~~ تجاربكم ... المعرض المهني ~~ [الأرشيف] - منتديات شبكة الأسهم القطرية

مشاهدة النسخة كاملة : ~~ تجاربكم ... المعرض المهني ~~

رهج السنابك

01-04-2013, 01:22 PM

بفتح هالموضوع للسرد اليومي لتجارب الاعضاء

مانبي انتقادات وايد مواضيع فيها انتقادات

المعرض لازم تنظرون له بايجابيه محد خسران شي لو الكل استفاد وقدم وجرب حظه

اتمنى مشاركة الجميع الي راح وحضر يكتب لنا وين قدم شنو انطباعاته
اي جهة حس انها جاده ومهتمه
شنو الجهات الي محد عطاكم ويه فيها :) ادري وايد

شنو الجديد الي شفتوه عن قبل

طريقتكم في التقديم؟؟؟ هل تدورون حد تسألونه ونوع الاسئله؟ ام بس تروحون وترفعون السي في وتاخذ كيس الهدية وتتوكل؟

ارحب بكل تجربه ايجابيه

أسد الجزيرة

01-04-2013, 01:56 PM

يا ريت الاخوان يقترحون الاماكن الزينة حق الفلاشات و اذا في قلاصات حلوة بعد ما يخالف

شيوخه

01-04-2013, 02:02 PM

يا ريت الاخوان يقترحون الاماكن الزينة حق الفلاشات و اذا في قلاصات حلوة بعد ما يخالف

هههههههههههههه :victory:

Right

01-04-2013, 02:35 PM

مانبي انتقادات وايد مواضيع فيها انتقادات

في كل شي يوجد فيه إنتقاد وهو " الإنتقاد البناء "

فــ الإنتقاد البناء:

هو توجيه رسالة من شخص فحواها أنه قد أخذ عليه مآخذ ويريد أن يبينها

وهو يعلم أنها أخطاء في واقع الأمر، دافعها الحب والإحساس الشديد بالولاء

إلا إذا إنتي تبينا " نطبل و نمدح " !!!

الزلزال

01-04-2013, 02:41 PM

انا خاطري اعرف شي واحد بس

كم قطري توظف عن طريق المعرض المهني من العام الماضي ؟؟

ياليت الي توظف عن طريقهم يشاركنا اهنية

اذا على الاحصائيات وطلبات احنا عارفينها

نبي تجارب حيه و واقعيه

nono80

01-04-2013, 03:17 PM

انا كل سنه اقدم ومحد يتصل يوعدوني خير وماشوف شي الله كريم

al_jo0ory

01-04-2013, 08:22 PM

حاولوا انكم تكونون متفائلين وانتوا رايحين ولا تسمعون كلام الناس وعن تجاربهم السيئه

ان شاء الله بحاول أروح له هاليومين ... بس عن تجربه الجهات اللي حسيتهم كانوا جادين وردوا علي وكانوا تقريبا كلهم في نفس الفتره هم راس غاز ودولفن وقطر للألمنيوم وكهرماء وقطر للبتروكيماويات اما الباقي للامانه انا ماقدمت عندهم فما ابي اظلمهم اذا كانوا جادين او لا

ونصيحه مره ثانيه اكتبوا السي في عدل وروحوا قدموا على الجهات اللي تناسب تخصصاتكم وانسوا كل الكلام السلبي اللي تسمعونه

Dark_QTR

01-04-2013, 08:34 PM

اتمنى الي يروح بهدف القلاصات والفلاشات ما يروح.. لأن غيره يترزق الله وهو مسوي زحمة!!

