تقرير زيارتي السريعة الأولى لمعارض التشطيب في الرياض

[(عبدالله)]

السلام عليكم ورحمة الله

هذا تقرير سريع لزيارتي الأولية لمعارض التشطيب في الرياض

بعد الاستفادة من تجربة وتوجيهات صديق الطفولة وأخي الذي لم تلده أمي (فويرط)

http://www.4reesoft.com/files/4s6d2d8/Riyadh_Finishings_March_2013_without.pdf.htm

ولا تنسونا من الدعاء

مع خالص التمنيات بالتوفيق للجميع

[نور الحور]

جزاك الله خير أخوي عبدالله انت وأخوك فويرط .. شفته على السريع ..لقيت صور كثيرة ما شاء الله .. قلت لا يبيله عودة مرة ثانية ...
الله يعطيك العافية ومشكور على الإفادة .. بس جايينك بالأسئلة :nice:

[q6r143]

مشكوووور على التقرير الحلوووو

[الاسكافي]

تسلم اخوي على التقرير المفيد
ويعطيك العافية على المجهود الطيب

وننظر نصايحك للناوي يشطب من الرياض

[BoFahed]

انا رحت هناك واشوف تقريرك مختصر وشامل في نفس الوقت ما شالله عليك

ما قصرت اخوي كفيت ووفيت

[معماري قطري]

ما شاء الله تقرير إحترافي لأبعد الحدود

تسلم يا أخ عبدالله على هالتقرير المتعوب عليه .. وصج فيه خيارات كثيرة بس لاحظت إن الأسعار بعد نوعاً ما غالية وممكن يحصل الواحد البديل متوفر في قطر بسعر مقارب .. لكن اللي عارف إحتياجه ومختار النوعية من هالتقرير ممكن يقارن أكثر من ناحية السعر والشكل بس الجودة والمواصفات الفنية الكاملة ممكن تنشرح أو يحصل كتيبها هنيه بسهولة وهناك بشوية صعوبة لازم الزيارة يعني علشان يشوف ويقرر بالضبط، ويكون مسوي رسومات لتوزيع البلاط حسب هذا التقرير والصور مثلاً وعارف الكميات والقطع الخاصة اللي بياخذها قبل ليروح، وياخذها بشوية زيادة 15% مثلاً إحتياط، أو ياخذ شيء مشابه والأهم تكون الرسومات التفصيلية معاه.

شيء واحد ما عجبني .. اللي هو بعض المحلات تمنع التصوير .. أخاف تكون داخل مفاعل نووي وخايفين تطلع الأسرار.

عقليات غريبة ألحين الدعاية المجانية أفضل شيء لهذي المحلات بالصور والنت والسمعة الطيبة.

[خزامئ]

الله يبارك لك
اوخونا عبدالله
بس هل هاذي الاسعار النهايه
او كان فيه خصم

[مطر الحب]

يعطيك العافيه أخوي ع التقرير المختصر

ملاحظة بسيطة أخوي

محل الأنيق ومحل بيت الأباء محلات تابعة لشركة المدى للسيراميك
الاسعار في هالمحلات نفس الشيء وحتى البضاعة كذلك
ولكن الاختلاف في طريقة العرض فقط ..

[(عبدالله)]

:: نور الحور ::

وجزاج المثل اختي وحاظرين افا عليج بالاسئلة :nice:


:: q6r143 ::

الله يحييك حاظر لك طال عمرك :omen2:


::الاسكافي::
الله يسلمك ويعافيك :shy::)
نصيحتي الله يسلمك .. ان الواحد قبل لا يعزم يستخير ويحسبها صح
استيراد مواد التشطيبات تكون مناسبة حق ناس ومب مناسبة لثانيين.. وخاصة اللي ما لهم عبالة متابعة
شي ثاني... كثرة التنويع في الالوان والانواع تزيد من العبء غير عن اللي مثلاً عنده صالات مفتوحة يبي ياخذ من نوع واحد وطقة وحدة.. مثلي :shy:
والله يوفقك :omen2::nice:

[(عبدالله)]

:: BuFahed::

تسلم بوفهد.. جزاك الله خير :):shy:

:: معماري قطري ::
الله يسلمك أخوي معماري قطر ويجزيك خير على كلماتك اللطيفة وإطلالتك الألطف
ما قصرت على نصايحك


