حبيت اخذ نصيحتكم ومشورتكم ..

[BARBICAN]

بسم الله الرحمن الرحيم

اصبح عالجميع , ويعطيكم العافية

عندي استفسارين ، واحب من اصحاب الخبرة واللي مرت عليهم نفس المشكلة نصيحتهم ومشورتهم


عندي بنتي عمرها ثلاث سنين ونص , قبل 3 شهور سوت عملية اللوز واللحميه وركبت انابيب عشان ماي الاذن

عقب العملية باسبوع صار معها نزيف بنفس مكان العملية و ترقدت لمدة اسبوع عشان طلع عندها فقر دم .. الهيموجلوبين قبل العلمية كان 11 عقب العملية صار 8

الحمد لله وضعها تحسن , حاليا بس البنت صارت عصبية بشكل غريب

مع انها قبل ماشاء الله عليها ضحك ولعب و مرحه لاخر درجة .. حاليا كله صياح ومعصبه وزعل وماتسمع الكلام

والاشياء اللي تعلمتها قبل العملية ماصارت تسويها , مثل روحة الحمام بروحها الله يعزكم

و وتعاند بشكل مب طبيعي في كل شى .

هل المشكلة في فقر الدم ! والا نفسية البنت عقب العملية

المشكلة الثانية عندها تاخر بالنطق , الكلمات اللي تعرفها على الاصابع , اختها الكبيرة لما كانت في عمرها ماشاء الله عليها تتكلم بطلاقة

ولاحظت بعض الكلمات اللي كانت تعرفها قبل العلمية صارت تنطقها غلط عقب العلمية

نحاول نتكلم معها عشان تتعلم ، تقول كلام مب مفهوم كلام اطفال , هي بالعكس تتكلم وايد بس مب مفهوم كلامها

العجوز في البيت الله يطول بعمرها تقول ودها عند مطوع يقرا عليها ، لان من هي صغيرة حريم وايد يتكلمون عالبنت لانها طالعه غير عن اهل البيت عيونها ملونه , وشعرها فاتح

والا تنصحون اوديها عند دكتور اطفال ، اشوف مشكلة العصبية وتاخر النطق ؟

وهل في دكتور ممتاز تنصحوني فيه ؟

طولت عليكم بس حبيت الصورة تكون واضحة يمكن الله يسخر لي احد عنده الحل

جزاكم الله خير ولاهنتوا جميع

[ابو حيان]

ما عليها شر ان شاء الله

بس لازم تعرضينها على دكتور مختص
وبعدها اذا طلع ما فيها شي
وقتها وديها لاحد معتمد يقرا عليها
لان العين حق (والعين فلقت الحجر)


وربي يشفيها ويعافيها ان شاء الله

[BARBICAN]

الله يجزيك خير اخوي

اخوك مب اختك :)

[H H]

ياليت تراسل الدكتور طارق الحبيب على التويتر لان على مااعتقد
له خبره كبيره فالاطفال ونفسياتهم وعلاقتها بالامور الجسديه ..


بالتوفيق

[راشد محمد]

اخوي تاكد انه السمع عندها ما تاثر..
اتوقع اليهال بعد العملية يحتاجون للحنان والرعاية

[BARBICAN]

ياليت تراسل الدكتور طارق الحبيب على التويتر لان على مااعتقد
له خبره كبيره فالاطفال ونفسياتهم وعلاقتها بالامور الجسديه ..


بالتوفيق


جزاك الله خير

[BARBICAN]

اخوي تاكد انه السمع عندها ما تاثر..
اتوقع اليهال بعد العملية يحتاجون للحنان والرعاية


لا الحمد لله السمع زين

والحمد لله الرعاية موجوده والاهتمام بعد

[الوان]

ما تشوفون شر

اظن البنت لين الحين تتألم ... جرب تعطيها المسكن العادي اللي من المركز الصحي و شوف اذا طبعها يهدا ...

