مشورتكم في Franchising

[مهب النسيم]

السلام عليكم و رحمة الله

اخواني و اخواتي الكرام اصحاب الخبره في مجال التجارة و الاعمال احتاج مشورتكم. عندي مخطط لاستقطاب محل اجنبي للبلد, في البداية عرضت عليهم ان العقد يكون محدود المسؤوليه و انا اكتفي باجرائات التصاريح و الخ بما يخص ال 49 - 51 بالميه . الشركه اقترحت غير ذلك, اقترحت اني اكون ال master franchiser و اشتري اسم محلهم في القطر!

ماهي عواقب / فوائد شراء اسم مسجل اجنبي في قطر؟
و ااذا كان تسجيل الاسم له فايده لي , هل بامكاني البدء في اجراء شراء الاسم وبعدين ادخل معاهم في امور استقطاب المحل !

حاولت التواصل مع وزارة الاعمال من يومين للنصيحه والمعلومات و لكن لا يوجد رد! هل في موقعهم مايتعلق في شراء اسم مسجل اجنبي ؟


اسمحوا لي على الاطاله و بانتظار نصائحكم


مهب النسيم

[شموخ دائم]

,

,

مرحبا

حاب ادردش معاك نفرض احنا جالسين في كوفي شوب ( وانت عازمني )
هههه
وطلبت لي نسكافي على حسابك
:)

صار لك فتره تفكر بهذا المشروع اكيد
وتتخيل هذا المكان وانت صاحبه ومسوي لك مكتب فيه فوق
:)


دائما المفاوضات تبتدي بجس النبض
:)
وهذا حلاوه التجاره تبتدي من هنا بالفكره والحلم وبعدها التواصل والمفاوضات
بالايميل اول شي وبعدها ( اجتماع ) معاهم

انت تبي الربح السهل والمخاطره عليهم !!

وهم شركات عالميه وما ينقصهم الذكاء ولا الخبره و100 مره متفاوضين مع ناس غيرك
هذا اكيد


هم ايضا يبون يعطونك المخاطره والتجربه
وهم ياخذون ربحهم صافي وهم مرتاحين
وهم ( الطرف القوي ) وبيفرضون شروطهم عليك
وانت الحلقه الاضعف

امامك خيارين
توافق على شروطهم او ترفض

راح تشتري الاسم بمبلغ وقدره وبتكون انت صاحب الحق بقطر
وراح تدفع مبلغ شهري او سنوي لهم من الارباح
وراح يعطونك اسرار الشغله من دعم وتدريب وطريقه عرض البضاعه والديكور والبضاعه

ممكن تتوفق وممكن لا الله اعلم

المخاطره بهذا الموضوع تكون في شغلتين

الايجار \ لان عاده لازم تفتح في مكان راقي وايجاره غالي وتصمد
الاسم التجاري \ هل هذي الماركه ممكن تمشي بقطر !! وعليها اقبال
او ما تقدر تنافس باقي البضائع من ناحيه الجوده والسعر

قبل ما نخلص القهوه
تتوقع كم تحتاج راس مال لهذا المشروع

مليون ريال
:)

يمكن 2 مليون ريال
:)
انا ادردش معاك

,

,


اخوك


شموخ دائم

[مهب النسيم]

الماركه ممكن تمشي في قطر لانها مش موجوده لحد الان. واذا عن الايجار , ماتحتاج مكان راق ابدا , بس هم يفضلون البدء في مول . بس اساسا عندهم اغلبية افرعهم في الشارع و فرع واحد تقريبا في مول. اعتقد هم داخلين على كبير و لو ان مشروعهم مايحتاج ان يكون كبير في البداية في قطر.

و بالنسبه للسعر تم تحديده لدول ثانيه تفاوضوا معاهم من قبل بمليون و شي قطري. بس هل تتوقع شراء الاسم بقطر ولو ان محلهم مش عالمي , يعني لحد الان ماعندهم افرع خارج بلادهم بيكون مكلف لشرائه بقطر ؟؟

ازيدك قهوه ؟؟

[شموخ دائم]

,

,

مرحبا

توكل على الله قهوتك ما تنرد
:)

وعلى شان القهوه بعطيك مثال من الواقع ميزه الماركات والاسماء العالميه
ان نسبه المخاطره تكون قليله والربح شبه مضمون

سواء كان ماركه ملابس او مطعم او مشروب معين

على سبيل المثال


( فروج الطازج فقيه ) مطعم مشهور سعودي

100 الف ريال سعودي
رسم الامتياز

100 الف ريال سعودي لكل مطعم
رسم التطوير

متطلبات راس المال 2.000.000 إلى 5.000.000 ريال سعودي على الأقل وتتفاوت التكاليف الفعلية اعتمادا على التكاليف المحلية للأرض (الشراء أو الاستئجار ) ، العمالة

اما اذا كان المبنى ايجار فالموضوع مختلف


5 % من إجمالي المبيعات شهريا
أتعاب الامتياز

4 % من إجمالي المبيعات

يعني ياخذون 9 % من الدخل الشهري



انت بتشتري وبتدفع مقابل يعطونك هذه الامور



الإسم التجاري

العلامة التجارية

أسرار المهنة

التدريب على التخطيط للأعمال

الرقابة على نتائج الأعمال

طريقة الإنتاج

طريقة البيع والتوزيع

إعلانات يقوم بها صاحب الإمتياز

الرقابة على الجودة


الحين عرفنا ان حق الامتياز مو غالي ذاك الزود
هو بحدود 100 الف الى 200 الف

اما الي سعره مرتفع هو ( تجهيز المبنى ) وهذا يعتبر راس المال كامل

الشركه الاصليه مكسبها المادي

تكسب من ( بيع المواد لك )
وتكسب من الربح الشهري

وتكسب التوسع في ( دوله جديده ) بدون ما تدفع ولا ريال
وممكن تنفتح فروع جديده بهذه الدوله بكل المدن فيها


كل ما كان ال Franchising تبعك
قوي وعالمي مايكون عندك مخاطره والربح مضمون باذن الله


وكل ما كان ال Franchising الي بتجيبه محلي
راح تكون المخاطره مرتفعه

ملاحظه
لاتنسى تدفع الحساب
انا طالع الحين
:)

,

,

اخوك


شموخ دائم

[HSN]

والله دردشه ممتعه

يعطيكم العافيه

واخوي شموخ دوووم مبدع

[مهب النسيم]

اخوي شموخ دائم يعطيك العافيه وشكرا لك علآ الشرح بالامثله افادتني وايد . راح ابتدي اتفاوض معاهم بداية على حق الامتياز في بادئ الامر ونشوف ايش يصير بعدها . بس لنفترض اني شريت حق الامتياز و بعد فتره هونت ما ابي افتح المحل في قطر , ايش يصير ؟

حلفت عليك تقعد للعشا


مهب النسيم

[طير شلوى]

موضوع شيق. ومفيد.