رهج السنابك

01-04-2013, 08:58 PM

لين الحين مافي رد بنفس الموضوع الا الاخت مشكوره

مانقول لا تنتقدون بس انا مخصصه هالموضوع حق التجارب

النقد السلبي شبعنا منه ووايد مواضيع تكلمت بسلبيه عن المعرض

خلوا ع الاقل موضوع واحد فيه طرح ايجابي ومحفز

انا عن نفسي بروح باجر او عقبه وبنقل لكم تجربتي وكلي امل انها بتكون ايجابيه وبلقى وظايف اطمح لها

اتسموا بالايجابيه

عيون الدوحة

01-04-2013, 10:03 PM

الحمدالله أنا مقتنعة بوظيفتي الحالية ولا مرة زرت المعرض المهني

وأتمنى من كل الجهات المصداقية وإعطاء الناس فرصة في الوظائف المميزة مش بس الوظائف صغيرة والعادية

لمعة الالماس

01-04-2013, 10:16 PM

الحمد لله انا توظفت عن طريق المعرض المهني للسنة اللي طافت

وفي نفس وقت التوظيف كلموني اكثر من جهة والحمد لله رب العالمين

اهم شي السي في يكون واضح ومفصل ويفضل يكون عربي وانجليزي

وتوكلوا على الله

قطر70

01-04-2013, 10:27 PM

انطباعي انا كمشارك في المعرض المهني

اليوم الزحمه بدت من طلع ولي العهد يعني على الساعه 11 الى الساعه 6 تقريباّ

ومن بعدها خفوا الناس

وهالسنه المعرض بيكون مفتوح في الويكند حتى الجمعه من 3 العصر الى 9 المسا والسبت من 9 الصبح الى

9 المسا واتوقع ان اكثر زحمه راح تصير في الويكند

بو - جاسم

01-04-2013, 11:20 PM

رهج السنابك

01-04-2013, 11:44 PM

شنوً متطلبات البعثه بوجاسم؟

رهج السنابك

01-04-2013, 11:46 PM

حلوو لمعه الالماس بالتوفيق

هذي اول وحده مستفيده :) شفتوا خلكم ايجابيين

لمعه الالماس تقصدين السي في نفسه يكون مكتوب عربي وانجليزي ؟

رهج السنابك

01-04-2013, 11:46 PM

قطر سبعين

شكرا ع نقل التجربه

تغلبية

01-04-2013, 11:59 PM

والله قمة في التعاون في اجنحة الشركات في المعرض المهني

والاخوان اللي هناك بعد ما قصروا يجاوبون على استفسارات الناس بكل رحابة صدر

وهذا بشكل عام

اما ما يخصني انا

انا عقب ما خذت لي لفه في المعرض مريت على قطر للبترول وسالتهم عن متطلباتهم للبعثات الدراسية

قالولي المتطلبات وانا ولله الحمد عندي جميع المتطلبات

عطيتهم اوراقي شافوها وطلبوا اوراقي وعطيتهم يشوفونها

والحمدلله وقعت عقد معاهم

والله يوفق كل من يبحث عن عمل او بعثة

^^^^

ماشاءالله مبرووووك

تباشير خير ..

:

بالنسبة لي .. رحت اليوم علشان احضر ورش العمل المصاحبة

والله يجزاها خير د. سارة المري - مدير مركز القنوف للاستشارات والتدريب تقدمت بمبادرة لاستضافة اساتذة وخبراء التدريب لدعم الكوادر الشابة القطرية الجديدة واعطائهم لمحات في العمل الوظيفي والتنظيم والتخطيط الشخصي ... وذلك بالمجــــان دون مثابل يذكر لا من إدارة المعرض ولا من المشاركين في الورش.

اليوم الاول كان عن التميز الوظيفي للأستاذ/ محمد يوسف من مركز قناة دبي الاعلامي
كانت ورشة رائعة .. مؤثرة برغم قصر الوقت، الجميل ان كان هناك مقاعد لذوي الاحتياجات الصم والبكم شباب وبنات.. ولهم مترجم اشارة.

بالنسبة للمعرض .. كتنظيم وديكورات جميل جداً
قلت بشكل ملحوظ أكياس الهدايا عن كل سنة
الى الان ماقدمت ..

ملاحظة عامة ..
الحضور ما كان بذيك الكثافة فتحولت الاجنحة والقائمين عليها الى جلسات سوالف
وفي احد الاجنحة لاحد الشركات الكبيرة جاوا شباب صغار يبون يشوفون العروض المتوفرة
العارض ما اهتم لهم ولا رحب فيهم كان يبي يكمل السالفة مع خويه!
لين ماجاو هم لي عنده داخل البوث وسلموا عليه !