:: خزامئ ::
ويبارك فيك
الله يسلمك الخصم يعتمد من محل لمحل.. المحلات اللي في التقرير يتراوح الخصم عندها
من 1-3 ريال للمتر المربع
والله المستعان :):shy:


:: مطر الحب ::
الله يعافيك ويجزيك الخير
كلامك صح.. وأنا ركزت عليها لأنها تتبع نفس المجموعة وسمعتها طيبة في الخدمة والجودة
:shy::)


:: عبدالله ::

[Bozizoo]

يعطيك الف عافيه اخوي عبدالله
جزاك الله خير
هذا التقرير راح يستفيد منه كثير من الاعضاء

[مضارب دوسري]

المشكله يا اخوان في السيراميك والارضيات
انا رحت السعوديه وشفت المنتجات اللي هناك اسباني وايطالي وانواع واشكال وسعر ارخص من هنا
بس اكتشفت شي ان الجوده احيانا تكون شبه معدومه
شفت بورسلان ايطالي واسباني في مكارم النخبه على 72 وبعد الخصم يوصل حول ال 60
ولكن البلاطه اشيلها باربحيه في يد وحده والسمك مب مثل اللي في قطر

على فكره عندهم محلات فالرياض اغلى او مقارب لسعر قطر

حاليا في محلات وايد نزلت اسعارها ف قطر وفي محلات للحين عايشه الدور ولو تقعد عند المحل من الصبح لين الليل ماتلقى قطو يوطوط عندهم

عندك حاليا في الضحى ونابينا وتدمر والعاصمه وسيراميك الخليج وغيرهم وايد
اسعارهم مقاربه للاسعار اللي فالتقرير
اللي في التقربر التشكيلات كثيره بس هناك ناس مثلا عندهم الجوده قبل الشكل
عشان جذي انا قررت اشتري من هنا عشا ما كرر غلطة اخوي اللي ندم عليها بعد فوات الاوان
لانه اخبر سافر مرتين وكل مره عشان بلاطه او بلاطتين
يقولي اشتريت زياده ف كل حمام 10متر احيانا ولكن لما توصل قطر تكون تكسر منها جزء
ويرجع يسافر 650 كيلو عشان بس بلاطتين او ثلاث
ومره مسافر عشان مغسله جابوا النوع اللي يتعلق فالطوفه وتصميم بيته من النوع اللي فوق الارض

ومن ناحيه حسابيه
في السعوديه
واحد مثلا اشترى سيراميك حمام ب 40 ريال ل 30 متر
يطلع عليه ب 1200
اشترى احتياط 10 متر يعني المجموع 1600
في قطر 1600ريال / 30متر
يطلع الناتج 53 ريال

يعني اشتراه هناك بسعر 40 ريال واشترى زياده عشان مايعور راسه
وفالاخير يطلع كانه اشترى المتر ب 53 ريال
لو اشترى من هنا بيلقى فالمحلات المذكوره اعلاه اسباني افضل جوده وبسعر 50 و55
بس ماراح يحتاج تشتري 10 متر زياده

[مضارب دوسري]

ف نصيحه لكل واحد ناوي يتعنى عن هالشي
ترى والله يالربع في اسعار هنا اغلى من السعوديه ب 4 و 5 ريال ولكن اجود من اللي هناكً
وتكون شريت شي ولا تعور راسك من التكسير والجمارك وخط الرجعه
انا ماقول هالكلام من فراغ
انا توني شاري لبيتي ولقيت وايد اسعار مقاربه للاسعار اللي فالتقرير
جربوا ماراح تخسرون شي :)
ولقيت في نابينا كم نوع من راك الاماراتي افضل بمليون مره من الصيني وبسعر 26 ريال
ولقيت بورسلان للحمامات توني شاري منه نوعيه فخمممه وعجبتني كانها رخام عليها سبيشل اوفر 45% واللي بيروح نابينا يسال عن راك اللي عليه سبيشل اوفر سعره القديم ب 185 وبعد الخصم ب102
تقريبا
بس هذا تشتريه حق حمامات الدلع الماستر والضيوف هههه
ويعطيك العافيه يا صاحب الموضوع عالتقرير الشمولي بصراحه
ولكن همسه ف اذنك
صحيح السعر افضل ولكن ركز على الجوده قبل السعر ومثل ماقلت لك في محلات بنفس السعر واجود من اللي هناك بوايد جرب تمر هني

