تعالوا استفيدوا من موضوعي السيارة مقصوصه من النص

[تمون]

السلام عليكم ورحمة الله وبركاته

صبحكم الله بالخير جميعا

من زمان ماكتبت تجربه شخصيه لي فالمنتدى بس المره هذي ضروري اني اكتب موضوعي عشان يستفيد منه غيري وعشان يوصل للجهات المختصه ويعالجون هذا الاشكال

بحكم اني اداوم في منطقه بعيده عن الدوحه و بعيده عن البيت بتقريبا 85 كيلو رايح و 85 راجع ف شفت اني محتاج سياره صغيره اقل صرفيه للبترول و الاشياء الاستهلاكيه مثل الايل و السفايف و التواير يعني تكون سياره فقط للدوام و اريح سيارتي الثانيه فالبيت

المهم قالوا لي روح شارع 10 فالصناعيه وبتحصل الي تبيه
انا رحت و ترددت على الشارع وشفت السيارات الي تعبان و الي زين والي غالي و الي رخيص سوق حره ههههههه

المهم انا كنت ادور اي سياره تويوتا صغيره مثل كرولا ولا كامري ولا ياريس
لفت انتباهي سياره يارس السياره نظيفه جدا شكليا موديل 2011 قاطعه 30 الف فقط فول ابشن

رحت كلمت راعيها و هو من الجنسيه الايرانيه رجال شايب وكان زحمه على السياره بشكل غير طبيعي يعني السياره لقطه قلت له بكم تبي السياره ؟ قال ابيها ب 30 الف السياره جديده و دفتر الضمان موجود فالدرج و من هالكلام و يحلف ان السياره كانت حق ولده و ولده رمحته ناقه وانكسرت رجله وصار مايقدر يسوق وهو بيبيعها لانه محتاج فلوسها

على طول انا دخلت قطر سيل اشوف و اقارن سعر السياره و اكتشفت ان سعر السيارات الي نفسها في قطر سيل يتراوح مابين 40 الى 45 الف وهو قالي 30 الف يعني سعر خيالي

طلعت 25 الف و قلت له فلوسي كاش 25 كنت ناوي ازيده لين 30 ماعندي مشكله لو كان مب عاجبه السعر قالي زيدني شوي و السياره جديده و من هالكلام ويحلف شفت الزحمه على السياره وخفت واحد يسوم اكثر مني قلت له بزيدك 500 و قالي توكل على الله قلت له بس انزل بشوف مكينة السياره و محركاتها و من هالكلام طبعا الناس لين الحين ملتمين و قلت لهم ياجماعه خلاص انا شريت السياره عطوني مجال بس و راحوا

شفت المكينه جديده جدا و سواقه السياره سلسه وكل شي زين عرفت ان فيها صبغ في اماكن متفرقه لكن مايهمني الصبغ لاني ابيها للدوام

المراد عطيته فلوسه و رحنا حدى المعارض عشان يسجل السياره باسمي والله في نفس اليوم رحت فيها الدوام فالليل كانت عجيبه الصراحه كاني اسوق سياره توها طالعه من الشركه

المهم الربع فالدوام قالوا لي غلطان ليش مافحصتها و و و و صدعوني قلت بفحصها وقت ثاني وسفهت الموضوع 4 ايام وكان واحد من الشباب فالدوام محصل سياره صغيره ورايح يفحصها اتصل فيني و قالي تعال افحص سيارتك مع السياره الي بفحصها قلت له اوكي ورحت افحص السياره

والرجاجيل مشغولين في فحص السيارتين وانا و خويي نسولف فجأه الي يفحص قال من راعي اليارس و عينه مبطله كذا :omg:

قلت له انا اشفيك ؟؟؟!!