بالنسبة لروحة الحمام ... عادي الاطفال بهالعمر ممكن اتجيهم انتكاسة اذا مروا بموقف نفسي و مخاوف و الام .... طبعا ابتدوا دربوها من جديد و طولوا بالكم عليها ..

[الدمعه]

ودها عند دكتور افحصها بالأول. وتأكد من الأذن. يمكن حاليا تسمع

الأصوات عاليه ،،، عيال أختي نفس الشي صادهم ،،، وتلاقيها

تولعت بالاهتمام الزائد فالفتره اللي كانت تعبانه فيها وتحاول تلفت

انتباهكم لها بأي طريقه. ،،،، مثل سالفة الحمام.

وفتره وتعدي ان شاء الله

وماتشوفون شر ....

[MAZEN37]

الله يعينك
انشاء الله خير

[محمد سعيد]

الله يشفيها ان شاء الله

اسال الناس الي مرت عليهم نفس حالة البنت

واذا الدكاترة في قطر ماعرفوا مشكلتها ودها تايلاند

اهني همج ولدي عنده اكزيميا اول مانولد وماعرفوا السبب مستشفيات خاصة للأسف

رحت تايلاند وبقيمة الف ريال تعالج وعرفوا سبب الاكزريما وهو حليب البقر

للعلم الي دفع قيمة العلاج التأمين!

وكنت رايح سياحة تسوق وبس يعني صدفة

[نوار قطر]

ان شالله البنت ماعليها شر ونفسيتها تغيرت من الويع والالم احنا الكبار ياخوي مانتحمل شلون اليهال في هالعمر يتحملوون ان شالله فتره وتمر بس لازم خلال هالفتره الام تكوون قريبه منها ودووم معاها ماتفارقها وتستحملها وتحاول تعدل عليها على الاشياء الي كانت تسويها والحين تركتها بس بطريقه تحببها مب تنفرها لين البنت ترجع لطبيعتها وربي يطمنكم عليها ان شالله

[ahmed jasim]

عندك مركز العوين مقابل الفروسية
فى دكتور سوري ممتاز (مأمون مبيض) بيساعدك

الطفل يحتاج إهتمام أكثر
هي أعتقد تحاول ترسل لك مسجات
كافأها لما تعمل أى شىء إيجابي وعطها هدية

وأي شيء سلبي لاتركز عليه ولا تصرخ عليها أو تلومها بس وقف عنها الهدايا

[شراع]

الله يشفيها ويشفي كل مريض يارب العالمين
الاطفال بشكل عام تتأثر نفسياتهم بشكل كبير بكل ما يدور حولهم ولم يكن سهلاً عليها ان تقوم بعملية في هذا العمر فطبيعي ان تتاثر نفسيتها وينعكس تأثرها على تصرفتها لان الاطفال لا يعرفون ماذا يحدث واخضاع الطفل لعملية جراحية تجعله يحاول التفسير ويتسائل بعينيه لماذا فعلتم هذا بي ولان العقل تفكيره ما زال محدود فقد يفسر الطفل ان ما حدث له قد يكون نوع من انواع العقاب فيعاند ويتراجع عن كل ما كان يقوم به طواعيه منه وردة فعل مباشرة وتسجيل اعتراض شخصي فهو يعترض بطريقته التي تتناسب مع عمره وعقله
رأيي هو اعطاء الطفل قدر كبير من الاهتمام والحنان حتى يطمئن وترتاح نفسه ويحاول يعرف ان ما حدث له ليس عقاب وايضاً محاولة محو هذا الحدث من ذاكرته بكل الطرق وبقدر الامكان البعد عن كل شيئ قد يذكره بهذه المرحله فكل شئ اصبح يحذر ويخاف منه حاولوا طمئنته بكل الطرق والبعد عن زيارة اي مكان غير اعتيادي او مقابلة اشخاص غير اعتياديين في هذه المرحله
وأسأل الله اسميع العليم ان يشفي بنتكم ومرضى المسلمين
اللهم رب الناس اذهب الباس اشفي انت الشافي لا شفاء الا شفاءك شفاء لا يغادر سقما

