شوركم (كوفي شوب راقي)

[كاشف الغطاء]

السلام عليكم ورحمة الله وبركاته

بصراحة مب عارف شلون ابدا موضوعي
المهم
واحد من الشباب فتح له كوفي شوب من فترة كأول مشروع له وهو المفروض انه يكمل دراسته بس مسوي له سجل تجاري وحاط الفكرة في باله ودارسها من قبل والحمدلله المحل صار على ارض الواقع وبداه من الصفر تأسيس وعلامة تجارية قوية وكل شي

اللي صار ان الأيام تركض والريال صار له واقف على حطة يده من اول مافتح وهو فتح في منطقة تعبانة شوي من ناحية الزباين لكنه مشى وخذ له سمعة بسيطة بس ادارة المحل وكلمه اكثر من شخص عن الشراكة او شراء المحل او فتح فرع (في بداية الشغل) وحتى بعض الاماكن عرضت ان يفتح عندهم بايجار رمزي تشجيع له وكان هو متخوف من المشاكل فرفض وفي نفس الوقت ماتوقعها بها الصعوبة من ناحية تعامل مع العمال ومعاملات وبلدية ومشاكل ونقل العمال وجدول العمل الخ ...

والخلاصة ان الرجال يدرس برع ولازم يروح يدرس الكورس الجاي خصوصا انه موقف لفترة ومحتار في موضوع الكوفي شيسوي فيه خصوصا ان محد من صوبه يقدر يعابل المحل وعنده فكرة ادارية عالاقل فطلب رايي وقلت له باشاور اعضاء المنتدى هو الحين بين اربع خيارات

اما انه يأجر المحل على هندي عنده كافيتيريا وهالشي انا قلت له اذا انت تفكر تستفيد منه ومن سمعته لما تخلص وتفتحه مرة ثانية ماينفع خصوصا انه تعبان عالاثاث وعلى الشغل وجايب مكاين ايطالية صعبه الهندي يتعامل معاها

والخيار الثاني انه يبيع المحل بديكوره وكل شي بس مشكلته انه الديكور كلفه وايد غير الأغراض اللي فالمحل هو يقول يمكن السعر اللي يجيه مايكون عادل غير انه يبي يكمل بنفس الاسم والشعار والمستوى بعد مايخلص دراسة

والخيار الثالث انه يعرض الشراكة على اشخاص بشروط معقولة بس هو مب عارف وين يحصل هالاشخاص اللي يتجاوبون معاه ويكون تفكيرهم مناسب لتفكيره لان الريال خايف ربه ومايبي يحط شيشة وبنات وخربطه وهو يكون موجود في قطر تقريبا 6 شهور يقدر يتابع امور المحل ويتابعها شريكه اذا كان مسافر

والخيار الرابع وهو بدا يشتغل عليه هالفترة انه يجيب مدير يشتغل له على المحل سواء من قطر او من بره ويعين محاسب عليه ويريح راسه بس هالراي فيه مشاكل من ناحية انه مايضمن اشلون هالمدير يشتغل خصوصا انه مخسر وايد عالفكرة وماياب فرنشايز او مدير من البداية

عطوني رايكم وانا كشخص وقفت معاه من اول مافتح واسبوعياً اروح المحل لان الفكرة عاجبتني وكنت بادش وياه فالبداية بس على ويه زواج والبزنس يبيله صبر وخبرة والله ييسر

[Ashom Qatar]

الخيار الرابع وهو بدا يشتغل عليه هالفترة انه يجيب مدير يشتغل له على المحل سواء من قطر او من بره ويعين محاسب عليه ويريح راسه بس هالراي فيه مشاكل من ناحية انه مايضمن اشلون هالمدير يشتغل خصوصا انه مخسر وايد عالفكرة وماياب فرنشايز او مدير من البداية

هذا افضل حل
مشاريع الكوفي شوب مربحه بس يبيلها صبر

[كاشف الغطاء]

هذي هي انا بعد قلت جذي انزين شنو الافضل مدير من برع او من قطر لان ياووه سوريين وسودانيين وفلبيني عرضوا عليه ادارة المحل ؟؟؟

[Ashom Qatar]

اكيد من داخل قطر والافضل من جنسية عربية بس لو حاب تحط مثلا مدير وسكرتير ومحاسب خلهم من جنسيات مختلفة عشان مايتحزبون في ظل غيابكم وخلهم يطرشون لكم تقرير شهري او اسبوعي حول كمية الدخل والاهلاكات والمواد الي يحتاجونها عشان تكونون على بينه

