خلصت العظم وابغي نصايحكم في التشطيب ؟

[سهم عتيج]

السلام عليكم جميعا

الحمدلله خلصت مرحلة بناء العظم وباقي اللحم:) اقصد التشطيب

مادري فيه ناس انصحوني اشطب بنفسي وناس قالوا عطها شركة وفك راسك

اللي قالوا لي شطب بنفسك قالوا العملية يبغيلها شوية تعب لانك اصلاراح تتعاقد مع شركة للشبابيك واخرى للابواب واخرى للسباكة وتمديداتالصرف الصحي واخرى للعوازل وووو الخ

يعني اكثر شي بتتعب فيه هي عملية الدفان والتبليط

اما اللي قالوا خل شركة او مقاول يشطب لك فراح يوفر عليك الوقت والتنسيق وعوار الراس. الخ
بس راح تدفع اكثر


مادري اشرايكم

اتوكل على الله والا اتعاقد مع مقاول خاصة انني قررت بدء التشطيب باذن الله بعد رمضان لان الصيف جاي وعشان ارتب ميزانيتي من جديد ،، يعني عندي وقت باذن الله

ننتظر ارائكم القيمة ان شاءالله

[MAZEN37]

الله ييسر امرك
عموما انت فقط الي تقدر وقتك
وبرائي حبه حبه وانت بنفسك شطب الا اذا مستعجل

[kka]

انا نفسك والله يعين ان شاء الله ببتدي بالكهرباء والبيب فيتر وبعدين السنفرة والمعجون وبعدين الديكور وبعدين بلاط الحمام والاطقم وبعدين السراميك ثم اعمال الالمنيوم بعدين باوقف فترة والله يعينا على عوار الراس

[ahmed jasim]

إتفق مع مقاول للكهرب والصرف الصحي والعازل
أما البقية فكل شغلة براعيها
شعاير
حجر
أبواب نوافذ ألمنيوم
هندريل سلم ألمنيوم مشغول
جبس 1
جبس حمام
خمامات
إكسسوارات
مكسر
شاور
بورسلان و بلاط
بلاط الحوش
ساكتات ذهبية
سبوت لايت
ليتات حوش
ديزاين سطح
بالوعة
مغاسل
رخام مداخل
مكينة باب
أبواب ألمنيوم مشغول خارجي
زجاج للمغاسل
جى أر سى
شفاطات
صبغ داخلي
ليتات
أبواب ألمنيوم مشغول داخلى
مكيفات
صبغ سطح سور
تسليك انتركم وبدالة تلفون
غسيل البيت
تلميع رخام الدرج
مطبخ داخلي ألمنيوم
رخام سلم داخلي
ورق جدران
مطبخ خارجي ألمنيوم
طبيلات
ثريات
خزانة
كبت للمطعم
ستائر
طاولات

[Chambray]

اذا مستعجل عطها شركة

اذا تشتغل على قد ميزانيتك ( نفسي ) اشتغل بنفسك ..

[ضوى]

ااخ اكير غلطة اني عطيت المقاول يشطب لي والله لو اني ماوقفت على راس العمال كان خربوا لي الدنيا الحمد لله

والله التشطيب مايبي له شي يبي له صير وطولة بال ؛ اختار واحد يبلط لك وتعاقد معاه وواحد للصبغ وواحد للجبس وواحد للكهربا وواحد للالمنيون وواحد للخشب .. .. الخ واختار شركات لها سمعة طيبة في السوق مقاولي تعاقد مع واحد زبالة للالمنيوم مدري من اي حارة جايبه فينيشنغ وبالع والمنيوم خفيف ؛ بعد ماركب كل الشبابيك رحت للاختصاصي للالمنيوم وخليته يحي ياخذ قياس ويوم خلصوا الشبابيك قلت للمقاول قول للشركة الزبالة اللي مركبها لاني تعاقدت مع شركة محترمة بتجي تركب ولا قال ولا حرف وفعلا ركبوا لي وشالوا القديم اللي كانه ورق

الكهربا قعدت لهم قعدة كل شوي اطلع العقد واشوف المواصقات طلعت عيني

بس الحمد لله على كل حال


الله يوفقك ويعينك عالتشطيب

[ZURICH]

التشطيب بنفسك افضل .. لكن يحتاج لمتاابعة واهتمام

وتحتاج لفورمان شاطر وثقه متواجد في الموقع يومياً

يوفر لك المواد ويتابع شغل العمال ويشرف على الاداء في بيتك

[مصنع المبارك]

اسأل احد مجرب قبلك من اهلك وبيته شوف عينك
اذا كان متعاون مع شركه حلوه تعامل معهم اذا ماكان
عندك وقت .. واسأل المجربين من الي حولك عشان
تطلع على شغل فللهم بنفسك وتكون مرتاح وربي يوفقك

[بن غيث]

عندي سؤال .. ؟؟

اذا الشخص بيبني بيته بنفسه .. او بيشطب بيته بنفسه ..

