ايش راح تعمل لما تتعرض لهذا السؤال التقليدي؟ [الأرشيف]

khaldoon

22-03-2013, 11:46 PM

السلام عليكم و رحمة الله و بركاته

لما تكون في مقابلة شخصية و تتعرض للسؤال التقليدي فيها و هو انت كم تاخذ حاليا بالمكان اللي بتشتغل فيه؟...... ايش بيكون ردك؟

هل راح تقول راتب اعلى من الراتب اللي تتقاضاه فعلا؟.....في حالة قلت نعم او لا قد تكون كسبان او خسران

هل راح تقول راتبك الحقيقي؟.....في حالة قلت نعم او لا قد تكون كسبان او خسران

هل راح تعوم الاجابة او تتهرب من السؤال؟.....في حالة قلت نعم او لا قد تكون كسبان او خسران

ايش راح تعمل بالضبط....ارجو الرد بمنتهى الصراحة

عن نفسي تعرضت لكثير من المواقف و جربت الاجابات كلها و ان شاء الله بقولكم ايش صار معاي لاحقا من خلال الموضوع

خليفـة

22-03-2013, 11:48 PM

عن نفسي .. بقول الحقيقة طبعاً
وبيكون عندي أمل ان يكون الراتب للوظيفة الجديدة
اعلى من راتبي القديم .. وفي اسوأ الأحوال مساوي
له .. وبعدين من ضمن الأوراق المطلوبة في أي
وظيفة جديدة شهادة اثبات راتب .. بالتالي مو من
مصلحتي ان اكذب واعطي معلومات خطأ .

خليفــة

الخزرجي قطر

23-03-2013, 12:00 AM

طبيعي الصراحه راحه بقول الراتب والمميزات واذا ماعجبني العرض الجديد ماراح اقبل
اعتقد سؤال محرج لكن الاولى ان يتم عرض مخصصات الوظيفه الجديده مالهم شغل كم كنت اخذ سابقا

khaldoon

23-03-2013, 12:06 AM

عن نفسي .. بقول الحقيقة طبعاً
وبيكون عندي أمل ان يكون الراتب للوظيفة الجديدة
اعلى من راتبي القديم .. وفي اسوأ الأحوال مساوي
له .. وبعدين من ضمن الأوراق المطلوبة في أي
وظيفة جديدة شهادة اثبات راتب .. بالتالي مو من
مصلحتي ان اكذب واعطي معلومات خطأ .

خليفــة

اولا اشكرك يا الغالي على ردك السريع

صراحة جربت اني اقول الحقيقة و كذا مرة يعرض علي راتب اقل من الراتب اللي احصله و هالشي يصير بعد عدة مقابلات لنفس الوظيفه يعني اني اكون اعجبتهم و قبلوني و يبون يقابلوني اكثر و يجلسون معاي اكثر ......يعني والله العظيم يقولون لي انت اعجبتنا و نبيك و بالاخير يعرضون علي راتب اقل...... طيب هذا مب اسمه تضييع وقت وجهد و خيبة امل

ايش اللي يخليني اترك شغل مستمر فيه اكثر من 10 سنوات علشان اروح على راتب اقل او حتى على نفس الراتب ..... الا لو كنت متفنش لا قدر الله

بخصوص انه من ضمن الاوراق المطلوبة هو شهادة راتب و في كل الوظائف مثل ما تفضلت...... صراحة اول مرة اسمع هالشي..... قد يطلب في بعض الاحيان و لكن ليس دائما و الله اعلم ....يا ريت لو تعطينا امثلة علشان نستفيد و نتجنب الكذب مع هذه الجهات ههههههههه

تغلبية

23-03-2013, 12:08 AM

ممكن اراوغ شوي ..
بس يعتمد على الوضع اذا كنت اعرف المزايا اللي يعطونها للوظيفة بشكل مسبق

وفي كل الأحوال الصدق منجاة ..
بقول اللي آخذه .. لو عرضهم ماناسابني ممكن افاوضهم قد يكون الراتب اقل لكن هناك امتيازات تشفع

حيهم على الاقل عندهم شفافية .. في عرض .. وفيه قبول أو رفض ..

khaldoon

23-03-2013, 12:19 AM

طبيعي الصراحه راحه بقول الراتب والمميزات واذا ماعجبني العرض الجديد ماراح اقبل
اعتقد سؤال محرج لكن الاولى ان يتم عرض مخصصات الوظيفه الجديده مالهم شغل كم كنت اخذ سابقا

حياك الله يا الخزرجي قطر

والله ما في اجمل من الصراحة بس للاسف في ناس وايد ما تستحقها......مرة قابلت واحد و قالي انت اعجبتني و ابيك معانا بالشركة و بعدين قالي ابي نسوي مقابلة ثانية مع مساعدي بالشركة و كان واحد بريطاني و بعدين قالي ابيك تقابل ابوي لانه صحيح انا مدير الشركة بس ابوي هو صاحبها الفعلي و بالاخير و بعد كل هالمقابلات يعرضون راتب اقل و في كل مميزاته .....و بعدها يتصل علي الاب يبي يقابلي مرة رابعة للتفاوض...والله ما يستحون .....قلت له بطريقة دبلوماسية اسف ما عندي وقت اضيع معاكم اكثر من الوقت اللي ضاع.... و ندموني اني كنت صادق معهم من البداية......

و هذه مب المرة الوحيدة اللي يصير معاي هالشي

khaldoon

23-03-2013, 12:26 AM

ممكن اراوغ شوي ..
بس يعتمد على الوضع اذا كنت اعرف المزايا اللي يعطونها للوظيفة بشكل مسبق

وفي كل الأحوال الصدق منجاة ..
بقول اللي آخذه .. لو عرضهم ماناسابني ممكن افاوضهم قد يكون الراتب اقل لكن هناك امتيازات تشفع

حيهم على الاقل عندهم شفافية .. في عرض .. وفيه قبول أو رفض ..

اعجبني جدا ردك ..... وهذا اللي اسويه حاليا.....يعني انا معطييني شقة مفروشة و الكهرباء و الماء عليهم......مع تأمين صحي فأشلون اقدر احدد راتبي ؟؟؟حتى انا اسألهم هالسؤال....

اعجبتني كلمة الصدق منجاة و متفق تماما معاكي

ايضا نبهتيني لنقطه انه مثلا خلنا نقول ان الشغل الجديد يبي يعطيكي مثلا 30 الف و معا عندهم مشكلة و مرتاحين جدا.....لو قلتي لهم انك تاخذين 20 الف و انت صادقة ...اكيد راح يقررون يعطونك اي رقم عند ال 20 الف و يفاوضونك بعد..... يعني راح يقللون قد ما يقدرون و المسـألة عرض و طلب و تقبلي او ترفضي

المريخي77

23-03-2013, 01:47 AM

قول الحقيقة ولا تزيد أو تنقص . أو قول لهم سلم رواتب الدولة وانا بدرجة كذا ...

fhd4

23-03-2013, 02:22 AM

احسب كل الامتيازات اللي تحصلها في السنة مثل البونس والتذاكر وغيرها … وقسمها على 12 وزيدها على الراتب الشهري … وقولهم هذا متوسط دخلي الشهري … تكون طلعت من الخلاف …

khalid525

23-03-2013, 02:30 AM

حساب الراتب اخ خلدون يكون على الدخل السنوي كما قال الاخ الذي قبلي ، يعني تجمع كل رواتبك والحوافز والبدلات وتقسمها على 12 شهر وتعطيهم النتيجة ، ولابد ان يكون رسالتك لهم في المقابلة انك تبحث عن دخل اعلى حتى توقف اي تنزيل للعرض .

