شوركم في التصميم

[مرتبش]

السلام عليكم
اخواني هذا تصميم لبيت العمر ان شاء الله ..حاب اشوف ملاحظاتكم على التصميم ونصايحكم مالنا غنى عنها.

http://im34.gulfup.com/XlBnc.jpg (http://www.gulfup.com/?V98Iaq)

http://im34.gulfup.com/55ymJ.jpg (http://www.gulfup.com/?sg8QzP)

اتمنى تفاعلكم ولكم الشكر

[قطري قديم]

بالتوفيق
خوش توزيع للصالات الارضيه
ماعندي اي تعقيب الا علي غرفه كي الملابس والغسيل يفضل ماتكون في الدور الارضي للفيلا
ويفضل ان تكون في الملحق الخارجي او في البينت هاوس .

[معماري قطري]

ما شاء الله تصميم موضح بما فيه الكفاية

وحلو الواحد يحط في باله توزيع الأثاث من البدايه .. راجع إن شاء الله وباذكر كم ملاحظة وتوزيع للأفضل إن شاء الله.

[almaf1a]

اهنيك على التصميم والمكتب الي مسوي الخريطه عنده
ماشاء الله


غرفة الصلاة:nice:

[qtr432]

تصميم ممتاز والتوزيع ولا أروع، وعندي كم ملاحظه بسيطه.

بالدور الأرضي عندك مكان مغاسل اليد لو تخلي الباب بجانب غرفة الصلاه يكون أفضل من ناحية أن ما يكون وجود الحمام والمغاسل واضح بالصاله وتقدر تستفيد من مكان الباب لين سكرته، وبيكون مكان الباب من ناحية غرفة الصلاه أفضل لانه راح يكون قريب من غرفة الطعام وأيضاً سهل للواحد إذا احتاج للوضوء لانه ماراح يمر على الصاله، وبيكون الوضع انه عندك ممر (لوبي) يفي للغرضين.

الملاحظه الثانيه في الطابق الثاني عندك الحمام الي فالصاله ايضاً، أشوف أنه ماله داعي يكون من الأساس وجود حمام وذلك لوجود الغرف بحماماتهم، وأي شخص إذا احتاج أنه يروح لدورة المياه بيروح غرفته، وبالعاده أن هذا الطابق يكون خاص وعائلي وما توقع أنه يكون مكان استقبال للضيوف، ومن رأيي انك تقسمه قسمين قسم يكون مطبخ تحضيري أو بار مطل على الصاله، والقسم الثاني يكون حمام يخدم الغرفه الي جنبه مباشره وذلك بفتح باب من داخل.

والله يوفقك أخوي ويسر أمرك.

[مرتبش]

السلام عليكم

شكرا للمداخلات الطيبة..ابدأ بالاخ قطري قديم ..فكرة الملحق عندي انه يكون جزء من مبنى الفيلا ويكون شبه مفصول وتقريبا الفكرة متحققة لكن مثل ماتفضلت غرفة الكوي صايرة مكشوفة على الصالة ومكانها مش مضبوط لأني افضل انها ماتكون جزء من غرفة الخادمة.. ولو خليتها في البنتهاوس بتصير بعيدة وشغلانة مجابل المطبخ والمغسلة.

الاخ معماري قطر منتظر تفصيلك :) ولك الشكر ..توزيع الاثاث مهم ويعطي تصور للتصميم ويوضح مكان الخدمات من تكييف وسواكت وتلفزيون ..احيانا تجيك الغرفة كلها نوافذ مافيها مكان عدل للسرير او المكيف مكانه غلط

الاخ almaf1a جزاك الله خير كلك ذوق

الاخ qtr432 شاكر لك المداخلة والنقطة الاولى اشوفها ممتازة :)
النقطة الثانية للدور الثاني جيدة ..المغاسل مالها معنى وماتحقق اي هدف بس ايضا احتاج لحمام للصالة..الفكرة يبي لها تمحيص شوي.

يعطيكم العافية جميعا

[معماري قطري]

بابدأ من الزاوية اليمنى العلوية في الدور الأرضي:

1. الحمام عرضه 2.3 شوي زايد عن المعقول للأربع قطع وعرض مترين كفاية ومريح، ويفترض تكون المغسلة مقابله الدبليوسي أو كرسي الحمام والبديه.

2. ما اتوقع النظام الإنشائي نهائي لأني أشوف أماكن بدون أعمده كلش وأماكن فيها عمودين بينهم أقل من متر.

3. المكيف لو كان قرب الحمام أفضل علشان ما يكون مباشر على السرير.