[أسد الجزيرة]

بخصوص المطوع خل امها توديها عند ام محمد الهاجرية في بني هاجر

[ريم 28]

أنا مع الأخ الكريم شراع في كل كلمه
بالفعل ما زالت صغيره ولا تدرك العمليه وتاثرت نفسيتها مما حدث
ولكن أتوقع في هذا العمر لابد من وجود حصيلة لغويه كافيه.
بما ن الكلمات قليله جدا والسمع جيد
لابد من التدخل المبكر ودلك لمصلحتها ولسلوكها
فتصرفاتها طبيعيه لأنها لا تستطيع إن تعبر بالكلام والتواصل. فتعاند وتصرخ.
عليك إن تأخذها للتدخل المبكر في رميله.
سيتم عمل تقييم لحالتها
وهذه أفضل خطوه للاطمئنان ومنها معرفة السبب.
والرقيه الشرعيه انت أرقي بنتك بنفسك وتوكل على الله.
اسأل ان يطمن قلبك عليها.
وعلى فكره فقر الدم يجعل الشخص عصبي.

[شميرام]

الم الأذن يخلي الواحد عصبي ومتنقص أنصحك تودونها استشاره مختص في دكاتره إذن وحنجرة وايد منهم الجفيري في بوهامور وتومس رغم ان عيادته غبره في وايد بس تومس حق الحساسيه زين الجفيري عنده أجهزه متطورة

مب خاسر شي اذا وديتها عند مطوع من المعترف بهم من قبل الأوقاف

[طبيب قطري]

السلام عليكم، اخوي أنصحك توديها تفحص أنف وأذن وحنجره .. عادة عملية اللوز مايصير معاها نزيف وممكن الأعراض الي ذكرتها تكون من مضاعفات العمليه ..

[alhaayaa]

نصيحه لوجه الله ودها لدكتور متخصص وخله يشوف عمليتها. يمكن تالمها وهي اللي مخليتها عصبيه

[ريم 28]

عن تجربه
الدكتور عبد العزيز الجفيري ممتاز
وفي نفس عمر بنتك عملت لبنتي عملية سحب السوائل من خلف الاذن

مجرد فحص للاذن وتتطمن عليها
وبعدها تشخيص رميله لمعرفة سبب تاخر الكلام
وحتى الجفيري عنده خبره بيعطيك اسماء دكاتره لتاخر النطق
وما عليها شر يارب

[khalid525]

لا تحاتي اخوي بنتك يبيلها شوي وقت وترجع طبيعيه بس اهم شي لا تعاملونها معاملة خاصة عشان ما تستمر تمثل هالدور

[BARBICAN]

جزاكم الله خير على الردود الطيبه

بالنسبة للعملية , العملية زينه ونتابع مع الدكتور اللي سوا لها العملية , مافي اي مضاعفات

والسمع زين ومافيه مشكلة ,

للعلم اختها من قبل سوت نفس العلمية وعقب اسبوعين امورها طيبة ..

البنت والله العالم مشكلتها مب في العملية نفسها

[BARBICAN]

بخصوص المطوع خل امها توديها عند ام محمد الهاجرية في بني هاجر


اذا عندك الرقم او المكان ولا عليك امر ارسله لي عالخاص ولا تهون

[ريم 28]

أخي الكريم أذكر الملاحظات التي لاحظتها على ابنتك.
شاستشير صديقتي الأخصائيه.

[الزلزال]

ربي يشفيها ويعافيها ان شاء الله
اجر وعافيه

[BARBICAN]

أخي الكريم أذكر الملاحظات التي لاحظتها على ابنتك.
شاستشير صديقتي الأخصائيه.


شيكي الخاص اختي