موقف صادفك في السفر !

[شموخ دائم]

,

,


http://forum.hwaml.com/imgcache2/hwaml.com_1336478135_455.png

مرحبا


السلام عليكم ورحمة الله وبركاته ..

مساء وصباح الخير للأحبـــة جميعاً ..

أجمل مافي السفر بعد الراحه والاستجمام

هو الذكريات والمواقف التي نمر فيها وتصادفنا

فيها الذكريات السعيده وفيها المضحكه وفيها المواقف المتعبه والمؤلمه

موضوعنا اليوم خفيف ومفيد نتبادل فيه

الذكريات ونتشارك اللحظات

http://cdn.akhbaar24.com/295af961-ce87-4984-bf15-c7e703a4b591.jpg



مواقف .. لحظـــات لاتنسى صادفتها في رحلاتك .. !!


http://www.alqabas.com.kw:82//sites/default/files/imagecache/original_image/article/original/2012/05/01/49496.jpg

كل المتعه والفائده لكم

:)

,

,


اخوكم


شموخ دائم

[MAZEN37]

مرحبتين كبار لشموخ ولكل الاعضاء
موقف لا انساه مر على لما كنت مسافر للهند وصار زلزال باليل وانا بالفندق وفجاءه حصلت العالم بالشارع ويطبون من العماير على الارص
موقف اول مره اشوف هلع بمعنى الكلمه وذولي الهنود مجانين مخابيل ومواقف وايد شفتها بدياناتهم غبيه لكن مابي اطول عليكم

[Chambray]

مرة كنت بالجامعة وكان فصل شتاء
نزل الثلج وانا بالمحاضرة بغزاره شديده
خلصت المحاضرة .. ابي ارجع البيت ( ماقدر ) !!!!
السبب مب مركب تواير ثلج على السيارة ولا عندي صناقل ! ومافي وسيلة مواصلات في هالاجواء والجامعة فوق الجبل
أهئ أهئ أهئ .. صج صحت إلا شوي ..

[نوار قطر]

موضوع حلووو مممم كنت مسافره دبي مع اخوي وخواتي وبما اني الكبيره فيهم خذت الجوازات وحطيتهم عندي في السيفتي بوكس واحنا راجعين الدوحه خذت الجوازات وحطيتهم في الشنطه بدون مااعد كم جواز عندي وركبنا السياره ومشينا فترة عشر دقايق الاتقول اختي شيكي على الجوازات وانا متاكده انهم كاملين بس قلت بشيك اعدهم 6 جوازات واحنا 7 صار ويهي :omg: مت من الخوف والي مب عندي جواز اخوي قلت له اصلا مب عندي انتي مارجعته لي يوم تأجر السياره :secret: قال والله عطتج اياه المهم رجعنا الفندق ورحت الغرفه والحمدلله لقيته وووبس اذا تذكرت شي برجع :)

[نوار قطر]

اخس موقف صادني في سوريا كنت رايحه مجمع وبنتي كانت تبي من محل سويت فاكتوري رحت اخذ لها طلعت مبلغ الف ليره قال لي ماعندي فكه جان احط بوكي على الستاند واخذ من مرت اخوي خرده واخذ الحلاوه واخلي الجمل بما حمل البوك باللي فيه من فلوس وكانت 20 الف ليره وتقريبا 5000 ريال قطري وغير الفيزا وبطاقة البنك وبطاقتي الشخصيه
ولان المجمع ماعجبني ماخذت منه شي وماحسيت اني فاقده البوك بس عقب مااكتشفت اني فقدته سويت لهم مناحه لا صارت ولا استوت :weeping: ومن هالسفره تعلمت ان مااخذ في بوكي الا الي احتاجه يعني كل يوم اطلع مبلغ وقدره واخلي بطاقاتي في السيفتي بوكس :rolleyes2:

[عيون الدوحة]

