عاملوا محطات الوقود يستغلون غفلة سائقو السيارات

[مسلمة]

السلام عليكم ورحمة الله وبركاته ،
أحببت أن أنبهكم لما يقوم به بعض عاملوا محطات الوقود واستغلالهم لانشغال السائقين ، تذهب للمحطة تطلب منه أن يعبي لك 100 ريال ولكنه يعبي 90 - 80 أو حتى 50 ريال ، ويستغل انشغالك وعدم التفافك للعداد .
وإذا انتبهت يستدرك ويقول : أوه سوري ، ويكمل للمبلغ المطلوب ،وكأنه لم يسمع بالمرة الأولى .
ومنهم من يقوم بتصفير العداد في الحال حتى لا تنتبه للرقم .

أرجو من الجميع أخذ الحذر وعدم السماح بالنصب عليه من ضعاف النفوس ، فلقد تكرر الموقف ومن أكثر من محطة .

[المرحب]

:omg:

من آمن العقوبة أســـاء الأدب

يسلموا على التنبيه أختنــــا مسلمة


:nice:

[ودي أكون]

تنبيه وتحذير جميل

بارك الله فيج اختي مسلمه

[بونووف]

كلامج صحيح وصار لي موقف مع واحد فلبيني قلت له صب لي فل وقعد يسولف معاي المهم فول الموتر وطلع حسابي حروة ال 110 عطته 500 ورجع لي الباقي وحطيت الفلوس في حظني ماعديتهم وتميت اتكلم فالتلفون .. تميت واقف مكاني المهم اشوفه يطل شوي ويرجع يطل ويرجع حسيت فيه شي قبل لا احرك حسبت الفلوس الا الريال لاهف حروة 50 ريال كلمته قالي اوه سوري بووس توو هووت مادري شخربط خذت الباقي وحركت

هالفلبيني موجود في محطة وقود اللي عند نادي لخويا واكثر من مره يقعد يتملحس ويسولف

وفي فلبيني ثاني في مطعم جينه بنحاسب وعطيناه 500 الا تم يسولف معانا ويقول اشياء مالها معنى ( رفيجي دب يقوله انت تتمرن ويقعد يرقص ) المهم وده المبلغ عند الكاشير ورجع وتم يسولف المهم الا انقوله وين الباقي قال اوه سووري بوووس

حطوا بالكم من الفلبن مشكله ترى

[PGR]

يعطيج العافيه اختي على التنبيه ,, السالفه كلها لانه شبابنا قاموا لما الهندي يبي يرجع ريال او ريال يقوله خلها لك ,, العمال خذوها عادة وفكروا اي عادي هذول عندهم خير ما بيفتكرون بال 50 او 10 ريالات

[التيما]

أنا صار لي نفس الشي من كم سنة ومن يومها أحدد له المبلغ واشيك بعد عالعداد ..

[كازانوفا]

حسبنا الله ونعم الوكيل

[فرهود]

السبب ان الكل يحصل بخشيش الا الشغالين في محلات البترول مساكين فماحصلوا الا هالطريقه

[@north_star@]

لازم الي يعبي يخلي عيونه على العداد وما يفتح مجال لمثل هالحرامية واذا شاف منهم اي شي على طول يكلم مدير المحطه .

[غاردينيا]

اشوه دريولي عينه على العداد مفتح عيونه معاهم:victory:

وصاجين الفلبن كل هاي حركاتهم حتى في المطاعم

مره في لونوتر
باقي لي 27 ريال
مارجعتها الفلبينيه حسبتها بخشيش لها

[Hassan33]

شكراً على التنبيه اختنا مسلمة

وياما صارت بس الحمد لله دائماً اكون منتبه للعداد واحسب الفلوس


وعلى طاري المطاعم ارجو من الأخوان الحذر بالذات في مطاعم الوجبات السريعة لاحظت يوم اطلب طلب واسكت بدون مااقول ليهم حجم الوجبه (صغير-وسط-كبير) على طول يحسبون لك سعرة الوجبة الكبيرة وتلاحظ انه في فرق بين السعر المكتوب في المعروض والسعر الانحسب لك