حبر وقرطاس

23-03-2013, 07:54 AM

انا دخلت وايد مقابلات شخصيه ودائما احط في بالي نقطتين اذا سألوني واذا فتحوا باب الاسئله لي ان اسأل .
:victory:في حاله سألوني في المقابله الشخصيه كم راتبك الحالي ؟ اضيف الفين ريال للرقم الحقيقي لان من يقابلني كمسؤول لن يعبأ بالاطلاع على شهاده راتبي اذا اجتزت المقابله سيترك مسأله متابعه واستكمال اوراقي للسكرتيره او السوبر فايزر الي ينوب عنه هذي نقطه .
النقطه الثانيه في هذي الجزئيه تحديدا ومن خفايا صلاحيات المدير الي يسوي معاك مقابله له الحق يضيف لك الفين فالراتب او مايضيفهم ما الاحتفاظ بتطبيق قانون الموارد بخصوص الشهادات والمؤهلات وكل مرحله كم يستحق راتب .
:shy:في حاله فتحوا لي باب الاسئله عن جهتهم لا يجوز بحال من الاحوال ان اسألهم عن الراتب كم لانهم سيعرفون اني مش جاي عشان الوظيفه ذاتها من اجل الانتاجيه والخبره وانما من اجل المال وفي نظرهم هذا الشخص الي هو انا ان سأل عن الراتب من البدايه فهو دليل على انه لن يستمر معنا بمجرد سماعه عن جهه اخرى في راتب اعلى وهذا امر غير مشجع لقبوله لديهم. لانها مسأله بديهيه هم ينظرون لمصلحه العمل والاوليه لاستمراريه انتاجيتهم بتوفير موظفين على قدر من الاستقرار والجديه. ولا يخفى على احد ان هدف كل شخص البحث عن وظيفه براتب اعلى او افضل وهم يعلمون ذلك ولكن لا يحبون المجاهره به.

واخيرا:) ملاحظه هامه لكل من تمت مقابلته وينتظر الاتصال من الموارد في اي جهه خاصه او حكوميه في حاله تم الاتصال بك وابلاغك بأنه تم قبولك وسيتم ارسال العقد لك او يريدونك الحضور لتوقيع العقد في هذه المرحله تحديدا بأمكانك المطالبه بالزياده فيه في الاساسي بنسبه الفين ريال وعاده هذا التوقيت هو الفرصه الوحيده للتفاوض لانهم مايصرفون هالفلوس من جيوبهم هذي اموال دوله .

اتمنى افدت صاحب/ صاحبه الموضوع

تحياتي

R 7 A L

23-03-2013, 08:09 AM

الحين يطلبون شهادة راتب من جهة العمل القديم
مايحتاج الواحد يقول شي عن الراتب كل شي واضح عندهم

MAZEN37

23-03-2013, 08:57 AM

عن نفسي بقول الصحيح طبعا
والرازق ربنا
الواحد يدور البركه يا خلدون والله شايف ومطلع

أخت الكل

23-03-2013, 10:27 AM

انا عن نفسي ما راح أجاوب على هذا السؤال لانه خصوصيات

راح أقول له لا تسالني عن راتبي انا ما تركت شغلي وقدمت عندكم إلا لاني ابي احسن دخلي فانت ايش راح تقدم لي من امتيازات :)

ROSE

23-03-2013, 11:22 AM

دائما الصدق منجاه اخوي خلدون ،،

بخصوص الراتب اما انك تقول الصدق او تراوغ وماتعطيهم راتبك

بقول لك ليش

لو كذبت عليهم بالراتب وعطيتهم راتب اعلى احتمال يطلبون البنك ستيتمنت او يطلبون لاحقا من المكان اللي تشتغل فيه لما يسوون reference chick وبيعرفون راتبك الصحيح وهني بتطلع كذاب ومابيقبلونك

اما اذا راوغت ودايما افضل هالشي حتى لو اصروا لا تعطيهم الراتب لان احتمال

يكون المعروض عليك اكثر بوايد من اللي تاخذه الحين فراح ينزلون الاوفر علشان يتوافق
مع الـ 15% من الزيادة المفترضه على راتبك القديم

وذي اللي احنا نسويه بالعادة ،، فالاجابة دايما تكون انا مب راضيه عن اللي اخذه الحين وذي احد الاسباب اللي مخليتني ادور على الوظيفه فافضل عدم الذكر

او الراتب الحالي يعتبر سر من اسرار المكان اللي اشتغل فيه فاعذروني ماراح اقدر اعطيكم اياه وعطوني الاوفر خل اشوف اذا يتناسب مع اللي اخذه بقبله واذا لا راح اخبركم ونتناقش في حزتها ان شاء الله :tease:

التيما

23-03-2013, 11:34 AM

للأسف بقول راتبي الفعلي .. وصارت لي لمن قدمت لوظيفة غير المجلس الأعلى للتعليم وسالوني عن الراتب ! وبما ان راتبي كبير قالي ما عندنا وظيفة بنفس راتبها المرتفع وما نقدر نوظفها براتب اقل .. مع اني كنت موافقه عادي ينزل راتبي بس ماقبلوا .. وحتى لو تكرر الموضوع بقول راتبي الفعلي .. لو وافقوا او رفضوا ! فهو خيرة من عند الله

روح الاطلس

23-03-2013, 11:43 AM

دائما الصدق منجاه اخوي خلدون ،،

بخصوص الراتب اما انك تقول الصدق او تراوغ وماتعطيهم راتبك

بقول لك ليش

لو كذبت عليهم بالراتب وعطيتهم راتب اعلى احتمال يطلبون البنك ستيتمنت او يطلبون لاحقا من المكان اللي تشتغل فيه لما يسوون reference chick وبيعرفون راتبك الصحيح وهني بتطلع كذاب ومابيقبلونك

اما اذا راوغت ودايما افضل هالشي حتى لو اصروا لا تعطيهم الراتب لان احتمال

يكون المعروض عليك اكثر بوايد من اللي تاخذه الحين فراح ينزلون الاوفر علشان يتوافق
مع الـ 15% من الزيادة المفترضه على راتبك القديم

وذي اللي احنا نسويه بالعادة ،، فالاجابة دايما تكون انا مب راضيه عن اللي اخذه الحين وذي احد الاسباب اللي مخليتني ادور على الوظيفه فافضل عدم الذكر

او الراتب الحالي يعتبر سر من اسرار المكان اللي اشتغل فيه فاعذروني ماراح اقدر اعطيكم اياه وعطوني الاوفر خل اشوف اذا يتناسب مع اللي اخذه بقبله واذا لا راح اخبركم ونتناقش في حزتها ان شاء الله :tease:

اعتمد هالجواب خلدون كله حكم من انسانه خبيرة في هالمجال:nice:

لكن عندي ملاحظة بعض الاحيان شركات تعطي للمرشح للعمل ابلييكيشن لازم يعبيه من ضمنها ابليكيشن خاص بتفاصيل الراتب الحالي! شنو يسوي الواحد هني؟

: بوحمود :

23-03-2013, 11:44 AM

لو قلت1000 راح يطلبون اخر شهادة راتب ولو قلت 100000 راح يطلبون اخر شهادة راتب يعني مافي مفر الافضل انك تقول الصدق

تاجر الشباب

23-03-2013, 11:47 AM

شكرا اخوي على طرح هذا السؤال

اخوي اولا لازم اقول الراتب الى انا باخذه واقولهم طبعا اطمح الى راتب اعلى وثانيا لازم يطلبون شهادة راتب من شغلك القديم فيه الدرجة والراتب والعلاوات يعني مافي مفر من الموضوع

روح الاطلس

23-03-2013, 11:47 AM

خلدون من قراءتي في المواقع الاجنبيه والعربية بخصوص المقابلات الشخصية استنتجت ان سؤال الراتب المفروض ماتعطي رقم فيه ابداااااا

ان سألوك لا تجاوب قول انا ابي اعزز مجال خبرتي ولما نتفق على كل تفاصيل الشغل واخذ منكم القبول المبدئي وقتها نتكلم في الراتب

لا تتكلم في الراتب من اول مقابلة وان سالوك تهرب لين تحس انهم يبونك ومتمسكين فيك وعجبتهم ووافقوا مبدئيا عليك حاول تاخذ عرضهم بالاول

دايما يقولك من يعرض اول " يكشف اوراقه" هو الخاسر الاول

لا تخبرهم يكون افضل خاصة لو المقابلة شفهيه مب تعبئة ابليكشنات او اجباري

روح الاطلس

23-03-2013, 11:48 AM

بخصوص شهادة الراتب لا مب كل مكان يطلبونها على حسب.

