هل هذا مستشفى يحترم نفسه ؟؟

[المستعصم بالله]

السلام عليكم ورحمة الله وبركاته

لطالما كنت أدافع عن مستشفى حمد وأقول بأنه جيد وهو أفضل من الخاص ولكني تيقنت بعد احتكاك بهم بأنهم لا يحترمون مرضاهم وهم من سيء إلى أسوء.

تخيلوا معي زوجتي كان اليوم موعدها عند الساعة الـ 7 صباحاً وقد أوصلتها الساعة السادسة والنصف أي قبل الموعد وحتى هذه اللحظة أي بعد 5 ساعات انتظار لم تأتي الدكتورة !! تخيلوا فترة الانتظار؟؟ وهذه ليست المرة الأولى فحتى المرة الماضية أخروها حوالي ساعتين إلى ثلاث ساعات عن موعدها وأيضاً بحجة أن الدكتورة لم تحضر بعد .

السؤال الذي يطرح نفسه : إذا كانت الدكتورة مشغولة لماذا لا يتم إخبار المرضى مسبقاً بأن الدكتورة ستتأخر ؟؟؟
ما هي وظيفة الموظفين المسؤولين عن حجز المواعيد ؟؟ شرب الشاي أم القهوة أم كثرة القيل والقال !!


لماذا كل هذا الإذلال للمرضى ؟؟


الذي أتمناه أن يجتث الطاقم الإداري في هذا المستشفى عن بكرة أبيه ويتم تعيين كوادر تستحق موقعها فعلاً .

وأخيراً السؤال الذي يساورني متى ستأتي الطبيبة !!!!!!!!!

[ضوى]

كلمة حق ، مواعيد حمد وايد تحسنت عن السابق ولا تتجاوز فترة الانتظار الساعة كأقصى وقت ، ربما طبيبتها صادها ظرف او يمكن بلغت والخطا من بنات الكاونتر الله العالم بالاسباب

[فتى البراري]

السالفه عندهم زمبليطة وراتب مثل العسل

[همر]

مستشفى حمد من افضل المستشفيات على مستوى العالم من ناحية الاجهزه والخبرات.. لكن المشكله ان هذا كله ضايع لسبب بسيط جداً ...


الاهمال

[راشد محمد]

وااااااايد تصير للاسف

[حرم النعمه]

مب شي يديد ..!!!

عادي كنت مسويه حادث رحت الطوارى وللعلم وقت الحادث قالي الشرطي بطلب الاسعاف وقلت له لا انا بروح

وصلت وعندهم علم تقير الشرطه وكل شي تنقعت برع 4 ساعات ووللعلم حادث .!!!

يوم زوجي يا يهاوشهم الا الفلبينيه تقوله احمد ربعك انها تتحرك في ناس ماتتحرك ...!!!!

اعنبو لازم تشوفون الوحده مشلخه من فوق لين تحت دم عشان تدخلونها ايرجنت ولا شسالفه ..!!

الزبده ..!!!!


اهمال وبسس ..!!!

[ودي أكون]

الله لا يحوجكم لهم يارب :)

[بوحمد111]

الله المستعان

وان شاء الله التطور قادم

[أسير الاسهم]

مستشفى فاشل .. انا الوالد مواعيده للقلب والعيون والسكري ما صار يروح خلاص .. ولما اسأله يقول اجي وانطر ساعتين ثلاث ليما يجني الدور !! يرتفع الضغط والسكري والقلب ينغث من الانتظار هذا كله .. أشتري راحتي وما أروح

[لمعة الالماس]

فعلا خدماتهم مب جيدة ولا يراعون حالة المريض

وصارت كل الحالات بالنسبة لهم بسيطة وممكن تتاخر واغلب كلمة يقولونها صبر صبر

ياليت يقدرون وما يتاخروا علنا بالعلاج او المواعيد او الكشف

[المستعصم بالله]

دخلت بعد انتظار لـ 6 ساعات !!! رغم أنها وصلت قبل الموعد بنصف ساعة!!!!!

[طبيب قطري]

أخوي مع اني في الكادر الطبي بس كلمة حق المستشفي غلطانين طبعا.. وحتي اذا الدكتوره صادها ظرف طارئ لازم كانوا يخبرونكم.. مثل النظام في العيادات الخاصه اذا الموعد بيتاخر يطرشون مسج بالموضوع وانت حر تقولهم بغير الموعد او بنتظر..
للأسف مستشفي حمد من سيئ إلى أسوأ وصار الكلام في هذا الموضوع ماينفع لان المسؤولين خبر خيييييير !

