مساعدة لبناء أعمدة خارج البيت لبناء طابق ثاني لبيت ضعيف

[احلى ستايل]

السلام عليكم ورحمة الله وبركاته،،





اليوم موضوعي عن بيتي وصار لي فترة طويلة

مع الإسكان رايحين رادين الخبراء والاستشاريين اللي عندهم يقولون البيت مايتحمل نبني طابق ثاني ومادري ايش

ولما اجي استلم الكتاب انصدم انهم كاتبين ابني بالمواد الخفيفة وانهم مايتحملون أي مسؤولية ؟؟؟؟؟؟؟ ممكن اعرف إذا هم يقولون لنا ابنوا وما يتحملون مسؤوليتنا يطيح فوق رؤوسنا من إللي يتحمل وليش من الأساس يقولون ابنوا مواد خفيفة!!!!!

بالعربي نسمع كلام ونشوف كلاااااااااام آخر تعطلت جميع أموري بسبب تناقضاتهم دام الدولة في خير ونعمة شنو نسوي إحنا المساكيين اللي كبروا عيالنا وصغرت بيوتنا علينا ولما نجي نوسعها يقولون بيوتكم ماتتحمل هالاسكان حتى مافيه قانون يمشون عليه على كيفهم فيه واسطة بتمشي مافي الله يعينكم


وكذلك المكاتب الاستشارية قالوا حتى عش مايتحمل ولا مواد خفيفة وقالوا لنا بالعربي راجع الاسكان لأنهم بها لطريقة صرفوكم بإسهل الطرق

البيت صار له تقريبا 19 سنه



في الأخير شكلي ما بطلع منهم لا بحق ولاباطل

فقررت ابني الطابق الثاني وأسوي فكرة قالوها لي بعض الأعضاء

اللى هي أحط أعمدة خارج البيت وابني عليها الطابق الثاني بدون مايتحمل الطابق الأرضي الثقل

بس من المهندس الشاطر اللي راح يسويها لي ؟؟؟؟؟؟

وهل الفكرة تطبقت في قطر من قبل؟؟؟؟؟



لأني بصراحة يأست من الاسكان والله يجزي اللي بيشور علي كل خير

[ضوى]

مقدرة حاجتكم للطابق الثاني واكيد ضرورة هاالشي خلتج تكتبين هالموضوع مرة ثاتية

مدري عن الافكار اللي طرحوها االاخوان لانه احنا بيت ابوي نفس الشي مع انه طابقبن عسى مانحفر لمسمار تشلخ البيت وقالوا البيت مايتحمل صيانة مهب بنيان جديد

لو تقدرين والله رزقج هديه وابنيه من اول وجديد ولاتخسرين وبعدين تتوهقين ؛ يمكن افكار الاعضاء تصلح لحالات معينة وفي بلدان غير عن قطر فاا تجازفين وتخسرين ادرسي الموضوع وجيبي ناس فاهمة تعطيج راي صحيح مب بس همها الفلوس

والله يوفقج ويسخر لج عيال الحلال

[معماري قطري]

إختي الحل الأنسب شكوى للديوان وطلب هدم البيت وتوفير بيت أجار بداله لين يتم بناء بيت جديد حسب رغبتكم.

الإسكان إستووا صعبين الحركة والتفكير ودوم يحاولون يكونون قانونيين ويخلون مسؤوليتهم.

[احلى ستايل]

مشكورة اخت ضوى وكلامج 100% سليم لولا الحاجة لافكار اعضاء المنتدى النيرة ولا مكان كتبت الموضوع مرة ثانية والواحد وين يقدر هالايام يهدم بيته ويبني مكانه وياخذ بيت اجار ميزانية مش طبيعية


أخوي معماري قطر مشكور وماتقصر دوم تساعدنا بافكارك واقتراحاتك والله يجزاك خير
الشاهد الله تعطلت جميع اموري من زواج العيال وغيرة من المسؤليات وذلك بسبب تخبط هالاسكان
نسمع كلام يسرنا ونتأمل خير ونشوف شي مايسرنا.