UAE-SOUL

23-03-2013, 11:51 AM

طبعا الواحد ويقول الراتب لأنهم يطلبون شهادة راتب لكن بالنسبة الراتب تقدر ترفض الأوفر وتقول ليش لو تبي زيادة في الراتب لو صح بيونك بي زيدون الراتب وفي ناس ترض الأوفر أكثر من مرة لين ما يعجبهم الراتب بالذات لو الواحد مرتاح في شغله

ANONYMOUS

23-03-2013, 11:52 AM

اولا تيقن ان الرازق والمعطي الله عزوجل

اذا سال عن الراتب قول له "مثلا" راتبي 20 آلاف ..

ولكن اذا كان عندكم الاوفر اقل من "مثلا" 35 الف .. لاتضيعون وقتي و وقتكم

( طبعا من المفترض تعرف كم تعطي هالشركه رواتب.. على الاقل متوسط رواتبها مب تطلب شي خيالي)

ونت طالع ارفس الباب برجلك هههههههههههه

chillis

23-03-2013, 11:53 AM

اكيد بقول الحقيقه وبشوف ان عجبني عرضهم بوافق مب شرط يكون الراتب اكثر المهم باقي المميزات احسن كمسمى وظيفي او كتحسين العمل

ROSE

23-03-2013, 12:37 PM

اعتمد هالجواب خلدون كله حكم من انسانه خبيرة في هالمجال:nice:

لكن عندي ملاحظة بعض الاحيان شركات تعطي للمرشح للعمل ابلييكيشن لازم يعبيه من ضمنها ابليكيشن خاص بتفاصيل الراتب الحالي! شنو يسوي الواحد هني؟

اذا سيستم ابليكشن يكتب مابين كذا وكذا

واذا ابليكشن ورق يكتب يفضل النقاش لاحقا

خلدون من قراءتي في المواقع الاجنبيه والعربية بخصوص المقابلات الشخصية استنتجت ان سؤال الراتب المفروض ماتعطي رقم فيه ابداااااا

ان سألوك لا تجاوب قول انا ابي اعزز مجال خبرتي ولما نتفق على كل تفاصيل الشغل واخذ منكم القبول المبدئي وقتها نتكلم في الراتب

لا تتكلم في الراتب من اول مقابلة وان سالوك تهرب لين تحس انهم يبونك ومتمسكين فيك وعجبتهم ووافقوا مبدئيا عليك حاول تاخذ عرضهم بالاول

دايما يقولك من يعرض اول " يكشف اوراقه" هو الخاسر الاول

لا تخبرهم يكون افضل خاصة لو المقابلة شفهيه مب تعبئة ابليكشنات او اجباري

:nice::nice:

ooredoo90

23-03-2013, 01:10 PM

اذا سيستم ابليكشن يكتب مابين كذا وكذا

واذا ابليكشن ورق يكتب يفضل النقاش لاحقا

:nice::nice:

الإخت روز.. طلاتج هالأيام جميلة لأنه مايصاحبها (إغلاق) للمواضيع (:

Right

23-03-2013, 01:28 PM

الجواب: " الله العالم "

Al-Kuwari

23-03-2013, 02:30 PM

انت مهب مجبور تجاوب يا خلدون

للأسف البعض يصر على معرفة الراتب ويحن ويزن

لكن انت ممكن تتهرب من الاجابة بشكل اخر وهي انك تغير الموضوع وتقول انا جيت عندكم وحاط فبالي راتب x , طبعاً الأغلب يفضل انه مايذكر رقم معين خوفاً من ان الراتب اللي راح يعرضونه عليه اكثر من الراتب اللي راح يطلبه

لكن هذي الامور يكون فيها جزء من المغامرة والحظ

وبالاخير ماقدر اقول الا عسى ربي يوفقك ويرزقك الراتب اللي فبالك وفوقه 10,000 زيادة ياخوي :nice:

تاجر الشباب

23-03-2013, 02:36 PM

احسن شي قول الحق والرزق على الله

king fish

23-03-2013, 02:43 PM

أخوي خلدون من واقع خبرتي خليك نفس اللبنانيين يعني اذا راتبك 10000 اطلب 80 الف وبي ام وفيلا حتى لوماتفهم في المجال الي انت مقدم له
اشتغل 6 شهور وبتتفنش تروح شركه اخرى وتقولهم انا كنت مدير اخذ 80 الف واطلب ميه
الف تشتغل 6 شهور وتتفنش وهكذا

عليهم مخ 12 سلندر

تاجر الشباب

23-03-2013, 03:02 PM

والله الى عنده خبره يشترط الى يبيه لا لبناني ولا شي

تحداني

23-03-2013, 07:18 PM

كل الاماكن الي قدمت عليها او جاتني عروض منهم كوني اعمل بوظيفه موجوده في كل قطاعات العمل لما كانوا يسالوني كم راتبج الحالي ؟؟
عمري ما قلت لهم كم .. كنت اقول ما بين " 30 الف الى 40 الف " وما لقيت اصرار على معرفه الرقم الفعلي ابدا
ولا كانوا يطلبون مني شهاده الراتب في حاله الموافقه على وظيفتي

لكن انا كنت اساوم .. والسبب ؟؟
اني قديمه في المجال الي اعمل فيه .. ان كنت ابحث عن شي افضل من ناحيه التطوير
وابحث عن الجديد .. وابحث عن مساحه ابداع واقدر اتحرك فيه ..
وان المكان الي انا فيه حاليا مرتاحه من كل النواحي
فلما يرفضون المساومه اقول لهم فمان الرحمن

عندي قناعه كل جهه عمل تأخذ موظف قديم في مجال معين ما راح تستخسر فيه الراتب الي يرضي الموظف .. بقدر ما تريد ان تأخذ من ابداعاته ..فإذا ما قدروك من الناحيه الابداعيه وانت تملكها .. فلو عطوك الي يرضيك قول لهم لا

الله يوفقك يارب .. ويجملك برضاه

ايلاف

23-03-2013, 09:50 PM

اخوي اسمح لي بالمداخلة
آفضل اللام كلام الرسول صلى الله عليه وسلم،،

((‏تحروا الصدق، وإن رأيتم أن فيه الهلكة، فإن فيه النجاة.))

[ هناد عن مجمع بن يحيى مرسلا تصحيح السيوطي حسن‏ ]

(( ‏إن أطيب الكسب كسب التجار الذين إذا حدثوا لم يكذبوا، وإذا ائتمنوا لم يخونوا، وإذا وعدوا لم يخلفوا، وإذا اشتروا لم يذموا، وإذا باعوا لم يطروا وإذا كان عليهم لم يمطلوا، وإذا كان لهم لم يعسروا.))

[ رواه البيهقي في شعب الإيمان عن معاذ تصحيح السيوطي ضعيف ]

والواحد يتحرى البركة
((‏إذا كذب العبد تباعد عنه الملك ميلا من نتن ما جاء به‏.))