4. المطبخ طريقته حلوه حايطين عليهم الكبتات وممر في الوسط .. ما يسمى بالغاليري .. وهذا عملي وسهل .. بس أحلى لو الباب يجي بالصبط في الوسط .. والكسرة النازلة في الكاونتر قرب باب المخزن صغيرة ومزعجة لو ينعمل الكاونتر سيده للحايط وينفتح باب المخزن مباشر .. يعني يكون مدخل المخزن قريب للحايط اللي فيه النافذة ومساحة التخزين تكون أرفف مقابلة للباب وعلى الحائط اللي في يمين الباب .. ولك الخيار تسوي فتحة بقوس بعرض 80 سم كفاية أو باب بعرض 90 سم.

5. لو كان المطبخ هذا تحضيري وعندك مطبخ خارجي أنصح بفتح فتحة في الحايط بين المطبخ وبين غرفة الطعام .. وعندك عرض المطبخ 4 متر ممكن تسوي فيه حتى جزيرة وسطية بفرن إضافي ومغسلة وجلسة طعام مرتفعة داخلية.

6. بالنسبة لغرفة الخادمة والمصلى واللي صراحة أهنيك على هذي الفكرة والإضافة المميزة إنك تخلي في بيتك غرفة خاصة بالصلاه .. شيصير لو خلينا غرفة الخادمة أكبر شوي بحيث نلغي الحائط الوسطي والكوي ممكن يكون في طرف الغرفة مب مشكلة، ولو خلينا باب الممر ينفتح بالعكس وفتحنا باب لغرفة الخادمة على الممر مقابل تقريبا باب المطبخ وكبرنا غرفة الصلاه بحيث تكون متضمنه الممر اللي جدامها، وفتحنا بابها تحت مقابل المغاسل؟ أتوقع بيكون الوضع أحسن وأوسع بتكون الغرفة حتى ممكن تترتب كمكتبة صغيرة مع غرفة صلاة.
ولاحظ إن غرفة الخدامة في حالة إزالة الحائط بتكفي خدامتين.


7. الإرهاق عندي وصل حده باقيل شوي وباواصل معاك وقت ثاني بإذن الله.

[معماري قطري]

باكمل بعض الملاحظات اللي أتمنى تكون مفهومة إن شاء الله.

7. المدخل الجانبي يستحسن إن عتباته تكون داخله في المنطقة المفتوحة بدال ما تكون بارزه برا حدود البيت لحمايتها من المطر والتزحلق عليها والسقوط.

8. طبعاً الأعمده خصوصاً الدائرية في الوسط ممكن تكون لها دراسة .. معماري وإنشائي يقعدون مع بعض ويحطون حلول أحسن .. انا أشوف إنه ممكن إلغاء عمودين ويبقون عمودين المدخل للصالة الكبيرة اليمنى أسفل الصورة.

9. كحل عملي للصالات والممرات لو تم إعتماد تكييف سبلت المعلق في السقف واللي يوزع لأربع جهات بيكون أفضل، ولازم أشدد على خيار العزل الحراري لضمان توزيع حراري متوازن في البيت ولأسباب كثيرة مهمة ذكرتها في موضوع العزل الحراري اللي كتبته قبل.

10. الغرفة اللي تحت المغسلة ممكن يكون مكان التسريحة الغير واقعية والكبيرة كثير كبت من خزائن الحائط الأمريكية الثابتة، وهذا يطلع حلو لو سوينا الباب غائر في كسرة بحيث يكون في خط واحد مع الخزانة، بس يدخل الباب بعمق 70 سم وبعرض الباب وشوي زياده يعني 20 سم + 90 للباب + 40 ككتف = 1.5 متر والباقي بطول الكبت اللي بيكون طوله 3.3 متر... والتسريحة ننقلها في الزاوية اللي فيها الكرسي جنب التلفزيون.. والمكيف في رايي أفضل مكان له مقابل الباب.

11. الله يعينك على ملاحظاتي بس إن شاء الله كلها ممكنه وما تؤثر في جوهر التصميم وهذا المهم وباواصل إن شاء الله بعد مباراة برسيلونه مع بايرن ميونخ وطبعاً كل قطر أتوقع مع برسيلونه.

[Aaziz]

لي عوده للقراءة بتمعن للتثقيف .

