اول خطوة لتصميم بيت العمر [الأرشيف] - منتديات شبكة الأسهم القطرية

مشاهدة النسخة كاملة : اول خطوة لتصميم بيت العمر

مسمس12

12-05-2013, 12:04 AM

السلام عليكم

بغيت اسال وين احسن الاماكن انسوي خرايط البيت وكم الاسعار ماعندي اي فكرة اول مرة بنبني علما بان مساحة الارض1200 وناوين انسوي مجالس خارجية للرجال كم حدود المساحة اللي بتبقى للبنيان اذا حابين نترك مساحة حلوة للحوش

وجزاكم الله خير

معماري قطري

12-05-2013, 06:37 AM

الله يعينكم وموفقين إن شاء الله

نفس مساحة بيتي الحالي .. عن تجربتي سويت بيت من دورين وبنتهاوس بمساحة قريبة من 1000 متر مربع .. فيه مجلسين في المدخل وصاله متصله من الأرضي للأول بجزء مفتوح على دورين .. عدد الغرف 7 وكلها تكرمون بحمام مختلفة المساحات وبعضها بغرف ملابس، وخليت صالة فوق لغرفة مكتبه مع ألعاب رياضية لها إطلالة على 3 جهات مع باب للسقف، وكنت ناوي أسوي فيه جلسة خارجية.

الحوش وزعته بسبع أحواض زراعية بأشكال ومساحات مختلفه أهمها دوار في المدخل تدور عليه السيارة، مع طبيلات مظلله تكفي ل 7 سيارات بالإضافة لمساحة تحت المدخل مظللة لسيارة ولمساحة مفتوحة لسيارتين، وخليت مساحة ورا سويت فيها حوض سباحة متصل بالصالة مزدوجة الإرتفاع، وغطيته بسقف أيضاً مزدوج الإرتفاع، والملحق تقريباً 70 متر فيه مطبخ ومخزن وغرفة سواق.

ولو أي حد عجبته فكرة التصميم وحب ينفذه أو شيء مشابه باساعده في التواصل مع الإستشاري للحصول على فكره مطابقة أو قريبه من اللي سويتها.

الصالات كلها لكل جزء سكايلايت ويدخل النور الطبيعي من أول الفجر لوقت المغرب.

كلفني البنيان كامل سنة 2004 حوالي 3 ملايين يمكن أكثر بشوي وما يشمل حوض السباحة اللي سويته من سنتين بتكلفة وصلت 240 ألف.

لكم بما إنكم محتاجين مجلس خارجي الله يعينكم على التخبيط العمراني، شفت بيت كبير .. قصر .. مسوي مواقف السيارات تحت المجلس الخارجي اللي رافعه فوق ومسوي فوقه مكتب .. وبإرتفاع عالي لدرجة إنه دفن الأرض لحد طوفة الجار من فوق من الخارج .. البيت له سنين ينبني من 2000 تقريباً للحين ما سكن، ووصل سعره 36 مليون وكان معروض وقتها ب 2.1 مليون عظم.

مسمس12

13-05-2013, 05:51 PM

جزاك الله كل خير ممكن اطرش لي اسم المكتب اللي سوا لك الخريطة والله يهنيك فالبيت ماشاء الله

Bozizoo

13-05-2013, 06:50 PM

اخوي كل واحد تختلف احتياجاته عن الثاني
انت شوف شنهي احتياجاتك من بيت العمر
و تحب البيت يكون صغير او كبير صلات مفتوحه او مسكره
كم غرفة تحتاج وهل تحتاج لفت في البيت او لا
نوع التكييف شنو سنترال او سيمي داكت او اسبلت
وكم ميزانيتك اضافه على 1.2 مليون
تحتاج بيسمت او لا
قبل لا تسوي اي شي حدد احتياجاتك في بيت العمر
و كم ميزانيتك

مسمس12

14-05-2013, 04:15 PM

مضارب دوسري

14-05-2013, 06:31 PM

هلا اخوي

لازم اول شي تعرف انت كم تقدر تزيد ؟
ولا تبي تبني بالمليون وميتين فقط وتزيد شي بسيط 100 او 150 الف
اذا جذي لازم مساحة البنيان ماتزيد عن 650
عشان تكون مرتب امورك من الحين
عندك مثلا تزيد 400 الف
تقدر تبني حتى مساحة 800 الى 850

كم غرفه تبي ؟
البنت هاوس تبي تسويه غرفه بحمام وهذا الافضل ولا لا ؟
الدور الارضي يفضل يكون مرتفع
يعني الدور الارضي 4 متر والاول 3.6 والبنت هاوس 3
وهذا اللي انا مسويه ف بيتي
حاول تخلي غرفة الماستر كبيره ما تقل عن 6 في 7 واذا زادت احسن
تحس باريحيه
وباقي الغرف تقدر تخليهم 4 في 5 مع دريس روم وحمام لكل غرفه
تقدر تسوي غرفه فالدور الارضي وهذا الافضل يمكن الوالده تبات عندكم او ام المره ليله او الله يكفيكم الشر احد يتعب او يصيده كسر تكون هالغرفه جاهزه وهي ضروريه بصراحه
تقدر تسوي اربع غرف فوق وغرفه فالبنت هاوس
الحمامات
تقدر تخليها كلها 2 في 2.5
والماستر تخليه 3 في 4
الدريس روم
فالماستر 2.5 في 4
والغرف الثانيه 2 في 2.5
تقدر تخلي تحت صالتين مفتوحين على بعض تعطي المكان نفسيه حلوه اكثر من ان يكونون مسكرين
هذا كله اقولك اياه اذا بتسوي مساحة البنيان اقل من 700 بشوي

تقدر تريح راسك وتسوي شكل البيت صندوق للاسباب التاليه
صندوق يعني مربع
عشان ما تحتاج مقاول ممتاز لان مثل هالمقاولين يضرب عليك فالسعر
تحتاج فقط مقاول جيد وامين
وسعره بتلقاه مناسب ما ينجاوز ال 950 للمتر
تستغل المساحات اذا كان مربع لان الزوايا والحركات ونص دائري وغيره تلقى نفسك بنيت بيت مساحة 900 متر ولكن فالداخل اصغر بكثير من 900 متر لانها تاكل المساحات

هذا اللي عندي والله يوفقك

مضارب دوسري

14-05-2013, 06:40 PM

والمكتب انصحك تروح الاقصى للاستشارات الهندسيه وتخليهم هم استشاريين للبيت مستقبلا
يسوون الخرايط بسعر 10000 الى 12500
واشرافهم عالبنيان جيد حسب تجربتي معاهم
لا تخلي الاستشاري براتب خله مره وحده وهم ياخذون الاشراف ب 8000 لين مرحلة صب البنت هاوس وعقب ينتهي شغلهم ويجون وقت توقيع دفعات التشطيب