انتفاخ في الجسور الخرسانيه ؟

[MAZEN37]

السلام , سؤالي لمختصينا الاعزاء واصحاب الخبرات بمنتدانا العزيز
بعد فك البليوت والاخشاب عن الصبيات في المشروع (فيلا) وبعد ان جاوا البنائيين يصفوا الطابوق طبعا حطو ميزان وخيوط لمساواة الطوف على خط مستقيم لكن للاسف
طلعت المصايب وظهر بطن للجسور وعدم استواء من العمدان بعد وانتفاخ
طبعا ملاحظه كان البناء بالنظام الافرنجي
كلمت المقاول قال لا عادي البلاستر بيغطي العيوب مع شوية تكسير للخرسانه ومساواتها
سؤالي هل التكسير والنقر بالخرسانه يؤثر سلبا بسلامة المبنى وممكن يوصل لشبكة الحديد داخل الخرسانه ؟
ام هل اخلي الوضع على ما هو عليه ويعمل بلاستر سميك يغطي ؟

[Bozizoo]

الانتفاخ بسبب عدم تثبيت فريمات الخشب جيدا
ومثل ماقالك المقاول ممكن ياغطيها باضافة سمك البلاستر وانا افضل الشي هذا
تكسير لاميل له لكن اذا كان ولابد بسبب الانتفاخ كبير ممكن
لكن سوال اخوي الاستشاري وينه عن الموضوع هذا
هو الي يقدر يقرر بعد الكشف شنو ممكن يسوي

[معماري قطري]

الله يعينك مبين ان المقاول همجي

شوف هذي الطريقة ممكن تنفع بس تسبب مشاكل لو البلاستر سميك وايد يتفكك ويطيح أو تطلع فيه شلوخ قوية، وطبيعي بيكون في مكان سميك ومكان ضعيف .. أتوقع فيه إضافات للبلاستر تقويه وتمنع الشلوخ وتسمح بسمك كبير وبدون تكسير خله يخسر من الصوبين، وأبسط إضافة هي سائل الفايبر .. حطيت مواصفاته الفنية في موضوع عقود البناء وبتحصلها في بداية حساب الكميات لو رجعت للموضوع.

وبعدين لا تنسى التربيط بين الطابوق وأي خرسانة بمسامير خرسانة تنضرب بمسدس وتمسك حديد خاص ستانلس ينغمس في المونة اللي بين الطابوق، ما دامك سويت النظام الافرنجي شكل ما يسمونه .. خله يسويه صح وانتبه لهالأُمور.

[فتى الجود]

السلام عليكم

الأستشارى وين ياخوى ؟؟ !!

أصول الصنعه ان الأستشارى يمر بعد تركيب و رص الخشب والحديد

وبعد الصبية وفتحها من قبل العمال

يمر ويشوف
ويتأكد ان الأمور تسير على ما يرام


والمفروض ان هذا الخطأ يكتشفه الأستشارى مب عمال الطابوق

على كل الأحوال الحين اللى صار صار


حظرهم كلهم في الموقع

01 الأستشارى
02مع المقاول
03 وانت بصفتك المالك

في الموقع وخل الأستشارى يبحث عن حل مع المقاول على أرض الواقع

والله يعينك

[معماري قطري]

أساس الحل ما ذكره الأخ فتي الجود وما ادري شلون راح عن تفكيري في البداية، وإن تلكع الإستشاري شوته بوز وشوف غيره.

[naklan]

هلا اخوي mazen37 ما فيه داعي للقلق تحصل في
احسن الشرك الموضوع وما فيه انه في بعظ الجسور تفلت ملزمة
او يقوس الخشب من ضغط الخرسانه المفروض اذا كان جسر كبير يعملون
له ملزمه براغي الي تجي لها براغي من الصوبين هذي تحكم الشغل :)

شوف يالغالي اذا كان التقويس في حدود 3 سانتي يمشي مع البلاستر
واذا كان اكبر الافضل ان المقاول يجيب هلتي ويشيل طبقة من الصبيه لين
يصير البروز 2 سانتي و يمشي مع البلاستر ولا تحاتي البروز هذا اخرسانه
زايده وممكن تنشال ببساطه وهي بعيده كل البعد عن الحديد

وربي يوفقك اخوي :)

[فتى الجود]

هلا اخوي mazen37 ما فيه داعي للقلق تحصل في
احسن الشرك الموضوع وما فيه انه في بعظ الجسور تفلت ملزمة
او يقوس الخشب من ضغط الخرسانه المفروض اذا كان جسر كبير يعملون
له ملزمه براغي الي تجي لها براغي من الصوبين هذي تحكم الشغل :)

شوف يالغالي اذا كان التقويس في حدود 3 سانتي يمشي مع البلاستر
واذا كان اكبر الافضل ان المقاول يجيب هلتي ويشيل طبقة من الصبيه لين
يصير البروز 2 سانتي و يمشي مع البلاستر ولا تحاتي البروز هذا اخرسانه
زايده وممكن تنشال ببساطه وهي بعيده كل البعد عن الحديد

وربي يوفقك اخوي :)


السلام عليكم

وأظف على كلام اخوى / naklan

انه لازم هذا الكلام يكون تحت أشراف الأستشارى

مب على كيف المقاول

[jassimqtr]

اخوي خل المقاول يكسر الخرسانه الزايده بحيث يزيل الانتفاخ وماعليها ضرر بس اذا وصل للحديد في هذا الحال لازم يشوف للعمود حل اخر وبالنسبة للبلاستر اذا زادة السماكه يضهر عليها شرخ وتشققات فالمستقبل . المفروض المقاول قبل عملية الصب يشيك على المسافات بين خشب التربيط ويكون كل 40 سانتي مرربع تربيط وحجم العمود ايضا يحكم طريقة التربيط هذي الامور الفنيه الفروض يشرف عليها الاستشاري ويتأكد منها وكذلك السقف قبل عملية الصب يتأكد من المسافات بين الجيكات وتكون كافيه لحمل السقف كامل من حديد وخرسانه وخشب ومايبخل بالجيكات

[MAZEN37]

اشكر تفاعلكم ونصايحكم من خلا تجاربكم
لكن سبحان الله هذا الوضع في جسر واحد فقط وانشاء الله بحاول اخذ بنصايحكم

[مهندس يحيى]

السلام عليكم
كلام الأخ فتى الجود صحيح مية بالمية
والإستشاري مب شغلتو يشييك على الملازم وحدة وحدة
المهم تقدر تكسرالخرسانة الزايدة أفضل من ماتسمك البلاسترعن 2سم لانها تطبل وبالمستقبل تطيح
يمكنك الإستعانة بإضافات البوندنغ(عبارة عن سائل مثل الحليب) يخلط مع الرشة الاولى للبلاستر لزيادة التماسك مع الجدار .
وماتنسى الشبك في الفواصل بين الطابوق والخرسانة