[مسلمة]

اتوقع في مجموعة ماكانت منتبهة للموضوع راح بتنتبه بإذن الله .
صديقتي نبهت زوجها ، فلماراح المحطة وطلب يصب له 100 ريال الا فعلا عامل المحطة بغى يستغفله وقام صفر العداد بعد ما صب ، بس هو ما سكت له وقال له ليش صفرت وما خليتني اشوف قبل ما ادفع ، ما راح بدفع ولا ريال لك ، والعامل طبعا سكت ولا قال شي .
المفترض حنا جميعا نشتكي لمدير المحطة .

[فراغ]

ينطبق ذلك على الفلبينيات في كاشير السوبر ماركت
ردوا بالكم عليهم
مجموعة حرامية

[روح الاطلس]

اممم طيب بس هو يبين في عداد السيارة ! اذا طلبت فول راح يبين المؤشر عند الـ f صح ولا انا غلطانه؟

[سعود العمادي]

صارت معاي السنة الي طافت

في محطة الكورنيش مقابل المينا

قلت له عب لي 50 اذا ماخاب ظني

ولا اشوفه اشوي ومخلص !!! استغربت شفت العداد ولا مصفر

الصراحه لازم يحطون رقابه عليهم

[hasss1969]

نفس الموقف حصل معي من شهور قليلة في محطة بترول الجامعة بالدفنة...طلبت يعبي ب 100 ريال عبى واعطيته فلوس ومشيت حوالي 2 كيلو الا اشوف عداد البترول في السيارة اقل
بكثير من العادة...المهم رجعت لنفس العامل اللي عبى لي اول ماشافني وعرف انه بيتبهدل هو بنفسه قال لي سوري عبيت لك اقل من المبلغ اللي اخذته وكمل لي تعبئة الخزان لكن ماخليته بهدلته شوي وهددته لو عادها مرة ثانية...
لكن المشكلة من يومها وانا اتعامل فقط مع محطات وقود وبعد هالخبر اللي سمعناه اليوم عن وقود وين نروح؟؟

[.. الكاش ..]

جزاك الله خير خوش تنبيه لاني دايمن اتردد عليهم

[al_maystro]

طريقه اتبعها دائما في اي محطه بترول اعبي 29 ريال مثلا اعطيه 30
ب39 اعطيه 40 ريال اعبي 49 اعطيه 50 ريال

[الخزرجي قطر]

شكرا على التنبيه الواحد منا لازم يكون حذر ومنتبه لهم
ليس في محطات البترول وبس في كل مكان حتى في السوبر ماركت

[أم نواري1]

اشدعوا صاروا ياخذون الباقي من المبلغ لهم .!

إذا بعطي بعطي من نفسي مب غصب عني وبالإحراج

وشكرا لهذه اللفته التحذيريه منك أختي

بحفظ الله

[ww1000000]

خلكم من العمال يمكن يكون هذا تصرف شخصي أو نسى

فما بالكم لما محطة يحط لك في خزان السوبر عادي ويصب للناس على أنها سوبر صارت معاي كم مرة

لون السوبر معروف والعادي معروف

وين حماية المستهلك عنهم

[eXpert*]

ليش ما يخلون المحطات من الخدمات الذاتية ..

ياخي أحنا مقبلين على كأس العالم ،، خلنا نتحرك و ننزل ونصب حق أنفسنا ..

منها صاحب المحطة يوفر رواتب العاملين فيها ،، ومنها نتحرك شويّ ..

ولا حد يقول حر ما حر ،، ترى ما جاتنا الأمراض الإ من التنصل من الشمس وقلة الحركة ..



