الحل لـمشكلة نطق الأحرف عند الأطفال !!

[بوحارب]

السلام عليكم


عندي مشكلة مع بنتي 5 سنوات وولدي 3 سنوات

والمشكلة هي ان البنت ما تلفظ حرف ال (س )عدل وتقول ثين :omg:

ولدي مايلفظ حرف ال ( ر ) عدل ويقول واء :secret:

هل يوم حل لهي المشكلة ام ان هذي الحاله طبيعيه في هالعمر :telephone:

وشكرا

[غايه الطواش]

اخوي توهم صغار واكيد الحروف مخارجها بتكون غلط
انا اخوي لين صف اول وهو ينطق الراء لام

ماعليهم خوف ان شالله سنهم وايد صغير

[elders]

يمكن البنت تبدل اثنانها اللبنيه والولد لسه صغير .. اصلا الاثنين صغار لاتخاف عليهم ان شاء الله خير اخوي بو حاوب

[نوار قطر]

شووف اخوي انا بنتي مرت بنفس هالمشكله كانت ماتنطق حرف الراء لين وصلت الصف الاول اذا حد سألها شسمج تقول لهم نولا يعني نوره ووايد خفت عليها وكنت ابي لها مدرس عربي يأسسها قعد معاها وقلت له مشكلتها والله من اول حصه نطقهاا وقال بنتج من الدلع ماتنطق الحرف والحمدلله الحين عادي ،،،، وعيالك توهم صغار هو صح المفروض ينطقون الحروف عدل بس اتوقع انهم نفس بنتي ومجرد حد يقعد لهم بنطقون الحروف عدل وان شالله ماعليهم شرر

[Aaziz]

السلام عليكم

شلونك بوحارب عساك طيب ،،، الله يخليلك عيالك و يطرح فيهم البركة .

اعتقد انهم توهم صغار و بنسبه حق الولد ،،، فيه حل ممتاز و مجرب ولكن ما ادري هل بينفع معاه بحكم صغر سنه ولا لاء .

الحل باستخدام قلم رصاص ... يدخل الولد القلم بالعرض في فمه ،، و يردة ورى شوي .
و تخليه يتكلم و يردد بعض الجمل ... طبعا ماراح يكون الكلام مفهوم لذيك الدرجة ،،، بس بعد مايشيل القلم راح ينطق الاحرف بشكل صحيح و بمخارج الصحيحة لكل حرف خصوصا حرف الراء لان القلم راح يمنع للسان من لمس سقف الحلق.
فبعد مايشيل القلم راح يوصل اللسان لسقف الفم بسهوله .

هذا التدريب من اهم تدريبات القراء و المذيعين يساعد بشكل كبير على تحديد مكان ضغط اللسان لخروج الحروف بصوره صحيحة .


و هذي فيديوهات مهمه لعلاج حرف الراء

للاطفال

http://www.safeshare.tv/w/ehBTEhFTVm

للكبار

http://www.safeshare.tv/w/ULNEVHWIwJ

[بوحارب]

غايهـ & الدرز & نوار

تسلمون اخواتي طمنتوني جزاكم الله خير


وعليكم السلام بوسعود

بخير الله يسلمك

حي الله هل امريكا

والله ياخوي سالفة القلم تخوف شوي

والظاهر بنتظر عليهم لين يكبرون شوي ونشوف

تسلم وماقصرت يالذيب :)

[نوار قطر]

العفوو اخووي وربي يطمن قلبك عليهم

[Thamer_Qat]

هلا بوحارب

بنتي الكبيره كانت ماتنطق يوم كان عمرها 3 و ولدي يوم كان عمره 5 او 6 كانت عنده بعض الاحرف مب عدله مثل الراء تطلع كنها غغغاء.

صديقة اختي الكبيره تعمل في الشفلح مدرسة نطق

سيدة فاضلة وخايفه الله وبصراحه مبروكة وكان لها فضل كبير والفضل لله عز وجل في حل مشكلة الولد والبنت خاصه

والان نبحث عن اخصائية لتعليم السكوت والهدوء :omen2:

[naif3]

توهم اصغار الله يخليهم لك ان شاء الله

[غزلان]

اغلب اليهال تصيدهم مشكله نطق الحروف

بنت اختي تنطق القاف كاف يعني قمر تقول كمر

[حياة]

عادي انا ولدي كان ينطق الراء غاء
وكبر وتعدل عنده النطق يوم كبر

[fhd4]

لا تجيب لهم أي سيرة عن هذا الموضوع ... هذا شي طبيعي وان شاء الله راح يتعدل ... لكن أهم شي لازم تنمي عندهم الثقة بالنفس

[رجل الجزيرة]

في مستشفى الرميلة قسم النطق أو التخاطب بس تحويل من المركز الصحي وأمورك طيبة.