ههااااي بقول لكم سالفتي

العام رحنا تايلند ومن تايلند هونغونق
وصلنا هونغونق وصلت كل الشنط الا شنطتي وتمينا ساعتين وقدمنا بلاغ
ورحنا الفندق في الفندق كل واحد خذ شنطته وتمت شنطة في الممر لين الصباح
الصبح كل شخص يطالع الثاني مب عارفين شنطة من
اخر شي خذنا السنطة وفتحناها طلعت اغراضي بالشنطة
الي صار بتايلند وحدة قررة ترجع قطر وبدل الشنط واحنا ماندري لان شنطتها صغيرة وشنطتي اكبر ولا قالت لنا
:shy:بهدلتنا

[R 7 A L]

موضوع رائعة
ومواقف لايحسدون عليها اخواني وخواتي الاعضاء
ههههههههههه


انا مواقفي كثيرة
مرة رحت لدبي انا والاهل ولا اخذت معي الا 500 ريال
نزلت المطار اخذت شريحتين جوالي بحوالي 240 وعبيتها ب 200 ريال
المهم قلت باسحب والفيزا ماخذتها معي مامعي الا بطاقة البنك العادية ولا كل الاجهزة حوالي 10 اجهزة مارضت تسحب لي يه شسالفة ولا واحد يقول لي اذا ماعندك فيزا انسى
واكلم البنك ولايقولون لي فية خلل مع اجهزتنا في دبي انتظر من الحين لين 24 ساعة
ابوك يالتوهيقه :rolleyes2:
المهم اخذت تاكسي بحوالي 59 درهم وانا مابقى معي الا 60 ريال :weeping: قلت لة الباقي على شانك

نزلت الفندق ولا يقول صحيح فية حجز باسمي بس اسم القبيلة غير من الدوحة مغلطين في اسمي الكامل :anger1:

ولا يقول لي نبي ضمان قلت يارجال السفرة عطني السويت وبغير ملابسي وبنزل لك نتفاهم واسحب علية لين بكرة :secret:
بعدها شيكت حصلت الامور اوكية :nice:

بس بعد اسبوع رجعت للدوحة واكتشفت اني ناسي الايباد في الفندق :rolleyes2:
ورجعت عن طريق dhl بمبلغ 500 بعد أسبوع :rolleyes2:




الموقف الثاني في رحلة داخلية في امريكا من ولاية لولاية
كل اغراضي في شنطة مع الشحن مامعي الا الجواز والبوك فقط
المهم رحت لسير حق الشنط تابع لشركة غير الشركة الي انا جيت عليها وهات يا انتظار وكل مرة اروح للامانات يقولون مافية شي :rolleyes2:
ابوك يالحظ قلت خلاص اغراض راحت لشيكاغو لان الطيارة بتكمل لهناك :weeping:

وانا طالع وبالصدفة اشوف شنطتي في سيار ماحوله احد تدور بروحها :tease:

[نوار قطر]

نفس سفرة دبي قلت حق اخوي روح رد السياره وانا بخلص وتعال لي عند الكاونتر شفت الناس طابور وقفت معاهم باخذ الدور على ماتوصل الشنط شوي الا ياي الهندي معاه الشنط يقولي اي طيران انتو قلت له القطريه قام ضحك علي:shy: قال القطريه مب اهني قلت له شدراني انتو مب حاطين اي علامه عبالي الكل مع بعض مثل مطار الدوحه وعقب كلن يروح على حسب حجزه وعلى اي الطيران :anger1: وبس طلعت من السيد عقب ماانحشرت معاهم ورحنا الصوب الثاني :weeping:

[ضوى]