[ رواه الترمذي عن ابن عمر رَضِيَ اللَّهُ عَنهُ‏ ]

الله يوفقنا اجمعين ...

بوخالد911

23-03-2013, 10:53 PM

عاااادي

بقوووووول

والله يووفق

بصمة قطرية

24-03-2013, 12:22 AM

متابعة .. :victory:

khaldoon

24-03-2013, 12:28 AM

قول الحقيقة ولا تزيد أو تنقص . أو قول لهم سلم رواتب الدولة وانا بدرجة كذا ...

بارك الله فيك على النصيحه.... على العموم الموضوع مب بس بخصوص القطاع العام..... بل القطاعين

khaldoon

24-03-2013, 12:30 AM

احسب كل الامتيازات اللي تحصلها في السنة مثل البونس والتذاكر وغيرها … وقسمها على 12 وزيدها على الراتب الشهري … وقولهم هذا متوسط دخلي الشهري … تكون طلعت من الخلاف …

جزاك الله كل خير على الفكرة الحلوه ما قصرت.... فعلا اتبعها في بعض الاحيان مع التذاكر و بدل السفر .... بس عاد اشلون احسبها مع البونص الغير ثابت؟!!

khaldoon

24-03-2013, 12:31 AM

حساب الراتب اخ خلدون يكون على الدخل السنوي كما قال الاخ الذي قبلي ، يعني تجمع كل رواتبك والحوافز والبدلات وتقسمها على 12 شهر وتعطيهم النتيجة ، ولابد ان يكون رسالتك لهم في المقابلة انك تبحث عن دخل اعلى حتى توقف اي تنزيل للعرض .

جزاك الله كل خير اخوي خالد على النصيحه الطيبة ما قصرت....متفق معاك

تغلبية

24-03-2013, 12:36 AM

انت مهب مجبور تجاوب يا خلدون

للأسف البعض يصر على معرفة الراتب ويحن ويزن

لكن انت ممكن تتهرب من الاجابة بشكل اخر وهي انك تغير الموضوع وتقول انا جيت عندكم وحاط فبالي راتب x , طبعاً الأغلب يفضل انه مايذكر رقم معين خوفاً من ان الراتب اللي راح يعرضونه عليه اكثر من الراتب اللي راح يطلبه

لكن هذي الامور يكون فيها جزء من المغامرة والحظ

وبالاخير ماقدر اقول الا عسى ربي يوفقك ويرزقك الراتب اللي فبالك وفوقه 10,000 زيادة ياخوي :nice:

طيب اخوي لما نجي عند التفاهم على الراتب وفرضا هم بعد تموا يراوغون
لان يقولك انت كم حاط فبالك راتب عندنا!

فرضا انا ادري انهم يعطون على كفائتي 50 الف
هل ممكن اشطح واقول ابي 70 الف على اساس انهم بيتمون يقاصصوني فيه لين يوصل ل 50 والا في هذا الطلب مخاطرة؟
يعني انا ابتدي من العالي وهم يبتدون من تحت

khaldoon

24-03-2013, 12:51 AM

انا دخلت وايد مقابلات شخصيه ودائما احط في بالي نقطتين اذا سألوني واذا فتحوا باب الاسئله لي ان اسأل .
:victory:في حاله سألوني في المقابله الشخصيه كم راتبك الحالي ؟ اضيف الفين ريال للرقم الحقيقي لان من يقابلني كمسؤول لن يعبأ بالاطلاع على شهاده راتبي اذا اجتزت المقابله سيترك مسأله متابعه واستكمال اوراقي للسكرتيره او السوبر فايزر الي ينوب عنه هذي نقطه .

والله يا اخوي كنت اسوي مثلك ازيد الفين....مرة قابلت مسؤولة التوظيف و سألتني عن راتبي و زدت الفين اطلعت باستهجان و استغراب و كأنها مب مصدقه....و قالت لي لازم تجيب شهادة بالراتب لما نكمل معاك اجراءات التوظيف ....قلت لها ما في مشكلة و انا ما اعرف شلون بس قلت بتتدبر المسألة عن طريق تعويم الراتب لاحقا و سألتها كأنك تقولين انه الراتب عالي و لا يمكن اخذه ....قالت لا ما مشكلة ما في شي

النقطه الثانيه في هذي الجزئيه تحديدا ومن خفايا صلاحيات المدير الي يسوي معاك مقابله له الحق يضيف لك الفين فالراتب او مايضيفهم ما الاحتفاظ بتطبيق قانون الموارد بخصوص الشهادات والمؤهلات وكل مرحله كم يستحق راتب .

بارك الله فيك على هذه المعلومة الخطيرة.... ما اعرفها من قبل
:shy:في حاله فتحوا لي باب الاسئله عن جهتهم لا يجوز بحال من الاحوال ان اسألهم عن الراتب كم لانهم سيعرفون اني مش جاي عشان الوظيفه ذاتها من اجل الانتاجيه والخبره وانما من اجل المال وفي نظرهم هذا الشخص الي هو انا ان سأل عن الراتب من البدايه فهو دليل على انه لن يستمر معنا بمجرد سماعه عن جهه اخرى في راتب اعلى وهذا امر غير مشجع لقبوله لديهم. لانها مسأله بديهيه هم ينظرون لمصلحه العمل والاوليه لاستمراريه انتاجيتهم بتوفير موظفين على قدر من الاستقرار والجديه. ولا يخفى على احد ان هدف كل شخص البحث عن وظيفه براتب اعلى او افضل وهم يعلمون ذلك ولكن لا يحبون المجاهره به.

شوف انا اقولهم اني صارلي 12 سنة في شغلي و هذا اكبر دليل على اني مب من النوع اللي يتنقل وايد و اني ادور على فرصة عمل افضل من حيث الراتب و لو ما توفرت الفرصه فالحمدلله شغلي ثابت و مستقر ان شاء الله .....انا ما أسألهم عن الراتب الا لو هم سألوا كل اللي يبونه و حسيت انهم يبوني و بالاخير قالولي تحب تسأل عن شي..... عاد في هالحالة ما في مجال للخجل .... لاني مب جاي متطوع ..... اعجبتهم و يبوني عندهم و عيب نتكلم بالراتب هههه

في مرة رحت قابلت مسؤول التوظيف و سألني و كأنه مخوني: ليش تبي تترك شغلك.....كأني متفنش بنظره من خلال طريقة سؤاله و ابتسامته الصفراء....قلت له نفس الرد فوق و انه انا ادور على فرصه افضل و لو ما توفرت فما في مشكلة و شغلي ثابت و مستقر ان شاء الله .....ما توظفت عندهم و ما ساعدني و دارت السنين و لقيني في يوم من الايام انا المهندس المسؤول عن بناء بيت العمر الخاص فيه....و بنفس الشركة اللي كنت فيها يوم قابلته.... تبنج.....قلت له ما قلت لك من قبل انه شغلي مستقر ولله الحمد.... بس انت ما صدقتني..... عاد هو ولا كلمة :secret:

واخيرا:) ملاحظه هامه لكل من تمت مقابلته وينتظر الاتصال من الموارد في اي جهه خاصه او حكوميه في حاله تم الاتصال بك وابلاغك بأنه تم قبولك وسيتم ارسال العقد لك او يريدونك الحضور لتوقيع العقد في هذه المرحله تحديدا بأمكانك المطالبه بالزياده فيه في الاساسي بنسبه الفين ريال وعاده هذا التوقيت هو الفرصه الوحيده للتفاوض لانهم مايصرفون هالفلوس من جيوبهم هذي اموال دوله .

