شباب بغيت واحد يخطط فلل

[الكاسر007]

قررت اخيرا ابني وبغيت افضل وارخص واسرع مكان او مكتب للخرايط

والله يعينكم علي برشكم اسئلة فترة البنيان اذا الله كاتب لي

[الصقر المحلق]

اخوى مستحيل يكون في مكان بكل الصفات
لو افضل حيكون بطئ ومكلف
ولو سريع راح يكون سئ

[فتى الجود]

السلام عليكم
أرشح لك

المكتب القطري - بمعيذر بعد شارع ال شافي وسوبر ماركتت السعودية بجيك دوار بعده على اليمين

والله يوفقك ان شاء الله

وهذي الروابط ان شاء الله تفيدك

http://qatarshares.com/vb/showthread.php?t=327085

http://qatarshares.com/vb/showthread.php?t=410532

[بو دانه 1979]

هلا اخوي تواصل وياي ادلك على مكتب استشاري زين وتعاملت وياه قبل

[عقرب]

شعاع للإستشارات الهندسية

شغلهم زين وسريع

[Bozizoo]

مكتب النهضة للاستشارات الهندسيه
راعيه شاب مهندس قطري و يتابع كل شي بنفسه
وكل يوم يدوام في المكتب العصر
واسعاره ممتازه

[معماري قطري]

في أمريكا نظامهم بسيط وسهل وفي الغالب مطورين بناء يطورون مناطق كاملة والناس تشتري بيوت معروفة مواصفاتها، ولو فيها خلل أو مخالفات حتى بعد سنوات يحق للمالك يرفع قضية ويبهدل المطور، وفي دول عديدة متقدمة أكيد.

مره شريت مجلات من هناك فيها نماذج محدده، وكل نموذج ممكن تراسل المصمم وتطلبه الرسومات التفصيلية والمواصفات كاملة وتقدر تبني على أساسها، وحتى لبيوت عاديه ما تحتاج إشراف المقاول يهمه يكون شغله صح وكل شيء بمواصفات وطريقة معروفة ولو غش تقدر تقاضيه أي وقت.

معليش سامحوني على هالمقدمة .. بس بعد عندنا نماذج بيوت جاهزة وممكن للي يدور ويسأل يحصل شيء يناسبه بسعر معقول وبسرعه، بس العيب في بعض المكاتب اللي يدعون إن أي تصميم يسونه من الصفر، وهم يعتمدون نماذج معينة ويغيرون فيها حسب رغبة العميل ولا يحطون رايهم وجهدهم في الشغل ولا يطورون لأجل التطوير، يطورون فقط لإرضاء العميل.

ألحين في ظل إرتفاع الأسعار يفترض من التخطيط الطلب من بعض المكاتب نماذج مدروسة تناسب متطلبات العامة والبيئة القطرية، وتكون مدروسة ومطورة صح وبحيث يكون نظامها الإنشائي إقتصادي ومطور بمواد حديثة مثل خرسانات السيبوريكس الخفيفة والعازلة، والخرسانات المجوفة المصنعة في معمل تحت درجة حراره مضبوطة ورطوبة مثالية، والمباني الحديدية بقطاعات مختلفة ومناسبة وإقتصادية للمنازل العادية... ويفترض وضع معايير ومواصفات خاصة وتطويرها بحيث لا يكون البناء بأقل من هذه المواصفات كشبكات الكهرباء وباقي الأنظمة، ويجب تطوير النظام القضائي ونظام مراقبة الجودة الهندسية في كافة الأعمال، بحيث يكون الصحيح بين والخطأ واضح للكل وتكون الأحكام سريعة ولا تأخذ سنين طويلة ويظفر بها المقاول الا ما ندر.