[شميرام]

الأنظار مب مشكله يمكن الدكتوراه عندها حاله مستعجلة او عمليه الخ نعطيهم عذر

لكن الإهمال واصل حده انا الصراح انصدمت من الطواراء العادي وطواراء النساء

طواراء العاديه ينقصهم تنظيم والأجهزة لو يسون طواراء بروحه حق العمال

مادري بس المفروض في كذا شخص له خبره بطب مب شرط طبيب مختص بس يعطي تشخيص سريع وتكون عن عنده اجاهزه مثلا في حالات يبغون تطمين بس مب لازم ينظرون مع المرضى والمصخنين يعني اللي مسوي حادث بسيط او ضغطه مرتفع او فيه ربو مب لازم ينتظر مع المصخنين اللي حالتهم حاله عشان ما تنتشر العدوى
مره سوينا حادث وكانت معنا حامل دخلنا الطواراء نجيك قالو لنا ننتظر مع المرضى وثلاث رابعهم نسوان وعيالهم مرضى ومصخنين ومعاطس وحالتهم حاله طلعها رحنا طواراء النساء نطرونا يمكن ثلاث ساعات او أكثر واحنا نبغي بس نتأكد كل شي أوكيه ولا لو رايحين أشعه الخليج سوينا سونار ابرك من نطرتهم مفروض في طواراء العاديه من تدخل يجيكون وخلاص ننطر نأخذ عدوى ليش !!!!!!


طواراء النساء
الاستقبال ثنتين فيه نوع من قله الخبره ،،،، الحين تجيهم حالات متنوعة تعالو جيبو صوره من البطاقة شخصيه للزوج والزوجة وعقد زواج !!!!طواراء ول فتح ملف مشكله ذي الاوراق طلبوها قبل المركز الصحي واصلا المفروض سستمهم مربوط مع سستم ثاني يبين لهم فرضا جاتهم حاله مرضيه والمره منفصله نفس وحده كانت كبيره في السن الا تقولها وين بطاقه زوج قالت لها انا منفصله وهو في الفلبين ،،،، غير اللي يسال عن مرته وين وهي تقوله يمكن ربت في مستشفى الفلاني
نفس الفكره المفروض في دكتوره او خبيره مب لازم دكتوره تحدد الحاله قبل الدخول عل دكتور والاستقبال مالهم يبغيله اعادت ترتيب وكل سرير جنبه جهاز سونار وكل دكتور عنده جهاز مب كل مكان في صوب مب لازم جهاز فل اوبشن يخذون أجهزه لحاله الطواراء

والحمام الله يعزكم ماساه مره مافي كلينكس مره مافي صابون مب مجهز نهائيا كا حمام طواراء وحمام واحد المفروض أصلا في عامله مخصصه حق الحمام و المفروض يضمن سلامه الحامل مب منبع بكتريا ،حمامات المولات أنظف منه

[وحيد-الشوق]

ملينا من سيرة هالمستشفى الفاشل

متى بيتسنعون ؟

[R 7 A L]

أنا لست حزين الا على شي واحد فقط
على اسم غالي على قلوبنا ونحبه مرتبط بهذة المؤسسة

[الأصيلة]

أخاف مغلطين ياناس،،،
المواعيد صارت ممتازة وصار لي سنة تقريبا
لما أروح مواعيدي ما انتظر أكثر من نص ساعة،،،
ولما اسمع معاناة الناس مع بعض المستشفيات الاوربية،،،
أقول الحمد الله على النعمة،،،،،

[صوت مواطن]

مستشفى القصر العيني

[تاج المراجل]

خاطري انه يتم تبديل الكوادر العامله هناك .. وراح يكون افضل مستشفى ..

[رمح الضعاين]

مستشفى حمد من افضل المستشفيات على مستوى العالم من ناحية الاجهزه والخبرات.. لكن المشكله ان هذا كله ضايع لسبب بسيط جداً ...


الاهمال




وانعدام الرقابه وسوء التخطيط

للاسف امكانيات هائله تخصصها الدولة وميزانيه ضخمه للتعليم والصحه نفتقد لمن يديرها بطريقة ايجابيه لخدمة المواطن والوطن بشكل فعّال



اخوكم

[حميداني]

فعلاً مصخره

[حمد 2002]

مستشفى حمد متوفره فيه احدث الاجهزه على مستوى العالم وميزانيته ضخمه ولاكن شنو ينقصه !!!!!

ممممم ينقصه ايجيبون كل هالاطباء الي بالمانيا واوربا وياحطووونهم فييه ، بدال الناس ماتتعالج برع قطر بيصيرون ايتعالجون بقطر ، وبالعكس تالي كل الدول العربيه ودول العالم بيزورون قطر بسبب العلاج ،،،

يعني المفروض الدوله بعد اتفكر اشلون تجذب السواح ، مممم يعني مب شرط ايركزون على السياحه الترفيهيه بعد لازم ايركزون على نقطه السياحه من اجل العلاج ببناء المستشفيات المدعمه بالكوادر الطبيه الممتازه والعالميه

[فرهود]

الحل تأهيل اطباء قطريين .لاتحلمون طبيب ممتاز وخبره يترك بلاده ويجي يشتغل عندنا لان الاطباء في اوروبا وامريكا يشتغلون بشكل متواصل من الصبح لين اخر الليل بدون توقف ودخلهم اليومي مايقل عن 20-50 الف ريال يعني في الشهر دخل الطبيب يتعدى مليون ريال الا اذا الدوله بتعطيهم راتب شهري مليون يمكن يفكرون .