أعتقد المعرض مستوي للشباب الصغار علشان يلقون فرص تعليم وتدريب
والمفروض يكون لهم ترحيب خاص ومعاملة خاصة كنوع من التشجيع.

بنعتبرها هفوة .... أرجو ما تتكرر ،،

لمعة الالماس

02-04-2013, 08:41 AM

حلوو لمعه الالماس بالتوفيق

هذي اول وحده مستفيده :) شفتوا خلكم ايجابيين

لمعه الالماس تقصدين السي في نفسه يكون مكتوب عربي وانجليزي ؟

اي صفحة عربي والصفحة الثانية انجليزي

لان في اغلب الجهات يكون في خبير موارد بشرية فعشان يقرا المؤهلات الافضل يكون السي في عربي وانجليزي

بنت المطر

02-04-2013, 12:55 PM

تجربة فاشله

معرض مهني خرررررطي

مافيه جدية فالطلبات عالاقل مفروض يهتمون لما يعرفون ان الشخص عاطل او خريج
بالمساعدة

مب خذ سيفي وبس حتى الواحد يسالهم متى بتردون يقولون بعد الفرز ثلاث شهور يفرزون اشدددددعوى الناس تفرز أسبوعين ولا ثلاث اسابيع

وما عجبني المعرض والتجربة فاشلة فاشلة فاشلة

ومافيه اعلان عن الوظايف المتاحة

*

بنت المطر

02-04-2013, 12:58 PM

مافيه مقابلات مافيه أسئلة يعني
تقدم وتحس ان محط بيرد عليكم لان السيفي معلومات بس

مفروض يقعدون مع الاشخاص يسالون خصوصا اذا الخريج جامعي ومب محصل وظيفة

بو - جاسم

02-04-2013, 04:34 PM

شنوً متطلبات البعثه بوجاسم؟

بالنسبة للبعثات الجامعية يطلبون نسبة 80٪ للمدارس المستقلة و 75% للمدارس الخاصة

ويطلبون 5.5 في الايلتس او 71 في التوفل

ولازم يكون عندك قبول من جامعة معتمدة في المجلس الاعلى في احد التخصصات اللي هم طالبينها

واذا ما عندك هم يبعثونك جامعه في التخصص اللي هم يختارونه هذا اذا مستوفي جميع متطلباتهم طبعا

اما بالنسبة للدورات التدريبية وبرامج الدبلوم

يطلبون 60% في الثانوية

اجتياز امتحان القبول

واجتياز المقابلة الشخصية

وردة

03-04-2013, 07:16 AM

بسم الله الرحمن الرحيم

http://www.betek.info/upload/tagi7gabi/fawasl/salam2.gif

الحمد لله قدمت على اكثر من شركة وكان التعامل ممتاز ما عادة شركة وحدة ما عجبني اسلوبهم بالمره شركة ( الريل ) مالت القطارات

حاطين موظفة ما قريت اسمها وله كان كتبته :telephone: بصراحة تفتقر مهارة التواصل مع الجمهور يعني اسائلها اختي عندكم ابتعاث خارجي قالت لي اي وعطتني كتاب
قلت طيب شنو التخصصات قالت في الكتاب قلت طيب شنو الشروط ردت بنفس الجواب في الكتاب طيب والتسجيل في الكتاب ... طيب دام كل شي في الكتاب ليش ما تخلين كتابج ع الطاولة وتروحين تتمشين شوي فالمعرض , كلش الاسلوب كان دون المستوى :anger1:
نرجع لمحور حديثنا الاساسي .