قال حسبي الله و نعم الوكيل قلت اشفيك خرعتني ؟؟ قالي سيارتك مقصوصه من النص ؟؟؟؟؟؟ قلت له اشلون يعني ؟؟ المهم هو شرح لي اشلون مقصوصه
عموما الصوره هذي تختصر شرحه
يعني السياره كانت كذا

http://montada.haraj.com.sa/imgdir/4fec537719bde.jpg

و صلحوها و صارت سياره كامله تحطمت الصراحه و قالي هالسياره انت ماخذها للتجاره قلت لا والله للدوام قالي انصحك ماتستخدمها للمسافات الطويله بتكون خطر عليك اذا استخدام المدينه مافيه مشكله

على طول قررت اني اتخلص منها بأي طريقه وحرصت ان الي بياخذها يكون على علم بالي فيها وعرضتها للبيع و معاها ورقة الفحص و خذها واحد من عندي بسعر 26 الف و هو يدري بالي فيها

المهم تجربتي هذي بتخليني احرم اشتري سياره بدون فحص
وعرفت ان فيه ناس تحلف كذب عشان الفلوس وتنصب على خلق الله
الي مخليني مستغرب السيارات الي حوادثها خشنه مثل هذي السياره ليش مايلغونها المرور من الاساس ليش تتصلح وتكون خطر على الناس الي فالشارع

والحين شريت كرولا جديده وفكيت عمري من النصب و الاحتيال

[بـويوسف]

حسبي الله ونعم الوكيل

لازم تفحص اي موتر قبل لا تشتريه

لان في ناس ما تخاف الله

وحزات تفحص الموتر وما يطلع فيه شي .. وترجع تفحص عند نفس المحل عقب سنة .. تنصدم بورقة الفحص

[@north_star@]

بارك الله فيك على طرح تجربتك عشان الناس تستفيد
وانا مرات كنت اسوي مثلك ما افحص السيارة وكنت اخذها بحكم الخبرة المتواضعة بالسيارة وكل ما اخذ سيارة ولد عمي يقولي حتى لو موديل سنتها افحص لانه غير انه السيارة مقصوصة ممكن يكون فيها ضربة بالشاصي او مقلوبة أو او او كثير من هالاشياء والحمد لله انك قدرت تبيعها وما خسرت فيها زيادة والله يعوضلك بالاحسن

[بوحمد111]

الله يعينك اخوي وفعلا فحص السياره مهم جدا وانا اشتريت بي ام موديل 2011 وعلى حسب خبرتي سألت صاحب السياره ان كان جاها حادث او اي مشاكل في السياره وقال لي بالحرف الواحد افحص السياره وانا احلف لك انها سليمه 100% ومن زود ما انا شفت ثقة الرجال وحالة السياره وقارنت سعرها بالجديده وقلت في نفسي السياره على الضمان وبوفر لي تقريبا 60 الف عن الجديده والحمد لله دفعت له المبلغ 100 الف وسجلت السياره بإسمي والسياره كانت قاطعة تقريبا 8000 كم وقلت في نفسي هذه صفقه رابحه ان شاء الله

والمفاجئه بعد 6 شهور من بعد ما اشتريت السياره اخذتها للوكاله تشيك وسألت احد الموظفين في الكراج عن حالة السيارة وقال لي كم دفعت فيها قلت له المبلغ وقال حسبنا الله وهو نعم الوكيل وقلت له شسالفه وقال لي السياره صار عليها حادث قوي وتصلحت في الوكاله بسعر 65 الف ولكن لا تحاتي السياره تحت الضمان والتصليح كان عباره عن تغير كل شي بقطع جديده اصليه من الشركه والله الحافظ والحمد لله الشاصي ما تغير ولا جاته اي مشكله وهذا اهم ما في الموضوع والحمد لله على كل حال والى اليوم السياره عندي وبدون اي مشاكل

اتصلت لصاحب السياره بعد ما اكتشف المشكله وقلت له حسبنا الله وهو نعم الوكيل وياريتك خبرتني بالحادث اللي صار على السياره وان شاء الله حقي باخذه منك في يوم من الايام اما في الدنيا او الآخره والحبيب مطنش

آسف على الإطاله ولكن الواحد حزات يقتهر من ناس ما عندهم ذمه ولا ضمير

[يافا]

