هل من حق الوكالة انهم تاخذون فلوس عشان فتح ملف للسيارة ؟؟؟

[المحافظ]

السلام عليكم ..

سؤال .. هل من حق بعض الوكالات انهم ياخذون فلوس بالألاف عشان مجرد فتح ملف للسيارة على السيستم ، العملية كلها ما تاخذ دقايق و يضرب عليك خمسة إلى عشرة آلاف .. هذا طبعا غير التصليح او الصيانة نفسها.

هل نقدر نشتكي على هالوكالات عند حماية المستهلك ، وهل فعلا يقدرون يسوون شي ، بالذات إذا انا ما ابغي اني أفتح ملف ، و لايهمني افتح ملف ، ابغي اسوي صيانة للسيارة و مستعد ادفع مقابل ذلك ..

اللي عنده خبرة في هالموضوع ياريت يعطينا خبرته .. وشكرا

[asulaiti]

بدون مبلغ فتح ملف ولا هم يحزنون ...
واضح محاولة النصب هنا

إذا موترك أمريكي غالبا يكون عليه ضمان الخليج، يعني تصلحه على الضمان لكن لازم تسوي السيرفس الدوري عندهم كل 10,000 كم
وإذا طالبوا منك قيمة فتح ملف إذا مبلغ مايتعدى 500 ريال بسيطة لكن ن زاد عن ذلك كلم حماية المستهلك أو طيح في بطن المصنع
ارسل لهم أيميل شديد اللهجة

والله يعينك

[المحافظ]

هل حد من قبل كلم حماية المستهلك و وصل إلى نتيجة ؟

[Fahad77]

مرحبا أخوي

لاتتعب نفسك مع حماية المستهلك مب ماخذ منهم لا حق ولا باطل

وجودهم مثل عدم وجودهم

صارت لأخوي مشكلة مع كارفور على جهاز وكلمنا حماية المستهلك وتمينا فوق 3 شهور

ولا حياة لمن تنادي وفي الأخير احنا اللي كلناها

بخصوص موضوعك اذا الموتر أمريكي مثل ماقال أخوي السليطي بس جمس أو شفر

فالضمان عالمي أما لو فورد ماعليه ضمان عالمي ولو كان موترك ياباني أكيد ماعليه ضمان عالمي

لكن للأسف من حق الشركة انها تاخذ منك مبلغ مقابل انها تفتح لك ملف عشان تدخل سيارتك

وتسوي لها صيانة عندهم وللأسف الشديد ان القانون معاهم يعني لاتفكر ترفع قضية أو تكلم

حماية المستهلك لأن حتى القانون لما صار وياهم في هالموضوع ماتحدد المبلغ المستحق لفتح الملف

يعني ممكن تلقى كل شركة تطلب مبلغ على كيفها عشان فتح الملف


اسمحلي لو طولت والله يعطيك العافية وربي يعينك

[المحافظ]

شكرا على الرد .. امس حماية المستهلك كلموني وقالوا انه مش من حق الوكالة تطالبك بمبلغ كبير لفتح ملف .. و انه هم بيكلمون الوكالة و بيكلموني ..

اللي اذكره ان وكالة النيسان كانت اول تاخذ فلوس عشان فتح الملف ، بس الحين عادي ما ياخذون شي ..

عموما الحين اللي جاني من حماية المستهلك ان الوكالة ماعندها حق تطلب مبلغ كبير لفتح ملف ، هذا الشي يريحني شوي ، ولكن إذا كان هالكلام صحيح .. مب كل الوكالات لازم تلتزم فيه؟

[بن غيث]

عندي سيارة مستوردة من امريكا وليس لها ضمان في الخليج .. والوكالة لم تأخذ أي مبلغ لفتح ملف
فالموضوع واضح أنه يوجد أختلاف في سياسات الشركات .. وطرق الربح

[وحيد-الشوق]

اخوي اذكر لنا اي شركة الي قالت لك ادفع لنا مبلغ وقدره ؟

[الفا برافو]

انا كان عندي كروزر ماخذه جديد معرض البريمي
وصار له حادث بسيط
وديته وكالة التيوتا عشان التصليح قالوا لازم تفتح ملف ب 3000 ريال .. مع انه بندفع لهم قيمة التصليح كامله !!
وديته المناعي.. وصلحوه لا ملف ولا هم يحزنون

[المحافظ]

ما احب اذكر اسم الشركة في المنتدى ، ولكن الشركة فعلا طلبت مبلغ يتجاوز 4000 ريال لفتح ملف ، الغريب في الأمر ان هناك العكس ، مثلا كان هناك شركة (توكيل ياباني) تاخذ فلوس ثم غيرت سياستها وصارت تقبل السيارات و (بدون) رسوم فتح ملف ، مع انهم يواجهون منافسة لابأس بها من السيارات اللي تجي من خارج البلاد ، ومع ذلك هم مستفيدين في الخدمة و الصيانة.

وبعدين الوكلاء نفسهم يستفيدون من الصيانة فليش يخرب على نفسه و يضغط على الزبون عشان يدفع مبلغ كبير ، لو مبلغ بسيط قلنا معليه ..

[qatari 111]

معروفه انها شركة عبدالله عبدالغني وهاذي سياستها .