نصايحكم للموظفين والموظفات الجدد؟

[الخـود]

السلام عليكم ورحمة الله وبركاته

ماهي نصائحكم "من خبرتكــم" للموظفين والموظفات الجدد من جميع النواحي ( المهنية، العلمية، الاجتماعية، التواصل .... الخ) ، وفي كل المجالات ..
ما هي الأخطاء التي كنت تتمنى أنك تجنبتها مثلا ؟؟؟!

شكرا جزيلا

[بونووف]

عدم التاخير عدم الغياب عدم اخذ مرضيه الا في حالت الضروره .. اول الايام هي الاهم لانه ياخذون الانطباع الاول من الموظف واذا من البدايه عطيتهم صورة الموظف المجتهد واللي يحب يتعلم ويشتغل خلاص هالصوره بتم في بالهم عنك .. فلازم الموظف الجديد يسوي شووو قد مايقدر

[بن غيث]

لا تمدح ولا تذم في أحد ..

لا تثق في أي شخص ..

كن مستمع جيد .. ولا تتحدث كثيراً

[المحقق كونان]

االصدق والامانة في الشغل مهميين

اثبتي وجودج من اول الايام وانج قد الشغل والمسؤوليه ..واذا ماعرفتي شي ولا شغله اسئلي المسؤول المباشر لاتنحرجيين

وحاولي ان يكون شغلج مافيه خطاء ومرتب والانجاز يكون في الوقت المحدد حاولي بقدر المستطاع ان يكون حضورج وانصرافج في الوقت المحدد

ابتسمي وسلمي على الموظفات وضيفيهم في البلاك بيري وسوي معاهم صداقات لان الموظفات بتشوفينهم كل يوم 8 ساعات اول اقل او اكثر .. لو فيه مناسبه لحد الموظفات طبعا روحي اذا قدرتي او اقل شي اتصال ..

الله يوفقج

[تحداني]

نصيحتي دايما لخواتي واخواني الجدد في عالم العمل وانتي وحده منهم
" حبي شغلج " عطي كل شي عن رغبه وخلي عطائج دائما لمصالح الناس وخدمتهم
تحملي تتأثرين من النظره السلبيه للي حولج .. وكوني دايما على قناعه ان العمل المميز مهما كان بسيط او كبير الا بيظهر صاحبه

اقول لج هالكلام من باب سنوات طويله من العمل
كل شي سويته لقيته .. وكل لحظه قضيتها في العمل خذت المقابل عليه واولهم المقابل المعنوي


اماعن العلاقات الاجتماعيه انا انظر لها من باب يمكن ما تقتنعين فيها
بس كل انسان يقدر يحط اي حواجز او يشيلها بإرادته ولايمكن الغير يأثر فيه


الله يوفقج يارب .. وينور طريقج .. ويرزقج على قد نيتج

نصيحه اخيره .. المكان الي تترزقين منه خليه لوجهه الله في كل شي
ورب العالمين راح يفتحها عليج دائما

[روح الاطلس]

الانضباط واظهار الحماس للعمل

طبيعي في البداية بيكون عندج خجل وبتحسين نفسج مثل بنت بصف اول ابتدائي اول مرة تدش مدرسة وتشوف ناس ههههه

لكن لا تبالغين في الخجل وشوي شوي بتتأقلمين

كوني دبلوماسية وادرسي القروب اللي بتشتغلين معاه وهذا يعتمد على شخصيتج كوني في البداية متأملة واعرفي شخصية القروب والمسؤل ..

الشغل اعطيه من قلبج وركزي على خلق افكار جديدة قدمي مقترحات بيني شنو عندج من مهارات

وقبل لا تروحين الدوام افطري عدل واذكري ربج صلي الفجر بوقته وادعي ربج بالتوفيق واعزمي نية العمل تكون لوجه الله لان الله يحب العبد العامل، واقري وايد في كتب التنمية البشرية بتحصلين مجموعات حلوة في الانترنت كيف تديرين جدول عملج وكيف تديرين الوقت والازمات والتخطيط ومهارات النجاح
طوري نفسج حتى لو بيئتج ماتشجع على التطوير اجتهدي لا تصيرين مثل الغالب الاعم الناس السلبيه الي همها الراتب اخر الشهر ومافي انتاج!

[elders]

لا تمدح ولا تذم في أحد ..

لا تثق في أي شخص ..

كن مستمع جيد .. ولا تتحدث كثيراً

صـــــــــــــــح

وما تكون ماخد راحتك في علاقاتك الاجتماعية اذا كان طبعك عشري ..لانو رح تتعب ويمونو عليك فوق طاقتك ولما تحتاجلهم رح يكونو مشغولين

[تغلبية]

ماقصروا الاخوان .. نصايحهم كلها ذهبية ..