حسبي الله ونعم الوكيل

لازم تفحص اي موتر قبل لا تشتريه

لان في ناس ما تخاف الله

وحزات تفحص الموتر وما يطلع فيه شي .. وترجع تفحص عند نفس المحل عقب سنة .. تنصدم بورقة الفحص

كلام صحيح

بس انا اخذت سياره وبعد يومين جابت سعر زياده 5000 ريال قلت ببيعها

ووديناها عند نفس الفحص طلعت السياره مقلوبه ومصبوغه ومغير لها الشاصي

وطحت في مشاكل مع راعي الفحصواتضح ان التجار يدفعون لراعي الفحص او الفني وليس

الجميع ويمشون السيارات على انها ما فيها شيء كبير يقولك بوشات وربلات ومشي حالك

والله كريم ان شاء الله

[Rider]

صارت معاي في لكزس 2012 خذيتها من غير فحص من عند رجال قبيلي ويحلف بالله انه مافيها شي بعد فترة قلت ليش مافحص السيارة طلع فيها صبغ ومصلحها في الوكالة

[تمون]

ما شاء الله الاخوان كلهم صادفتهم مشاكل النصب و الاحتيال في السيارات

الله يعين الصراحه اذا محلات الفحص بعد ينصبون ؟؟؟

لاحول ولا قوة الا بالله

[الواصـل]

الله آيعين ،، نآس واجد ماتخاف الله وتحلف كذب لكن أنصح جميع واحد يشتري سيارة يفحصها حتى لو كانت ماشية 100 كيلوا فقط ،، لأن أحيان تندعم وهي مأمشت شيء واحياناً تندعم فالوكالة وتنبأع جديدة لكن حاولوا يااخوان تفحصون في.مكان فحص أمين لأن. سالفت تفحص عند وتستخدم السيارة فتره واذا جئت تبيعها طلعت لك 100 شغله. بذات السالفة الحوادث تصير واجد انتبهوووا وثم انتبهوووا

[وبشرالصابرين]

ياجماعه في ناس ماعندهم ذمه ولا ضمير

كل واحد يحاسب ... انا صارلي موقف

كنت بشتري سياره من واحد حاط اعلان اتصلت له قلت له السياره فيها حوادث قام يبربر ويشعر
سياره زوجتي سليمه مافيها شي ومن هذا الكلام .. بس قالي بس مبدل صدام امامي فقط
قلت معليش خل نفحص

رحت الفحص ياجماعه الوجه كامل مع البانه والرفرفين مبدل ودعمه في الوجه كامل ..

قلت له شلون الحين قاال مادري زوجتي داعمه في السياره ...

.... شكرا ياصاحب الموضوع

[جاسم القطري]

افحص و لو يحلف من اليوم لين بكره

هذا بيع و شراء

[ولد المنصور]

افحص و لو يحلف من اليوم لين بكره

هذا بيع و شراء

:nice:

[الكواري 1972]

بعض الناس ماعاد فيهم خوف من الله

لاذمه ولا ضمير

حسبي الله ونعم الوكيل

[BU_7MD]

السلام عليكم

انا من زمان عن الرد في موضايع فالمنتدى ..

لكن لفت نظري هالموضوع .. لأنه نفس اللي صار لي بالضبط

كامري 2005 جراندي .. اتوقع سنة 2007 هالكلام

وشريتها من واكد باكستاني الله يقلعه ولا يتهنى في الفلوس اللي دفعتها له

السياره كانت من الشكل الخارجي نضيفه وورده وممشاها شوي

ما فحصت الموتر .. لأني كنت مأمن ان الريال الباكستاني ملتحي وكله يذكر الله (عساها زقوم في بطنه الفلوس اللي خذاها)

بعد ما شريت السياره منه بدون فحص .. وديتها الوكاله عشان يسوون لها تششيك كامل

بعدها باسبوع اتصلي وقالي تعال الورشه في شي لازم تشوفه .. وكانت الصدمه

قلت له والحل .. قالي اللحام اللي استوى للسياره تعبان .. وعادي وانت تمشي على سرعه عاليه ينكسر وينفتح اللحام

