ابي جدول سياحي لتركيا

[fzaa_qatar]

السلام عليكم .. انا ان شاء الله ناوي اروح تركيا مع هلي وماعندي اي فكره او برنامج سيايحي .. خبراء تركيا جدولي اسطنبول وبورصه وشنهو الاول اسطنبول ولا بورصه وهل فيه اماكن غيرها والفنادق .. المده عشره ايام وتركيا امن وامان وطبيعه اهل تركيا يعني حد يضايقك ولا لا .. والتكلفه مبدئيا كم راح تكون . يحتاج تاشيره دخول من السفاره ...والتكاسي متوفره بالامكان السياحيه .وبصراحه كنت حاط تايلند بس متخوف من اللي سمعته وما خاب من استشار ...وجزاكم الله الف خير..

[غير البشر]

مرحبا اخوي فزعه ان شاء الله ابشر راح اكتب لك الفنادق والاماكن الي ممكن تروح لها في اسطنبول :nice:

[fzaa_qatar]

يعطيك الف عافيه اخوي غير البشر داااايم متألق بهالمنتدى الرائع .. وانا في انتظارك

[احساس غريب]

اخوي ما توصل ريح ليلتين في اسطنبول في فندق اسمه لإريس بارك في تقسيم وعقب روح ف العبارة لبورصة واسكن بفندق سيليك بالاس ان ماخاب ظني هاي اسمه خمس نجوم فندق حلو. الصراحه اسكن فيه لمدة اربع ليالي لاتزيد وعقب ارجع لإسطنبول وكمل باقي أيامك هناك وف أرجعه ممكن تسكن في تقسيم فندق مد تاون او تسكن في حي السلطان بس ما عندي فكره عن فنادقهم لني ماسكنت هناك وحلوه البلاد حق تسوق وتزور متاحفهم وحدائقهم الصراحه خوش بلاد وبالتوفيق وانا عطيتك هالجدول لنه كان جدولي ونفس مدة السفره العام

[عتيج الصوف]

السلام عليكم ورحمة الله وبركاته

اذا تحب الطبيعة ,,وعشرة ايام ان شاء الله تستطيع استغلالها بعد اسطنبول وزيارة المتاحف ورحلة البسفور وزيارة جزيرة الأميرات ...في اربعة ايام وتترك باقي المدة للشمال التركي وهو ان تركب طيران داخلي الى طرابزون وهناك تستـأجر سيارة مع نظام ملاحة والطريق سهل جدا الى الريف في الشمال وزيارة اوزنجول وايدر ومزارع الشاي في ريزي وشكر سو ,فمن طرابزون الى ابعد المنطق ايدر حدود 180 كيلو والطريق بحد ذاته متعة لاتوصف ,وسترى الشلالات والمناظر التي تاخذ العقول

وهذه صور مختلفة لاوزنجول وشلالات ايدر وهي ايضا مشهورة بالحمامات المعدنية ,,والناس في الشمال التركي سترى كل الطيبة وحسن المعاملة ..

http://www.arab4load.info/uploads/2fe0136580942431.jpg (http://www.arab4load.info/)

http://www.arab4load.info/uploads/2a3a1365809430472.jpg (http://www.arab4load.info/)

http://www.arab4load.info/uploads/54731365809433513.jpg (http://www.arab4load.info/)

http://www.arab4load.info/uploads/a34c1365809436054.jpg (http://www.arab4load.info/)

http://www.arab4load.info/uploads/32101365809437955.jpg (http://www.arab4load.info/)


http://www.arab4load.info/uploads/991e1365809441746.jpg (http://www.arab4load.info/)

http://www.arab4load.info/uploads/e5271365809449627.jpg (http://www.arab4load.info/)

اذا احببت اكثر معلومات ابحث في جوجل عن الجداول السياحية الى طرابزون وسترى مايسرك ,,وستكون رحلة لن تنسى بأذن الله ,وهذه الأماكن تأسر العقول والقلوب وتجعل الأنسان يقول سبحان المبدع الخالق ويسأل الله الجنة ,والله ييسر رحلتكم ويحفظكم..