تحياتيّ

[أم نواري1]

أما نصب بروحنا

والحريم يازينا ننزل ونصب .!

بحفظ الله

[تركي محمد]

ليش ما يخلون المحطات من الخدمات الذاتية ..

ياخي أحنا مقبلين على كأس العالم ،، خلنا نتحرك و ننزل ونصب حق أنفسنا ..

منها صاحب المحطة يوفر رواتب العاملين فيها ،، ومنها نتحرك شويّ ..

ولا حد يقول حر ما حر ،، ترى ما جاتنا الأمراض الإ من التنصل من الشمس وقلة الحركة ..



تحياتيّ

على اساس انك بتنزل وتصب بترول ؟ ههههه

مادري ليش المواضيع تاخذ اكبر من حجمها هنا ،،
يا خي شوف العداد قبل لاتدفع ،، و انتهى الموضوع

وانشالله نشوف الدفع عن طريق البطاقة البنكية ، لان هي الطريقة المحترمه اللي تمنع البخشيش

واذا على الحركة ،، في مكان اسمه سباير يمدحون الحركه فيه :victory:

[QTR-1978]

ولد عمتي رايح محطة بترول بوهامور قال عب لي فل
يقول ولد عمتي سمعت صوت المكينه لما وقف العداد والتفت شاف العداد 85 قال فريت وجهي ونطرت الهندي يجي الا يقولي 95 قال فريت وجهي الا 95 صج قال نزلت وقلت له شلون زدت المبلغ قال تعبثت فالمكينه الا طلع المبلغ القديم 85 طلع في حركه يقدر يكتب اي رقم المهم راحو لمدير المحطه قال اطلب له الشرطه مب اول مره يسويها
حاسبوا ياخواني وخواتي من العماله الاسيويه دايما ينظرون لنا باننا مغفلين وفلوسنا محصلينها فالشارع كل واحد يوقف جنب العداد انا ماقدم وايد عن المكينه دايما جنب المكينه

[مسلمة]

سبحان الله مخافة الله هي الأساس في تعاملات الناس ، اذا انعدم من قلوب العباد كثر الفساد والنصب بين الناس ، وصار الحذر في التعامل واجب مع الاخرين .
الله يحفظ قطر وهل قطر من النصابين ، صغارا كانوا ام كبار .

[فراغ]

ليش ما يخلون المحطات من الخدمات الذاتية ..

ياخي أحنا مقبلين على كأس العالم ،، خلنا نتحرك و ننزل ونصب حق أنفسنا ..

منها صاحب المحطة يوفر رواتب العاملين فيها ،، ومنها نتحرك شويّ ..

ولا حد يقول حر ما حر ،، ترى ما جاتنا الأمراض الإ من التنصل من الشمس وقلة الحركة ..



تحياتيّ
في بريطانيا هذا النظام موجود
انته تصب حق نفسك وتروح داخل السوبر ماركة وتقولة رقم مثلآ 3 ويقولك المبلغ وتدفع وأنت بعد متأكد من المكينة بأن الرقم صحيح وهذا الى أنت صبيتة من بترول قي سيارتك

[بونووف]

لازم الواااحد يحااسب على العداد ويحسب الباقي من فلوسه ... والاخ اكسبيرت انا وانت نقدر نصب حق عمرنا لكن الحريم وين ينزلون يصبون حق عمرهم صعبه

[تحداني]

الله اعلم يمكن باقوني خمسين مره
من النوع الي ما انتبه وهالعاده جدا سيئه .. وفي كل شي مب في هالشي بس


الله يجزيك كل خير

[أبو راكان]

اتمنى ان اضافة خدمات الدفع في محطات البترول بالبطاقة الاتمانية افضل واسلم

[تحداني]

اتمنى ان اضافة خدمات الدفع في محطات البترول بالبطاقة الاتمانية افضل واسلم




اي والله صدقت .. وانا عندي سؤال ليش ما ايخلونها بالبطاقه ؟؟ وين المشكله

[أبو راكان]