الالية التسجيل بسيطة وواضحة , وفي شركات يعطون رد مباشر مثل قطر للبترول . لله الحمد وقعت على اوفر للابتعاث في نفس اليوم لاني حققت الشروط كاملة

http://www.betek.info/upload/tagi7gabi/fawasl/fasel8

الطلاب الي يقدمون لازم يكون عندهم 3 اشياء رئيسية :victory:

1- شهادة ثانوية بنسبة مادون ال 80
2- قبول من الجامعة
3- شهادة ايلس او توفل 5 ونص

بالاضافة الى السي في او السيرة الذاتية :nice:

http://www.betek.info/upload/tagi7gabi/fawasl/fasel8

نقاط لازم انراعيها :. :discuss:

* الاوراق لازم اتكون عندنا منها سوفت كوبي وهاردكوبي بمعنى نسخة في الفلاش ونسخة مطبوعة

* تحديد التخصص قبل التقديم لاحظت مجموعة من الطلاب يوم يقدمون يسالونهم شنو تبون تدرسون يردون ما ندري اي شي !! :omg:

http://www.betek.info/upload/tagi7gabi/fawasl/fasel8

# شركات انصح فيها :telephone:

1- قطر للبترول \
2- قطر فاونديشن \
3- الملاحة \
4- سدرة \
5- المجلس الاعلى للصحة \
6- وزارة الداخلية \

والي عنده استفسار انا في الخدمة :telephone:

http://www.betek.info/upload/tagi7gabi/fawasl/khtam2.gif

رهج السنابك

03-04-2013, 01:22 PM

ورده انتي ورده ربي يوفقج بالبعثه وتردين بأقوى شهاده

نوفة قطر

03-04-2013, 09:08 PM

المعرض فيه فرص وايد حلوه للي رايحين وهم جادين يبون يدورون على فرصه

اما اللي يروحون عشان يضحكون والا يتفرجون والا حتى يجمعون هدايا .. اكيد مابيعجبهم !

انا موظفه والحمدلله مرتاحه في وظيفتي .. بكره بكون موجوده في الجناح الخاص بجهتنا عشان اشوف الوضع وغيره

وحده تقرب لي كانت موجوده بعد عشان الجهه اللي تشتغل فيها وقالت انهم وظفوا واايد خلال يوم واحد !

ترى في وايد شركات تبي ترفع نسبة التقطير روحوا و ودوا معاكم سي في عدل

بخصوص ان هالوحده قالت لي ان في اوراق تجيهم مع دريوليه :nice: المعزبه مطرشته يوزع السي في مالها على كل الجهات !

في ذمتكم هاي اسلوب !!! وبعدين بتجي هالوحده والا الكذا وحده وبينزلون مواضيع يقولون ماتوظفنا !!!

ترى في مقابلات تصير في نفس اللحظه يعني الحضور مهم يا شيوخ

:)

STAR

03-04-2013, 09:22 PM

عندي وجهة نظر بخصوص التقديم....
جميع الشركات والوزارات ماصارت تقبل السير الذاتية المطبوعة..
وصاروا يطالبونا بالتقديم اون لاين. اوك مب مشكلة احنا بعصر التكنولوجيا ماراح اقول شي..بس بصراحة شي متعب عند كل شركة اروح لها لازم اعبي استمارة التقديم ع وظيفة يدويا...جد بصراحة شي متعب وياخذ وقت...

اتمنى انهم يكتفون برفع سيفياتنا عن طريق الفلاش ميموري او الرجوع لطريقة القديمة الي هي نقدم السي في ورقيا....

فارس محمد

03-04-2013, 09:34 PM

مشاركة ر ائعة ويعطيك الف عافية

بوخالد911

03-04-2013, 10:09 PM

الله يوفق الكل

ما رحت

al_jo0ory

03-04-2013, 11:04 PM

اليوم رحت الظهر والصراحه هالمره وااايد عجبني المعرض وحسيتهم جادين أكثر من كل مره ... روحوا وقدموا واستغلوا الفرص يا جماعه

نورهان88

03-04-2013, 11:25 PM

يا ريت الاخوان يقترحون الاماكن الزينة حق الفلاشات و اذا في قلاصات حلوة بعد ما يخالف

ههههههههههههههه

Um Met3b

03-04-2013, 11:32 PM

ما رحت هذه السنة....ولكن من ملاحظاتي السنوات السابقة:

يفضل اخذ سوفت كوبي من السي في..في فلاش

معظم الشركات تطلب...التقديم اونلاين...( فعلا التقديم يدويا متعب...يفضل اخذ ايميل الوظائف والتقديم عليه)