الخلاصة من يبحث عن التصميم المجرب والجيد يسئل عن شيء جاهز ومن مكتب إشتغل بأُصول هندسية صحيحة، فممكن لبيت بمساحة 1000 متر مربع وبتوزيع مريح وجيد وأنظمة مدروسة أن يكون مريح وعملي ومتوازن من أغلب النواحي، وممكن لبيت بنفس المساحة أن يكون مكلف على لا شيء وغير متوازن ومواصفاته ضعيفة وتكون دفعت أخي المالك أكثر من اللازم في مبالغات إنشائية أو مساحات ضائعة أو في نظام كهربي غير مدروس صح.

ويبقى عندنا طبعاً الإشراف والمتابعة الدائمة.

[الكاسر007]

اولا اشكركم جميعا على المرور والعذر منكم ماقدر اشوف بدون لا اشكركم وبكرة لنا لقاء فيكم

[captin]

قررت اخيرا ابني وبغيت افضل وارخص واسرع مكان او مكتب للخرايط

والله يعينكم علي برشكم اسئلة فترة البنيان اذا الله كاتب لي

مرحبا أخوي صبحك الله بالخير والنور

ذكرت أرخص وأفضل في طلبك وهاذي المعادلة خاطئة مئة بالمئة
لايوجد شيء في الدنيا أسمه أرخص وأفضل

يوجد أرخص ورديء
وغالي ذو جودة عالية

بالنسبة لتصميم فيلا سكنية يجب أن تكون نظرتك شاملة للمشروع
من البداية تراعي فيها ظروفك الحالية والمستقبلية من حيث عدد افراد الأسرة
والطبيعة الاجتماعية للأسرة وهوايات الإسرة والأقارب والزيارات والمناسبات
ومدى تكرارها , وهواياتك انت هل راعي بحر وطراريد وسكوترات
وسيايير معناة تحتاج مساحات اوسع للتخزين تحتاج حديقة خلفية للأهل والأولاد
تحتاج مكتب خاص فيك تحتاج صالة تمارين رياضية الخ من أمور .

عموما لفيلا سكنية خذ ورقة وقلم وحدد احتياجاتك انت واهل بيتك حطها نقطة نقطة
وروح حق مكتب في رأيي متوسط عنده خبرة كبيرة في التعامل مع الفلل السكنية
واجلس معاه وقول له حققي له هاذي المتطلبات في التصميم.

وانصحك من البداية اذا بديت تسوي التصميم المعماري تتعاقد مع مكتب متخصص
في الديكورات الداخلية ويدخل معاك في تصميم الديكور والأثاث لأنك بترتاح في النهاية
وبتحقق البيت اللي تحلم به لاتخلي القرارات في النهاية بعد ما تبني وتخلص تفكر تسوي
تكييف سلبيت عادي ولا دكت أو ترفع السقف او تنزله او تسوي بيسمنت او لا .
هاذي القرارات احسمها من البداية .

موفق بإذن الله

[رآعي موآجيب]

يوجد أرخص ورديء
وغالي ذو جودة عالية





صدقني مش دائماً وانا اخوك

هذي مشكلتنا مع الأسف ، الشي الغالي يكون شي ممتاز ، والرخيص سيئ !!

هذا مهوب مقياس ابد

بقولك مثال بسيط خارج عن الموضوع شوي

مره شريت منشار كهربائي من شركة التيسير بـ 1700 ريال علشان اقطع فيه الحطب ، ماكمل معي شهر إلا وانا كل كم يوم مصبح الشركه وامسيهم للتصليح

والعام شريت منشار من السوق الصيني بـ 230 ريال ، الصراحه شريت منشارين لأني متوقع بيختربون بسرعه ، ليومك المنشار الثاني بكرتونته ما أشتغل ، والأول انا استخدمه ومستوي سبيل للربع كلهم يستخدمونه وهذا هو زي الفل :victory:

يوجد الرخيص والجيد ، ويوجد الغالي والرديئ ، لكن المطلوب حسن الأختيار :nice:

[الكاسر007]

اشكركم شباب وكل كلمة باخذها بعين الاعتبار
والعذر على التاخير بالرد