اي والله صدقت .. وانا عندي سؤال ليش ما ايخلونها بالبطاقه ؟؟ وين المشكله

مافي اي مشكله اختي
امور واقتراحات يفقهها الانسان البسيط في كثير من امور الحياة وتقدم خدمات تختصر المسافات والجهد والوقت على الانسان
لكن للأسف لانراها تطبق على ارض الواقع

[احب قطر]

انا صار لي نفس الموقف في وقود اللي عند نادي لخويا ، لاني كنت مشغول وأتكلم في التلفون عطاني خمسينات ولم شفتهم طلعوا ناقصين خمسين والتفت عليه سوا نفسه مش منتبه ، اليوم بعد ما قريت الموضوع تأكدت انهم ينصبون عالناس والله العالم على كم شخص انصبوا ، اتصلت في إدارة وقود وبلغتهم بالموضوع كامل وقلت لهم يدخلون المنتدى ويقرون ايش الناس مواجهين مع موظفين وقود وهذا راح يفقد وقود مصداقيتها مع الناس ، قال لي بابلغ مسؤل المنطقة ، قلت له هاي مشكلة عامة مع كل موظفينكم ولازم تاخذون اجراء معاهم ، انا ما اشتكي على موظف بعينه ولكن المشكلة اصبحت عامة مع محطات وقود.

[مسلمة]

انا صار لي نفس الموقف في وقود اللي عند نادي لخويا ، لاني كنت مشغول وأتكلم في التلفون عطاني خمسينات ولم شفتهم طلعوا ناقصين خمسين والتفت عليه سوا نفسه مش منتبه ، اليوم بعد ما قريت الموضوع تأكدت انهم ينصبون عالناس والله العالم على كم شخص انصبوا ، اتصلت في إدارة وقود وبلغتهم بالموضوع كامل وقلت لهم يدخلون المنتدى ويقرون ايش الناس مواجهين مع موظفين وقود وهذا راح يفقد وقود مصداقيتها مع الناس ، قال لي بابلغ مسؤل المنطقة ، قلت له هاي مشكلة عامة مع كل موظفينكم ولازم تاخذون اجراء معاهم ، انا ما اشتكي على موظف بعينه ولكن المشكلة اصبحت عامة مع محطات وقود.

جزاك الله خير على إيجابيتك والموضوع والله أعلم الظاهر هي ظاهرة ويحتاج الأمر إلى وعي منا في كافة محطات البترول و المحال التجارية والمطاعم .
في صديقة لي أخبرتني أنها تتعامل ببطاقة خاصة لمحطات الوقود التابعة لوقود حتى تكون في مأمن من هذه السلوكيات .

[دروب]

باركــَ الله فيك أختي مسلمة على التنبيه ورفع الله قدركــِ ..

[<اضرب واشرد>]

الحرامي ينعرف من شكله وتصرفاته وحركاته

وهو بعد مع كثرة الممارسة ومقابل الناس 24 ساعة في المحطة يصير خبرة في النصب .. ويصير يعرف المفهي والغافل من الواعي والمنتبه .. فينصب على واحد ويخاف من الثاني ..

يكون خابصهم وعارفهم وكل الأشكال والأجناس مرت عليه

من الطريف والمضحك .. مرة بنغالي صغير يمكن 20 - 21 شكله شيطان ومبلتع .. يوم يرجع لي الفلوس .. يرجعها شوي شوي حبه حبه .. هذي خمسين .. هذي عشرة .. هذي خمسة !! عرفت أنه يبيني أقول له خل الباقي لك .. يوم وصل للخمسة الأخيرة والريالات قال لي خلاص ؟ قلت شنو خلاص ؟ عطاني خمسة .. قال لي وهو يبتسم : خلاص ؟ بس هازا شوي ( كم ريال خلهم لي )