طالب مشورتكم يالربع

[زئير الاسد]

السلام عليكم

ياشباب انا عندي دوره خارجيه مبتعث من الجيش مرشح

لكن صارلي حاليا شهر هنا ومتضايق ومارتحت نفسيا وكل يوم اقول ابي ارجع

مع ذالك عندي بعض المشاكل الصحيه فالمعده

اذا ابي ارجع وش الاجرائات اللي اسويها وهل سهله ام معقده

[Aaziz]

الله يوفقك و يشفيك ... يمكن رايي مايعجبك ابد

اخوي الدنيا فرص و انت اتوقع توك في بدايه شبابك ... تاكد لو تروح لاكثر الاماكن السياحيه في العالم كمبتعث فتره و راح تتضايق و توصل معاك الامور الى باب مسدود و هذا بسبب الغربه (حاله يمر فيها كل مغترب تسمى الحنين الى الوطن بالانجليزي homesick )

ويزيد تاثر الشخص في الغربه ان كان شخص مستقيم اخلاقيا

انصحك انك تستعيذ من الشيطان و انا صدقني ندمان اشد الندم على كثير فرص ضيعتها في بداية حياتي و الحمد لله على كل حال .

الحاله الصحية تقدر تعالجها و انصحك بالكشف عن مرض يصيب المعدة اسمه جرثومة المعدة Helicobacter pylori (http://en.wikipedia.org/wiki/Helicobacter_pylori)

تراني ناصح لك نصيحة الاخو لاخوه . كافح و اصبر ترى النجاح مايجي الا بالصبر ، و المثل يقول "التعب منسي" بعد ما تخرج و ترد الدوحة التعب و الغربه بتذكرها كانها حلم .

الله يوفقك

[طموحي عالي]

والله اخوي انا مثل راي اللي قبلي

اول شهر هو اصعب شهر بالغربه

وان شاء الله فتره وتعدي

بالنسبه للمعده راجع طبيب وماتشوف شر يارب

[مخطط قطري]

نصيحه اخو تحمل شوي وانت عسكري لازم تمر بمثل هالظروف واصعب واصل والمستقبل قدامك
وبنسبه للمعده ان شاءلله الامور سهله وطيبه مر اقرب مستشفى عندهم شد من عزيمتك ولاتردد اعرف الخيار صعب بس انت قدها بتمر شهور بسرعه وبتعلق نجمه على كتفك تنسيك كل هذا

[كازانوفا]

هذه نصيحه سمعتها ولا اذكر من من كانت
عند السفر من مكان لمكان يفضل اكل البصل باول اكمن يوم عشان يصير عندك مقاومه لاي جرثومه لاسمح الله وبالفعل هذه النصيحه جابت نتائج طيبه مع الكثير ولله الحمد فارجو ان تاخذ بها

بالنسبه للغربه اقلم نفسك بانك في نزهه وطويله شوي وانسى وتناسى ولا تفكر كثير الايام ترررررركض

[العملة النادرة]

انا مع راي الي قبلي
الغربه صعبه حتى لما تكون علاج , دراسه في كل الاحوال صعبه خصوصا انك شاب وتفقد الطلعات والوناسه الي عايشينها الي بسنك بس صدقني الايام تركض بسرعه ومابتشوف نفسك الا متخرج والمستقبل كله جدامك والايام الي تعيشها احين بتكون ذكري بتيي فتره تتمنى ترجع ...
واصل والله يكتبلك النجاح

[سارونه]

السلام عليكم

ياشباب انا عندي دوره خارجيه مبتعث من الجيش مرشح

لكن صارلي حاليا شهر هنا ومتضايق ومارتحت نفسيا وكل يوم اقول ابي ارجع

مع ذالك عندي بعض المشاكل الصحيه فالمعده

اذا ابي ارجع وش الاجرائات اللي اسويها وهل سهله ام معقده


يا خوي

الدورة الخارجية فرصة لك لتحسين دخلك ومعيشتك في هالزمن الصعب
الشباب يدورون اماكن العمل الي تسفرهم لدورات وترقيهم بعد .
معلي اصبر - بالنسبه لتعبك - حاول تتعالج مافي مرض من غير دواء .

لازم ترجع وانت انسان مطور حالك الى الاحسن :) مع تحياتي للجميع بالتوفيق .

[رُفق المجنّا]

السلام عليكم

ياشباب انا عندي دوره خارجيه مبتعث من الجيش مرشح

لكن صارلي حاليا شهر هنا ومتضايق ومارتحت نفسيا وكل يوم اقول ابي ارجع

مع ذالك عندي بعض المشاكل الصحيه فالمعده

اذا ابي ارجع وش الاجرائات اللي اسويها وهل سهله ام معقده

اذكر الله يا مسلم ، مرشح ظابط وتبي ترجع ؟! اللي انت فيه محسود عليه وأنا أخوك ووالله أني رفضت الترشيحة واليوم متحسف !

أخوك شهر عشره الجاي يكمل خمس سنوات في امريكا ، والحمدلله الوضع طيب وتعودنا عليه ، ووالله اننا أحيانا نشتاق للروتين في امريكا إذا رجعنا الدوحة

لا يغرونك البعض بقولة ( ارجع واهم شئ راحتك ) ، صدقني بترتاح اذا انت تبي ومثل ما قال الشاعر ( النفس راغبة إذا رغبتها )

اختلط مع الصحبة الطيبة من الشباب الخليجي والقطري بالذات وإذا ما فيه فجماعة المسجد ولكن بحذر ، وحاول تشد في دراستك وتجرب أمور جديدة مثل : إذا لم تكن تقرا فجرب القراءة والاطلاع وإذا في امريكا ، يا حياك زرنا في كولورادو

وصحيا ؛ ابتعد عن الفاست فود وجرب تطبخ لروحك ولو أشياء خفيفة

اهم شئ لا تطيع هوى النفس وتذكر ان المجتمع ما يرحم إذا رجعت

[حياة]

نصيحه لوجه الله تحمل ترجع
انت لو تشوف العدد اللي يبون مرشحين
وحتى مدنين في الجيش بتدري انك
في نعمه ... واعرف ناس حد طلع وحد رفض
البعثه وهذيلا هم يعضون اصابع الندم
اللي معاهم حد بيتخرج الخميس وحد عفب
فتره.. احمد ربك واقراء القران خل لك ورد يومي
لو صفحه منه يوميا والاذكار لازم تداوم عليها
.. وصدقني كم واحد يتمنى
مكانك .. انت اكيد كبر عيالي واحد بيروح نص فبراير
والثاني في الكليه .. ولاتفتكر ماضاقوا وهم في ديرتهم
بس الواحد يحط الله قدام عينه ويدري ان ماله بد
من التعب والدراسه...! شلون بتكون نفسك وتتزوج
وتفتح بيت لازم تتعب شوي... والله يفتح عليك ويوفقك
اما المعده مين مافبه ؟!!! حتى الاطفال والله فيهم
اهم شي ابتعد عن الفاست فود والدهون كلها
والله ييسر امرك ان شاء الله

[ذيب ازغوى]

ارسلي رقمك وان شاء الله مالك الا طيبه الخاطر

[زئير الاسد]

جزاكم الله خير علئ النصايح وماقصرتوا

وعسئ الله ييسر ولايعسر وكلامكم صحيح انا سعيت وتعبت عشان اوصل هالبعثه مدري ليش عفتها كذا فجئاه

وانا ناوي استخير والله يكتب اللي فيه الخير

[بـارود]

إذا كنت راضي بالخيطين ارجع