،، شوارع العـــــــرب .. شوارع الصياعة والهياته ! ،،

[رهج السنابك]

في الكثير من الدول من الشرق للغرب



يوجد مايعرف بشارع العرب لكثرة تجمعات العرب فيه

في لندن مثلا شارع الاجوورد
في بانكوك
في ماليزيا
في استراليا
في نيويورك
في الصين
في سنغافورا


لكن الملاحظ والمعروف والظاهر للعيان للاسف ان هذه الشوارع هي مرتع الصياعة والهياته وكل انواع الفساد والفسق وكأن العرب وصمة عار في السياحة

ياترى شنو الاسباب؟؟ مب المفروض العرب انهم سفراء الاسلام في دول العالم؟! مب المفروض العرب يتحلون بأخلاق الاسلام والمسلمين

لو حد اول مرة يسافر وسمع عن شارع العرب وقرر يسكن فيه الكل يحذره انتبه من النصب وانتبه من الفساد المنتشر في هالشارع

مانلوم الاجانب لو نظروا لنا باحتقار بما اننا مصدرين الفساد لين عقر دارهم نصب واحتيال وغش وفساد يندى له الجبين

بالمناسبة مازرت ولا شارع عرب لكن سمعت التحذيرات وقريت في الانترنت كل سواد الويه يطلع من العرب

:( واااحسافتاه

[عيون الدوحة]

لا وتكون الفنادق والشقق في هذي المنطقة أعلا سعر عن غيرها
فصارت قاعدة عندي أي مكان في عرب أبعد عنه

[ذيب ازغوى]

ههههه العرب مشكله عافسين الدنيا عفاسه

[ضوى]

ماعليج اختي من كلام النت كله خرابيط ، كثر ماسمعت عن شارع الاستقلال وشارع تقسيم في تركيا ماشفت ولا شي من اللي سمعته ، مشيت فيه وبنصايف الليل ووناسة وكله عرب واجانب وشوراع حيوية اكيد مب بروحي مع زوجي وعيالي لكن محد نصب علينا ولا حد ضحك علينا ولا احد حاول يسرقنا الحمد لله والفضل لله ، واحد يصيده موقف معين والا اثنين ثلاثة ويعممونه وهذا غلط

شارع المارينا في ميونخ عجيب وكله عرب واجانب بعد حلو والتمشي فيه عجيب وماشفنا اي شي يكدرنا

شارع العرب في انترلاكن وزيلامسي وناسة وترفيه الصراحة وبعد ماشفنا اللي يقولون عنه


شارع العرب بماليزيا كذلك حلو وممتع وماشفنا شي كدرنا فيه

بجد بجد ماشفنا الصياعة والفسق اللي سمعتي عنه

الاكلام طلع من تجربة عدد بسيط وتعمم عالشوراع المذكورة وصار لصيق بها

[BoFahed]

اختي غالبية السياح في العالم وخصوصا فئة الشباب يسافروون للصياعة والهياتة انتي لو تشوفين الاوربين شلون لما يسكرون تطلع حقيقتهم في البلاد اللي ذكرينها لانهم همج ووسخين بس القانون داعس عليهم

الفرق بانه العرب دفيعه و يحبون اكل الحلال علشان جذي في اي بلد سياحي يفتح في الاول مطعم ويمشي (شعوب تاكل الزلط ههه)وغالبا يكون جنب مسجد و ولما يربح تنفتح مطاعم ثانية وقهاوي وتطور المنطقة بتوافد العرب وتتحول اسمها الى منطقة العرب

الوساخة موجودة في كل مكان

[رهج السنابك]

بمناسبة شارع الاستقلال بتركيا وايد تحذيرات عليه ويقولون اي عربي يمشي فيه بالليل بروحه خطر

[ضوى]

بمناسبة شارع الاستقلال بتركيا وايد تحذيرات عليه ويقولون اي عربي يمشي فيه بالليل بروحه خطر

وانا بعد مثلج اختي سمعت فيه واااايد لكن والله يشهد علي مشينا فيه لين 1 بالليل ولا شفنا شي الكل بحاله صج صج الكل بحاله تمشي ومطاعم واسواق وعااااالم وزحمة ماتتخيلينها بس محد تعرض لنا والعرب بحالهم

