مسلح وإلا كيربي

[angelicheart]

السلام عليكم ورحمة الله وبركاته

إخواني بغيت رأيكم ببني غرفه إضافية ومحتارة ابني مسلح وإلا كيربي،

المسلح الأسعار غاليه ع غرفة مساحتها 4x5 وآلكيربي قريت أن بتكون الغرفة حاره + الشكل من داخل ما ادري شلون بيطلع ،والصوت بعد ، والغرفه غرفة نوم !

هل فيه حلول لمشاكل الكيربي وإلا المسلح افضل

[ريان]

المسلح افضل اكيد خصوصا انها غرفه نوم خاصه

عموما اسعار المسلح 800 ريال للعضم تقريبا

[معماري قطري]

إذا تفضل الكيربي ممكن تركب النوع اللي وسطه عازل وهذا يكون سميك وقوي وما تسمع صوت من فوقه وشكله معقول من تحت، ومساحة 4 في 5 حلوة وصغيرة وملمومة وممكن اللي يركب بسهولة يخلي الحديد مشقوق له في الحائط، ويسويه لك من برا يبين مثل الخرسانة ويركب حتى فوقه عازل مياه مثل نظام الخرسانة وتصريف.

فيه من النوع المعزول سمك 7 سم وفيه 5 سم وفيه أنواع يجي الحديد شوي عريض وقوي، وهذي أصلاً ما تسمى حديد خلطات خاصة من المعادن وما تصدي بسهولة إذا كانت محمية، وإذا بتركبه محفور له في الطابوق من 3 جوانب وبحيث يتغطى الفراغ اللي بيبقى بين الطابوق والحديد بشوية بتومين، وبتخلي جزء مفتوح والسلوب بسيط صوبه ما عندك مشكله وما تحتاج عزل مائي ولا تصريف، السلوب ممكن يكون 1% يعني 5 سنتيمتر لخمسة أمتار بحيث ما يبين الميلان قوي من داخل.

[مضارب دوسري]

الافضل مسلح
بس الكيربي لا باس فيه اذا اللي ركبه شغله مضبوط
وبخصوص الحراره صحيح
بس اذا مثلا بتركبون مكيف 2 ونص طن ماراح تحسون بالحراره
واهم شي يكون ف وسطه عازل يسمونه الهنود كيربي سندويشه :p

[angelicheart]

ريان، معماري قطر ، مضارب دوسري

ما قصرتوا الله يعطيكم العافيه ع الردود الوافية ، بقارن بين الأسعار وبتوكل ع الله

جزاكم الله خير ع الإفادة

[angelicheart]

عندي استفسار ثاني ولا عليكم أمر،

الحين عندي مخطط البيت الأصلي ، هل احتاج أروح مكتب استشارات هندسية عشان يضيف لي الغرفة وإلا اكتفي باتفاق بيني وبين الشركة اللي بتعاقد معاهم يسوون لي الغرفة ؟ وهل المكاتب تخطط مشاريع صغيرة وإلا لازم فلل ومشاريع كبيرة ؟!

[معماري قطري]

عندي استفسار ثاني ولا عليكم أمر،

الحين عندي مخطط البيت الأصلي ، هل احتاج أروح مكتب استشارات هندسية عشان يضيف لي الغرفة وإلا اكتفي باتفاق بيني وبين الشركة اللي بتعاقد معاهم يسوون لي الغرفة ؟ وهل المكاتب تخطط مشاريع صغيرة وإلا لازم فلل ومشاريع كبيرة ؟!

إذا إنت ساكن البيت وتقدر توفر خط كهربه للغرفة الجديدة بدون مشاكل، وبس إنتبه يمكن الأرض فيها خدمات أو منهول، وهذا بنيان بسيط ما يحتاج موافقات ووجع راس، مع انك لو سئلت البلدية أو التخطيط بيقولون لك لازم موافقات.

حول بيتي بيوت شكثر أجار وكلها مسوين غرف اللي فوق السطح واللي في الحوش واللي الإثنين، ومن ضمنهم حضانة أطفال مخالفة القوانين البشرية والغير بشرية كلها ولا حد بيحاسبهم، وانا في بيتي سويت حول 100 متر مربع إضافات حديدية ومحد درى .. بس انا ضايفها في المخطط الأصلي وحاسب حساب الكهربه.

[angelicheart]

أخوي معماري قطري ما قصرت ، الله يعطيك ع العافية ع الردود والإفادة ، جزاك الله خير