هل يستطيع تبين مستوى العمل المطلوب .. و تقييمه من حيث الجودة والفنيات .. ؟؟

هل يستطيع فحص المستويات المطلوبة في جميع الاعمال المنجزة ..

هل ... هل .. هل ... ؟؟؟؟

هذه شغلات محتاجة الى مهندسيين وليس فورمانية او عمالة عادية ..

[سهم عتيج]

جزاكم الله خير جميعا على الردود والمداخلات الطيبة

[ولد المنصور]

هلا اخوي ...
اذا عندك وقت وصبر شطب بروحك ..
وان بغيت شي انا حاضر وفي الخدمة .....

[RAHA]

بسألك سؤال و بتحصل الجواب تحته )
ليش بنيت عظم؟؟؟
بنيت عظم اكيد للتوفير
انك توفر في قيمة أعمال التشطيب إلي انت ممكن تسويها

بما انك بنيت عظم
أكبر خطأ انك تعطي مقاول يشطب لك

لأن قيمة المقاوله المفرقه تكون أعلى من قيمة المقاوله الواحده
يعني قيمة مقاولة التشطيب عظم+تشطيب أرخص من قيمة مقاوله عظم مع مقاول عظم و بعدين قيمة مقاوله تشطيب مع مقاول اخر

إلا في حالة عدم تفرغك فدور لك على مقاول ينجز لك المطلوب

عملية التشطيب سهله
و لا يبيلها إلا الترتيب و طول البال
و خطة ميزانيه صحيحه و بالسؤال ما راح إتوه

رتب نفسك و حدد أولوياتك
و أعمل جدول حساب تكلفة كل بند

ترا ماعندك إلا
عازل
كهرباء
سباكه و صرف
أبواب
بلاط و رخام
شبابيك
حديد و درابزين
صبغ

أهم حاجه انك تبتددي بخطوات صحيحه
و تتعرف على الأعمال لأنها متداخله مع بعض
و الله يسهل عليك

[abdulla889]

انا اقول شطب بروحك وايد ابرك لك من عوار الراس مع المقاول تقدر تنسق مع الكهربائي والبفيتري والمبلط والالمنيوم وبتوفر وايد وكل شي بيكون على ذوقك .

والله يوفقك ان شاء الله

[سهم طايح]

اتفق مع مقاول كهرباء وصرف صحي ولا تبخل وتدور الرخص في هالشيين بالذات
اتفق مع شركة للعوازل وارشح لك المسند للعوازل
الأبواب أرشح دك المتحدة عن عوار الرأس
النوافذ القطرية الكويتية أو المعماري القطري
سيراميك الحمامات من المتحدة أو الدهليز أو الأمانة
أرضيات الغرف باركيه من رافكو أو بورسلان من كنتوار وافضل الباركيه مع أني مركب بورسلان
أرضيات الصالات والمجالس من الأمانة عندهم بورسلان صيني ماتفرق بينه وبين الرخام بشرط تحط النعلات رخام
الدرج رخام من مركز الرخام
أطقم الحمامات من نابينا أو العباس
اكسسوارات الحمامات من نابينا
الإنارة أنصحك تضرب خط للحسا
قبضات الأبواب من إقفال
البلاط الخارجي والقرميد من التيماء
الدرابزين ابتعد عن درابزين بلازا
المطابخ من العبيدلي للمطابخ وابتعد عن الخشب
التكييف فوجي من الريس
الجبس الدوحة للديكور
الدرامات من المفتاح
السخان المركزي من تدمر

هذا اللي سويته تقريبا واللي بهدلوني استبدلتهم لك بشركات جربوها الربع وارتاحوا من تعاملهم

الله يوفقك ويبارك لك في بيتك

[كبير المتداولين]

انا عن نفسي اشطب بنفسي صحيح دوخه راس بس اقل شي اضمن جوده ونوعيه الشغل لانه هاي في الاخير بيتي وبكون موفر المال والجوده مقابل التعب .

وحتى لو تعطيها مقاول راح تتعب نفسيا تقوله سو كذا تحصله مسوي شي ثاني تتعب نفسيا .

ولك حريه الاختيار


وجعله بيت عامر يامشرفنا الغالي

[بوخالد911]

بنفسك

صج تعب
ولكن تضمن الشغلات اللي بتاخذها

والله يسهل

[Bozizoo]

اخوي التشطيب سواء عطيته شركه او شطبت بنفسك
في كلى الحالتين لازم تكون مشارك في كل صغيره وكبيره
مثلا لازم تختار البلاط و الصبغ و الدرايش و الحمامات و المطابخ
و..وو.........وو الخ
اذا عطيتها شركه تشطب لك الشي الوحيد الي بترتاح منه التنسيق بين المقاولين
فقط .
وهذه نصيحه لك وظف لك فورمان لمدة 6 شهور براتب بالكثير 5000 ريال شهريا
ويشيل عنك التنسيق بين المقاولين و الاشراف
وكل هذا ماراح يكلف عليك 40 الف ريال
اذا قلنا تصرف له بترول و جوال وسكن
اي مقاول او شركه مقاولات لن ترضى باقل من 150الف ريال ربح مباشر
وفي ارباح غير مباشره وغير معلنه
تحياتي للجميع