مممم مواقف لا يحسد عليها الاعضاء الصراحة

اتذكر بسفرتي ماليزيا كنا بفندق بكوالالمبور ، وكنا بنروح بياننغ بسيارة ، قررنا نخلي شنطنا في ستور الفندق ونودي معانا شي بسيط عشان مانتعابل بالاغراض والشنط ، واكتشفت اني نسيت شنطة الجوازات وحجوزات فندق بياننغ فوق كاونتر الاستقبال وماتذكرت الا بعد ثلاث ساعات واحنا بالطريق ، شنسوي ؟ كلمت الفندق وقالوا لي موجودة الشنطة وقلت لهم احتفظوا فيها ، والحمد لله ما صارت اي مشكلة عطيتهم الاسم اللي حاجزه به ومشت الامرو على خير بس الوهقة لو ماكانت لنا ردة على كوالالمبور بهالحالة شكنت باسوي ؟

وموقف من المواقف في انترلاكن بسويسرا ، رحنا حديقة فيها الزحلاقية العجيبة ، وكانت عالكاونتر عييوز حقيرة ، مخيسة النفس معانا بس سنعتها ، المهم دخلنا الحديقة وتمينا نتمشى وعيالنا عند الزحلاقية واحنا نزلنا بالطريقة العادية من صوب الغابة وهم نزلوا بالزحلاقية ، وصلنا لعيالي الا اشوف ولدي اللي كان صغير بذاك الوقت يصيح وخده احمر ، واخته معاه تصيح ، اشفيكم شصار الا يقول ولدي ضربني العامل كف لانه تشيطن ، ويركبني ابليس اعوذ بالله منه واحتد عالعجوز اللي بالكتونتر قلت لها نزليه لا اخلي ليلكم اسود ، وتميت اتلاغى معاها وريلي من صوب ، وينزل العامل محتد ويبعبع علينا بالالماني اعتقد ، بمعنى انه ولدكم يلعب بالرمل ، ويمسكه ريلي من قميصه ويهزه هز ويهزا فيه ويلعن ابو خامسه ، وكان فيه خليجين انهم يسالون اشفيكم ابدا اعوذ بالله قلوب حجر عاد انهم متحضرين الحمد لله والشكر ، المهم عقب ماخذ نصيبه العامل تمت السالفة بقلبي ، وعقبها بكم يوم رحنا زيرمات على اساس بنرد انتر لاكن وخلينا شنطنا بنفس الفندق ، وتمينا اربع ايام مدري ثلاث ماذكر ، ردينا لنفس الفندق وكان اللي في الاستقبال محترم ، قلت له عن السالفة قالي لي ماله حق يمد ايده روحي اشتكي في الشرطة انتظرت زوجي يروح المسبح مع العيال وتميت انا وبنتي والسالفة تقرقع بقلبي ، واخذها ونروح مشي لمركز الشرطة كان وايد قريب من الفندق ، وادخل لهم ويطلع لي ضابط واشرح له السالفة ، قالي يمكن ولدج سوى شطانة غير مقبوله ، قلت له روح طلع لي القانون اللي يقول له حق هالعامل يمد ايده على طفل لو هو عفريت من الجن اسم الله عليه ، وتم وتم يقنعني قلت له انا ابي اقدم شكوى وابي حقي والا باكلم محامي يتابع الموضوع ، قد فات عالموضوع اسبوع اواكثر بشوي ، المهم جابوا العمال اللي كانوا بذاك التاريخ وكان المسؤول واحد محرتم جدا بالحديقة وعرفت الشخص وقلت له انا ابي حقي منه ، وجاني هالمسؤول وتم يتعذر ويتعذر ويتعذر وقالي اللي تبينه باسوي لج بس اسحبي الشكوى لانه فيها محكمة ، قلت له اشوف هالعامل ذليل جدامي والود ودي اجيب ولدي يرد له الكف ، بس كسر خاطري الشيبة المسؤول لكن جبت هالعامل اللي وطى راسه زي الكلب وسبيته سب جدام الشرطة وفي الاخير قلت له لاني مسلمة وعربية باعفي عنك والا انت ماتستاهل الا السجن طبعا ولا كلمة من اي طرف ، وعقبها سألني الشرطي خلاص اسكر المحضر قلت له ايه ورديت الفندق وانا وااايد فخورة بنفسي لكن زوجي هاوشني وقالي لو تحد غالط عليج لو احد تجرا عليج ، قلت له لا تخاف احنا ببلد القانون وهم يقدسون القانون جدا