الف مبروك و المنزل و ان شاءالله تغمض تفتح تلقاك قاعد في الصاله :)

[معماري قطري]

11. الصالة اللي على يسار الصورة تحت عرضها 5 متر وطولها 8.2 مفتوحة على باقي البيت، وعندك جلسة أو صالة عائلية وغير عن الجلسة الدائرية، والمكان المفتوح شرح وزين وخصوصاً في وجود زوار، وعندك مدخل ثاني ممكن تستعمله للدخول للدور العلوي .. بس آحس إن الصالة اللي مفترض تكون مجلس مكشوفه على مكان الدخول من الباب الثاني ومن المدخل الرئيسي، ولو سويتها مجلس مغلق خاص نسائي أو حتى للدروس الخصوصية مثل ما يصير عندنا ممكن تكون أفضل وانت أعرف بإحتياجك، ولو سويتها مجلس زيد العرض شوي ل6 أو 6.5 متر .. في نفس الوقت بتاخذ من عرض المدخل الكبير وبتصغر فوق في جلسة غرفة النوم وبتكبر غرفة النوم لأن جلسة غرفة النوم تحتاجها صغيرة وملمومة وخاصة بعدد قليل من الأشخاص.

12. لو فرضاً طلع المهندس الإنشائي فنان وشال العمودين في الجلسة الدائرية ... العمود الفوقي في الصورة وأقصى اليسار وصغرها شوي، وبدال ما يسويها عتبة مرتفعة يسويها مع صالة العائلة عتبة نازلة أو مب عتبة كاملة بس 10 سم بحيث تكون مريحة، وتكون الجلسة الدائرية بشوي أصغر علشان تستوعب التوسعة في الصالة اليسرى اللي نفترض تكون مجلس بإذن الله بتكون أفضل.

13. نفس الوضع للمدخل بيكون أحلى وعملي وأنظف إن العتبات تبدأ تحت الظلال ومع خط البيت.

14. الزراعة يبي لها تبعد عن البيت أقل شيء 40 أو 60 سم مع حماية ضد الماي بحيث إنك تسوي حفرة غزيرة في حدود مترين وتبني طابوق حماية وينملى بالدفان وينحط عليه بيتومين وبلاستيك سميك من برا وداخل وبعدين يندفن حوله من برا بدفان نظيف ومن داخل بدفان خاص بالزراعة وبسماد وبرمل وطين بحيث يكون طبقات وأعلاها خليط رمل وطين.

15. في حالة سويت الجلستين بأرضية نازلة تقدر تكمل الدائرة لين العمود الدائري اليمين وتضيف عتبة وحده للدرج.

16. ليش ما تسوي الحوائط الخارجية معزولة وعريضة شوي يعني طابوق عادي داخل وبعدين عازل حراري الفوم الأبيض أو الأزرق وبعدين طابوق طيني 10 أو 15 سم وتمدد البايبات معزولة في الحائط وتفتك من منظر الدكتات البارزة الخارجية اللي تشوه المنظر؟
ملاحظ فوق في الصورة مسوي لك الحائط عريض يمكن 30 سم وباقي الجوانب لا عرض عادي 20 سم.

17. صعب أوضح كل النقاط توضيح إنشائي لكن لو ترسل لي فايلات الاوتوكاد باقدر أعدل عليها بسهولة واوضح رايي أكثر.

18. فوق عندك يا اخوي 4 جلسات وكل جلسة بتلفزيون ومستحيل تقدر تشغل تلفزيونين بوقت واحد .. حتى الجلسة الدائرية مسح العمود اليسار فيها وبقت الدائرة المحيطة بلون العمود علشان يسوي مكان للتلفزيون.. من رايي الصالة الدائرية تنلغي فوق بالكامل ويكون على الحايط القريب منها بوفيه لعمل الشاي وفيه ثلاجة ومغسلة صغيرة وشوية أدراج للصحون والأكواب وميكرويف وهذا أقدر أوضحه عدل، وتبقى عندك صالة في الزاوية كبيرة وموزعة صح وفيها تلفزيون كبير للعائلة ككل، أما الصالة الصغيرة اللي جنب الدرج فهذي ممكن تتسكر وتستوي مكتب أو غرفة ألعاب الكترونية أو سينما منزلية، ومكان العمود اللي فوق في الجلسة الدائرية لو إنلغى وإنلغت الجلسة تجي طاولة دائرية صغيرة بأربع أو 6 كراسي حسب الحاجة للفطور أو للوجبات الخفيفة.

19. الغرف تترتب أكثر والحمامات كذلك بس أعرف متطلباتك لتجهيزاتها وإحتياجك، ولو تشوف الحمام اللي جدامه مغاسل مقاسه 3 في 2 وكافي لكل القطع وترتيبه أفضل وحتى ممكن يكون 1.8 في 3 وكفاية.