اتمنى افدت صاحب/ صاحبه الموضوع

تحياتي

بارك الله فيك على الرد الوافي ما قصرت

khaldoon

24-03-2013, 12:53 AM

الحين يطلبون شهادة راتب من جهة العمل القديم
مايحتاج الواحد يقول شي عن الراتب كل شي واضح عندهم

والله يا الغالي مب كلهم.... خاصة القطاع الخاص....... اشكرك على مرورك الجميل

khaldoon

24-03-2013, 12:54 AM

عن نفسي بقول الصحيح طبعا
والرازق ربنا
الواحد يدور البركه يا خلدون والله شايف ومطلع

والنعم بالله

بارك الله فيك ما قصرت......بس والله في ناس ما تستحق انه نكون صادقين معها مثل ما قلت لكم فوق..... يضيعون وقتنا و يحبطونا و يقهرونا

Al-Kuwari

24-03-2013, 01:34 AM

طيب اخوي لما نجي عند التفاهم على الراتب وفرضا هم بعد تموا يراوغون
لان يقولك انت كم حاط فبالك راتب عندنا!

فرضا انا ادري انهم يعطون على كفائتي 50 الف
هل ممكن اشطح واقول ابي 70 الف على اساس انهم بيتمون يقاصصوني فيه لين يوصل ل 50 والا في هذا الطلب مخاطرة؟
يعني انا ابتدي من العالي وهم يبتدون من تحت

فيها مخاطرة يا تغلبية

يعتمد على شخصية اللي يفاوضك

في واحد بيحاول يوصل معاك لحل وسط

وفي واحد بيشوف انج شايفة حالك ويفركش الموضوع

وفي واحد بيحس انه صعب ينزلك من سبعين الف لخمسين الف ويفركش الموضوع

هي لعبه حظ وفيها مخاطرة كبيرة وتعتمد على شخصية وطريقة تفكير اللي يفاوضج

الله يسهل وييسر دربك اخوي خلدون :nice:

khaldoon

25-03-2013, 01:17 PM

انا عن نفسي ما راح أجاوب على هذا السؤال لانه خصوصيات

راح أقول له لا تسالني عن راتبي انا ما تركت شغلي وقدمت عندكم إلا لاني ابي احسن دخلي فانت ايش راح تقدم لي من امتيازات :)

راح يقولك لابد من معرفة الراتب و هذه اجراءات مطلوبه ومن هالكلام و راح تعطينه فكرة انه راتبك ضعيف لو ما قلتي بهالحالة.... لا انصحك صراحة بهذا الرد

بو خليفه 123

25-03-2013, 01:21 PM

السلام عليكم و رحمة الله و بركاته

لما تكون في مقابلة شخصية و تتعرض للسؤال التقليدي فيها و هو انت كم تاخذ حاليا بالمكان اللي بتشتغل فيه؟...... ايش بيكون ردك؟

هل راح تقول راتب اعلى من الراتب اللي تتقاضاه فعلا؟.....في حالة قلت نعم او لا قد تكون كسبان او خسران

هل راح تقول راتبك الحقيقي؟.....في حالة قلت نعم او لا قد تكون كسبان او خسران

هل راح تعوم الاجابة او تتهرب من السؤال؟.....في حالة قلت نعم او لا قد تكون كسبان او خسران

ايش راح تعمل بالضبط....ارجو الرد بمنتهى الصراحة

عن نفسي تعرضت لكثير من المواقف و جربت الاجابات كلها و ان شاء الله بقولكم ايش صار معاي لاحقا من خلال الموضوع

الحين مافي مفر يا خلدون سواء قلت راتبك الحقيقي او ضربته بـ 10

لأنه بعد انتهاء المقابله يطلبون منك كشف حساب من بنكك بآخر 3 رواتب او شهادة راتب من العمل تفصيليه بالاساسي والعلاوات . لذلك انصح كل شخص في مقابله يكون بروفيشنال و صادق مع نفسه

في نهاية المقابله بيسألونك ماهي توقعاتك للراتب عندنا ؟ انت هنا بامكانك تطلب مليون ريال و من حقك .

انصح التفكير والتريث قبل الاجابه .. او الاجابه بطريقه دبلوماسيه الا وهي حسب الوظيفه التي سوف تخصصونها لي . لأن ممكن تطلب 20% زياده على راتبك الاساسي لكن الشاغر الي يفكرون يخصصونه لك يكون 35% اعلى .

لا تكشف اوراقك , و كن صادق

أنا للحين ماخلصت حسابي معك بخصوص تبييض الاسنان :anger1:

khaldoon

25-03-2013, 01:24 PM

دائما الصدق منجاه اخوي خلدون ،،

متفق تماما معاكي بس مثل ما قلت من قبل .... في ناس لا تستحق اننا نكون صادقين معهم لانهم بيضيعون وقتنا و بيحبطونا
بخصوص الراتب اما انك تقول الصدق او تراوغ وماتعطيهم راتبك

بقول لك ليش

لو كذبت عليهم بالراتب وعطيتهم راتب اعلى احتمال يطلبون البنك ستيتمنت او يطلبون لاحقا من المكان اللي تشتغل فيه لما يسوون reference chick وبيعرفون راتبك الصحيح وهني بتطلع كذاب ومابيقبلونك

ذكرتيني بقصة قالي اياها صديق نقلا عن صديق له.... سألوه عن راتبه فقالهم 23 الف و هو ياخذ 19 الف... طلبوا هالشهادة اللي ذكرتيها..... عصب و قالهم انتوا ما تعرفوني و تكذبوني من الحين.... انا مب كذاب.... و اذا هذه اولها عيل اشلون لما اشتغل عندكم..... انتوا لو شركة محترمة ما راح تطلبون هالشي و التعامل معاكم يخوف و مب مريح..... ثاني يوم ارسلوا له رسالة اعتذار و عرضوا عليه 26 الف و رفض لانه حصل عرض افضل.... هذا على ذمة الراوي

اما اذا راوغت ودايما افضل هالشي حتى لو اصروا لا تعطيهم الراتب لان احتمال

يكون المعروض عليك اكثر بوايد من اللي تاخذه الحين فراح ينزلون الاوفر علشان يتوافق
مع الـ 15% من الزيادة المفترضه على راتبك القديم

متفق تماما معاكي.... هم راح يصرون ....يعني يحاولون يخلوني اكشف اوراقي قبل انهم يكشفون اوراقهم........حتى لو سألتهم عن عرضهم راح يقولون لا احنا نبي نعرف كم تاخذ و كم تتوقع بيكون راتبك عندنا .... شكلهم يلعبون ورق وايد بعد الدوام

وذي اللي احنا نسويه بالعادة ،، فالاجابة دايما تكون انا مب راضيه عن اللي اخذه الحين وذي احد الاسباب اللي مخليتني ادور على الوظيفه فافضل عدم الذكر

او الراتب الحالي يعتبر سر من اسرار المكان اللي اشتغل فيه فاعذروني ماراح اقدر اعطيكم اياه وعطوني الاوفر خل اشوف اذا يتناسب مع اللي اخذه بقبله واذا لا راح اخبركم ونتناقش في حزتها ان شاء الله :tease:

اشكرك على الرد الجميل و نورتي الموضوع والله

ضوى

25-03-2013, 01:25 PM

والله اقول ولا في اذني ماي واقرا قل اعوذ برب الفلق

khaldoon

25-03-2013, 01:26 PM

للأسف بقول راتبي الفعلي .. وصارت لي لمن قدمت لوظيفة غير المجلس الأعلى للتعليم وسالوني عن الراتب ! وبما ان راتبي كبير قالي ما عندنا وظيفة بنفس راتبها المرتفع وما نقدر نوظفها براتب اقل .. مع اني كنت موافقه عادي ينزل راتبي بس ماقبلوا .. وحتى لو تكرر الموضوع بقول راتبي الفعلي .. لو وافقوا او رفضوا ! فهو خيرة من عند الله