[fzaa_qatar]

اخوي احساس غريب وعتيج الصوف الله يعطيكم الف عافيه ع اضافتكم .. اللي فهمته الجدول راح يكون كالاتي
يومين باسطنبول واربعة ايام فبورصه واربعه ايام اخيره باسطنبول .. بس ما كنه اربعه اياك فبورصه وايد عليها .. وبالنسبه للايام فاسطنبول اول يومين ابي اسكن بمكان والايام الاخيره بمكان ثاني ومحتاج احسن الفنادق سواء اتكون قريبه من اسواق واماكن سياحيه وسوبرماركت .. وشلون الجو فيه ثلج فالجبل ولا خلص حار ولا بارد بشهر خمسه او سته وكم راح تكون التكلفه للعشره ايام بدون تذاكر وفنادق .. وشاكر لكم تجاوبكم .

[احساس غريب]

اخوي بالنسبه للفنادق انا جربت فندق لاريس بارك اول ليلتين وهالفندق الصراحه ممتاز وموقعه حلو في قلب تقسيم وكل شي حولك سوبرماركت وقهاوي وشارع الاستقلال قريب عشر دقايق مشي وعندك فندق مد تاون قريب منه مابينهم الا دقيقتين مشي هالفندق سكنت فيه اخر كم يوم وفي بورصه انا قعدت اربع ليالي الصراحه ماتمللت لني قزرتها عالحدائق وعندك جبل اولوداغ لين توصل لقمته بتشوف الثلج ف الصيف وبالنسبه لي كنت افضل منطقة تقسيم على حي السلطان لني ارتحت فيها اكثر وبالنسبه للتذاكر انا ماخذهم العام بحدود 2700 عالقطريه والفنادق شيك ف بوكنق لني نسيت بالظبط كم واحسب حساب المواصلات لن يبيلك سايق بحدود 200 دولار يوميا تقريبا المرسيدس العود حق العوايل والله يوفقك

[ماجد البدر]

اذا قصدكم السفر في الصيف اسطنبول جوها حلو في الليل و النهار مع الشمس مباشره حارة خاصة شهر 7 و 8 بعد هشهرين تبرد شوي الحين مثلا برد وامطار بورصة في الصيف يوم واحد يكفيها ممكن السكن في اسطنبول و الذهاب بالعبارة و العودة في نفس اليوم تطلعون الصباح وترجعون المساء
تبقى المواصلات مشكله الا ان تتفقون مع سائق تطلعون معاه بسيارة على العبارة عن كل يوم من 100 الى 150 دولار وقد يختلف السعر اذا رحتوا بورصة

لو تحبون الطبيعة طلعوا بطيران داخلي الى طربزون ومن طرزون الى اوزنجول ايدر ريزا مناطق خيال خيال في الصيف درجة الحرارة اقل من 15 والانهارو الشلالات في كل مكان

[ضوى]

لا تقعد في اسطنبول وايد ولا في بورصة حدهم يوم بورصة ويومين اسطنبول ، تبي استجمام روح ابانت وكارتيبه خيال وبرد برد في عز الصيف وايد استانسنا لما رحناها عجيبة الصراحة

كارتيبه عبارة عن منتجع باااارد بس مافيه حواليه شي الفعاليات من الصبح لين العصر تلفريك وسيارات وسياكل بس خضرة وجو بديع وبرد

ابانت نفس الشي تقدر تنزل منها على بولو مع انه مافيها شي عادي ، وتقدر من ابانت تروح جبل الصود ، صودا طبيعية تنزل من الجبل يقولون انها مفيدة للجسم اشرب منها واغتسل منها

اسطنبول حدها يومين في الصيف يمه ماتنبغى حر مووت

بورصة روحها الصبح وارجع بالليل مب حلوة كلش بالصيف كانك بالخليج بس دافع فلوس على هالقعدة :)

عشر ايام ماتكفي الشمال ، هذي بروحها حكاية طرابزون وماجاورها يبي لها اقل شي عشرين يوم حتى تغطي كل الاماكن الرائعة بها

الفيزا من المطار ، والصراحة السفر لتركيا مكلف احنا عشر ايام فوق 50 الف بس وايد دلعنا نفسنا الصراحة :)

[الإكسير]

اخوي تركيا فيها مكاتب سياحيه باسعار رمزيه من الصبح لين المغرب يفرفرون فيك لاتعور ورأسك وتأخذ تكسي