قالي حنا فالوكاله ممكن نظبط لك اياه بحيث يكون آمن عالطريق .. بس بيكلفك 15000 .. قلت لاحول ولا قوة الا بالله

بدأ شغل فالسياره .. وخلال الوقت هاي كنت اشكي هالحال لواحد من الشباب يشتغل مساعد قاضي والحين هو قاضي ما شاء الله

قالي ارفع عليه قضيه .. قلت له القانون لا يحمي المغفلين .. انا اللي مافحصت .. قالي ارفع عليه قضيه تحت بند العيوب الخفيه بشرط مايكون معدي عالتسجيل شهر

انا دورت رقم الباكستاني واتصلت له وتواعدت معاه عشان احل الموضوع سلمي
وكلمته بالسالفه وقلت له انا برفع عليك قضيه لانك غشيتني .. او خذ السياراه متصلحه على حسابي فالوكاله وعطني فلوسي

قال عطني وقت لاني ارسلت الفلوس لبلاده اشترى فيها ارض .. وقت اذكره انه مسلم والله فوق وخاف ربك

بعدها بأسبوعين اتصله .. يطلع لي هذا الرقم لم يوضع فالخدمه

رضيت بالامر الواقع .. وحلفت اني مابريئه من هالنصب ليوم الدين .. والسياره لين الحين عندي لأني اعرف انها ماراح تجيب لي شي وبكون خسرت فيها خساره كبيره

والحمد لله تعلمت من الدرس .. وصرت افحص كل سياره اشتريها مستعمله .. واحلف على اي واحد يشتري مني سياره يفحصها عشان ابرئ ذمتي يوم الدين

[تمون]

السلام عليكم

انا من زمان عن الرد في موضايع فالمنتدى ..

لكن لفت نظري هالموضوع .. لأنه نفس اللي صار لي بالضبط

كامري 2005 جراندي .. اتوقع سنة 2007 هالكلام

وشريتها من واكد باكستاني الله يقلعه ولا يتهنى في الفلوس اللي دفعتها له

السياره كانت من الشكل الخارجي نضيفه وورده وممشاها شوي

ما فحصت الموتر .. لأني كنت مأمن ان الريال الباكستاني ملتحي وكله يذكر الله (عساها زقوم في بطنه الفلوس اللي خذاها)

بعد ما شريت السياره منه بدون فحص .. وديتها الوكاله عشان يسوون لها تششيك كامل

بعدها باسبوع اتصلي وقالي تعال الورشه في شي لازم تشوفه .. وكانت الصدمه

قلت له والحل .. قالي اللحام اللي استوى للسياره تعبان .. وعادي وانت تمشي على سرعه عاليه ينكسر وينفتح اللحام

قالي حنا فالوكاله ممكن نظبط لك اياه بحيث يكون آمن عالطريق .. بس بيكلفك 15000 .. قلت لاحول ولا قوة الا بالله

بدأ شغل فالسياره .. وخلال الوقت هاي كنت اشكي هالحال لواحد من الشباب يشتغل مساعد قاضي والحين هو قاضي ما شاء الله

قالي ارفع عليه قضيه .. قلت له القانون لا يحمي المغفلين .. انا اللي مافحصت .. قالي ارفع عليه قضيه تحت بند العيوب الخفيه بشرط مايكون معدي عالتسجيل شهر

انا دورت رقم الباكستاني واتصلت له وتواعدت معاه عشان احل الموضوع سلمي
وكلمته بالسالفه وقلت له انا برفع عليك قضيه لانك غشيتني .. او خذ السياراه متصلحه على حسابي فالوكاله وعطني فلوسي

قال عطني وقت لاني ارسلت الفلوس لبلاده اشترى فيها ارض .. وقت اذكره انه مسلم والله فوق وخاف ربك

