقولك السيارة على الضمان اذا فيها شي جيبه بنصلحه

هالمتعارف عليه

وانا خذت السيارة للاهل وماشية تقريبا 400 كم على ان السيارة ما فيها اي حوادث
علما باني اشتريت سيارة في 2011 تويوتا بريفيا للسواق في البيت موديل 2008 وطلعوا لي الملف وتبين ان السيارة فيها حادث في الرفرف الخلفي وتم تصليحه في الوكالة وتم خفض سعر السيارة.
يعني حتى حماية المستهلك ما سوا لي شي.

اسف ان طولت عليكم
بس حبيت اعرفكم بللي حصل معاي

وشكرا.

[@north_star@]

للأسف هذا خطأك بعدم فحص السيارة
والله يعوضك خير ويوفقك ببيعتها

[كازانوفا]

في لعب بالموضوع من قبل الوكاله عشان لا تخسر في بيعة السيارة على الزبائن

ربي يعوضك خير ان شالله

[tawareq]

للأسف هذا خطأك بعدم فحص السيارة
والله يعوضك خير ويوفقك ببيعتها

ما فحصت السيارة لان السيارة جديدة وماماشية شي وموظف المبيعات اكد لي ان السيارة ما فيها اي حوداث بعد مراجعه الملف والسيستم

[tawareq]

الحمدلله على كل حال والحق ما يضيع عند رب العالمين

[الزلزال]

الله يكون في عونك

[Aaziz]

واحد من ربعي تعرض لموضوع مشابه ولكن ماكان حادث و حاول انه يقابل ناصر ولكن صرفوه بطريقه مش حلوه . مع العلم انه شرح لهم الموضوع.

بكل بساطه اخذ رقم الفاكس او الايميل لا اذكر ايهم بالضبط . و كتب رساله لشركه تيوتا الام في اليابان يشرح فيها الوضع و استغلال الشركه و استغفال العميل و الاستخفاف به .

المهم بعد الرساله بوقت قصير اتصلت فيه السكرتيره تقول له المدير يبي يكلمك .. و كلمه و طلب منه زيارته للمكتب في اي وقت يناسبه.

وفعلا مر عليه في وقت لاحق و شرح له الوضع و قدموله اعتذار و فنشو المدير الي كان لصديقي الموقف معاه و صلحو سيارته مع تقديم بعض الامور المجانيه للسياره لا اذكرها و حطو في السيستم على رقم شاصي هذي السياره خصم 50ظھ على اي صيانه يسويها للسياره .

انصحك بان تسلك هذا الطريق

[OutLaw]

انا حصل معاي نفس الموضوع خذت سيارة جديده اصفار من الشركه في اكس ار
وبعد عام من الاستخدام وقاطعه السياره 8000 كم نويت ابيعها وبعد الفحص في طريق سلوى تبين ان الصدام الخلفي مصبوغ النصف الايمن ... واضطريت ان اخفض من السعر لما يقارب 3000 ريال بسبب هذا العيب ولا اعور راسي مع الوكاله الي ما اخذ منهم لاحق ولا باطل .. وتحسبنت عليهم ...

نعم مثل ما تفضلت انت تعاملت مع شركه مب فرد وعلى هذا الاساس كنت على ثقه من كلام المدير ومسئول المبيعات عن حالة السيارة

الله يعوضك خير ...

[Bin Hood]

في البحرين عند الاهل تويوتا كامري

وتعطلت في الشارع بشكل مفاجأة دون حادث اعتقد خلل في كمبيوتر السيارة

طرشت ايميل للشركة الام او الوكيل الاقليمي

واليوم الثاني اتصلت لي الوكالة وطلبت السيارة وقاموا باصلاحها بالمجان طبعا

[captin]

إلى الآن لاتوجد في قطر حقوق وحماية للمستهلك
بسبب ضعف التشريعات والأنظمة من جانب
وبسبب الإحتكار من جانب آخر بوجود موردين حصريين
للسلع والمواد والخدمات.

[راشد محمد]

لا تسكت عن حقك..ما يضيع حق وراه مطالب

[راعي 2006]

انا بصراحه ماقريت الردود ..

بس بصراحه الخطأ خطأك لانك مافحصت السياره لان السياره مستعمله وتوقع اي شي وانت ماسألت نفسك عن السبب الي خلاه يبيع سياره ماشيه 400 ؟؟ هذا شي بالعقل مايحتاج له سؤال

لو السياره مطلعها من الوكاله واكتشفت انها فيها حوادث هذا شي ثاني وتقدر تحاججهم عليه وتقدر تثبت بتقارير من المرور ان السياره ماصادها حادث منك انت . بس السياره مستعمله يعني في طرف اخر قبلك .

