من أولى بتلك الأماكن؟

[ms-qtr]

بسم الله الرحمن الرحيم


موضوعي تسائل يدور في بالي وأتمنى أن تدلون بارائكم القيمة في الموضوع

أنا لاحظت ان الكثيرين من اهل قطر يتكلمون بسلبية كبيرة عن بعض الأماكن السياحية الكبيرة في الدولة و يمتنعون من الذهاب لها
على الرغم من أن بعض هذه الأماكن تقع في أماكن استراتيجية وبنيت على أعلى مستوى من الجودة وتقدم خدمات رائعة وأكلات شهية
لأن بعض هذه الأماكن تمتلئ بالشباب والفتيات االقطريين الذين لا يلتزمون بعاداتنا وتقاليدنا المحافظة

على سبيل المثال: كتارا, اللؤلؤة ,الاندمارك وفيلاجيو وبعض المطاعم وغيرها




لماذا يتم ترك هذه اللأماكن الجميلة لهذه الفئة؟
ولماذا تنسحب الفئة الصالحة ويترك الحبل على القارب للفئة الطالحة؟
أليس من باب أولى أن نبعد هذه الفئات عن هذه الأماكن بدل الإبتعاد عنها؟
ولماذا من يفعل الخطأ يستمتع ويروح عن نفسه في تلك الأماكن بينما من يلتزم يبحث عن أماكن أقل جودة للترفيه عن نفسه وعائلته؟


فمن أولى بتلك الأماكن؟

[الخزرجي قطر]

الاماكن الي ذكرتها مخصصه للجميع دون استثناء ولكن بعض العائلات لاترغب في زيارة
او التواجد في اماكن مؤذيه للنظر والتصرفات وكان من باب اولى لهم تجنب التواجد بها..

[intesar]

نعم رأيي من رأيج.. ليش نترك هالأماكن الحلوة.. للغير يعيث فيها.. ونقعد ننتقد وبس..
ياريت لو اللي عنده حل يقترح.. يمكن حد يقرأ وينفذ..

[تغلبية]

الحياة حلوة .. وحلو نشوف كل شي فيها ونعيش باللي يريحنا ويسعدنا

اللي يبي يروح ويوسع سدره ويستمتع يروح .. والمتحفظين عذرهم معاهم ..

بس مرات الازدحام يكرهج في هالاماكن .. مثلا المجمعات ما تندخل في الويكند من الزحمة

أكتئب اذا دخلت :rolleyes2:

[بصمة قطرية]

دائماً نسمع مقولة
الخير يخص والشر يعم
مجرد ذكر مكان و ذكر السمعة السيئة للي يرتادون هالمكان
تخلينا نحط ألف خط أحمر قبل لا نفكر نروحه ..
مثل كتارا
عورني قلبي يوم سمعت جملة من أكثر من شخص
اللي فيها خير ما تروح هالمكان
لأن سمعته سيئة
بسبب الفئة اللي ترتاده
في أماكن كثيرة غير
ليش أروح هالآماكن
و أعرض نفسي لأي تفكير سيء ..!!
أخالفج الراي
مكان سمعته مب زينة أضرب عليه إكس ..

[intesar]

بثراحة يا بصمة اللي قال مثل هذا الكلام مع كامل احترامي.. بروحه مو ماشي عدل..
الغلط بالتعميم..

وهذولي مرضى من فئة المرضى اللي اكثروا عندنا بالمجتمع..
قبل الانترنت وتبعاته.. ما كنا نسمع مثل هذي الانتقادات اللي تعم ولا تخص.. لكن مع وجود الانترنت صرنا نشوف العجب من الكلام والقذف..

بس اللي فيه العيب يعيب غيره..

ودمتم بحفظ الرحمن..

[R 7 A L]

عني انا يا رحال
ماراح اودي اهلي او اسمح لهم يروحون لهالاماكن

[أم نواري1]

هالأماكن بعز الزحمة والمصاخة ما تنداس ولا تنطاق أصلا
لها أوقات معينة عشان تروحين ومع رجال بعد

إذا المطاعم متفقين أنا وزوجي مانروح لها إلا عقب نص الشهر
لأن أغلب هالأشكال تلقينهم مع نزول الراتب
ونتعمد نروح متأخر عن وقت الغداء أو العشاء عشان مانصيد زحمة
بس نلقى كثير من الأزواج اللي تفكيرهم مثل تفكيرنا
التأخير لاجتناب الزحمة والواحد ياخذ راحته أكثر

ومثل ماقالت بصمة ليش أجيب الكلام لنفسي .!