بعدها بأسبوعين اتصله .. يطلع لي هذا الرقم لم يوضع فالخدمه

رضيت بالامر الواقع .. وحلفت اني مابريئه من هالنصب ليوم الدين .. والسياره لين الحين عندي لأني اعرف انها ماراح تجيب لي شي وبكون خسرت فيها خساره كبيره

والحمد لله تعلمت من الدرس .. وصرت افحص كل سياره اشتريها مستعمله .. واحلف على اي واحد يشتري مني سياره يفحصها عشان ابرئ ذمتي يوم الدين

والله موضوعك ينرفز اكثر من موضوعي
الناس هذي اشلون يستانسون على اذيه خلق الله سواء كانت الاذيه ماديه او معنويه او حتى جسديه

الشي الغريب عندنا فحص فني و عندنا اقوى جهاز امن و شرطه و مرور اشلون يسمحون لهالسيارات بالسير على الطرق

فالدول الغربيه اي اعوجاج بسيط في شاصي السياره فورا تعتبر غير صالحه للاستعمال وتتحول للسكراب على طول فما بالك لو كان الشاصي مقصوص كامل و ملحوم مجرد لحام عشان السياره تمشي بس لكن الامان معدوم لو تركب مطبه بالقو يمكن تلاقي وجه السياره في صوب و خلفيتها مع ربعك الي قاعدين فالخلف في اتجاه اخر
والله مأساه
هذا هو العامود الفقري للسياره كيف تعيش ونص عامودك الفقري ملحوم بسيليكون ؟؟

[بويعقوب]

السلام عليكم ..

يالربع انتبهوا ولاتصدقون كل من حلف واقسم

الفحص تقريبا بــ 200 ريال ويطلع اشياء ماتتوقعها

الله يحفظنها واياكم من النصابين والمحتاليين


روى مسلم عن أبي ذر رضي الله عنه عن النبي صلى الله عليه وسلم قال: (ثلاثة لا ينظر الله إليهم يوم القيامة ولا يزكيهم ولهم عذاب أليم). لما قالها النبي صلى الله عليه وسلم مرة واثنتين وثلاثاً قال أبو ذر : (خابوا وخسروا منهم يا رسول الله؟! قال: المسبل، والمنان والمنفق سلعته بالحلف الكاذب). والمسبل هو: الذي يلبس القميص أو البنطلون أو الإزار ويجرجره في الأرض، وما أكثر ذلك، فتراه يمشي في المجالس فيلوث ثوبه، ويصلي على هذا الحال، هذا المسبل لا ينظر الله عز وجل إليه، وقال النبي صلى الله عليه وسلم: (ما زاد عن الكعبين فهو في النار)، وتجد الكثير من الناس في غفلة عن حديث النبي صلوات الله وسلامه عليه، وإذا قلت لإنسان: ارفع بنطلونك عن الأرض، أو ارفع قميصك قال: الموضة هكذا، أي موضة هذه التي ستودي بك إلى نار جهنم، وتكون من الذين لا ينظر الله إليهم يوم القيامة ولا يزكيهم ولهم عذاب أليم؟ هو الذي يعطي الشيء ويمن على من أعطاه، ويهدي الهدية ويمن عليها ويتصدق على إنسان بصدقة ويفضحه بين الناس ويمن عليه، فاحذر أن تمن على أحد بشيء صنعته له. قال: (والمنفق سلعته بالحلف الكاذب)، أي: هو يريد أن يبيع سلعته، وحتى يشتريها الناس يحلف كاذباً أن قيمتها كذا وأنه سيبيعها بخسارة وهكذا.