المضحك بعض الجهات...يقولون لك قدم اونلاين على موقعنا...( وموقعهم مافيه رابط للتقديم ولا ايميل للوظائف) <<< هم جهتين ( حصنين مدرعين) ولا ياخذون السي فيهات.... جايين بس يتقهون :)

فرص الابتعاث اكثر من فرص التوظيف....لتشجيع الطلاب

اعتقد فرص ايجاد وظيفة لشخص غير متوظف ....اسهل ...من ايجاد وظيفة لشخص

اساسا عنده وظيفة ويطمح لوظيفة افضل..!!؟

قدموا على الشركات الجديدة.....مثل (شركة منتجات) والمطار الجديد...

المضحك تقدم اليوم......بعد سنتين يرسلون يطلبونك ....قد صرت اوفر كواليفايد...على الوظيفة المطلوبة

في جهات فاهمه تعتذر بكل لباقة...او تخيرك بين وظيفتين..مع ملاحظة ( سنوات الخبرة...الكفاءة)

المشكلة لما تكون جهة كبيره.....ومش فاهمه هذه النقطة !؟

................

لازال هناك شئ مبهم في المعرض المهني....ويتم تجاهله كل سنة...

الكل يطالب...بتوضيح الوظائف والتخصصات المطلوبة...بينما الجهات تصر على ذكر عدد الوظائف المتاحة فقط؟؟

تحية

Crown

04-04-2013, 12:06 AM

انا في جامعه قطر نخصص شريعه وابحث عن وظيفه تعطيني نفرغ ومحتاج لهاشي واجد

وتخصصي شريعه وناوي احول شؤون دوليه بس انشاله يقبلوني ممكن حد يساعدني يا اخوان

الاجوديه

04-04-2013, 12:09 AM

انا رحت اليوم وبصراحه احبطت :(

الله يوفقنا جميع :(

tofa7a44

04-04-2013, 01:38 AM

السلام عليكم
انــــا اليوم رحت المعرض وحسيتهم هالسنـــة جادين في التوظيف وفي شركة من بعد ماعبيت طلب التوظيف طلبوني لمقابلة فورية بنفس الدقيقة اللي انا عبيت فيها الطلب ,,
وبعد حسيت هالسنه انهم مركزين ع طلاب الثانوية والخريجين الجدد ووكان اكثر تخصص مطلوب الهندسه بكل افرعه..

الله يوفق الجميع ان شاءالله,,

STAR

04-04-2013, 06:25 AM

الاقبال هالسنة ماكان وايد. نفس السنوات السابقة...

رهج السنابك

04-04-2013, 11:47 PM

نبي المشاركات اكثر ايجابيه

الاخت نوفه قلتي في جهات جاده ويسوون مقابلات فوريه ياليت تذكرون اسم الجهات

نبي نعرف الاماكن الجاده

والاخت توحه كذلك ياليت اسم الجهات

عن نفسي رحت ساعتين مريت شركات مثل دولفين والمنيوم واوريكس قدمت او لاين

الريل مع انها شركة جديده قالوا مانوظف اصحاب خبره

المجلس الاعلى للقضاء بعد قالوا مانبي خبره

جامعه قطر نكته جبت لهم فلاش قالوا نبي ورق قلت طيب ماعندكم طابعه قالوا لا اعتقد تصريفه

راس غاز بعد نكته قالوا نبي ورقه عدم ممانعه من شغلج مع اني ماشتغل بقطاع بترولي !! يا حليلي وانا اطلب من جهة عملي عدم ممانعه

شركة تسويق مركزين على نوعيه معينه من البنات ونوعيات اخرى ماينعطون ويه

الديوان قالوا قدموا من البيت

امممممم شنو بعد

قطر فاونديشن ماحسيت باهتمام كلش

قطر ايرويز عجبني جناحهم بس

قطر للبترول قالوا قدمو في البيت على مااظن او قالوا مانبي خبره

جهاز قطر للاستثمار خذوا كرت فيه موقع روحوا بيتكم قدموا منه

مريم ع

10-04-2013, 12:16 AM

السلام عليكم
تجربتي مع المعرض المهني كانت وايد ايجابيه
انا طالبه جامعيه وتخرجت العام ...
في جهه سوت معاي مقابله اوليه .. وبعد ما رحت منهم وانا للحين بالمعرض كلموني وقابلوني للمرة الثانية .. وبعد يومين كلموني ومقابله اخيرة مع مديرة الاتش ار و اخر يوم بالمعرض توقيع امر تعيين ...