[Dana’1]

ما أقدر أفيدك إذا يحتاجون أخصائي نطق أو لا

بس أحب أقولك إن أختي يوم كانت طفلة كانت تنطق الراء واو ..وكنا حيل ننبسط على نطقها وبالذات بالسيارة
عشان نقولها إيش هذا تقول إشاوة المووو أو نضربها على يدها خفيف وتقول ما يعوو
ويوم كبرت وراحت للمدرسة شوي شوي تعلمت النطق الصحيح بالبيت ومع المدرسة وصارت تنقط الحروف عدل
بدون أي مشاكل الحمدلله

[النهار]

بوحارب ترى ياخوي عادي في مثل هذالسن
انا ولدي كانت عنده نفس المشكله والحمدلله دخلته روضة الفتاه المسلمه في اللقطه والحين صار له سنتين والحمدلله ينطق جميع الكلمات بالشكل الصحيح ويقراء ويكتب اي جمله امامه ويدرسون القران الكريم بالنطق الصحيح الحين هو الان في الصف الثاني روضه اسلاميه تعتمد على تعليمها على القاعده النورانيه دخلهم في الروضه الولد والبنت في السنه 12 شهر 1500 ريال لطفل الواحد بدون باص

[حميداني]

اعتقد للحين صغار لكن هم بعد علشان ترتاح استشير حد من ذوي الاختصاص
روح اي مستشفى واسئل الطبيب ان قالك الشي عادي لا تكبره

أهم شي لين ما تكلمونهم لا تستعملون لغتهم الي يستخدمونها من باب انهم يهال ونلاعبهم
كلموهم بالمخارج الصح لانها غلط لما الام او بقية الاهل ياخذون ويعطون وياهم بحروفهم من باب المزح فيظنون اليهال ان ما ينطقونه صح

بالتوفيق على كل حال

[العربية نت]

اشوف ان الوضع طبيعي مقارنة بالعمر والله اعلم

[Miss]

صحح لهم الحرف
يعني حرف ر مخارجه اخر الفك العلوي خله يرجع لسانه على ورا وهو ينطقه ومارس هالشي معاه دايما وبيطلع الحرف .
حرف س اخذ العود مال الدكتور اللي يشوف في البلاعيم وحط الطرف بين اسنانه وخله ينطق حرف السين .. بس راس العود ..هنيه بيتعلم ان ما يطلع لسانه اذا نطق الحرف لان العود يجبره انه ما يخرج لسانه .

[ابوعلي]

ياخوي بوحارب تو الناس عليهم الله يحفظهم

الاهم طريقة كلامكم معاهم المفترض كلام عادي بدون تكسر ولازم يتجنبون الخدامه

[BoAof]

الحل 1 ولا في احسن منه
دخلهم مركز تحفيظ قران
ويعلمونهم اضن النونيه وقواعد القران
5 من عيالنا كان فيهم بس مايكملون كم شهر في مركز التحفيظ الا يتعدل النطق

[♫ احسـاسـ طفلـهـ ♫]

الحل 1 ولا في احسن منه
دخلهم مركز تحفيظ قران
ويعلمونهم اضن النونيه وقواعد القران
5 من عيالنا كان فيهم بس مايكملون كم شهر في مركز التحفيظ الا يتعدل النطق



صحييييح


هذول على الاقل ترى توهم يهال الا 5 سنين و3 سنين بدري عليهم شوي خصوصا ابو 3 سنين

بس اللي عمرها 5 سنين من الحين لازم تدريبها وافضل مكان مركز تحفيظ طبعا


ترى اختكم في الله اللي هي انا :secret: كنت مانطق حرف السين عدل والزاي و الصاد وللحين شوي عندي مشاكل وياهم وكانت عندي لدغه بالراء نوعا ما وخفت مع الوقت لكن السين والصاد والزاي ظلوا مشكله بالنسبه لي .. لين دخلت التحفيظ وكملت 4 شهور الحمدلله تحسنووووا كثيرررررررر جدا بالنسبه للسابق لكن ظل فيهم شوي شي بسيط طبعا لاني طفت العشرين سنه بالاكيد التحسن عندي ما بيكون نفس التحسن عندي الاطفال بيكون فوري فانصحك ادخلهم تحفيظ وبتشوف الفرق الشاااااااااسع عن تجرررررررربه وامسكوهم وهم صغار لان اللي يكبر بيعاني كثيررررررررررررر تحملوا والله الموفق :nice:

[Bin.Yousef]

ماعليهم شر ان شاء الله يابوحارب

[بصمة قطرية]

أخوي بالنسبة لحرف الراء ممكن يكون عندها لدغة
يعني هالشي طبيعي
و لا راح يتعدل
عندنا هالشي و رياييل و للحين الراء مش واضح
مب شرط
في ناس عندهم لدغة في بعض الحروف ..