خلنا نفترض راتبك 20 مثلا و قولي لهم اخذ 30 بس عندي استعداد اخذ اقل لاني ادور راحة البال و التعامل الزين .... افضل من راتب عالي مع وجع الراس

khaldoon

25-03-2013, 01:28 PM

اعتمد هالجواب خلدون كله حكم من انسانه خبيرة في هالمجال:nice:

لكن عندي ملاحظة بعض الاحيان شركات تعطي للمرشح للعمل ابلييكيشن لازم يعبيه من ضمنها ابليكيشن خاص بتفاصيل الراتب الحالي! شنو يسوي الواحد هني؟

خلاص طالما روز قالته و انت اكدتيه فراح اعتمده و انا مغمض..... بس لو ما لقيت شغل عاد لازم تساعدوني :telephone:

يكتب من كذا الى كذا ..... و الله كريم..... بس غالبا ما راح يلاقي رد:(

khaldoon

25-03-2013, 01:28 PM

لو قلت1000 راح يطلبون اخر شهادة راتب ولو قلت 100000 راح يطلبون اخر شهادة راتب يعني مافي مفر الافضل انك تقول الصدق

بارك الله فيك على النصيحة الطيبة

khaldoon

25-03-2013, 01:29 PM

شكرا اخوي على طرح هذا السؤال

اخوي اولا لازم اقول الراتب الى انا باخذه واقولهم طبعا اطمح الى راتب اعلى وثانيا لازم يطلبون شهادة راتب من شغلك القديم فيه الدرجة والراتب والعلاوات يعني مافي مفر من الموضوع

مب شرط يا اخوي خاصة لو كانت شركة خاصة

khaldoon

25-03-2013, 01:32 PM

خلدون من قراءتي في المواقع الاجنبيه والعربية بخصوص المقابلات الشخصية استنتجت ان سؤال الراتب المفروض ماتعطي رقم فيه ابداااااا

ان سألوك لا تجاوب قول انا ابي اعزز مجال خبرتي ولما نتفق على كل تفاصيل الشغل واخذ منكم القبول المبدئي وقتها نتكلم في الراتب

لا تتكلم في الراتب من اول مقابلة وان سالوك تهرب لين تحس انهم يبونك ومتمسكين فيك وعجبتهم ووافقوا مبدئيا عليك حاول تاخذ عرضهم بالاول

دايما يقولك من يعرض اول " يكشف اوراقه" هو الخاسر الاول

لا تخبرهم يكون افضل خاصة لو المقابلة شفهيه مب تعبئة ابليكشنات او اجباري

والله جربت .... اروح يمين اروح يسار .... لازم تقول راتبك و لازم تقول لنا كم تتوقع بتاخذ عندنا و بعدين احنا نقولك..... تعرفي افضل حل اقولهم مثلا ابي 40.... حتى لو انا ابي 30.... ساعتها بيقولون لا عالي وايد.... ساعتها بقولهم كم يعني تقدرون تدفعون..... بهالطريقة هم بيكشفون اوراقهم مب انا

khaldoon

25-03-2013, 01:33 PM

بخصوص شهادة الراتب لا مب كل مكان يطلبونها على حسب.

متفق تماما معاكي ... هذا اللي اقوله من زمان :victory:

khaldoon

25-03-2013, 01:34 PM

طبعا الواحد ويقول الراتب لأنهم يطلبون شهادة راتب لكن بالنسبة الراتب تقدر ترفض الأوفر وتقول ليش لو تبي زيادة في الراتب لو صح بيونك بي زيدون الراتب وفي ناس ترض الأوفر أكثر من مرة لين ما يعجبهم الراتب بالذات لو الواحد مرتاح في شغله

صحيح.... حسب حالة الشخص و حاجته للوظيفه .... تفرق من شخص لاخر

khaldoon

25-03-2013, 01:38 PM

اولا تيقن ان الرازق والمعطي الله عزوجل

والنعم بالله
اذا سال عن الراتب قول له "مثلا" راتبي 20 آلاف ..

ولكن اذا كان عندكم الاوفر اقل من "مثلا" 35 الف .. لاتضيعون وقتي و وقتكم

ساعتها بيقولون لي لا تنسى تسكر الباب وراك .... ليش نعطيك 35 و شغلك يعطيك 20....... مسوي فيها مفتح في حارة عميان

( طبعا من المفترض تعرف كم تعطي هالشركه رواتب.. على الاقل متوسط رواتبها مب تطلب شي خيالي)

اعرف و اتكلم على هالاساس و يصيرون مثل اللي قطع يده و يشحت عليها.... ما نقدر و الشغل ما عاد مثل اول وما في مشاريع و في ركود بالبلد وما احد يعطي هالراتب اللي تطلبه ومن هالكلام..... فجأة تكتشف انهم جماعة مساكين و الفكرة المأخوذه عنهم غلط تماما من حيث الرواتب العالية..... كل كلامهم كذب*كذب

ونت طالع ارفس الباب برجلك هههههههههههه

هههههههههههههههههههه اخاف هم يشوتوني قبل

khaldoon

25-03-2013, 01:40 PM

اكيد بقول الحقيقه وبشوف ان عجبني عرضهم بوافق مب شرط يكون الراتب اكثر المهم باقي المميزات احسن كمسمى وظيفي او كتحسين العمل

انا عندي استعداد اشتغل بمسمى اقل و راتب افضل..... ايش فايدة اسم وظيفي كبير و انا مب مرتاح ماديا ومب لاقي اكل و راتب ما يكفيني لاخر الشهر..... زمن الالقاب ولى زمان.... الناس لها بالمظاهر و ايش عندك و ايش سيارتك و ايش تلبسين و اشلون تقدرين تصرفين ....حتى لو كانت كلها ديون

khaldoon

25-03-2013, 01:41 PM

اذا سيستم ابليكشن يكتب مابين كذا وكذا

واذا ابليكشن ورق يكتب يفضل النقاش لاحقا

:nice::nice:

بارك الله فيكي على هذا التعقيب الجميل :victory:

khaldoon

25-03-2013, 01:42 PM

الإخت روز.. طلاتج هالأيام جميلة لأنه مايصاحبها (إغلاق) للمواضيع (:

ههههههههههههههههه ايش عرفك و انت عضو جديد :secret:

khaldoon

25-03-2013, 01:44 PM

الجواب: " الله العالم "

والنعم بالله بس راح يقولي: اي دا احنا هنهرج :anger1:

khaldoon

25-03-2013, 01:46 PM

انت مهب مجبور تجاوب يا خلدون

للأسف البعض يصر على معرفة الراتب ويحن ويزن

لكن انت ممكن تتهرب من الاجابة بشكل اخر وهي انك تغير الموضوع وتقول انا جيت عندكم وحاط فبالي راتب x , طبعاً الأغلب يفضل انه مايذكر رقم معين خوفاً من ان الراتب اللي راح يعرضونه عليه اكثر من الراتب اللي راح يطلبه

لكن هذي الامور يكون فيها جزء من المغامرة والحظ

وبالاخير ماقدر اقول الا عسى ربي يوفقك ويرزقك الراتب اللي فبالك وفوقه 10,000 زيادة ياخوي :nice:

وياك يا الغالي..... بارك الله فيك على هذه الدعوة الطيبة مثلك

متفق تماما معاك:victory:

khaldoon

25-03-2013, 01:47 PM

احسن شي قول الحق والرزق على الله

والنعم بالله....بارك الله فيك يا اخوي :victory:

khaldoon

25-03-2013, 01:50 PM

أخوي خلدون من واقع خبرتي خليك نفس اللبنانيين يعني اذا راتبك 10000 اطلب 80 الف وبي ام وفيلا حتى لوماتفهم في المجال الي انت مقدم له
اشتغل 6 شهور وبتتفنش تروح شركه اخرى وتقولهم انا كنت مدير اخذ 80 الف واطلب ميه
الف تشتغل 6 شهور وتتفنش وهكذا