[حمد 2002]

الحل تأهيل اطباء قطريين .لاتحلمون طبيب ممتاز وخبره يترك بلاده ويجي يشتغل عندنا لان الاطباء في اوروبا وامريكا يشتغلون بشكل متواصل من الصبح لين اخر الليل بدون توقف ودخلهم اليومي مايقل عن 20-50 الف ريال يعني في الشهر دخل الطبيب يتعدى مليون ريال الا اذا الدوله بتعطيهم راتب شهري مليون يمكن يفكرون .

بالعكس اخووي لو تعطيهم مليون ريال مافيها شيء ، على الاقل ايفيدون هل قطر ، احسن من هاللعيبه الي يعطوونهم ملايين على كوره ايشوتونها

[بو علاوي]

احسن شي انهم احيانا يعطون مواعيد لبعض النساء الحوامل والموعد يكون بعييييييييد يعني بعد الولادة ههههه
والشي الثاني يعطونك موعد بعد فترة طويلة ولما تجي على موعدك تكتشف ان الدكتور مسافر اجازة ومش موجود وموعدك تبخررررر



..
المشكلة الضغط الكبير اللي عندهم اهم سبب للزحمة والروتين

[رذاذ]

السالفه عندهم زمبليطة وراتب مثل العسل



والله والراتب .. انت ما تعرف شي لو بتكلم عن المنسقات والاداريات والممرضات المقيمين مواليد قطر رواتبهم جداااااا ضعيفة ولا تتجاوز 6500 مع دبلوم التمريض ..

راتب ممرضة فلبنية او اي جنسية مستقدمة اعلى من راتب اي مقيمة مولوده وربت ودرست و شتغلت بمستشفى حمد . وهم بالانتاج افضل واحسن واسلوب اقنع من الى يجون لجل المادة ويروحون




بالعكس اخووي لو تعطيهم مليون ريال مافيها شيء ، على الاقل ايفيدون هل قطر ، احسن من هاللعيبه الي يعطوونهم ملايين على كوره ايشوتونها

عطه مليون ريال وبعد يومين رايح بلادة .. من الاولى بالنظر الممرضة المقيمه الى درست ونولدت و كملت وصارت دكتورة

ولا دكتور جاهز من الخارج وراتب شوي وشويات وبعد سنتين سافر ولا رجع

[قطريه أصيله]

يبيلكم دورة صاعقه في مستشفيات باقي الدول العربيه ..
وقتها بتعرفون وش قيمة مستشفى حمد !

[BoFahed]

هذا المكان بالذات مادري شنو فيه ؟؟؟ فيه لعنة الفراعنة ولا شنو ؟؟؟؟ عمره ما يتعدل

فساد ورشاوي وتسيب واخطاء طبية بالهبل لين متى ؟؟؟؟ ومقسمين المرضى ال عاديين وال vip واتحدى اي شخص ينكر انه بالمواعيد مب هالشي

ما تمشي امورك الا بالواسطة ؟؟؟؟حتى الممرضات الهنديات والفلبينيات يتوسطون لربعهم :eek5: وعلا عينك يا تاجر


الاهمال والتسيب ضارب بجذورة في هالمؤسسة

[نوفة قطر]

عادي ^^"

انا قبل يوم كنت اراجع في رميله كان موعدي 8 اروح من 7 عشان المواقف وجذي ومادش ع الدكتور الا بعد الـ 1

:nice:

[الزلزال]

انا عندي لك ثلاث حلول
1 - اتودي زوجتك متأخر
2 - وطني صباح الخير
3 - تشتكي المدير العام في المستشفى
والله شي يحزن بس شنقول الله كريم

[الخزرجي قطر]

الكمال لله سبحانه وتعالى
خدماتهم تحسنت عن الاول
بالرغم ون وجود بعض السلبيات

[المرحب]

الله المستعان

[khaldoon]

لا حول و لا قوة الا بالله

الله يكون في عونك

اذكر يوم كنت اراجعهم في التسعينات انه الموعد عندهم يعني انتظار يوم كامل حتى يفرغ الفريق المعني بمعالجتي في ذلك اليوم

[الأصيلة]

احسن شي انهم احيانا يعطون مواعيد لبعض النساء الحوامل والموعد يكون بعييييييييد يعني بعد الولادة ههههه
والشي الثاني يعطونك موعد بعد فترة طويلة ولما تجي على موعدك تكتشف ان الدكتور مسافر اجازة ومش موجود وموعدك تبخررررر



..
المشكلة الضغط الكبير اللي عندهم اهم سبب للزحمة والروتين

هذا قبل سنتين،،
أما الحين فالوضع تغير وتعدلت المواعيد
والكل مرتاااااح،،،،

[الأصيلة]

يبيلكم دورة صاعقه في مستشفيات باقي الدول العربيه ..
وقتها بتعرفون وش قيمة مستشفى حمد !