بس معوض خير والله يكتب لك الي فيه الخير

[wadha-qa]

نفس الموقف حصل معاي بس انا الفحص الفني ما طلع اي شي يقولون السياره سليمه و ماشيه 20 بس المهم اخوي قبل فتره راح الصناعيه يصلح تواير السياره قال لي ان السياره صاير لها حادث خشن وفيها تلحيم ومغيرين بعض القطع و البانه بس انا منصدمه شلون ما بين في الفحص ؟؟؟ وابي اعرف وش احسن شركه للفحص تكون ثقه ابي اشتري سيارة جديدة و ابي افحصها عشان اتاكد

[راعي 2006]

معليش اختي وش الي خلاج تصدقين راعي التواير وتحكمين عليه ان هو الي صح ؟؟

المهم انا من تجربتي ان الطاير للفحص افضل للسيارات اليابانيه

والالماني للفحص للسيارات الالمانيه

فقط وجهة نظري

[tawareq]

سالت الموظف ليش المالك يبي يرجع السيارة وهي جديدة .

قال لي موظف المبيعات المالك رجع الموتر للوكاله ان السيارة ماعجبته بعد الاستعمال وبياخذ سيارة لكزس ثانية اكبر.

وبحسن نية صدقناه .

[@north_star@]

ما فحصت السيارة لان السيارة جديدة وماماشية شي وموظف المبيعات اكد لي ان السيارة ما فيها اي حوداث بعد مراجعه الملف والسيستم

والله مافي ثقة هالايام ومافي بعد الاوراق الرسمية وللعلم فقط في سيارات تنضرب وهي نازلة من السفن بالمينا ويصلحونها وتنباع على انها بدون حوادث

[tawareq]

اتصلت في مدير مكتب الدكتور ناصر عبدالغني وشرحتله الموضوع علشان يبلغ الدكتور
فرفض ان يبلغه معللا ان الدكتور اوصاه وبشده عدم مقابلة اي شخص لديه شكوى في الامور والمشاكل الفنية في الشركة وتحويل هذه الشكاوي الى المدير التنفيذي السيد/ كريم ( مغربي )

[حفيد الأنصار]

تبين نصيحتي اتصلي بالشركة الام وارسلي لهم ايميل
في جميع شركات السيارات مقر الشركة الام يكون حريص على سمعة الشركة
اما المدراء التنفيذين بداخل الدول مايهمهم الا الربح المالي
شخصيا وواحد مخبرني بالسالفه يقوولي وواحد من اصدقائه اخذ جيب من فورد وخرب عليه بعدها بفتره وبعد مماطله من الوكاله ارسل ايميل للشركة الام
يقوول ماقعدت يوم الا متصل عليا الرئيس التنفيذي بالمنطقة من دبي وقال له ايش اللس تبيه وقال بس ابي فلووسي وخذو السيارة وهذا اللي صار
انصحك بايميل ترسلينه الى الشركة الام وايميل ترسلينه الى مقر الشركة الاقليمي بالبحرين وفالك العوض يارب

[نوفة قطر]

حسب ردود الاعضاء .. التواصل مع الشركه الام يفيد

فـ اسلك هالطريق يمكن فعلا يفيد وتاخذ حقك

..

هالموضوع يصير فالمعارض العاديه بس ماتوقعته يصير من الوكاله نفسها !

تذكرت مره اختي كانت بتشتري منهم سياره وبعد ما خلصت كل الاوراق وكانت بس ناطره يجيبون لها السياره من الصناعيه حسب اعتقادي ( سياره جديده مب مستعمله )

كلموها وقالوا لها ان اللي جايب السياره دعم فيها وتعالي اختاري لون ثاني لو حابه لان هاي كانت اخر وحده من هاللون

تعتقدون في هالحاله يصلحونها ويبيعونها على اساس جديده وماصادها شيء ؟

-

[almaf1a]

الاكثر مبيعا في قطر والافشل في الخدمات في الشرق الاوسط

مره نزلنا موتر التشيك الاول بعد استلام السيارة اتضح ان الرفرف الي ورى مصبوغ
بعد الشد والجذب تم التعويض ب gxr v8 بدل موترنا gxr v6
لا تسكت عن حقك حتى لو اضطريت تراسل الشركة الام باليابان

[بوخالد911]

قابل المدير القطري

والح عليهم بالمقابلة


لو ما فاد

اشتكي عليهم بالوكيل بالشرق الاوسط
وكذلك باليابان

[تويوتا تيربو]

حسب ردود الاعضاء .. التواصل مع الشركه الام يفيد

فـ اسلك هالطريق يمكن فعلا يفيد وتاخذ حقك

..

هالموضوع يصير فالمعارض العاديه بس ماتوقعته يصير من الوكاله نفسها !