وبكل امانة للحين اتذكر الموقف واستغرب من نفسي اشلون جاتني القوة وسويت اللي سويته ببلد غريب

[meyao]

ماشاءالله عليج يا ضوى ردة فعلج قوية وعجيبة.. الام دائماً اذا حد يتعرض لعيالها تجيها قوة غريبة في الدفاع عنهم هههههه الله يخلي لج عيالج يا رب ..

[ضوى]

ماشاءالله عليج يا ضوى ردة فعلج قوية وعجيبة.. الام دائماً اذا حد يتعرض لعيالها تجيها قوة غريبة في الدفاع عنهم هههههه الله يخلي لج عيالج يا رب ..

سكتي والله صج كانت فيني صيحة وودموعي متحجرة بعيوني مقهورة على ولدي وكاسر خاطري ، والله لو شنو شطانته مايسوى يمد ايده عليه ، وللامانة ولدي وااايد فرح وكان فخور فيني ودوم يتذكر هالسالفة ويوقلها لربعه انه امي سوت كذا وكذا

[المسعف]

صارلي موقف من العيار كنت مع زوجتة في شهل العسل في ألمانية (ميونخ) عاد دخلت محل ورحت آنه وزوجتي قسم الملابس الداخلي للرجال بعدين شفت وحدة قاعدة تشتري ملابس داخلي في قسم الرجال عاد قمت آقول حق زوجتي شوفي شنو قاعدة تشتري فجأة تطالعني وتقولي مالك شغل ،،،،، طلعت كويتية حدي افتشلت لا وجدام زوجتي

وآنه كان قصدي شوفي نسوانهم الأجانب عادي يشترون حق ريايلهم ملابس داخلية مو احنه

[غزلان]

اقرب موقف صادنا بدبي سويتنا بالطابق العاشر الساعه 2 الفجر يرن جرس الأنذار قلنا شوي وبيسكت شكل كل مره الا بالمكرفونات طلعو حريق :rolleyes2: طلعنا الا المرر مليان كل الناس طالعه نزلنا معاهم عشر طوابق :cry2:

بعد ماوصلنا الا يقول لنا المسؤال العامل غلط وضغط على الجرس بالغلط :omg: :(:(:(:(:(

تبا لكم قلتها بقلبي:(

[ابوعلي]

صار لي موقف في امتحان بالجامعه

كانت عندي مادة ( اعادة ) ولازم ندفع 50 جنيه والشباب قالوا ان نحط المبلغ على الطاولة لين يجي المحصل وياخذ المبلغ ويعطينا الوصل

المهم جاني المراقب وشاف الملبغ على الطاولة وقام يصارخ بترشيني قلت له اي رشوه هالمبلغ رسوم اعادة المادة وانتظر المحصل وقام يصارخ وانا منصفق ويهي جدام العالم والحمدلله وصل المحصل وفهمه الوضع

[Abdullah_89]

اوصخ شي بالسفر لما يجيك الفندق يسوي block مبلغ تأمين حق الغرفه وترجع الدوحة وتنصدم ان المبلغ مخصوم وتقعد تتصل الفندق وتشرح لهم قصه السفره كلها واخر شي مايرجع لك المبلغ :(

صارت لي وايد في دبي بالذات

اما في تركيا مرينا منطقه ريفيه والا اصحاب البيت حاطين طاولات وكراسي فالحديقه واول ماشافونا بالباص انا وربعي رحبوا فينا وهللوا وطبعا الحبايب لايتكلمون عربي ولا انجريزي مافي الا افندم وافندم ، المهم ذبحوا لنا ذاك التيس الزين وغسلوه ونظفوه وسووا لنا غدا واحنا مصدومين نقول شالكرم اللي فالأتراك ويمو خلصنا الغدا جابوا لنا شاي تركي مع سويت نفس المهلبيه اخر شي جانا راعي البيت وقال لنا you want the bill now ??