[Dana’1]

وانا بعد مثلج اختي سمعت فيه واااايد لكن والله يشهد علي مشينا فيه لين 1 بالليل ولا شفنا شي الكل بحاله صج صج الكل بحاله تمشي ومطاعم واسواق وعااااالم وزحمة ماتتخيلينها بس محد تعرض لنا والعرب بحالهم
:victory:

شارع العرب بتايلانداا سمعتة بالقاع ما يبيلها كلام
شهدت لهم صديقتي...ومرت خالي...حتى عيالهم المراهقين كا بعد خط شنبة..يشوفونهم عرب ،،،يقولون لهم شحم لحم؟!!
تقول لعنوبهم مب صاحين

[sweet qatar]

عزيزتي المسميات هذي تكون بين العرب.. اهل البلد ما يعرفونها..

[bos3eed]

عزيزتي المسميات هذي تكون بين العرب.. اهل البلد ما يعرفونها..

صج, وانا في بانكوك عجزت وانا اقول للتكسي اراب روود, اراب ستريت ولا فهمني الا لما قلت له نانا روود عاد بعدين لما تطورت صرت اقول (نانا سوي) <<<<شارع نانا بالتايلندي, ها المنطقه فيها من كل الجنسيات لكن الاغلبيه هم العرب واكثرهم عوايل , والسبب الرئيسي انهم يسكنون هناك لان المنطقه فيها مستشفى (بومرنجراد) او المستشفى الامريكي ووايد ناس تروح هناك للعلاج. وبعدين صار فيها مطاعم حلال ومحلات تبيع بضايع تهم الخليجين والعرب مثل العطور والعود والشنط والساعات التقليد حتى الكرك قاموا يبيعونه وطبعا لا ننسى محلات الشيشه.

بقولها بصريح العباره, السياحه الجنسيه ليست حكرا على عرقيه معينه او على دين, اللي شفته بعيني في نانا روود في بانكوك ان اغلب زباين الفسق هم ليسوا عرب او مسلمين, الاكثريه غربيين كبار في السن او في متوسط العمر واسيوين من هنود وغيرهم وبسببهم كثرت المراقص والبارات في تلك المنطقه. واغلب العرب والخليجين جايين مع عوايلهم واولادهم وهم اكثر فئة تنفع الاقتصاد السياحي لانهم يفيدون مجالات تجاريه كثيره.


نشر الاسلام ليس حكرا على العرب ولا لنا فيه تميز

[الخزرجي قطر]

بمناسبة شارع الاستقلال بتركيا وايد تحذيرات عليه ويقولون اي عربي يمشي فيه بالليل بروحه خطر

هذا الكلام غير الواقع من تجارب عدة سفرات الى اسطنبول
حتى اسكن في فندق في نفس المنطقه لأكون قريب من شارع
الاستقلال في تقسيم

[بـومحمد]

ياناس مب كل شي ينسمع ولا ينقال صحيح التجربه غير وبرهان محسوس خلو عنكم وكالة يقولون انا ماشفت ماتكلم والزين والشين مب بس عندنا يالعرب حتى هم عندهم زين وشين

[بـن عدوان]

بمناسبة شارع الاستقلال بتركيا وايد تحذيرات عليه ويقولون اي عربي يمشي فيه بالليل بروحه خطر

ماعليج من الكلام الفاضي

انا قبل اسبوع كنت هناك ومافي اي مشكلة
حتى لو الساعه 3 الفير

[بـن عدوان]

:victory:

شارع العرب بتايلانداا سمعتة بالقاع ما يبيلها كلام
شهدت لهم صديقتي...ومرت خالي...حتى عيالهم المراهقين كا بعد خط شنبة..يشوفونهم عرب ،،،يقولون لهم شحم لحم؟!!
تقول لعنوبهم مب صاحين

هههههههههههه شحم لحم :tease:

صارت لي

[R 7 A L]

مو شرط
ثلاث ولايات في امريكا أمرها باستمرار
كل شوارع العرب سمعتها طيبة ولا فيها خرابيط
مجرد محلات ومطاعم