[احلى ستايل]

أخوي معماري قطر هل الديوان يتقبل نفس هالحالات واذا كتبت الكتاب وين اودي الاوراق ؟؟؟

[احلى ستايل]

ابي الاعضاء يقترحون علي لو انهم نفس حالتي وش كان سووا ؟؟؟

[بو راشد 1]

أختي، شفت في شارع المطار القديم (التجاري) محلات تجاريه قديمه، المالك ركب عواميد حديد دار مدار المبني و طلع دور كامل فوق المحلات، روحي شوفيه و أسالي منو المهندس اللي خطط له. (اظن البناية اللي فيها مطعم سي فود)

[معماري قطري]

أخوي معماري قطر هل الديوان يتقبل نفس هالحالات واذا كتبت الكتاب وين اودي الاوراق ؟؟؟

إختي الديوان هو لمساعدة أهل قطر، وكل حالة لازم معاها إثباتات ومراسلات وتظلم مكتوب بواسطة الشخص نفسه، والديوان الصغير فيه مكتب لإستقبال هذي التظلمات وفيه قسم مستقل خاص بالنساء، ودام فيه حاجة وفيه إثباتات ومحاولات مع دوائر حكومية بدون نتيجة أكيد ما يقصرون.

[معماري قطري]

أختي، شفت في شارع المطار القديم (التجاري) محلات تجاريه قديمه، المالك ركب عواميد حديد دار مدار المبني و طلع دور كامل فوق المحلات، روحي شوفيه و أسالي منو المهندس اللي خطط له. (اظن البناية اللي فيها مطعم سي فود)

النظام الحديد والخرساني جاهز الصب ينفع لمسافات قصيرة بدون عمدان، لكن عرض بيت يوصل لعشرين أو 15 متر لازم يكون فيه عمود وسطي وهنا بتكون المشكلة، ولو ممكن عمل عمدان خارجية وأبيام بتكلف كثير لأن حجمها لازم يكون كبير، وموضوع الإخت تكلمنا فيه قبل وناقشنا مختلف الآراء، بس مبنى عمره حول 20 سنه وبنيانه ضعيف مثل ما تقول الاختبارات صعب الواحد يغامر فيه، وخصوصاً مع القوانين الصعبه ألحين للدفاع المدني وللتخطيط .. أفضل بكثير الهدم وإعادة البناء .. أو لو الحوش فيه مساحة عمل مخطط للبناء في هذي المساحة ثم السكن ثم هدم الموجود وإستكمال البناء وربطه بالجديد.

[معماري قطري]

كمحاولة أخيرة أحد الإخوان يبني بخرسانات جاهزة بالنسبة للقواعد والأعمدة والأبيام والأسقف، وحسب علمي فإن مصنع قطر للردي مكس مختص بإنتاج هذه الخرسانات، ومن الممكن سؤالهم كم تغطي أسقفهم وأبيامهم من مساحات بدون أعمده حتى تتم عملية بناء دور بأعمده جانبية.

[jassim69]

ابي الاعضاء يقترحون علي لو انهم نفس حالتي وش كان سووا ؟؟؟

هلا أنا نفسك ونفس معانتك معاهم بيتي صارله من أنبنا 16 سنه وقدمت علي الإسكان حق إضافة دور ثاني وبعد فحص أساس البيت قالو مايستحمل دور ثاني معنى مبني على أساس دورين ما بقي أطول عليك احين قام دور ثاني مع ستخدام صبيات جاهزه بس السويته سويت مبنى كامل حق الدرج وصلته مع البيت إذا في خاطرك تشوف البيت كلمني على الخاص وتشوف كل شئ مباشر:):nice:

[بن غيث]

للأسف أختي .. ينفع تسوين طابق ثاني بأعمدة جانبية ..
وللأسف أيضاً كلام معماري صحيح .. أنه لازم يكون فيه أعمدة في الوسط لتدعيم الاحمال
وللأسف أنه يجب عمل شئ اسمه ( قميص ) ..ههههه يسمونها كذا المهندسين المصريين او ( تدعيم وتقويه لبعض الاعمدة الرئيسية القديمة )
وللأسف الاخير .. قليلة الشركات والناس التي تفهم في هذه الشغلات .. او .. أعمال الترميم وأعادة البناء

فنصيحة أختي .. معاملة هدم وبناء أفضل من المغامرة مع الشركات عديمة الخبرة والمعرفة

[معماري قطري]

إيه والله صادق بن غيث كثير أشياء ما يسونها

مره فيه مسجد في دور علوي ثاني أو ثالث المهم أخير، وتساقطت خرسانات من سقفه وإنكشف الحديد، وكان الحل لإستخدامه مؤقت إنه يدعم بأعمده حديد وتنحط قطعة حديد ملاصقه للسقف تمنع سقوط الخرسانات .. أشوف المبنى للحين موجود من حول 10 سنين كان هذا الحل مقترح ولا ادري سووه أو لا.

ألحين المعروض من بيوت أجار أكثر من الحاجة والحكومة ما تقصر تتكفل بالتأجير وبالهدم والبناء بس لازم حركة ومطالبه.

[معماري قطري]

ألا يا اخوان بعد الزلزال ما صارت مشاكل في مباني قديمة مثل شلوخ قوية؟