:nice: صادقة
ما تعرف قديري لين تجرب غيرررري،،،،

[شميرام]

هذا قبل سنتين،،
أما الحين فالوضع تغير وتعدلت المواعيد
والكل مرتاااااح،،،، لا لين الحين ،،،لازم تراجعين عند المركز الصحي لين الأسبوع 32 يعني الثامن طبعا المركز ما يعطي إجازات لانهم أطباء عامين اقل خبره في الامور النسائيه يعني اذا الوحده تعاني من الم صبري متنسيه اصبري ول ذي الجمله تقهرني "أنتو بتدلعو"لو مصريه شكلها عل طول عطتها أجازه (الحامل تحتاج على الأقل أسبوع من كل شهر ) طبعا اذا مثلا تم التحويل في الأسبوع 32 بيعطونج موعد عقب شهر جد دخلو التاسع اذا الوحده عندها مشاكل صحيه ؟؟؟؟طلق مبكر الخ تراجع الطواراء ؟؟؟ قبل كانو يعطون كل أسبوع موعد في الثامن واجازات ذي الحين 2013

الأغلبية يرجعون مسائي يعني بفلوس او عند عياده خاصه

[GENIUS]

على سبيل المقارنة مستشفى إسبيتار أصبح ملجأ وملاذ وقبلة لعلاج الإصابات الرياضية ويهب عليه البشر والرياضيين من كل أنحاء المعمورة على عكس مستشفى حمد الذي جعلنا نهرب منه . الفرق في الإهتمام بالكادر ونوعية الخدمة .

[الصغيره]

السلام عليكم ورحمة الله وبركاته

لطالما كنت أدافع عن مستشفى حمد وأقول بأنه جيد وهو أفضل من الخاص ولكني تيقنت بعد احتكاك بهم بأنهم لا يحترمون مرضاهم وهم من سيء إلى أسوء.

تخيلوا معي زوجتي كان اليوم موعدها عند الساعة الـ 7 صباحاً وقد أوصلتها الساعة السادسة والنصف أي قبل الموعد وحتى هذه اللحظة أي بعد 5 ساعات انتظار لم تأتي الدكتورة !! تخيلوا فترة الانتظار؟؟ وهذه ليست المرة الأولى فحتى المرة الماضية أخروها حوالي ساعتين إلى ثلاث ساعات عن موعدها وأيضاً بحجة أن الدكتورة لم تحضر بعد .

السؤال الذي يطرح نفسه : إذا كانت الدكتورة مشغولة لماذا لا يتم إخبار المرضى مسبقاً بأن الدكتورة ستتأخر ؟؟؟
ما هي وظيفة الموظفين المسؤولين عن حجز المواعيد ؟؟ شرب الشاي أم القهوة أم كثرة القيل والقال !!


لماذا كل هذا الإذلال للمرضى ؟؟


الذي أتمناه أن يجتث الطاقم الإداري في هذا المستشفى عن بكرة أبيه ويتم تعيين كوادر تستحق موقعها فعلاً .

وأخيراً السؤال الذي يساورني متى ستأتي الطبيبة !!!!!!!!!

تلاقي الدكتوره رايحه مرافقه لاحد من معارفها بطابق من المستشفى ياكثر ما نشوف موظفين مستشفى حمد تاركين عملهم ويلاحقون مواعيد اهلهم وكان المريض اللي ينتظرهم مش مريض او وراه التزامات

مستشفى منتهي الصراحه مافيه فايده حتى تتصل بخدمة المرضى وعادي شكواك بالزباله ترمى هو مستشفى حمد اذا ماسووا كذا ما يكون مستشفى حمد

[غرِيبهـ]

بسم الله الرحمن الرحيم

بالنسبة للانتظار والمواعيد تحسنت عن السابق بوايد

مثلا المريض اللي على كرسي متحرك له اولويه الدخول
وتم ابلاغنا عن تغير احدى المواعيد لسفر الدكتور

حاليا في مكاتب للشكوى

وانا اذا حصلت اي تقصير اتوجه له والقى تجاوب سريع لحل الاشكالية

المساله صبر واظهار الجانب الايجابي والسلبي

[kuwari]

مستشفى حكومي لازم السمردحه فيه يكون