سبحان الله من شوي محد يتكلم عربي ولا انجليزي والحين you want the bill

المهم دفعنا الفاتورة مع ان المبلغ كان جدا بسيط بالنسبه للي طفحناه هههه
واحنا عبالنا ضيافه من عندهم ، طلعوا الحبايب قالبينها مطعم وبدون لافتات ولا مينيو خخخخخخخخ

[بـن عدوان]

تابعتكم عضو عضو

مواقف ولا احلى هههههههههه

[ابوعلي]

وموقف في مصر بشارع جامعة الدول العربية

كنا نتمشى ولا واحد عنده ثعبان صغير حطه في ويهي :omg:

وبصراحه من الصدمه صرت نفس توم اند جيري لما روح القطو تطلع من التصرقع واصارخ عليه:anger1:

يقولي خذ الثعبان قلت له اعمل فيه ايه قالي هديه لحماتك قلت له يخرب بيتك

بس روعتي لما حط الثعبان في ويهي:rolleyes2:

[Chambray]

صار لي موقف في امتحان بالجامعه

كانت عندي مادة ( اعادة ) ولازم ندفع 50 جنيه والشباب قالوا ان نحط المبلغ على الطاولة لين يجي المحصل وياخذ المبلغ ويعطينا الوصل

المهم جاني المراقب وشاف الملبغ على الطاولة وقام يصارخ بترشيني قلت له اي رشوه هالمبلغ رسوم اعادة المادة وانتظر المحصل وقام يصارخ وانا منصفق ويهي جدام العالم والحمدلله وصل المحصل وفهمه الوضع

ههههههههههههههه تخيل لو ما وصل المحصل ( يا نهار اسود ) هههههههههه

[ابوعلي]

ههههههههههههههه تخيل لو ما وصل المحصل ( يا نهار اسود ) هههههههههه


اي والله فضحني وقام يصارخ والمشكلة اني على مبدأ ياغريب خلك اديب

[شموخ دائم]

,

,



مرحبا

mazen37

انا دائما اخاف من السكن في الادوار العاليه جدا
اتخيل بيصير حريق او زلزال ومابعرف انزل
يمكن انا اخاف اكثر من الهنود في الارتفاعات
ههههه

مشاركه طيبه

,

,


اخوك


شموخ دائم

[شموخ دائم]

,

,



مرحبا

Chambray


الله يعينكم في شتاء اوربا
والله السواقه هناك خطره بالثلج
وما اجملها بالصيف

موقف لاتحسد عليه

مشاركه طيبه ودير بالك من الثلج هذي الايام
:)


,

,


اخوك


شموخ دائم

[شموخ دائم]

,

,



مرحبا

نوار قطر

مواقف السفر ما تخلو من التوتر ساعتها
وما اجمل الذكريات بعد ما نرجع
ونتذكر كل لحظه فيها
ديري بالك على الجوازات
:)

انا اعد الجوازات 6 مرات وانا رايح المطار
هههه


,

,


اخوك


شموخ دائم

[شموخ دائم]

,

,



مرحبا

عيون الدوحة

:)

هذا الموقف مثل الكميرا الخفيه
الشنطه المجهوله في اللوبي
:)

مشاركه طيبه


,

,


اخوك


شموخ دائم

[شموخ دائم]

,

,



مرحبا

r 7 a l

:)

والله موقف صعب بدون فلوس
ما شاء الله عليك وصلت الفندق على اخر المبلغ
ههههه

مشاركه طيبه
يسعدني تواجدك


,

,


اخوك


شموخ دائم

[التيما]