[كاشف الغطاء]

اكيد من داخل قطر والافضل من جنسية عربية بس لو حاب تحط مثلا مدير وسكرتير ومحاسب خلهم من جنسيات مختلفة عشان مايتحزبون في ظل غيابكم وخلهم يطرشون لكم تقرير شهري او اسبوعي حول كمية الدخل والاهلاكات والمواد الي يحتاجونها عشان تكونون على بينه

باقوله بس احس انه مابيعجبه لانه مايداني الزلمات خصوصا اللي فقطر :nice:

وشكرا يعطيك العافية بس ليش مايجيب حد من برع قطر عشان يكون متفرغ له ومب داش على طمع

[النهار]

ان شاءالله بيحصل حل قبل السفر

[كاشف الغطاء]

ان شاءالله بيحصل حل قبل السفر

آمين , توه مكلمني يقولي ان في وحدة اليوم الصبح عرضت عليه تاجير المحل بالمعدات والاثاث
شنو المبلغ المناسب اذا كان المحل مكلفه اكثر من نص مليون ؟؟

[شموخ دائم]

,

,



مرحبا

المعلومه المهمه لنا ما تم ذكرها
:)

هل المحل الان يغطي الايجار ورواتب العمال وسكنهم وكهرباء وماء ومواد الشغل
؟؟؟

اذا المحل يغطي ويطلع له ربح لازم مايفرط فيه نهائيا

يحط مدير يدير الشغل !! يتفق معاه على راتب معين ونسبه من الارباح 10 % او 15 %
على حسب دخل المحل

اما اذا المحل مايدخل مصاريفه !! يبيعه احسن له ويسترجع راس ماله !!

التجاره مافيها عواطف !!

حتى لو تعب في المحل وفي ترتيبه حتى طلع على ارض الواقع
هذا ما مايعني انه يحتفظ فيه

لان فكره دخول التجاره هو فكره ( الربح ) اول شي

وهذا الي يحدد انه يحتفظ فيه او يبيعه

مسئله ارجاع راس المال وفوقه الربح

متى راح يوصل الى هذه النقطه !!

هذا الي يحدد سير المشروع وعليه يتم اتخاذ القرار !!

انا مقدر موقفه وتعبه والتاجر يعز عليه بيع مشروعه الي كان يحلم فيه ويخطط له
هذا انا ايضا يعز علي اقول هذا الكلام

لكن التجاره ربح وخساره والشاطر الي يطلع بالربح او يطلع باقل خساره ممكنه

الاستمرار في المحل وهو خسران هذا مشكله كبيره

اما يبيعه

اما يحط مدير زين اذا فيه ربح

اما يغير موقعه !! اذا ممكن واهم شي الايجار مايكون غالي لان الايجار هو سبب خساره 60% من تجار قطر

و40 % على الاداره سيئه كانت او مدير يتلاعب في دخل المحل

الحل الاخير هو الحل الي يلجى له كل تجار قطر ( يأجر ) المحل بكل معداته واسمه

وياخذ 6500ريال في الشهر

في السنه يجيب له 78الف

في 5 سنوات يجيب راس ماله

ويبيعه في السنه الخامسه خلو بمعداته بيجيب له 250 الف اقل شي

هذا هو الربح

على فكره ايجار الفيلا في الخور 6500 الان
وقيمتها مع الارض 2 مليون
:)



بالتوفيق له والله ييسر اموره

,

,


اخوك


شموخ دائم

[كاشف الغطاء]

الله عليك اخوي شموخ يبت الزبدة

بما انه توه بادي هو فاهم كل نقطة وكل شي في محله والريال يومياً هناك قاعد

هو يغطي الايجار (المرتفع) بس مايجيب له ربح لان ادارة المحل في يده وهو في اشيه وايد ناقصته مثل الخبرة وغير هالشي ان المحل للحين ماخذ اسمه واشتهر يعني هو تقريبا نفس فكرة الخيام بس بشكل ارقى لكن الخيام عنده اكل وسندويشات وعنده زباينه فهذا هو الفرق

فيات الفكرة انه يعين مدير عالمحل

اما فكرة انه ياجر المحل نقلت له اقتراحك فقالي انه الشي اللي خايف منه انه يأجره على هندي ويخرب كل شي فيه وهو يبي يرجع له عقب مايخلص دراسة