[K.A]

اخوي سهم عتيج
اذا لك بارض مشاوير
شطب بنفسك افضل
اتعب شوي وبترتاح ع طول

لو شركة اريح بس فكر فيها يمكن تركيب البلاط يكون مب ممتاز او شي مب يضبطونه
بالعربي لو بنفسك افضل
تروح لاشخاص من واقع تجربه وتركب احسن لك

وتشطب براحتك

[سهم عتيج]

يعطيكم الف عافية جميعا

وشكلي باشطب بروحي بس احتاج للتنسيق

يعني تقريبا اتفقت مع الكهرباءي والبلامبر وتقريبا راح اوفر مبلغ 50 الف ريال لو عطيتها مقاول

واتفقت مع شركة يوبي في سي وتقريبا راح اوفر مبلغ كبير ايضا

واتفقت مع شركة الاصانصير ( كوني) بديلا عن ميتسوبيشي وراح اوفر حوالي 50 الف
ريال

واتفقت مع الحجر بمبلغ

وكذلك البلاستر الداخلي والخارجي في طور الاتفاق

وكذلك الابواب والجبس في طور البحث والاتفاق

يمكن الشغلة اللي احاتيها هي عملية الدفان والتبليط ، تقريبا يقولون هذي اهم شغلة وراح يروح عنك نص التعب حسب كلام الاستشاري لي

واذاد فيه اية اقتراحات فانا ارحب بها

ولازال عندي وقت لين بعد رمضان ان شالله

الاهم اني احط خطة معينة وابدأ فيها سواء شطبت بنفسي او اتفقت مع مقاول

[MAZEN37]

اخوي التشطيب سواء عطيته شركه او شطبت بنفسك
في كلى الحالتين لازم تكون مشارك في كل صغيره وكبيره
مثلا لازم تختار البلاط و الصبغ و الدرايش و الحمامات و المطابخ
و..وو.........وو الخ
اذا عطيتها شركه تشطب لك الشي الوحيد الي بترتاح منه التنسيق بين المقاولين
فقط .
وهذه نصيحه لك وظف لك فورمان لمدة 6 شهور براتب بالكثير 5000 ريال شهريا
ويشيل عنك التنسيق بين المقاولين و الاشراف
وكل هذا ماراح يكلف عليك 40 الف ريال
اذا قلنا تصرف له بترول و جوال وسكن
اي مقاول او شركه مقاولات لن ترضى باقل من 150الف ريال ربح مباشر
وفي ارباح غير مباشره وغير معلنه
تحياتي للجميع
كلام جميل :)

[معماري قطري]

عندي سؤال .. ؟؟

اذا الشخص بيبني بيته بنفسه .. او بيشطب بيته بنفسه ..

هل يستطيع تبين مستوى العمل المطلوب .. و تقييمه من حيث الجودة والفنيات .. ؟؟

هل يستطيع فحص المستويات المطلوبة في جميع الاعمال المنجزة ..

هل ... هل .. هل ... ؟؟؟؟

هذه شغلات محتاجة الى مهندسيين وليس فورمانية او عمالة عادية ..

ما شاء الله عليك وصدقني مب مجامله انا قريت هالموضوع كم مره ولا قدرت أرد.

أكثر اللي يتورطون وتحصلهم يدورون ويسئلون ويتعبون وممكن يتأخرون فترات طويلة ويتعرضون للغش هم اللي يستسهلون هذي السوالف.

المقاولين كثيرين منهم شغالين بالبركه، وشلون الواحد بيسوي شغله قطاعي وكل شيء بإتفاق ومبهم أحياناً.

انا كنت معين استشاري بكامل التخصصات يتابع بيتي، وكنت أمر بصفه شبه يومية ودوم اتصل بالإستشاري يجي يشوف معاي ونتابع كل صغيره وكبيره، والمقاول كان درجه ثالثه وعنده عدد كبير من المهندسين وبكم تخصص والمدراء وغيرهم، واتفاقي كان معاه على تسليم مفتاح بس فيه أشياء خليت تنسيقها وتوريدها علي وبعضها حتى التركيب على مقاول آخر بس كنت حاط شروط إن المقاول الرئيسي مسؤول عن كل شيء وحماية الموقع والتنسيق في أُمور كثيره.

اللي يختار التشطيب بنفسه يدفع أكثر ويتعب أكثر وياخذ أقل، ونفس الشيء اللي يتفق إتفاق مع شركة أي كلام ومكتب إستشاري أي كلام حتى لو تسليم مفتاح.