[دااانة قطر]

أخوي بو حاارب بنتي الصغيره كااانت تعااني من نفس المشكله في بعض الحروف مثل الراء والخاء والسين

خذت تحويله من المركز الصحي لعيدة النطق في الرميله قبل ماتدخل المدرسه بكم شهر ومواعيدها كاانت قريبه وماطولت يعني كل اسبوع موعد لمدة 3 شهور وبعض التمارين يطلبها منك الاستشاري تسويها مع ولدك وباذن الله راح يتحسن

[♫ احسـاسـ طفلـهـ ♫]

أخوي بالنسبة لحرف الراء ممكن يكون عندها لدغة
يعني هالشي طبيعي
و لا راح يتعدل
عندنا هالشي و رياييل و للحين الراء مش واضح
مب شرط
في ناس عندهم لدغة في بعض الحروف ..

اختي بصمة قطريه الغاليه اللدغه ان ما كانت بسبب تشوه خلقي تروح مهما كانت وكلام اطباء عن نفسي من سنين كانت عندي لدغة قوية جدا بالراء وسبحان الله الحين بعد تمارين كثيره و دخولي التحفيظ و ادائي لتمارين شفتها باليوتيوب وبعد شهور مو بس راحت اللدغه الا حرف الراء عندي قوي ولله الحمد .. اللدغة بالحروف تصير من ان الشخص يستخدم المخرج الخاطيء للحرف منذ الصغر ويتعود عليه لين يكبر فيصير ينطقها بطريقه خاطئه وهو كبير وتصحيحها عند الكبير ياخذ وقت اطول لكن تتصحح باذن الله لما يعرف مخارج الحروف ويتدرب عليها باجتهاد وخلاص ينطق جميع الحروف بطلاقه :nice:

[ANONYMOUS]

طبيعي وبيتعدل الوضع

بنتي كانت تقول للراء لاء وتعدل السيستم عندها ههه

بعدين ترى اكشخ في اكشن ع الاقل

[بصمة قطرية]

اختي بصمة قطريه الغاليه اللدغه ان ما كانت بسبب تشوه خلقي تروح مهما كانت وكلام اطباء عن نفسي من سنين كانت عندي لدغة قوية جدا بالراء وسبحان الله الحين بعد تمارين كثيره و دخولي التحفيظ و ادائي لتمارين شفتها باليوتيوب وبعد شهور مو بس راحت اللدغه الا حرف الراء عندي قوي ولله الحمد .. اللدغة بالحروف تصير من ان الشخص يستخدم المخرج الخاطيء للحرف منذ الصغر ويتعود عليه لين يكبر فيصير ينطقها بطريقه خاطئه وهو كبير وتصحيحها عند الكبير ياخذ وقت اطول لكن تتصحح باذن الله لما يعرف مخارج الحروف ويتدرب عليها باجتهاد وخلاص ينطق جميع الحروف بطلاقه :nice:

أخوي ما زال يعاني من حرف الراء
وولد اختي نفس الشي ..:secret:

[♫ احسـاسـ طفلـهـ ♫]

أخوي ما زال يعاني من حرف الراء
وولد اختي نفس الشي ..:secret:

هل تعالجوا عند اخصائيين نطق او دخلوا التحفيظ اختي ؟ لان مستحيل تروح الا بأحد الاثنين


انا علموني في التحفيظ مخارج الحروف ودربوني عليها لمدة 4 اشهر حتى بكره ان شاء الله بمتحن وبخلص الدورة .. وتحسنت اغلب الحروف عندي بشكل ممتاااااز انا نفسي انصدمت من النتيجه وطبعا تحسني كان اسرع من المتوقع ولله الحمد والمنه بالنسبه لعمري .. يبيلهم دورة مخارج الحروف لو قدروا ياخذونها جدا ممتازه او اخصائي نطق ترى انا كانت وايد حروف عندي رايحه فيها السبب كنت دلوعه يوم صغيره فتعودت انطق الحروف جي فاختربت اللغه عندي :weeping: .. بس خلاص الحين الحمدلله بفضل الله انقلبت الامور للاحسن بواااااااايد

[بوحارب]

أشكركم على الردود الطيبة والجميلة ولي عودة للموضوع بعد سنتين ان شاء الله

عقب ما يكبرون العيال بنشوف وش يصير

لاهنتوا جميعا