عليهم مخ 12 سلندر

نصيحة رائعة...... بس ادور الاستمرارية بالعمل علشان ما يخافون مني اماكن العمل الاخرى و يعتقدون اني ما اقدر استمر في مكان واحد او اني اتفنش وايد...مب اضرب و اشرد.... مثل ما يسوون ناس كثير ....و ممكن يرتشون بعد في شغلهم الجديد....و يغيرون الشغل و البلد .... لا اقصد جنسية معينة بل اللي يسوون هالشي.... شفته من كذا تجربة لعدة اشخاص و جنسيات مختلفة

khaldoon

25-03-2013, 01:51 PM

والله الى عنده خبره يشترط الى يبيه لا لبناني ولا شي

صحيح بس لا يبالغ.... اذا اردت ان تطاع فأمر بما هو مستطاع

khaldoon

25-03-2013, 01:57 PM

كل الاماكن الي قدمت عليها او جاتني عروض منهم كوني اعمل بوظيفه موجوده في كل قطاعات العمل لما كانوا يسالوني كم راتبج الحالي ؟؟
عمري ما قلت لهم كم .. كنت اقول ما بين " 30 الف الى 40 الف " وما لقيت اصرار على معرفه الرقم الفعلي ابدا
ولا كانوا يطلبون مني شهاده الراتب في حاله الموافقه على وظيفتي

كلام جميل..... بس صراحة ما اقتنع بالرانج الكبير..... يعني 5000 فرق ممكن بس 10000 صعبة شوي
لكن انا كنت اساوم .. والسبب ؟؟
اني قديمه في المجال الي اعمل فيه .. ان كنت ابحث عن شي افضل من ناحيه التطوير
وابحث عن الجديد .. وابحث عن مساحه ابداع واقدر اتحرك فيه ..
وان المكان الي انا فيه حاليا مرتاحه من كل النواحي
فلما يرفضون المساومه اقول لهم فمان الرحمن

بس لما تكونين محتاجة لا قدر الله ما راح تقدرين ترفضين و تتكبرين عليهم

عندي قناعه كل جهه عمل تأخذ موظف قديم في مجال معين ما راح تستخسر فيه الراتب الي يرضي الموظف .. بقدر ما تريد ان تأخذ من ابداعاته ..فإذا ما قدروك من الناحيه الابداعيه وانت تملكها .. فلو عطوك الي يرضيك قول لهم لا

هم يحاولون يطمعون بتققليل الراتب قدر الامكان..... بس كلامك جميل و مقنع الله يوفقك يارب .. ويجملك برضاه

جميعا ان شاء الله

بارك الله فيكي و اهلا و سهلا بعودتك مرة اخرى .... نور المنتدى بوجودك و ارائك القيمة يا تحداني الزمن

ام السعف

25-03-2013, 02:33 PM

تدري يا ستو خلدون اني ولا مرة سويت مقابلة للتوظيف

ففكرت في سؤالك وقلبته ولقيت اني بعفس الدنيا،،

بس خلني اسجل اعجابي بمشاركة روح الأطلس اعجبتني كثيرا وايد ،،

روح الاطلس

26-03-2013, 08:40 AM

تدري يا ستو خلدون اني ولا مرة سويت مقابلة للتوظيف

ففكرت في سؤالك وقلبته ولقيت اني بعفس الدنيا،،

بس خلني اسجل اعجابي بمشاركة روح الأطلس اعجبتني كثيرا وايد ،،

حاضرين

بعد شبدي والله:shy:

روح الاطلس

26-03-2013, 08:43 AM

والله جربت .... اروح يمين اروح يسار .... لازم تقول راتبك و لازم تقول لنا كم تتوقع بتاخذ عندنا و بعدين احنا نقولك..... تعرفي افضل حل اقولهم مثلا ابي 40.... حتى لو انا ابي 30.... ساعتها بيقولون لا عالي وايد.... ساعتها بقولهم كم يعني تقدرون تدفعون..... بهالطريقة هم بيكشفون اوراقهم مب انا

تمام عليك

حاول تخليهم هم اول من يكشف اوراقه

اذا كانوا مصرين لا تعطي رقم واحد انتبه لا تقول مثلا ابي 40

حتى ان عرضوا عليك مبلغ اعلى من اللي تتوقعه لا تبين لهم بملامح وجهك انك مبسوط خلك حيادي

افضل طريقة دائما تعطيهم رينج قول مثلا بين هالرقم وهالرقم

لا تحدد رقم بعينه

هذا بس في حال انحشرت بزاوية واصروا انك تقول

اقرا في المواقع عن How to negotiate job offer بتتعرف وايد على اساليب التفاوض

CH Engineer

26-03-2013, 05:51 PM

ماله داعي تقول كم راتبك
اذا راتبك 20 الف قولهم انا اتوقع راتبي عندكم يكون فوق ال25 الف
او بحدود ال25 الف

khaldoon

26-03-2013, 10:47 PM

اخوي اسمح لي بالمداخلة
آفضل اللام كلام الرسول صلى الله عليه وسلم،،

((‏تحروا الصدق، وإن رأيتم أن فيه الهلكة، فإن فيه النجاة.))

[ هناد عن مجمع بن يحيى مرسلا تصحيح السيوطي حسن‏ ]

(( ‏إن أطيب الكسب كسب التجار الذين إذا حدثوا لم يكذبوا، وإذا ائتمنوا لم يخونوا، وإذا وعدوا لم يخلفوا، وإذا اشتروا لم يذموا، وإذا باعوا لم يطروا وإذا كان عليهم لم يمطلوا، وإذا كان لهم لم يعسروا.))

[ رواه البيهقي في شعب الإيمان عن معاذ تصحيح السيوطي ضعيف ]

والواحد يتحرى البركة
((‏إذا كذب العبد تباعد عنه الملك ميلا من نتن ما جاء به‏.))

[ رواه الترمذي عن ابن عمر رَضِيَ اللَّهُ عَنهُ‏ ]

الله يوفقنا اجمعين ...

جزاك الله كل خير على هذه المشاركة الطيبة

khaldoon

26-03-2013, 10:52 PM

عاااادي

بقوووووول

والله يووفق

بارك الله فيك...الله يوفق الجميع

khaldoon

26-03-2013, 10:55 PM

متابعة .. :victory:

ليش متابعة.... رأيك مهم....لازم تتركي بصمة مميزة كالعادة في الموضوع

khaldoon

26-03-2013, 11:13 PM

طيب اخوي لما نجي عند التفاهم على الراتب وفرضا هم بعد تموا يراوغون
لان يقولك انت كم حاط فبالك راتب عندنا!

