اعملها بنفسك diy

[الدوحه1]

"Do It Yourself"
ثقافة " اعملها(افعلها) بنفسك" منتشره في تقريبا كل دول العالم بما فيها اوروبا وامريكا.
أي ان الشخص يقوم بعمل بعض الاعمال المنزليه البسيطه بنفسه من دون الاستعانه بأحد(التصليح او التركيب).
وهذا يشمل بعض التصليحات البسيطه في البيت او السياره.
انا مثلا اذا اخترب شي عندنا في البيت اقوم اصلحه بنفسي وخاصه الامور الكهربائيه ,
ونفس الشي بالنسبه للسياره.. دايما احاول ان اصلح الخراب بنفسي.
الموضوع مب مسألة توفير ولكن الواحد يكتسب خبره ويتعلم..

[خليفـة]

كل ما هو داخل البيت اسويه بنفسي
بما في ذلك الكهرباء
احب اشتغل بيدي .. وما اثق في الي اجيبهم من برع
بعض الشغلات لابد من الاستعانة بمختص
ومع ذلك اكون معاه واشوف شيسوي
وبعدها اسوي نفس العمل بنفسي

الاعتماد على النفس شي جميل
ويزرع الثقة بنفس صاحبة
موضوعك رائع اخوي

خليفـــة

[المبرمج صلاح]

سبحان الله
انا في شغلي كثيرا احب اعلم الناس واقولهم اعلمكم الشغلات البسيطة جدا
يردون علي بابتسامة جزاك الله خير انتا موجود لمن تحصل مشكلة نتصلك
ولكني اكون اسعد عندما يختار اني اعلمه باحس اني انجزت انجاز كبيير ههههههههه
ملاحظتي ان الناس الكبار يحبون يتعلمون كل شي اكثر من الشباب ما يبون يتعلمون شي

شعور جميل عندما تري الشخص يريد ان يتعلم ويعتمد على نفسه في كل شي

[Positive]

موضوع جميل وحلو الواحد حتى لو شي جديد عليه بس على الاقل يحاول يجرب يصلح او يركب شي فالبيت...

للأسف إحنا في دولة :

البترول عامل يعبئ لك سيارتك ( مع أني ما احس انه شي صعب علشان نحتاج له عامل )

فالجمعية عامل يطلع لك أغراضك من الجاري ويحطها لك بأكياس ويدف لك الجاري لين سيارتك وبعد ينزل لك الأغراض فالسياره

كل هذه الامور اشياء بسيطه ونقدر انسويها بنفسنا لكن يريدون زيادة عدد العمال الأجانب دون عذر

احس ان في اشياء وايد في حياتنا اليومية نقدر نعتمد عليها وانسويها بأنفسنا لكن للأسف تعودوا الناس على هذه الامور واحس حتى ابسط الاشياء يتكيسلون عليها او ممكن يقولون مانبي انخرب البرستيج :rolleyes2:

أنا احب الاعتماد على نفسي وما انتظر حد يسوي لي شغلي


شكراً على الموضوع الحلو

[حمد 2002]

عط الخباز خبزه ولو باق نصه

[تغلبية]

أنا احب اسوي الشي بنفسي .. علمنا ابوي نركب الليتات .. نشوف الفيوز الخربان او الضارب ... نخلط الجص ونسد شقوق الطوفه .. وغيره

واشوف في هالوقت مع رتم الحياة السريعة .. حلو الواحد يفضي نفسه شوي ويستمتع بالاعمال اليدوية ..

[musel999]

جميل انك تتعلم وتعمل

بس لي تجربه فاشله من كم يوم حبيت اتفلسف واوصل بيب ماي من المطبخ لين فلتر حاطه بري عند الطبيله وقعدت اركب وافك واثبت بالطوفه وفي محل مواد بناء قريب من البيت كل شوي اطب عنده اشتري براغي وحنفيه وفلتر وانا مالي اي خبر المهم بعد مافحيت مانجح المشروع الماي يليك من كذا مكان ومو متثبت عدل واذا زدت ضغط الماي ينفك البيب اخر شي رحت المحل وجبت الهندي يضبط الشغله انا صارلي يمكن ٣ ساعات وهو ضبطه بنص ساعه


دايما ابتدي اتفلسف اتفلسف وبعدين اجيب واحد يضبط الشغله علي العموم اتعلم واستفيد من وقتي ونشاط حلو

[معماري قطري]

اللي عاش الغربة في حياته يعرف الأعمال اليدوية

من طبخ إلى غسيل إلى غسيل السياره إلى ترتيب وغسيل صحون

انا كنت شوي كسول خصوصاً في غسيل الأكواب .. وطبعاً قبل الإجازة تكون إمتحانات ولا أفضى لشيء وبعدها سفر لقطر العزيزة، وحصل كانت آخر ست شهور لي وكنت متملك وناوي الزواج في الصيف، وتركت شقتي معتفسه وأكواب الشاي يمكن 10 بدون غسيل واللبتون فيهم، ورجعت طلع إخوي بيتزوج بعد أيام وصادتني الغيرة تزوجت قبله بيومين وخذت زوجتي معاي وكنت ناسي سالفة الشقة .. نزلنا مطار ميامي وخذنا تكسي كابرس أظن وتكاسيهم شيء صفرا أكثرها وبعضها خضراء فاقعه .. دخلت ام العيال الشقه وشافتني على حقيقتي .. ثاني يوم رحت المدرسه ورجعت الا شقتي غير مثل جده غير .. تلق وتبرق من النظافة عرفت إني صج كسول وكل اللي أسويه نقطه في بحر.

[جاسم الدوحة]

ما يمنع الواحد يكون منظم ومكانه مرتب ونظيف
لكن لمسـة المرأة في بيتها .. غيــــــــــــــــر

[باراكودا]

ما أنصح بالمحاولة لخطورة بعض الاعمال خاصة الكهربائية
يجب الابتعاد عن العبث بالمكيف لوجود مكثف صاعق والساخانات المركزية
لوجود ضغط ماء قوي يسبب أنفجار وقد أعذر من أنذر .

[الزعفراني]

أنا احب اسوي الشي بنفسي .. علمنا ابوي نركب الليتات .. نشوف الفيوز الخربان او الضارب ... نخلط الجص ونسد شقوق الطوفه .. وغيره

واشوف في هالوقت مع رتم الحياة السريعة .. حلو الواحد يفضي نفسه شوي ويستمتع بالاعمال اليدوية ..


مب سهله :shy:

طلعت المواهب :secret:

[شيخ الديرة]

كل ما هو داخل البيت اسويه بنفسي
بما في ذلك الكهرباء
احب اشتغل بيدي .. وما اثق في الي اجيبهم من برع
بعض الشغلات لابد من الاستعانة بمختص
ومع ذلك اكون معاه واشوف شيسوي
وبعدها اسوي نفس العمل بنفسي

الاعتماد على النفس شي جميل
ويزرع الثقة بنفس صاحبة
موضوعك رائع اخوي

خليفـــة

سيم سيم:)

[أخت الكل]

انا اتمنى اغير سلندر الغاز لما يفضى بس الشكوى لله مدري هو خوف أو هي فوبيا منه

لكن الاشياء الثانية في حياتي الحمد لله بنفسي أعملها

[بصمة قطرية]

بصراحة أحس بمتعة لما أسوي شي بنفسي
الحمدلله عندي الرغبة بالتعلم
بس أخاف وايد من الكهرباء .. :secret:
حدي أغير ليتات :secret:

[بوخالد911]

الاعتماد على النفس
شعور لا يوصف