[المنسى]

حلو التصميم بس ممكن اعرف كم مساحه الارض والله يهنيك

[مرتبش]

صباح الخير
الف شكر اخونا معماري قطر على هالملاحظات القيمة اللي يبي لي قعدة مضبوطة اتفكر فيها خلني بس اعلق على المداخلة الاولى وارجع بعدين للملاحظات الثانية ..

ماعندي ملحق خارجي فبيكون هذا المطبخ الاساسي وهو مفصول عن الفيلا بالليوان اللي يوزع للمغسلة والمدخل الفرعي للفيلا ومفتوح من جهة الحوش .. المدخل قريب من المطعم فبيكون سهل التعامل .

التصميم الانشائي مابديت فيه والعواميد ما انتبهت لها ومادري هل ممكن الغي عامود في الدور الاول (مثل اللي في الصالة الدائرية هل هذا شغل مقبول وكيف اقدر اعوضه ..

بالنسبة لغرفة الصلاة وغرفة الخادمة فكرتك جيدة ..هذي المنطقة اشوفها مش مرتبة والاقتراحات جميلة ومنطقية.

الملاحظات الثانية ما شالله عميقة ..اتأملها واعقب عليها والله يعينك على الاسئلة.. وهاردلك على المباراة

[معماري قطري]

الله يسعد صباحك ومساك يا اخوي

ايه والله صدمنا ميسي وربعه طلعوا غش مثل منتخبنا... للحين مهب مصدق اللي صار جنه حلم تشمتوا فينا مشجعين ريال مدريد.

إنت بس طرش لي الفايل مال التصميم ببرنامج الرسم الأوتوكاد علشان أقدر أعدل عليه بسهولة .. مع حدود الأرض وأبعادها، وباشتغل لك عليه الجمعه والسبت إن شاء الله.

[Eng/AbdallaH]

ماشاء الله تصميم جميل ومميز والاخ معمارى جزاه الله خير ذكر ملاحظات مهمه
اسمحلى ببعض الملاحظات البسيطه موضحه على الصوره
اولا فى ترتيب جزء المغسله والكي وغرفة الخدم والمصلى وعمل لوبى نفتح عليه باب غرفة النوم فى الدور الارضى ويكون مدخلها له خصوصية على الحمام دون الخروج للصاله ويكون الحمام مشترك للصاله وغرفة النوم والمصلى وكذلك غرفة النوم والحمام اللى فى نفس المكان فى الدور الاول
ثانيا مقترح لتعديل مكان السلم وعمل سلم دائرى مفتوح عادة ما يتم عمله فى الصالات الواسعه اللى زي فيلا حضرتك وكذلك عمل جزء مفتوح للسقف فى الدور الاول باللون الاصفر ويطل منه على الدور الارضى بهاندريل ذو اللون الاخضر فى الدور الاول

http://im35.gulfup.com/BZBY8.jpg (http://www.gulfup.com/?DAjBMJ)


http://im35.gulfup.com/6HxTO.jpg (http://www.gulfup.com/?pUkzlJ)

[معماري قطري]

ما شاء الله بعد ملاحظاتك إنت أخ عبدالله ممكنه وجيده .. بس مشكلة الدرج الدائري مكلف كثير وصعب ينضبط واللي قبل سهل كان .. انا ممكن أسوي نفس المبدأ اللي إنت سويته بس بدرج سيده وبزاوية 45 درجة .. مع بعض التعديلات اللي ذكرتها بس إن شاء الله على ملف الأوتوكاد بيطلع كل شيء بالمقاس وأوضح.

[Eng/AbdallaH]

بارك الله فيك يااخ معمارى وربنا يجزيك خير على مجهودك فى النصح والارشاد

[معماري قطري]

بارك الله فيك يااخ معمارى وربنا يجزيك خير على مجهودك فى النصح والارشاد

الله يسلمك يا اخوي وما عليك زود

[بن غيث]

مــــــتـــــــــــــــــــابع .. يا برشلوني :)

[معماري قطري]

مــــــتـــــــــــــــــــابع .. يا برشلوني :)

صبحك الله بالخير يا شيخ بن غيث

عاد قطر كلها برشلونيين من تقصد؟ .. بس والله المكاين الألمانية إشتغلت البارحة وأول البارحة .. مسكينه مكينة السيات 4 سلندر ما قدرت تشتغل مع مكاين ال أي إم جي والإم سيرييز.