فرضا انا ادري انهم يعطون على كفائتي 50 الف
هل ممكن اشطح واقول ابي 70 الف على اساس انهم بيتمون يقاصصوني فيه لين يوصل ل 50 والا في هذا الطلب مخاطرة؟
يعني انا ابتدي من العالي وهم يبتدون من تحت

اختي ما يصير تشطحي ب 20 الف زيادة لانك راح تظهري بمظهر غير الجدية

ايضا اللي قدامك ما راح يقدر يفاوضك و انت تعطي هالفرق الكبير

مثل لما تبي تشتري ملابس و حاطة ببالك انه القطعة اللي تبي تشتريها ب 1000 ريال..... لو قالك البياع 5000 ....ما اعتقد راح تهتمي انك تفاوضينه لانه ما في امل توصلوا لاتفاق و لو قبل راح تحسي انه ينصب عليكي

khaldoon

26-03-2013, 11:14 PM

فيها مخاطرة يا تغلبية

يعتمد على شخصية اللي يفاوضك

في واحد بيحاول يوصل معاك لحل وسط

وفي واحد بيشوف انج شايفة حالك ويفركش الموضوع

وفي واحد بيحس انه صعب ينزلك من سبعين الف لخمسين الف ويفركش الموضوع

هي لعبه حظ وفيها مخاطرة كبيرة وتعتمد على شخصية وطريقة تفكير اللي يفاوضج

الله يسهل وييسر دربك اخوي خلدون :nice:

وياك يا الغالي...... رد وافي و لا اروع

khaldoon

26-03-2013, 11:17 PM

الحين مافي مفر يا خلدون سواء قلت راتبك الحقيقي او ضربته بـ 10

لأنه بعد انتهاء المقابله يطلبون منك كشف حساب من بنكك بآخر 3 رواتب او شهادة راتب من العمل تفصيليه بالاساسي والعلاوات . لذلك انصح كل شخص في مقابله يكون بروفيشنال و صادق مع نفسه

في نهاية المقابله بيسألونك ماهي توقعاتك للراتب عندنا ؟ انت هنا بامكانك تطلب مليون ريال و من حقك .

انصح التفكير والتريث قبل الاجابه .. او الاجابه بطريقه دبلوماسيه الا وهي حسب الوظيفه التي سوف تخصصونها لي . لأن ممكن تطلب 20% زياده على راتبك الاساسي لكن الشاغر الي يفكرون يخصصونه لك يكون 35% اعلى .

لا تكشف اوراقك , و كن صادق

أنا للحين ماخلصت حسابي معك بخصوص تبييض الاسنان :anger1:

كلام جميل جدا من اخ اجمل و اروع ......خلاص ما في امل للكذب....الله يعين

للحين ما استخدمت ولا طريقة من طرق تبييض الاسنان اللي قلت لكم عنها.... ترى بزعل منك لو قلت لا

khaldoon

26-03-2013, 11:18 PM

والله اقول ولا في اذني ماي واقرا قل اعوذ برب الفلق

ما شاء الله....باين راتبك عالي...الله يوفقك و يبارك لك فيه .... قل اعوذ برب الفلق..... :omen2:

al_maystro

27-03-2013, 12:33 AM

يعني صراحه سؤال سخيف من قبل الشركات او الجهات الاخرى اللي تسال هالسؤال
عندك السيره الذاتيه ناقشه فيها
يعني لو سال سؤال ثاني مثل ليش تبي تترك شغلك وتلتحق معنا هني سؤال معقول
اما مثل هالسؤال السخيف ينم عن جهل وتقليد اعمى

روح الاطلس

28-03-2013, 08:50 AM

يعني صراحه سؤال سخيف من قبل الشركات او الجهات الاخرى اللي تسال هالسؤال
عندك السيره الذاتيه ناقشه فيها
يعني لو سال سؤال ثاني مثل ليش تبي تترك شغلك وتلتحق معنا هني سؤال معقول
اما مثل هالسؤال السخيف ينم عن جهل وتقليد اعمى

لا ليس سؤال سخيف
هذا علم في فن التفاوض بل امتع جزئية عند مدراء التوظيف المناقشة في التعويضات
حتى لو الموظف كان راضي بالراتب ومبسوط لازم يفاوض يمين يسار بس بحذر لانها لعبه خطيرة ممكن تطلعك برا الملعب ان مالعبتها صح

السكين

28-03-2013, 09:33 AM

كمقابلة شخصية رح أقول الحقيقة من منطلق عدم الكذب .

ولكن ان قلت له اتقاضى راتب ضئيل وسكتت اكيد رح يقول هذا مسكين ومحتاج ويتفاوض براتبي على قد ما يقدر يكون قليل .

المفروض الشخص يقول راتبه الحقيقي ويقول انا أبحث عن الأفضل ولهالسبب جيت هنا .

ده اقتراحي في القضية لا مؤاخزة :nice:

khaldoon

30-03-2013, 09:51 PM

تدري يا ستو خلدون اني ولا مرة سويت مقابلة للتوظيف

ففكرت في سؤالك وقلبته ولقيت اني بعفس الدنيا،،

بس خلني اسجل اعجابي بمشاركة روح الأطلس اعجبتني كثيرا وايد ،،

ههههههههههههههه يعني ايش مثلا راح تجاوبين بهالحالة

بالنسبة لرد روح الاطلس..... هي دائما مميزة بردودها القوية القيمة اللي تثري المواضيع من غير قصور بالباقيين و انا منهم :tease:

khaldoon

30-03-2013, 09:51 PM

حاضرين

بعد شبدي والله:shy:

:victory:

khaldoon

30-03-2013, 09:53 PM

تمام عليك

حاول تخليهم هم اول من يكشف اوراقه

اذا كانوا مصرين لا تعطي رقم واحد انتبه لا تقول مثلا ابي 40

حتى ان عرضوا عليك مبلغ اعلى من اللي تتوقعه لا تبين لهم بملامح وجهك انك مبسوط خلك حيادي

افضل طريقة دائما تعطيهم رينج قول مثلا بين هالرقم وهالرقم

سويتها اخر مرة و قالولي بنتصل عليك و ما شفت شي :(
لا تحدد رقم بعينه

هذا بس في حال انحشرت بزاوية واصروا انك تقول

اقرا في المواقع عن How to negotiate job offer بتتعرف وايد على اساليب التفاوض

بارك الله فيكي على النصيحة..... ان شاء الله بمر الموقع و بستفيد منه لانه من توصيتك :victory:

khaldoon

30-03-2013, 09:55 PM

ماله داعي تقول كم راتبك
اذا راتبك 20 الف قولهم انا اتوقع راتبي عندكم يكون فوق ال25 الف
او بحدود ال25 الف

فكرة حلوة..... جزاك الله كل خير ما قصرت

khaldoon

30-03-2013, 09:57 PM

يعني صراحه سؤال سخيف من قبل الشركات او الجهات الاخرى اللي تسال هالسؤال
عندك السيره الذاتيه ناقشه فيها
يعني لو سال سؤال ثاني مثل ليش تبي تترك شغلك وتلتحق معنا هني سؤال معقول
اما مثل هالسؤال السخيف ينم عن جهل وتقليد اعمى

هو الصراحة اهم سؤال بعد ما يتأكدون انه الشخص اللي يقابلونه عجبهم و يبونه....هو مربط الفرس بالنهاية و حتى لو اعجبهم الشخص ممكن يتخلون عنه لو انه طلب راتب عالي او ما اعجبهم رده على هذا السؤال

khaldoon

30-03-2013, 09:58 PM

لا ليس سؤال سخيف
هذا علم في فن التفاوض بل امتع جزئية عند مدراء التوظيف المناقشة في التعويضات
حتى لو الموظف كان راضي بالراتب ومبسوط لازم يفاوض يمين يسار بس بحذر لانها لعبه خطيرة ممكن تطلعك برا الملعب ان مالعبتها صح

:(:(:(:(:(:weeping::weeping::weeping:

khaldoon

30-03-2013, 09:59 PM

كمقابلة شخصية رح أقول الحقيقة من منطلق عدم الكذب .

ولكن ان قلت له اتقاضى راتب ضئيل وسكتت اكيد رح يقول هذا مسكين ومحتاج ويتفاوض براتبي على قد ما يقدر يكون قليل .

المفروض الشخص يقول راتبه الحقيقي ويقول انا أبحث عن الأفضل ولهالسبب جيت هنا .

ده اقتراحي في القضية لا مؤاخزة :nice:

ههههههههههههه بارك الله فيك يا السكين على الرد الجميل...وينك مختفي صارلك فترة