في الصيف الماضي رحت منطقة في جنوب فرنسا لأني ابي أشوف أعلى جسر في العالم وهو جسر ميلو وتلفظ " ميو " ووصلنا إلا نبي نصور مافي مكان نصوره وجان يوقف ريلي على صوب وننزل ننصور ههههههههههههه وكاميرات مراقبة شوي إلا سيارة شرطة جايه بس الظاهر متعودين قلنا له نبي نصور وقالنا في باركنات ويوصلنا وأشكره واضحة بس إحنا العميان لأننا انبهرنا بالجسر صراحة ..
Millau Viaduct
هالجسر على وادي نهر تارن في الجنوب الفرنسي وعلى الطريق A75 وكان مشوارنا عقب مدينة " كان " وقلنا بنبات هاليوم في ميلاو و لانها في الريف ما فيها إلا فندقين نظام 3 نجوم فقلنا بنسكن في فندق كانت تسكن فيه فنانه فرنسية زمان وهو على شكل بيت بس طلع مافيه مكيف قلنا معليه الجو حلو .. وصاحبة الموتيل تقول لنا افتحوا الدريشه ههههههه خير أن شاء الله .. وتقولي البسي مثلي قصدها قصير وبدون كم ههههههههه مصختهاصح !
المهم بالليل بنرقد إلا النامس !!!!!!!!!!!! غير الساكن اللي حذانا كل ما دش الحمام الله يعزكم الصوت يوصل هههههههههههه حلف ريلي نطلع جهزنا اغراضنا ونطلع وتصيدنا صاحبة الفندق استغربت وين بالليل ! قلنا لها بنروح كان واحنا نبي أصلا فندق ثاني .. ونطلع ندور مافي ويحلف ريلي نروح كان !! غير بدل ؟ مافي .. يهديك يرضيك بهالليل ! مافي هههههههههه والجارمن لعب فينا ويطلعنا جبل بالليل طريق حق سياره وحده !! واخاف انا ويبي يرد واصارخ وانا ترد وشلون !! والله نزلت من السيارة قلت له تبي تلف السياره لف بروحك ههههههههه ويعصب وجان نرد ميلاو يبي يرقد بالسيارة هههههههههههههههههههههه وسبحان الله لقينا فندق اسمه ميركوري طلع شحلاته ومكيف ومافيه أصوات .. الحمد لله عدا على خير ..

[نوار قطر]

,

,



مرحبا

نوار قطر

مواقف السفر ما تخلو من التوتر ساعتها
وما اجمل الذكريات بعد ما نرجع
ونتذكر كل لحظه فيها
ديري بالك على الجوازات
:)

انا اعد الجوازات 6 مرات وانا رايح المطار
هههه


,

,


اخوك


شموخ دائم

مممم اول مره اسافر واكون البوس كل مره اقعد مكاني وهلي يخلصوون كلشي بس هالمره انا طقيت الصدر مع ان اخوي موجودبس قلت عندي أأمن :secret: ...والله لو ابوي معانا جان زلزل الدنيا علينا:weeping:

[مشتاقة لقطر]

انايسموني ام الحلقات من مطار دولتي يبدا المسلسل انواع واشكال هههههه

اخر سفرة بالصيف اول ما وصلنا المطار بوظبي من كثر الحماس بطيت العباية بالشوز من تحت شقيتها

ومن خلصنا اجراءات الجوازات بدلت عباية ثانية

واخر يوم شقيت عباية ثانية .. ههههه

غير سالفة الجوازات هاي تخصصي اضيعهم ..

والا شناطي تضيع .. لما رجعنا من ماليزيا ..

وضيعت لابتوبي بالمالديف ..

وسالفة تصوير الكنيسة بباريس من برع حصلت لي زفة .. معتبرة ..

وزيلامسي تهاوشنامع مالت الفندق وحجزت اغراضنا .. وهدت علينا كلب اسود باللوبي .. يمااااا

وتايلاند مرتين يركضون وراي كلاب .. عشان لبسة العباية السوداء والشيلة السوداء ..