وشي ثاني اللي هو شلون يحصل الشخص اللي يستأجر منه وبهالسعر؟

والشي الثالث اشلون يضمن ان الشخص ماينكبه وهو مسافر يسوي له حركة ولا شي هل يوقع معاه عقد ايجار للمحل مثلا او شيسوي

؟؟؟؟

[شموخ دائم]

,

,


مرحبا

اساسيات التاجر الناجح انه ما يخاف
صحيح يحرص ويتابع لكن ماعنده الخوف نهائيا

لازم تدخل اكل في المحل سندويشات شغلات خفيفه كروزون كيكات
هذي الي فيها المربحه
وتحتاج مدير جيد ان شاء الله تحصل
اتعب في هذا الشخص لانه هو اساس الربح بعد الله سبحانه وتعالى
اذا بيتم خايف احد ينكبه عمره ماراح يقدر يشتغل بقطر بزنز
بقطر لازم شخص يدير لك المحل
هذا من اساسيات العمل في قطر
تطمن في ناس فيها خير وتحب تشتغل
جيب لك فلبيني حطه مدير
:)
بس يكون خبره اشتغل في مسئول في مطعم او كافيه
كوفي خالي ما تقدر تمشي المحل
لازم اكل معاه

اتعب على هذا المسئول كثير
حط اعلانات بالجريده الانجليزيه وسو معاهم مقابلات
اشخلهم واحد واحد شوف منو يناسبك بشخصيته وخبرته
شوف كم سنه مشتغل وشنو نوع المكان الي اشتغل فيه

لاتخلي مكتب ولا تخلي صديق او ايجنسي في الفلبين
الا وتراسلهم وعندك النت شيك على كل الشركات توظيف العماله
وشوف السي في
واستخدم طريقه ( تجربه الشخص ) كل مدير تجيبه
تقوله تحت التجربه 3 شهور
اذا نفع دق له الاقامه اذا ما عجبك استبدله بسهوله

لازم تتعب على هذا الشخص ترى في ناس تسافر الفلبين والهند
عشان يجيب له شخص فاهم يختاره بعنايه بعد المقابلات


اما الايجار فهذا تحتاج اعلان في الجريده وتكتب عقد مع الشخص تحدد فيه مسئولياته من دفع ايجار
المحل والرواتب ووالمصاريف وعمل ايصالات فيها ويقدمها لك كل نهايه شهر حتى تضمن ان كل المصاريف تم تغطيتها
واذا ما سدد راح تعرف من اول شهر وما تحصل مشكله وفي العقد عند عدم التسديد شهرين متتالين يتم فسخ العقد
ويعود لك المحل

ويعطيك شيكات مقدمه لسنه كل بدايه شهر تصرفه ان شاء الله

والله يوفقك


,

,



اخوك


شموخ دائم

[كاشف الغطاء]

شكراً لكم يقول هو جرب العمالة الفلبينية ممتازين ومدربين بس فيهم مشكلة ان صعبة يتصرفون يعني ماعندهم مثل علاقات العربي فهو حط اعلان وينتظر يقابلهم

وشكرا شموخ دائم ماقصرت وبالفعل كوفي من غير اكل مايمشي

[القانوني]

:)من خلال ترددي على كثير من الكوفي شوبات


1- عليك ان يكون فيه نت للكوفي فكثير من الشباب صار ايجي بالاب توب او الايباد ويبي النت :)

2- خصص مكان للمدخنين وغير المدخنين

3- الوقت وفكثير من الشباب يحب الوقت المفتوح علشان ايي على مزاجه




القانوني ،،،

[كاشف الغطاء]

اخر المستجدات ان الرجال حط اعلان بيع او تأجير للمحل او توظيف مدير وهو يفضل البيع والتأجير عشان يرتاح من البوق وهو مسافر يقول انه ياته 3 عروض من عرب مصري وسوري ولبناني للتأجير ودلال اتصله بخصوص البيع وقاعد يدرس العروض الله يوفقه

[aljabini]

السلام عليكم ...
أخوي انا مهتم بالموضوع ... ممكن تراسلني عالخاص برقم التليفون ...
وشكرا

[كاشف الغطاء]

السلام عليكم ...
أخوي انا مهتم بالموضوع ... ممكن تراسلني عالخاص برقم التليفون ...
وشكرا

تم .........