وبركز على كم نقطة:

- لاتسمعين كلام أحد يعني أخذي وخلي .. و قناعاتج انتي كونيها .. لاحد يفرض عليج رايه في الشغل.

- اذا كلفتي بمهمه وماعرفتي لها او مافهمتيها ... اسالي ولاتستحين من المسؤول .. واجتهدي فيها .. دوري في النت او اقراي عنها .. سوي اللي تقدرين عليه ..
ولازم تسلمين او اتمين المطلوب منج وتسلمينه في وقت محدد .. يعني ماتخلين المهمة مفتوحة. ولو صار خطأ غير مقصود .. لا تكابرين .. اعتذري بكل بساطة وبيني انه خطأ غير مقصود وما راح يتكرر مرة ثانية.

- دووووووووووووم اقراي عن مجالج ومجال المؤسسة اللي انتي فيها بالعربي والانجليزي اذا لغتج زينة .. علشان تقدرين تتفاعلين وتضيفين واطورين نفسج والمكان اللي انتي فيه ... واتشوفين الناس اللي بمجالكم وين وصلت.

- اخيراً .. علاقات ومشاكل البيت خليها في البيت .. زوجي ابوي امي اختي اخواني .. يفضل تبقى في البيت لين تعرفين نوعية الناس اللي واياج .

- احرصي انج تسوين الشي اللي ينضاف للسيرة الذاتية ..

- كوني متعاونة وكريمة اطباع مع الجميع .. ولو صار عندج وقت فراغ ساعدي من يحتاج لمساعدة خاصة في السنة الاولى وحطي يدج في كل شي .. علشان تتكون عندج الخبرة وتكونين محل ثقة.

- اعرفي نقاط التقييم السنوي .. اطلبي الاستمارة .. وركزي على ان يكون العمل والانجاز في النقاط اللي يطلبها التقييم.


- نقطة اختيارية.. ولكني افضلها .. سوي لج ملف الانجاز ..
اي شي تسوينه حطي منه نسخة من الملف ، بيساعدج على كتابة التقرير الشهري لو اطلبوا منج ... وانتي بتقييمين نفسج .. شلون كان انجازج على مستوى الشهر .. والسنة ..
ويعطيج فرصة للمراجعة والتقييم والتطوير .


- ايضاً نقطة اختيارية لكن انصح بها جداً ... " يقولج فلان .. يقولج المدير " انصحج لاتقبلينها من موظفين مثلج .. ممكن تتأكدين من صاحب التكليف .. اللي يبي منج شي يجي يطلب منج بشكل مباشر حفظاً للحقوق.

- .. وأخيراً ... كوني مبتسمــــة ومتفائلــــــــة على طول .. واستمتعي بكل شي تسوينه حتى لو كان مجرد طباعة ورقة ... واخلصي النية لله .. واحتسبي الاجر :)

وكل التوفيق لج يارب

[حمد 2002]

يجب على الموضف الجديد ان يفرض شخصيته وايخليها تكون قويه من اول يوم له بالدواااااااام ،،

لأن الطيب كلن يستغله ويحول صوبه الشغل ،،،

[راشد محمد]

ماقصروا الاخوان

[فريج النجادة]

طلب العون والتوفيق من الله سبحانة وتعالى

واشكر كل شارك وساهم في إثراء الموضوع

[الخـود]

شكرا لكم

جزاكم الله خير

[مخطط قطري]

مختصر مفيد جدااا اغرسي الحب والاحترام والتقدير في نفس كل من يقابلك في الوظيفة وبتوفيق وحياة عملية متميزة باذان الله

[الخـود]

شكرا لك...

[khaldoon]

لا صداقة بالسر و لا عداوة بالعلن

[باراكودا]

تمسكن لين ما تتمكن .

[حقيقه]

أهم شيء الموظفين الرجال أبعدي عنهم. وخلك جاده معاهم. لأنه كلهم نيتهم سيئه

ولاتفكري أنه فيه حد الموظفات بتكون صديقه وتحفظ الأسرار

والاهم يكون هالشغل من اختيارك

لو يرجعي بي الوقت اشوي بس كان مااشتغلت في هالشغل

[الخـود]

نصايح مفيدة والله

شكرا لكم

[almaf1a]

اصدقاء العمل يبقون اصدقاء عمل
لا تطور العلاقه معهم خارج العمل

[بو خليفه 123]

اتوقع الاخوان والخوات ماقصروا بالافاده

من ناحيه اخرى فرح عجوز بيتكم بـ راتبك الأول و خصص لها نصيب منه

و ماوصيك بـ كفالة اليتيم الشهريه

[زمان]

مافي احسن من قول الرسول عليه افضل الصلاة والسلام

من عمل منكم عملاً فليتقنه

وإن الله يحب اذا عمل أحدكم عملاً أن يتقنه

والإتقان يشمل كل ماقالوه الأخوان سابقاً الله يجزاهم خير