بايطاليا سكننا بفينيسيا بالليل فججاة بدون تخطيط مسبق عن البلد .. ولا خلفية عن الاسامي .. باليالله لقينا الفندق والصبح طلعنا للسيارة ويوم بغينا نرجع ضيعنا الين الساعة 2 الظهر متنا حررررر .. تشابهت علينا المباني ..


وااااااايد مواقفي ماتخلص

بس وناسة ..

اذا كنت رايقة بارجع اكمل لكم المجلد مال المواقف ههههه

[راعي 2006]

انا الموقف الي اذكره باختصار شديد


اني كنت راجع من فرنسا انا والمدام وولدي عمره سنه ونص


ويوم وصلت المطار قالوا لي مافي حجز بأسم الولد المهم ان وجهي صار علامة استفهام هالشكل ؟

[ام الحلوين]

صباحكم خير

الموقف الي صحيح مانساه في لندت الربيع الماضي اخر يوم لنا في لندن والحمدلله انه اخر يوم
وانا اسحب من الصراف جاني هندي بثوب ولحيه قالي لاتسحبين الصراف خربان وانا دخلت بطاقتي بعدة جاني واحد ثاني هندي قام يدزني لاتدخلين البطاقه وتموا كلهم يصرخون وانا من الربكه مافهمت وش السالفه
جلست انتظر بطاقتي ماطلعت والي شككني بالموضوع انهم لما راحوا وهم يمشون يلتفتون علي..
شفت البنك مفتوح دخلت حتى اخذ بطاقتي على ماصفيت بالسيد ودوروا بطاقتي قالوا مش موجودة
قالي الموظف اكيد احد قالك الجهاز عطلان بسرعة وقفي البطافه
طوووالي اتصلت بالبنك ووقفت لكن قد سحبوا منها 7 الاف ريال
شلون سحبوا وكيف سرقوني مااااااعرف

[QTR-1978]

الموقف الغريب اللي صار وما انساه
الويك اند الاول
في سنة 2004 كنت مسافر دبي عن طريق البر وانا فالطريق لقيت كروزر قطري مسافر الى دبي ورقمه مميز وطبعا ايام الطيش :shy: تسابقنا عالخط المهم وافترقنا بداية دخولنا دبي

الويك اند الثاني اللي عقبه
كنت مسافر الى السعوديه توني طالع من المركز الا الكروزر نفسه قدامي بس كنت في سياره اخوي فالرجال مانتبه اني نفس الشخص وطبعا تسابقنا خفيف خفيف :shy: ولما وصلنا الحسا افترقنا


الويك اند الثالث اللي عقبه
كنت مسافر البحرين بس بالطياره وكان في واحد حذاي قطري تعرفت عليه وهو يقولي انا مشبه عليك وانا اقوله بعد انا طبعا مع السوالف وشنو موترك ورقمك اكتشفت انه نفس الشخص اللي اشوفه كل ويك اند في دوله :eek5: حتى هو انصدم لما قلت له السالفه

واسمحول لي عالاطاله :shy: بس صج موقف غريب

[شموخ دائم]

,

,


ضوى

مشاركه مميزه

وموقف انترلاكن موقف صعب و ما شاء الله تصرف يدل
على عدم التفريط بالحق وانا اتفق معاك احيانا من الخطاء السكوت
وموقف يدل على الشخصيه المتوازنه متى تصمت ومتى تتحدث

دمت بطيب


,

,


اخوك


شموخ دائم

[شموخ دائم]

,

,


meyao

مرحبا

ما شي موقف مني مناك

:)


دمت بطيب


,

,


اخوك


شموخ دائم

[شموخ دائم]

,

,


المسعف

مرحبا

والله موقف ما تتحسد عليه

:)

مرورك الجميل



,

,


اخوك


شموخ دائم

[دااانة قطر]