تذكرت مره اختي كانت بتشتري منهم سياره وبعد ما خلصت كل الاوراق وكانت بس ناطره يجيبون لها السياره من الصناعيه حسب اعتقادي ( سياره جديده مب مستعمله )

كلموها وقالوا لها ان اللي جايب السياره دعم فيها وتعالي اختاري لون ثاني لو حابه لان هاي كانت اخر وحده من هاللون

تعتقدون في هالحاله يصلحونها ويبيعونها على اساس جديده وماصادها شيء ؟

-

اختي هاذي السالفه سارت مع نسيبي كان شاري كامري على اخر سنة 2007 قير عادي وكان اخر موتر قير عادي كان شاريها حق البيت المهم هو شراها كاش وخلص اوراق الموتر على اساس يتصلون فيه عشان يستلم الموتر المهم ماتصلو نسيبي استغرب اتصل فيهم قالولا انه الموتر اندعم ف الموظف قاله دور على موتر ثاني بس مافي قير عادي نسيبي طنقر قاله عادي انا ابي الكامري المدعومه لان شك في لعبه في الموضوع الموظف كان حاجزها على واحد ثاني لان ذاك دافع اكثر عشان جي قاله مدعومه عشان نسيبي يتنازل على الموتر ماعندهم ضمير ف قالهم انا اعرف فلان ولله ماني ذاكر من هو الموظف تخسبق درا انه راح يروح وطي قاله بعطيك عرض حلو قاله انه راح تنزل كوامري موديل 2008 بسعر حلو نسيبي قالهم اوك واصلن النسيب ماكان بكلم حد بس كان يخوفه لان ماينفع معاهم الى جي :nice:

[tradesman]

ممكن ايميل شركة الام - لكزس؟

[shark999qa]

نفس الطلب ممكن حد يعطيتي ايميا الشركو الام لتويوتا

[كتكوت الوحش]

موضوع تكرر مع رفيجي وكان مشتري أفالون ظ¢ظ*ظ*ظ© اعتقد وبعد ما استعملها اربع أيام اكتشف انه باب السائق مصبوغ وعلى أساس انه السيارة أصفار وأخذها عن طريق المسترجع ورجع لهم ورجعوا له السياره وعطوه إفلوسه

[Realestate]

فعلاً أرسل للشركة الأم في اليابان و هم بيحلوا المشكلة
عندهم قوانين صارمة

[المستور]

الله يكون بعونك يارب

[كازانوفا]

اتصلت في مدير مكتب الدكتور ناصر عبدالغني وشرحتله الموضوع علشان يبلغ الدكتور
فرفض ان يبلغه معللا ان الدكتور اوصاه وبشده عدم مقابلة اي شخص لديه شكوى في الامور والمشاكل الفنية في الشركة وتحويل هذه الشكاوي الى المدير التنفيذي السيد/ كريم ( مغربي )



على حسب ما عرفت انه ترك الشركه وشد رحاله الى بااااااااااااريس

والكل يمدح فيه لانه انسان متفهم جدا ولا يرضى الظلم للادارين او للناس عامه

[CH Engineer]

القوانين موجوده مشكلتنا ما ندل المحاكم

تقدر ترفع قضيه نصب واحتيال وتلاعب
ملفين واحد في الصناعيه والثاني في الشركة واعطائك بيانات خاطئه
وان شاء الله بتاخذلك تعويض لا تطالب الفرق بالسعر بعد اطلب تعويض على الحركه
خلك بالمحاكم وخلك من حماية المستهلك
ارفع قضيه وخل المحاكم تنظر بالموضوع ونزل موضوعك في كل منتديات التويوتا العربية والاجنبية النصاب لازم ينفضح سواء شركة تويوتا او معصره

[CH Engineer]

نصيحة اخوي وان شاء الله تنفع معاك
اكتب ايميل موضح ان شركة تويوتا اعطتك معلومات خاطئه مع تواجد ازدواجيه بملف السيارة وباعوا لك سيارة ببيانات خاطئه وهالشي ينافي القوانين وخطأ اداري وارسله على الايميل للمدراء التنفذيين لشركات تويوتا في العالم
تقدر تحصل ايميل المدراء التنفيذيين في الانترنت طبعا لاتنسى اليابان وامريكا والدول الاوروبية لانهم يهتمون بهالشي
طبعا لو انك ماخذ السياره من شخص مشكلتك ولكن من شركة عيب عليهم هالحركه

[الخزرجي قطر]

الله يعينك على الوكاله شوفلك طريقه تخفض السعر وتخلص بيعت السياره

[..er..]

هذا موقع لكزس .. ( صفحه التواصل )
بس في امريكا مالقيت شي عن اليابان بالنسبه لـ اللكزس

http://www.lexus.com/contact/index.html

وهذا موقع تويوتا بس راح يطلع لك ارقام هواتفهم في اليابان

http://www.toyota-global.com/company/profile/overview/

هذا إيميل مدير علاقات العملاء في شركة تويوتا العالمية :


ap-overseas@mail.toyota.co.jp

وإسمه :

Tatsuya Sobue


ومسماه الوظيفي :

Group Manager
Overseas Operations Department
Customer Relations Division

اسمحلي ورب البيت قاهريني عطهم خطاب محترم ووثقه برقم الشاصي
وعلمنا وش يصير

[alrheeb2020]

الله يعوضك ب كل خير ,, وللاسف احسها غلطتك ,, هالايام الواحد مايقدر يثق ف حد

[Bin Hood]

وينه صاحب الموضوع
على الردود والحلول الي جاته المفروض
يطلع له lx 460 اصفار !!