فضفضه تجاريه ..حياكم

[انآآ غيير]

السلام عليكم ورحمه الله وبركاته

مدري هالقسم المناسب لموضوعي او لا بس اترك الحكم للمشرفين :victory:


هالموضوع يااخواني الكرام ودي يكون لتجاربكم التجاريه


كلنا نبحث عن الرزق وكل واحد وله توجه


الي يسوق لمنتج والي يبحث عن شي معين والي نشاطه بالاسهم والي بالعقار الخ الخ الخ

التجارة شي حلو ..صح متعب بس فيه متعه كبيرة

كل تاجر بدأ صغير ثم تطور وكبر شوي شوي

ياليت كل واحد يدخل يكتب لنا ملخص عن بدايته
كيف جاته الفكره؟كم راس ماله عند دخوله عالم التجارة؟

وش المعوقات الي لقاها؟من الداعمين له ببدايته

ماهي طموحاته وكم حقق منها لحد الان؟

يعني فضفضه للفائده

ولكم مني اجمل باقات الورد

الي مايعجبه الموضوع بلاش تعلقات مو حلوة:shy:

موضوع خاص بقلمي ((انا غيير))

[شموخ دائم]

,

,


مرحبا

موضوع طيب وفكره طيبة

ان شاء الله نشوف تجارب الاعضاء

احيانا البعض يشوف انها خصوصيات ما يحب يتكلم فيها
وهناك البعض يخاف من الحسد
:)

بالنسبه للطموحات على الانسان ان تكون طموحاته جدا عاليه
وما يكون طموح بسيط وقليل وعادي
الطموح من مجرد فكره الى واقع ولو احتاجت الى الكثير من العمل والصبر والاجتهاد
ولابد تكون افكارنا وطموحاتنا عاليه جدا جدا


علينا فقط نفكر ان ( الطيران ) كان مجرد طموح لانسان ما بهذا الوجود وطار حقيقه

والطيران القطري ( هو طموح وفكره شاب قطري ) تحولت الى حقيقه وشركه تنافس الشركات العالميه

وعلينا ان نفكر ان ( الوصول للقمر ) كان طموح شخص ما وفكره مجنونه بوقتها
والكهرباء
والسياره
كلها طموح وافكار لشخص ما
ولولا التوفيق من الله ثم هذه الافكار والناس الطموحه ما اصبحت حقيقه

شركه ( بيتزا هت ) كانت عربه امام مدرسه تبيع السندويشات
واصبحت عملاق في العالم



بالنسبه لي حتى الان ما حققت الطموحات الي اتمناها
ولحمدالله على كل شي الانسان طموحاته دائما عاليه ودائما مستعجل
اهم شي الانسان يكون راضي عن رزقه وراضي عن نفسه
ومقتنع ان هو في الطريق الصحيح ويوما ما بالعمل والاجتهاد
سيصل اليها او يصل اليها من يكمل مسيره هذا المشروع وهذا العمل التجاري
احيانا الجيل الثاني هو من يحقق الانتشار الواسع محليا وعالميا

والله يوفق الجميع


,

,

اخوك

شموخ دائم

[QtrGate]

انا بدئت بالأسهم وخسرت فخليت المبلغ استثمار من اربع سنين ولين الحين خسران
افكر في العقار لأكن يبيله مبلغ كبير
وأفكر بالذهب لأكن يقولون الذهب مثل البحر غدار
وفكرت الف مره في التجارة لأكن ماعرف أبدا

فهذا انا اصرف الراتب وامشي الحال

[saeed2005]

أهم شيء الواحد يصبر على التجارة التي اختارها فالتجارة لا تأتي بثمارها بسرعة كل التجار تدرجوا شوي شوي بعض الناس تجده يتاجر في مشروع ثم لا يفتأ ينتقل إلى غيره وده في الربح السريع وهو ما يعود عليه بالضر كتجربة أنا أتاجر في منتج من أكثر من عشر سنوات لم استفد فائدة ممتازة إلا في السنتين الأخيرتين وعندها فكرت في التوسع والله يوفقكم ويرعاكم

[بن غيث]

متابع ...:)

[أبوعلي89]

موضوع مهم .. نرجوا المشاركة فيه .. ياليت نستفيد من تجارب الأخوة

[بنت شرق]

افضل شي اذا حد من معارفكم أو اهلكم عنده تجربة ويساعدك بفتح تجارتك ..وإذا ما عندك روح دورات
لين تستقر على فكرة وتجمع مبلغ يساعد والتوفيق من عند الله ...فيه فرص عادية بالاعمال وفيه فرص
متوسطة وعالية ...المهم يكون مشروعك بالبداية كفكرة وتنفيذ ناجح وشغال ...والباقي يأتي بالتوفيق
والاجتهاد وتحري الحلال والصدقة وتكوين الاسم والعلاقات ....بس مصاريف التجارة وايد حط هاي ببالك فالافضل يكون عندك المال أوالدعم
ثم القدرة على منع الآخرين من سرقتك واستغلالك ...وبتلاحظ أنه في السوق فيه فهلوة ( ع قولة المصريين ) وعلم وشطارة ..
لتتميز خلك مع العلم والشطارة ...