ماشااء الله موااقف عجيبه



اخر سفرة لي لتركيا بنتي كااانت تصور من دريشة الطيااره المهم يوم وصلنا هنااك شلنا اغراضنا ورحنا الفندق يوم جينا نطلع العصر الا افتح شنطة كيمرة سوني مالقيتها جاان اقفل على بنتي تقول لي دوريها في الشنطة الثانيه عفست الاغرااض ولالقيتها
كنت شوي وبصيح فيها صورنا الا تذكرني بنتي اني نقلت الصور كلها عالكومبيوتر من فتره
المهم قلت للساايق ابي ارجع المطاار وخذنا نفس اليوم بالليل
المهم وصلنا المطاار وشغلاانه عشاان تدخل من جهة القاادمون بس تستقبل ومحد يبي يتكلم انجليزي لين قفلت عليهم اخر شي جااني وااحد وسمع الشكوى وخذني للاستقباال وخذ الشكوى وطرشني اخر الدنيا عمري مامشيت هالمساافه المهم كل اوصل مكاان يطلع مب هو لاازم اكمل لازم اطلع وانزل لين وصلت الاماانات واسئلة واستجوااب وووووو لين فتح لي غرفة الاماانات وطلع لي كاميرات ولابتوبااات وايباد وووووو
واحوس بينهم وادور لكني مالقيت
خذو رقمي عن حسااب اذا في شي بيكلموني ولا حد كلمني لين اليوم


الحمدلله اني مسحت الصور والميموري عندي بس الكيمرة جديده

[دااانة قطر]

في ماليزيا في صن واي لاجون شفت شي ماينشااف
ماستوعبت اللي شفته




المهم الشي الثاااني في الحماامات العاامه البريعصيه عندهم احتفاالات عالطوف والسقف عشر طعش في كل مكااان

[رجل الجزيرة]

مرة في بريطانيا كنت أدرس لغة على حساب الشغل لمدة ستة شهور على إنها سنة ونصف بس كملنا ستة شهور ورجعونا، المهم كنت في مدينة نورويتش شمال شرق من مدينة كيمبردج وطبعا في الفترة المسائية نجتمع أنا وربعي من الشغل وشباب من الخليج في نادي للترفية في المدينة وأقرب مكينة صرافة تقريبا كيلو والمكينة في مكان على شكل دائري وفيه مر واحد صغير للسيارات الصغيرة وعقب ما أخذت الفلوس من المكينة إلا وإطلعوا من البار أكثر من 10 بريطانيين سكارى فول على الآخر رايحين طينة وكان واحد ورفيقته يمشون جنبي في نفس الممر الصغير إلي يحول على الشارع العام وفي كل شارع عام شرطة بعد الساعة 10 مساء علشان السكارى ما يخربون ويكسرون، شوي إلي وإضربوا الشخص إلي جنبي مرة تبقس ومرة بغرشة البيرة لين طاح في الشارع لين صب الدم من راسه ورفيقته تصيح ولا هي قدرت تسوي ولا حاجة إلا الصراخ، شوى وأنا الحمد لله شافوني ولا سووا لي شيء لين طلعنا على الشارع العام فيوم شافوا الشرطة تجمدوا في مكانهم ومشوا مشي عادي فهذا الموقف عمري ما أنساه.

[NINA RICCI]

انا كنت باحرررق فندق في ماليزيا ..

ولعت الفحم وبخرت الغرفه بحيث ان الدخان مايكون متكثف على جهاز الانذار .. وبعد ماخلصت خليته في غرفة التبديل وكان لها باب .. حطيت المدخن على الارض وصكرت الباب .. ومادريت ان يوم صكرت الباب المدخن طاح :( :( وكنا خلاص بنطلع .. الا ريلي نسى البوك في غرفة التبديل ورجع ياخذه الا يشوف شي ماينشاف الزوووليه استوى فيها ثقب مدور من الفحم غير ريحة الحرق ويشيل الفحم وعلى طول نرش عليه ماي فالحمام ونحاول نغسل اثر الجريمه ^__^ والحمدلله عدت على خير .. وستاف الفندق خبر خير ولا دروا .. :)