صراحه تعامل راقي
و حببوني بشغلهم لأن الكل متذكرني ومتذكر اسمي وتخصصي وجامعتي بعد
والبنات اللي وقعوا معاهم ايضا اغلبهم جامعيات
والحمدلله يعني الدنيا بخير ...

جاتني فرصتين عمل من المعرض المهني وانا جامعيه والحمدلله .... بس صعب الاختيار بينهم .... :(

رهج السنابك

10-04-2013, 02:30 AM

مريم

لا تستعجلين

خذيها قاعده دايما حديثي التخرج يلقون فرص اكثر من اصحاب الخبره
لو صرتي صاحبه خبره وانتي مب مرتاحة وايد بشغلج صعب بعدين تلقين شغل غيره
فالافضل تتروين وتختارين مكان قوي وشغله مناسب والراتب بعد
اسالي عدل قبل ما تختارين المكان

عادي اذا طوفتي هالفرصه اذا مب مرتاحه وايد لان ممكن تلقين مكان افضل
فكري في كل النواحي حتى بعد المكان عن بيتج
ساعات العمل
بيئه العمل
قطريين او اجانب
منو مسؤلج المباشر
هل الراتب شي يستاهل
هل المكان فيه فرص تطوير وتدريب

فكري عدل وقارني عدل
ولو تعرفين حد من داخل المكان يكون احسن بعد

بو خليفه 123

10-04-2013, 02:33 PM

بحكم انه تم تعيني في لجنة التقطير في لجنة عملي تم القبول المبدئي على 162 طلب و سوف يتم توظيفهم ان شاء الله بعد استكمال الاجرائات خلال اسبوعين اقصى حد حسب تعليمات رئيسنا التنفيذي . و تم تخصيص ركن من موقعنا للمقابلات الفوريه حتى يتم توقيع العقد مباشره في حال تمت مطابقة الشروط و اجتياز المقابله .

التمست من المعرض الايجابيه , و اهتمامه اكثر بالجيل الجديد او بمعنى اصح خريجين الثانويه لتوفير الابتعاث للجامعات اكثر من الكوادر الاخرى مثل اصحاب الخبرات الطويله

ولد عمي استلم اتصال هاتفي من الملاحه و احد البنوك المحليه بقبول طلبه و تم تحديد موعد معه لاجراء مقابله نهائيه و هذا يدل على فرز الطلبات بشكل اسرع من السنوات السابقه .

اتمنى التوفيق امن توظف , او تم الاتصال به , و حظ اوفر لمن لم يحالفه الحظ .. فـ الخيره بما اختاره الله

قرنقووش

10-04-2013, 06:44 PM

انا خاطري اعرف شي واحد بس

كم قطري توظف عن طريق المعرض المهني من العام الماضي ؟؟

ياليت الي توظف عن طريقهم يشاركنا اهنية

اذا على الاحصائيات وطلبات احنا عارفينها

نبي تجارب حيه و واقعيه

انا كل سنه اقدم
وكل سنه يتصلون فيني
وكل سنه اسحب عليهم

الشركات اللي كلموني:
راس غاز
ميرسك

وردة

10-04-2013, 08:57 PM

انا في جامعه قطر نخصص شريعه وابحث عن وظيفه تعطيني نفرغ ومحتاج لهاشي واجد

وتخصصي شريعه وناوي احول شؤون دوليه بس انشاله يقبلوني ممكن حد يساعدني يا اخوان

السلام عليكم بالنسبة لتخصص شؤون دولية مطلوب في وزارة الخارجية قدمي عندهم وانشاءالله خير

البدوي

10-04-2013, 10:18 PM

خسارة وقت وجهد ومال .................... وقالوها في لقأت وطني صباح الخير ... المعرض شو بس مب توظيف