ماهي النصائح : لمنزل خالي من الحشرات والصراصير والنمل !

[Chambray]

نبغي تفاعل في هالموضوع ..


بحكم خبرتي هناك شجر يسمى ( النيم )
طارد للحشرات الطائره والباعوض والنامس ..


ايضاً صب الديزل في السور الخارجي للفيلا ومحيط الفيلا من الخارج قبل تبليط الحوش

صب الديزل في المنهولات

رش البيت بعد عملية الحفر وقبل الصبيه

رش البيت مرة اخرى بعد الدفان وقبل التبليط



قاعد افكر في طريقة لكن مادري هل هي عملية ام لا
وهي صبغ المنهولات الخارجية بالقار الاسود ..
لان المعروف ان الصراصير تبيض على حوائط المنهول
لذلك ابحث عن طريقة لمنع الصرصور من الدخول او البيض في المنهول ..


ماهي الحلول العملية الاخرى في وجهة نظركم للتغلب على الحشرات ؟؟


لاني صراحة تعقدت من الصراصير في البيت الي ساكن فيه وابحث عن أفضل الطرق للتغلب على كافه انواع الحشرات

ليش في الفنادق مانشوف صرصور !!!!!!!!!!!!! ههههههههه شيسوون ؟

[نور الحور]

ههههههههههه .. نفس تفكيري بالنسبة لتساؤل الفنادق .. اعتقد لأن السكن يكون في طوابق عاليه :secret:

وانتظر معاك التجارب والحلول ..

الحل المعتاد صب غاز في المنهولات بشكل دوري ..
وبالفعل سمعت عن شجرة النيم وزرعتها من فترة في بيتي ..
بعد في الرش المعتاد والحملات الخاصة بالبلدية ..
هذا اللي اعرفه ..وإن كان فيه تجارب ياليت نستفيد منها ..

[Chambray]

سؤال ، هل صبغ غرف المنهول بالقار مفيد ؟ ام خسارة فلوس على الفاضي ؟؟؟

[ضوى]

والله ياخوي صبغنا بالقار ااالاسود ولا خفوا هالصراصير مصببة يتكاثرون بشكل

[MAZEN37]

عن تجربه
حطوا بودره البف باف بودره تحت اي مكان في البيت غساله حطوا
تحت الكنب تحت السراير
حتى لو طلع الصرصور تحصلوه مترنح ويموت

[Chambray]

عن تجربه
حطوا بودره البف باف بودره تحت اي مكان في البيت غساله حطوا
تحت الكنب تحت السراير
حتى لو طلع الصرصور تحصلوه مترنح ويموت

ياخوي صعبه والله تحط بودره ( كيماويات ) في غرف النوم او في اماكن الجلوس .. في النهايه هذي مواد كيماويه مضره للانسان ..

[معماري قطري]

نبغي تفاعل في هالموضوع ..

ما شاء الله موضوع دسم .. انا باقول لك خبرتي في هالموضوع وباضيف على حلولك الصحيحة لدرجة ما.


بحكم خبرتي هناك شجر يسمى ( النيم )
طارد للحشرات الطائره والباعوض والنامس ..

هناك أيضاً نوعيات خاصة من الأصباغ فيها ميزة طرد الحشرات منها أصباغ ماس الصدفية الإيطالية.


ايضاً صب الديزل في السور الخارجي للفيلا ومحيط الفيلا من الخارج قبل تبليط الحوش

صب الديزل في المنهولات


إستخدام الديزل والكاز لهم مشاكل بيئية وتأثير على الزراعة وريحة بعد .. لكن للمنهولات إذا تعمل عزل مائي من داخل وبرا أتوقع بتكون قوية ومعزولة جيداً .. أو أقل شيء تحط بيتومين نوعية ممتازة وتعمر.

رش البيت بعد عملية الحفر وقبل الصبيه

رش البيت مرة اخرى بعد الدفان وقبل التبليط


نجي لرش الدفان وانا في رايي زين نرشه قبل الطبقات الأخيرة وقبل الدك ونرش شوي بعد الدك ورش الماي وما فيه داعي للرش بعد عملية الحفر .. المشكلة في أغلب المباني إن بيض النمل الأبيض والأرضة يكون موجود أصلاً في الدفان الرخيص والبعض يرشون الدفان الأساسي ويجيبون رمل غير معالج ويحطونه تحت البلاط وفوق صبية الحماية اللي فوق الدفان، فيكون هذا الدفان يحتوي على الأرضة وتطلع بسهولة للخشب وتبين هذي المشكلة بعد سنه الى 10 سنين حسب قوة الارضة .. مريت على مبنى اليوم الأرضة مخربته تخريب ومشوهة كل الخشب اللي فيه مع ان تتم معالجته بس بعد باقية.