[(عبدالله)]

:: Bozizoo ::
الله يعافيك ويجزيك الخير :):shy:


:: مضارب دوسري ::
يرحم لي والديك ويجزيك الخير على مداخلتك القيمة
مثل ما قلت .. الواحد لازم يحسبها صح ويعرف احتياجه

أعني شخصياً كنت محتاج دفعتين من الشحن، الدفعة الأولى مواد وأطقم الحمامات وانت بكرامة

الدفعة الثانية أرضيات الصالات والغرف

بالنسبة للدفعة الأولى: أشوف من المناسب والأصلح آخذ من الدوحة لأن الحمامات عندي تتفاوت في المساحات وتتنوع في التوزيع داخل كل حمام بحيث ان الحمام الواحد في اكثر من نوع، والأطقم ماشاء الله متوفرة في الدوحة بأسعار متفاوتة لكن الخلاطات باخذها من دبي جروهي ألماني.


الدفعة الثانية غالباً باخذها من الرياض بسبب إن الصالات عندي مفتوحة على بعضها وناوي آخذ طقة وحدة.

بعد ما أحسبها صح طبعاً في التكلفة والجودة

ما قصرت جزاك الله خير


:: عبدالله ::

[مضارب دوسري]

هلا اخوي
الله يوفقك يالشيخ

بقولك شي جربت تمر نابينا تشوف توتو ؟
تراها صناعه ممتازه وماعليها كلام
المراد الجروهي الالماني رقم واحد بس وين تلقى الالماني الصح

[(عبدالله)]

:: مضارب دوسري ::

ويوفقك والجميع أخوي
أشكرك على نصيحتك.. فعلاً انا مريت نابينا وموديلات توتو حلوة وممتازة
بس أنا حطيت في بالي موديلات معينة من جروهي مالقيتها في توتو.. كذلك في موديلات في توتو لقيت مشابهة لها في جروهي وأرخص..

والحمدلله رحت دبي وشريت من الوكيل جروهي ألماني وجبتهم معاي الدوحة

يرحم لي والديك جزاك الله خير

:: عبدالله ::


هلا اخوي
الله يوفقك يالشيخ

بقولك شي جربت تمر نابينا تشوف توتو ؟
تراها صناعه ممتازه وماعليها كلام
المراد الجروهي الالماني رقم واحد بس وين تلقى الالماني الصح

[(عبدالله)]

:: مضارب دوسري ::

على فكرة.. أنا خذت بنصايحك القيمة الله يجزاك خير ومريت المحلات اللي ذكرتها:
الضحى ونابينا وتدمر والعاصمه وسيراميك الخليج
بالإضافة للعمودي والعباس والشريف

للأسف عيني طاحت على الأشياء الغالية من سيراميك الخليج ولا راضية تنزل عنها :secret:
فشكلي باخذ من عندهم حق المجلس والماستر وغرف النوم

أما غرف الدريول والخدامة وحمام الحوش باخذ من نابينا راك

والله الموفق

[Azizuk]

مشكلة تجار الدوحة مايوفر الكمية المطلوبة وتجي تختار وتتفائج يقولك تعال غير طلبك خلص وإلا اصبر بنطلب من الامارات وتصبر 3 شهر لين توصلك البضاعة وحتى التغليف في السعودية يجيك مغلف ومرتب وتحصل الكمية الموجودة وعندك الاختيار متنوع وحتى لو غالي بس تكون بضاعتك مميزة لان في محلات في الرياض راقية جداً وسعرها غالي بس جودة ورقي

[مضارب دوسري]

:: مضارب دوسري ::

على فكرة.. أنا خذت بنصايحك القيمة الله يجزاك خير ومريت المحلات اللي ذكرتها:
الضحى ونابينا وتدمر والعاصمه وسيراميك الخليج
بالإضافة للعمودي والعباس والشريف

للأسف عيني طاحت على الأشياء الغالية من سيراميك الخليج ولا راضية تنزل عنها :secret:
فشكلي باخذ من عندهم حق المجلس والماستر وغرف النوم

أما غرف الدريول والخدامة وحمام الحوش باخذ من نابينا راك

والله الموفق

الله يوفقك ياخوي
ومنزل مبارك ان شاء الله