[BU_7MD]

والله موضوعك ينرفز اكثر من موضوعي
الناس هذي اشلون يستانسون على اذيه خلق الله سواء كانت الاذيه ماديه او معنويه او حتى جسديه

الشي الغريب عندنا فحص فني و عندنا اقوى جهاز امن و شرطه و مرور اشلون يسمحون لهالسيارات بالسير على الطرق

فالدول الغربيه اي اعوجاج بسيط في شاصي السياره فورا تعتبر غير صالحه للاستعمال وتتحول للسكراب على طول فما بالك لو كان الشاصي مقصوص كامل و ملحوم مجرد لحام عشان السياره تمشي بس لكن الامان معدوم لو تركب مطبه بالقو يمكن تلاقي وجه السياره في صوب و خلفيتها مع ربعك الي قاعدين فالخلف في اتجاه اخر
والله مأساه
هذا هو العامود الفقري للسياره كيف تعيش ونص عامودك الفقري ملحوم بسيليكون ؟؟

خلها على الله ,,

بس للتوضيح ان جسم السياره اللي كان ملحوم .. الشاصي قطعه وحده

[khalid Qtr]

لا تاخذ من شارع 10 ولا تتعب نفسك ، روح للمعارض وادفع اكثر على الاقل تحصل شي نظيف ومضمون

[النهار]

في 2005 شريت سياره كورلا من سوق بدل موديل السياره 2004
شفت واحد واقف على جنب مريت عليه قلت له للبيع قال نعم كم تبي فيه قال 32 الف
السياره ورده وماشيه 7000 كليوا والحجم 1.8 والسياره ستاندر كل شي عادي حتى الغير
سألته ياخوي ليش تبي تبيع الموتر قال لي صراحه اخوي صغير في العمر وعزم الموتر قوي
وخايف يسوى حادث سألته ومافي سبب ثاني قال لي على الفحص
ياخوي مافيها دعمه او تصليح قال لي ابد السياره ماجاتها شمخه
صراحه السعر 32 والتسجيل بعد عليه وين احصل موتر بهالنظافه بهالسعر
كل من شاف السياره يقول مستحيل تحصل سياره بهذالسعر حتى لومقلوبه ومتصلحه
رحت جبت الفلوس وسجلنها في المعرض والرجال دفع للمعرض ورسوم المرور
قلت بعد سنه بدلع السياره واركب لها القفل المركزي رحت عند دوار الفلكسويجن - عند سناء
في واحد شاطر الاخ فتح الباب اليمين الا يناديني تعال شوف الاالجنب كامل مدعوم ومسمكر حتى العمود
فتح الجنب الثاتي الباب الخلفي نفس الشي
بعد ماركب القفل المركزي ولع عندي ليت الايرباق قلت انت ايش سويت ليت الايرباق والع
بطل المكينه الشاصي من جدام فيه طعجه مصلحينه وباين عدل السياره مسويه حادث من الوجه
مع الضربه الايرباق طلع بس مسكرين مكانه عدل ومايبن
الموتر الاخ بعد ماطلعه من الكراج وغلسلها على طول سوق بدل
كل الاشياء مسمكرها ولاقطعه تبدلت لان التأمين ضد الغير يوم خذت الموتر ماكمل سنه
بس سبحان الله الموتر لين الحين عندي عمره ماشتكى من شي وتوني مسوى له ستماره جديد
من اسبوعين
3 من عيالي تعلموا على نفس السياره وحكوها حك
بس ابي اعرف هذالي قص علي ويحلف والمصيبه انه منا وفينا موغريب

[BU_7MD]

^^

اصحان النفوس الضعيفه .. يوم القيامه راح نقتص منهم

[تمون]

الحين يعني الواحد مجبور يشتري من الوكاله
ماتقدر تاخذ مستعمل توسوس طول عمرك

[kuwaiti]

ذكرتني بيام الشباب
كانت عندي كمارو سويت عليه حادث ونقصت بل نص وجبت سياره ثانيه ولحموها عليها
وبعتها لصديق لي لبناني وعنده خبر فيها بسر رمزي قالي بشتريها منك وبهايط فيها بل حاره عندنا في بيروت
المهم اتصل على من بيروت وساعه وهو يضحك قلت شفيك يولد قال دعمني واحد يمشي 40 ونقصت السياره بل نص

[الحسام]

لا حول ولا قوة الا بالله .
للاسف فيه ناس همها الربح أكثر من أرواح الاخرين ..
جزاك الله خير على نقل التجربه .