أحسن حل للقضاء على الأرضة بعد معالجة الدفان التحتي وصب صبية عليه بالكامل وطبعاً يبقى الخشب اللي قابل للإنضغاط " compressible edge wooden boards "
وهذا أساسه خشبي ومثل الكرتون وسهل تمر فيه وتاكله الأرضة، ويبقى ممر رأسي في أطراف الصبية، ولازم ينحفر شوي وينصب عليه دوا قوي للأرضة وبعدها يتسكر بماستك قوي أو بماستك وحبل ماستك خاص علشان يمسك وما ينفتح تطلع منه الأرضة لفوق وخصوصاً للنعلات اللي تكون سنتيمترات قريبة.. وبعدها نجي للدفان اللي تحت البلاط ونلغيه بالكامل نسوي صبية اسمنت تغطي البايبات وتكون اساس للزقة السيراميك أو البورسلان، وفي حالة الرخام رمل مغسول ناشف وبعد لو تعالج بدوا عن الأرضة أحسن



قاعد افكر في طريقة لكن مادري هل هي عملية ام لا
وهي صبغ المنهولات الخارجية بالقار الاسود ..
لان المعروف ان الصراصير تبيض على حوائط المنهول
لذلك ابحث عن طريقة لمنع الصرصور من الدخول او البيض في المنهول ..


إذا المنهول مسكر عدل والجوانب طابوق شلون بتدخل الصراصير؟ .. المفروض نظام الصرف الصحي مدروس ومتطور .. حتى من ناحية الأكواع والتهوية، وغيرها أُمور كثيرة من أهمها صوت الماي لو ينزل من المغسلة لمسافة كبيرة تحت يكون مزعج ، وللصرف الداخلي أكواع خاصة متطورة تمنع وصول الصراصير داخل تكرم الحمام ، والعزل أكيد مهم ويمكن رايك صح يمنع تبييض الصراصير هناك .. ولو في المنهول فتحات بسيطة في الأطراف حط شوي قريز عليها ما تنسد وتنفتح بسهولة وفي نفس الوقت تمنع دخول الصراصير


ماهي الحلول العملية الاخرى في وجهة نظركم للتغلب على الحشرات ؟؟


لاني صراحة تعقدت من الصراصير في البيت الي ساكن فيه وابحث عن أفضل الطرق للتغلب على كافه انواع الحشرات



ليش في الفنادق مانشوف صرصور !!!!!!!!!!!!! ههههههههه شيسوون ؟


نجي للحماية الأخيرة وهي الرش بالمبيدات القوية واللي تبقى لفترة ست شهور أقل شيء، وهذي زين تسويها سنوياً مع بدايات الصيف، وتجيب شركة ومهم تكون معاهم تشرف على رش المنهولات واحد واحد وكل الحمامات والمطابخ وتحت الثلاجات ووراها وفي المخازن ولا تعتمد على عمال البلدية اللي يرشون من فوق لفوق ولا يتنزلون يفتحون منهول .. ما ادري اذا تغيرت طريقتهم ومعاهم مشرفين خاصين.. ولا تنسى الرش صوب الزراعه وطبعاً أتوقع الحوش ما فيه انترلوك على رمل لأن هذا بتكون تحته بيوت نمل لو رشيتها بمبيدات بعد بتطلع .. يعني لازم الحوش صبية خرسانة تحت وفوقها بلاط شعبي - رخام - اللي هو بس معزوله عدل عن النمل.

[بوخالد911]

ومنكم نستفيد

[Bozizoo]

من واقع تجربه
عقد مع احدى الشركات الكبيره و خطين حمر تحت الكبيره
رش المبيدات الحشريه (best conrol)
ويكون العقد سنوي وكل شهر يرشون البيت و خلال الشهر شفت اي اشي اتصل عليهمو يجونك يركضون
وانصح شركه QPC شركه التيسير

[(عبدالله)]

أذكر في سنة 1999 أو 2000

بيتنا كامل كان تحت احتلال الله يعزكم الصراصير

استخدمنا جميع أنواع المبيدات ولا في فايدة

لين استدعينا البلدية مرة من المرات رشوا مبيدات كثيفة في المنهولات + ضخوا المبيد (الدخان) داخل البيت بكبره وسكرنا الدرايش والبيبان وخليناه محكور 24 ساعة

رجعنا اليوم الثاني وفتحنا البيبان والدرايش عشان تصير تهوية في البيت ونظفنا البيت كامل

تم القضاء على الحشرات والحمدلله رب العالمين

[الجناح الذهبي]

بالنسبة للصراصير بالذات النوع الالماني، هناك معجون صناعة كورية يباع في محل لمعدات الزراعة في سوق الخميس والجمعة، وسعره 45 ريال، وفعلا يقضي عليها لمدة 6 شهورن وينحط منه مثل حجم حبة النخي (الحمص) في الزوايا وخلف الاثاث والمعدات في البيت والمطبخ. والزين فيه ما له ريحه.
وبالتوفيق للجميع