بحفظ الله

[بوحمد111]

انا سمعت عن كتارا ولكن ولله الحمد لحد الآن ما زرت هالمكان ولا حتى اعرف من وين يدخلون وزرت اللؤلؤه مره وحده وضعت وقلت خلاص مثل هذه الاماكن مستحيل اخذ الاهل وخلنا على البيت والفريج ابرك لنا

[NINA RICCI]

في اوقات معروفه تكون هالاماكن زحممممه ومانروح لها , وفي المقابل في اوقات مثل الصبح واول العصر فاضيه تكووون وناخذ راحتنا الصراحه فيها , ولا نشوف الفئه السيئه ولله الحمد ..

[المرحب]

الله المستعان

حتى الأماكن العامة صارت لغير القطريين

[نوار قطر]

اغلب اهل قطر مايحبون الاماكن الزحمه ومايحبون الحشره فيضطرون انهم يبتعدون عنها ،،، بس لو سووينا مثل ماقلتي ورحنا هالاماكن ماراح يغير شي على الاجانب ،، لان اصلا هم عادي عندهم يروحون اماكن زحمه وبيقعدون ولا في اذنهم ماي ،، بالتالي احنا بنتضايق من هالزحمه وبنشل شلايلنا وبنطلع ،، يعني صبه رده :rolleyes2:

[تركي محمد]

كل الاماكن اللي انذكرت
هالقطر فيها اكثر من المقيمين
ما ادري على اساس شنو خليتوها ان غير القطريين هم اللي مستفيدين منها !!
وبعدين هذي اماكن عامة ،، لكل شخص مطلق الحريه في انه يروح لها او مايروح لها

واذا تبين مكان مخصص للقطريين ،، بقولج وين

روحي المخيمات الي في سيلين ،، ترا مخصصه للقطريين و ممنوعه على الاجانب :)

[chillis]

انا اشوف الي يقدر يدفع هناك خله يروح ويستانس ومحد بياكل مكان احد :) بس طبعنا احنا اهل قطر ما نحب الزحمه

[شبح الصمت]

حلفوا بس انكم تبون الشباب والبنات ما يروحون هالامكان اشفيكم ما تبون تتوعون وتدرون انه العالم قاعد يتطور


كلن يمسك اهله وكلن يمسك عياله ترى الي يبي يستانس يا كثر الاماكن والي يبي يونس نفسه يعرف اشلون والي يقدر يغض بصره بيغض بصره عن الاشياء الي تلفت الانتباه

بس طبعا نشوف فلان وعلان وعلانه وفلانه


بس من راقب الناس مات هماً

[ام السعف]

الاماكن الي ذكرتها مخصصه للجميع دون استثناء ولكن بعض العائلات لاترغب في زيارة
او التواجد في اماكن مؤذيه للنظر والتصرفات وكان من باب اولى لهم تجنب التواجد بها..

اتفق معاك ،، لليوم مادخلت كتارا الا يوم حضرت عرس ناس في القاعة اللي هناك
ولا لي خاطر ادخل اللؤلؤة
قناعة داخلية في قلبي انها اماكن مؤذية للعين من زود مااسمع من سوالف ،،

[intesar]

أم السعف مو لهذي الدرجة.. ليش أنا ما أشوف اللي يقولون عنه..
يا اني عمية أو حولة.

يا أن اللي يتكلمون.. ما خلوا طيف بشري ما قزوا فيه وسووا له مسح من أول الرأس حتى أخمص القدمين.. وهؤلاء هم الأكثر انتقاداً للوضع..

أحتار كثيراً لما أدخل مكان ليش ما أوف اللي الناس تشوفه..

خليها على رب العالمين..

ودمتم بحفظ الرحمن..

[التيما]

ماحب اطلع برا البيت إلا لبيت هلي بس .. ولو بنطلع تكون طلعتنا تالي الليل .. بس هالكتارا واللولوة وفيلاجيو !!! من مبطي مارحت لهم ولا بروح ..