[ماجد البدر]

لا تقعد في اسطنبول وايد ولا في بورصة حدهم يوم بورصة ويومين اسطنبول ، :)
صادقة والله خاصة في الصيف بس في الشتا شي ثاني مريحة لابعد الحدود


تبي استجمام روح ابانت وكارتيبه خيال وبرد برد في عز الصيف وايد استانسنا لما رحناها عجيبة الصراحة

كارتيبه عبارة عن منتجع باااارد بس مافيه حواليه شي الفعاليات من الصبح لين العصر تلفريك وسيارات وسياكل بس خضرة وجو بديع وبرد
سمعت عنها ومازرتها

ابانت نفس الشي تقدر تنزل منها على بولو مع انه مافيها شي عادي ، وتقدر من ابانت تروح جبل الصود ، صودا طبيعية تنزل من الجبل يقولون انها مفيدة للجسم اشرب منها واغتسل منها

ثلاث مناطق اسمهم بولو ضيعت و عفست الدينيا بسيارة ههه


اسطنبول حدها يومين في الصيف يمه ماتنبغى حر مووت
صحيح

بورصة روحها الصبح وارجع بالليل مب حلوة كلش بالصيف كانك بالخليج بس دافع فلوس على هالقعدة :)
كلامج صح وناس وايد تبالغ في جمالها الجبل و الشجرة المعمره حتى الشلال صغير وسوق الحرير متواضع جدا


عشر ايام ماتكفي الشمال ، هذي بروحها حكاية طرابزون وماجاورها يبي لها اقل شي عشرين يوم حتى تغطي كل الاماكن الرائعة بها
على حسب اذواق الناس ناس تقعد اسبوع وتمل يقولون و بعيدن ايش غير الطبيعة سبحان الله انا لو اقعد شهر ما اتملل حد يتملل من الجنة الله يرزقنا وياكم الجنان

الفيزا من المطار ، والصراحة السفر لتركيا مكلف احنا عشر ايام فوق 50 الف بس وايد دلعنا نفسنا الصراحة
المشكلة قلتيها و حللتيها مدلعين نفسكم وممكن بدون التذاكر تكلف 25 الف بس اسبوعين لو عايلة صغيره

[abdo222]

تروحون وتردون بالسلامه:

خل سكنكم في اسطنبول طول المده (منطقه تكسيم بشكل خاص) انصح بفندق مرمره في تقسيم خمس نجوم، او ماربل تقسيم

بالنسبه للسياحه ، الاماكن السياحيه كثيره ولين تروح لهم بالكتسي بيكون الموضوع متعب ومكلف، انصح بشركه سياحيه اسمها "الحران" لهم موقع وفي الموقع جدول لكل رحله "تقريبا سبع رحلات عندهم" مع السعر والوقت،، من الرحلات يوم كامل في بورصه يمرون عليكم الفندق الصبح ويردوكم المغرب،

[ماجد البدر]

تروحون وتردون بالسلامه:

خل سكنكم في اسطنبول طول المده (منطقه تكسيم بشكل خاص) انصح بفندق مرمره في تقسيم خمس نجوم، او ماربل تقسيم

بالنسبه للسياحه ، الاماكن السياحيه كثيره ولين تروح لهم بالكتسي بيكون الموضوع متعب ومكلف، انصح بشركه سياحيه اسمها "الحران" لهم موقع وفي الموقع جدول لكل رحله "تقريبا سبع رحلات عندهم" مع السعر والوقت،، من الرحلات يوم كامل في بورصه يمرون عليكم الفندق الصبح ويردوكم المغرب،
مرمرة اسطنبول زين ولكن على ما اسمع انه قديم اﻻ اذا تم تجديدة انا سكنته في 2003 اول مرة انزل تركيا كان زين ولكن غرفة صغيرة لو هم عايله اكيد ما يصلح لهم

[مهاجر]

انا انصحك تقعد ليله اول ماتوصل في اسطنبول وثاني يوم تاخذ لك سياره توصلك الى ابانت تقعد لك ليلتين وعقب ٤ ليالي في بورصه و٤ في اسطنبول والتشري زين في بورصه.