[q1989]

مــــــــــــــــــغا مرة

[بو جاسم قطر]

من تجربة ..
لاتدخل التجارة الا اذا
1-مخباك عود
اقل شي عندك نص مليون او مليون حتى لو المشروع صغير
2- اذا بتدخل مع حد دور ناس تثق فيهم ( وين بتحصل في هزمن )
3- خذ وقت كافي تتعرف وتدرس المجال اللي ناوي تستثمر فيه ولاتستعيل
4- يكون عندك علاقات تقدر تمشي أمورك
5- اهم نقطة عندك ناس يعرفون يديرون شغلك وتثق فيهم

[Qtrfalcon]

السلام عليكم

موضوع جميل اخي الكريم

كلنا والله نبي نبدا في التجاره

لكن المشكله كل شي غالي



اعطيك مثال بسيط جدا من واقع الحياه

ولو عندك حل ساعدني

مثلا ابي اشتري ارض في ام صلال
قول الارض مليون و 400
المبلغ هذي صعب توفره كبدايه فلازم تاخذ قرض من البنك
واكيد في فايده قريب ال 200

تبني بيت بمبلغ قول 800

صار كله ب 2.4 مليون
عاد بتبيع بتربح 50 او 100 الف
او ماقد تضمن تحصل حد يبي هالسعر وانت عارف الاسعار تتغير مع الزمن

هاي شي بسيط جدا

كمشروع

افتح ابسط شي ناخذ بقاله مثلا


اقل ايجار ممكن تحصله في معيذر ممكن ب 8000 ريال

قول معاش العمال والكهربا والماي والسكن والايجار والتكلفه
كم ؟
وكم ربحك من هذي كله ؟


المبدا مب اني اكون سلبي

لا والله ابي اكون ايجابي مع الجميع

لكن في ظروف من حوالينا خلت التجاره في قطر كانك تشري عصير باااااارد لكن داخله شوك

الله المستعان والله انا ودي ابدي ولو بشي بسيط بقاله دوبي منجره شي بسيط احس ان في مدخل ثاني والعمر يمضي وودي لكن ماعرف شلون

لو اي حد عنده نصيحه لي ينصحني ويفيدني ونحن التلاميذ وانتم الاساتذه

[..عاشق قطر..]

انا عن نفسي توني بديت في الذهب بمبلغ بسيط .. شوي شوي ..للعلم الاسعار نازله وفرصه بالمستقبل

[KSK Logistic]

أهم شيء الواحد يصبر على التجارة التي اختارها فالتجارة لا تأتي بثمارها بسرعة كل التجار تدرجوا شوي شوي بعض الناس تجده يتاجر في مشروع ثم لا يفتأ ينتقل إلى غيره وده في الربح السريع وهو ما يعود عليه بالضر كتجربة أنا أتاجر في منتج من أكثر من عشر سنوات لم استفد فائدة ممتازة إلا في السنتين الأخيرتين وعندها فكرت في التوسع والله يوفقكم ويرعاكم

من خبرتي البسيطة هاذا الكلاممن اخونا سعيد من درر ، واضيف المطلوب الصدق والامانة والقناعة باالربح القليل لانها تصنع لك السمعه الطيبة التي هية الراس المال الحقيقي ، وايضا ماتدخل مجال الا انك تفهم فية وتعشقة ، عمرك لااتورط في شي ماتفهم وتعتمد علي غيرك .من اجانب وخلافة.

[رهج السنابك]

محد يبي يقول تجربته!!!!

[مخطط قطري]

انا تجاربي اعتبرها اسرار شخصيه واللهم لك الحمد والشكر

[داعم طوفه]

السلام عليكم ورحمة الله وبركاته هذا الموضوع حلو بس أحيانا للتجارة اسرار واذا انكشفت الاسرار خفت التجارة ولهذا التجارة اسرار احد يبي تجارة جاهزة عليه بدفع لشراء اي مشروع

[احب قطر]

بداية لازم تحدد اهدافك المالية اللي تبي توصل لها ، بعدين تحدد استراتيجيك للوصول ، بشكل مبسط ، أنا حطيت لي هدف أن يكون عندي مدخول متنوع يصل أو يزيد عن الرواتب اللي نحصل عليها في الوقت الحالي ، فاشتغلت في الأسهم وفي العقار والتجارة كانت موجودة . وتقريبا حققت ٧٠٪ من الاستراتيجية .

بالنسبة للتجارة ، يعتمد على النشاط اللي انت متمكن منه ، ولازم تعرف أن قطاعات كثيرة في البلد محتكرة على جنسيات أو أشخاص معينين ، فعليك معرفة كيفية دخولك إلى هذا القطاع وتكوين علاقات مع من هم قائمين عليه.

واعرف أن أي عمل تقوم به يكون التوفيق به من عند الله سبحانة وتعالى ، وعليك ببر الوالدين لانه يفتح باب رزق عظيم.