يمكن الشارع الوحيد اللي سمعته السيئة وصلت
كل العالم شارع العرب في تايلند

[وحيد-الشوق]

شارع العرب بتايلاند قمة القذارة والانحطاط للعلم خذت فره مع امي 10 دقايق فقط ورجعنا

[السكين]

:victory:

شارع العرب بتايلانداا سمعتة بالقاع ما يبيلها كلام
شهدت لهم صديقتي...ومرت خالي...حتى عيالهم المراهقين كا بعد خط شنبة..يشوفونهم عرب ،،،يقولون لهم شحم لحم؟!!
تقول لعنوبهم مب صاحين

هههههههه ولها تكملة بعد بس عيب نقولها :nice:

انا بصراحة ما كنت اروح شارع العرب الا للعشا أو وأنا راجع من ام بي كي ، لأنه شارع قذر بمعنى الكلمة واللي يقول غير هالكلام مع احترامي له غير صادق .

وأنا ما أسكن الا بمناطق بعيدة عن العرب وهذا بتايلند فقط ، لأنه فيه بعض الشباب هم من أجبروهم على اخذ هذه الفكرة عنّا !

[فرهود]

غير صحيح .انا دايما اسكن في الاجور رود ماعمري شفت صياعه ولا شي من هالكلام .بالعكس مطاعم عربيه ومحلات عاديه وجو عربي 100% بدون خرابيط .

[ohlaladesign]

موضوع مميز

يعطيك العافية

[┋أَجِوَدًيّ┋]

القاعدة المطبقة على العرب عند السفر للخارج هي:


العرب = سواد الوجه !!

[مشتاقة لقطر]

انازرت شارع العرب

تايلاند - ماليزيا - المانيا - باريس - لندن

ودايم نتاخر بالليل بهالشوارع بس نكون مع مجموعة فاميلي

والحمدالله مافيه شي مواقف تخوف ..

[معماري قطري]

لا وتكون الفنادق والشقق في هذي المنطقة أعلا سعر عن غيرها
فصارت قاعدة عندي أي مكان في عرب أبعد عنه

حتى انا ... اللي يبي يرتاح يبتعد عن هذي الأماكن

[تاسيتوس]

مب كل العرب الي نقابلهم في الخارج نصابين وحرامية بس انت وحظك ، واحيانا يكونون مهمين علشان يسهلون الحياة في الخارج.

[معماري قطري]

غير صحيح .انا دايما اسكن في الاجور رود ماعمري شفت صياعه ولا شي من هالكلام .بالعكس مطاعم عربيه ومحلات عاديه وجو عربي 100% بدون خرابيط .

يحيك محظوظ .. انا ما سكنت فيه بس زرت أصدقاء ساكنين فيه وشفت أشياء خلوني بس ساكت .. ولا اللي في بانكوك أوصخ منطقة اللي فيها العرب .. صدقتي أُخت الإستقراطية .. وفي أمريكا في شوارع العرب مره سكروا كم محل والسبب ملاك المحلات ياخذون قسائم الطعام اللي تصرفها الحكومه الأمريكية للفقراء لشراء الطعام ويعطونهم بدالها فلوس .. وطبعاً فلوس أقل من القيمة الحقيقية .. والفقراء ذيلا أغلبهم مدمنين والعرب يعطونهم كاش حتى يشترون مخدرات.

[فرهود]

يحيك محظوظ .. انا ما سكنت فيه بس زرت أصدقاء ساكنين فيه وشفت أشياء خلوني بس ساكت .. ولا اللي في بانكوك أوصخ منطقة اللي فيها العرب .. صدقتي أُخت الإستقراطية .. وفي أمريكا في شوارع العرب مره سكروا كم محل والسبب ملاك المحلات ياخذون قسائم الطعام اللي تصرفها الحكومه الأمريكية للفقراء لشراء الطعام ويعطونهم بدالها فلوس .. وطبعاً فلوس أقل من القيمة الحقيقية .. والفقراء ذيلا أغلبهم مدمنين والعرب يعطونهم كاش حتى يشترون مخدرات.

لا ياخوي تكلم لاتسكت نبي نعرف اشفت في هالمره الي زرت فيها ربعك ماشفته انا في اكثر من 15مره سكنت فيه .