[رجل تعليم]

سأبدأ تجربة قريبا بحول الله وأسأل الله لي ولكم التوفيق

[be cool]

انا توني ادرس مشروعي مع الؤسسة القطريه للمشاريع الصغيره والمتوسطه... وان شاء الله بقولكم الي يصير خطوه بخطوه...

[الكبير الله]

اول شي التوفيق من الله وهو الرزاق

واذا الله كتبلك رزق في شي يأتيك دافع غريب يوجهك اليه حتى لو كان هالشي بعيد عن ميولك وعقب ما تأخذ رزقك منه وتتذكر الموضوع تستغرب انك اتجهت الى هذا العمل في فترة من فترات حياتك ... وهنا تعرف ان الله قسملك هذا الرزق و بهاذه الطريقة

اللي باللون الاحمر هو (جهدك ، تفكيرك ، تخطيطك ، مثابرتك ،استراتيجيتك ، الخ الخ الخ)

[مشموم]

انا توني بابتدي بمشروعي وقريب اخلص السجل ، بس المعانه مع عدم توفر المحلات والمكاتب واذا ليقيت محل اومكتب يطلع الدلال كذاب أو يبي ينصب عليك ، وسالفه الخلو بعد سالفه !
ماكنت ادري ان المقر اكبر مشكله !!!

الله يسهل

[حمد 2002]

انا توني بابتدي بمشروعي وقريب اخلص السجل ، بس المعانه مع عدم توفر المحلات والمكاتب واذا ليقيت محل اومكتب يطلع الدلال كذاب أو يبي ينصب عليك ، وسالفه الخلو بعد سالفه !
ماكنت ادري ان المقر اكبر مشكله !!!

الله يسهل

التجاره مب شرط ايكون عندج محل ومب شرط عندج مكتب ، اهم شيء عندج مخ شغال :victory:

[عضو مشاكس]

متابع معكم

[00soma00]

اول شي التوفيق من الله وهو الرزاق

واذا الله كتبلك رزق في شي يأتيك دافع غريب يوجهك اليه حتى لو كان هالشي بعيد عن ميولك وعقب ما تأخذ رزقك منه وتتذكر الموضوع تستغرب انك اتجهت الى هذا العمل في فترة من فترات حياتك ... وهنا تعرف ان الله قسملك هذا الرزق و بهاذه الطريقة

اللي باللون الاحمر هو (جهدك ، تفكيرك ، تخطيطك ، مثابرتك ،استراتيجيتك ، الخ الخ الخ)
كلام من ذهب

+ صلاة الاستخارة مهمة جداااااا

[pink pearl]

الصراحة ودي أفتح مشروع وأترك الشغل لكن مترددة ومافيه توجيه من كبار التجار! مانعرف دولتنا شنو ناقصها ومن وين نبدا؟ وكيف نفتح مشروع ونتطور في توسعته ؟

[sultan01]

موضوع شيق صراحة وجا بوقته
هاليومين أحاول ازيد مدخولي ومب عارف شلون
أفكر في تجارة وبعد مب عارف من وين أبدأ

أحيانا أقول الواحد يبدأ التجارة من النت أفضل
يعني تسوق لمنتج من سوق المنتدى ويكون هالمنتج طلببيه من النت يعني بمجرد تجمع الطلبات وتستلم العرابين تبدا تطلب
أحس هالتجارة أقل خساره وبدايه ممتازة منها أدير مشروعك وبنفسك وبدون خساير محل وديكورات وسجل تجاري

قرأت المشاركات السابقة يا ريت تفيدونا بخصوص مؤسسة قطر للمشاريع الصغيرة والمتوسطة
وبخصوص السجل التجاري

بالمرة يا ريت ترد على موضوعي في الرابط تحت

سؤال حول فلل وشقق قناة كارتيية (http://www.qatarshares.com/vb/showthread.php?576734-سؤال-حول-فلل-قناة-كارتيية-اللؤلؤة&p=9347386&highlight=#post9347386)
وشكرا

[MAZEN37]

عن نفسي اول خطوه لاي مشروع او تجاره انه المكان مايكون اجار
واحب ابداء صح لسبب بسيط اكون ضامن الاستمرار وتكوين سمعه والربح اخر همي لانه المشروع راح يكبر نفسه شوي شوي
والكلام كثير عموما بالتوفيق للجميع

[تغلبية]

اتبعوا شغفكم ..

واقروا قصص رجال الاعمال الناجحين

واستفتوا قلوبكم وان افتوكم الناس

[الدبلوماسي]

اول شي التجاره اسرار وكل تجاره لها اهلها ولها جنسيه معينه ف اذا الواحد قرب من اهلها وفك اسرار التجاره بتتسهل عليه اموره وايد
واهم شي التخطيط السليم
وكلها ف الاول الاخير بتوفيق من الله سبحانه وتعالى واغلب التجار مايحبون يتكملون في مواضيع التجارة (بتعمق) ف مب ملاقين اجوبه متفصله هههههههه
وبالتوفيق للجميع