3 مواقف

[محسن العجي]

3 مواقف مرت علي وأتمنى من الدولة تأخذها بعين الاعتبار

الموقف الأول

رجال وده يتزوج ما عنده كاش مر على البنك وقالوله بنعطيك200 وفوائدها 20 ألف ،، قاعه الحريم وتجهيز العرس بيكلفه حول 200 ألف قال خيره وراح الديوان علشان يقدم مساعده زواج ورد البنك وخذ 100 علشان المهر وعرس الرجال والحين عنده ولد و مساعده الزواج جات وطلعت 20 ألف

الموقف الثاني

رجال متزوج من 10 سنوات والله ما رزقه بعيال راجع اغلب مستشفيات وعيادات قطر ومالقى له دكتور يرسي معه على بر كل دكتور كلامه غير عن الثاني ومستشفى حمد علشان يسوي له عمليه أنابيب قالوله موعدك بعد 9 شهور

الموقف الثالث

رجال راعي اسره وعنده 4 وعليه التزامات ومصاريف إيجار بيت وفواتير ومصاريف بيت وده ينجب أكثر من العيال لكن يفكر يعيش الأربعة حياه مستقره


أتمنى من الدولة مساعده الشباب في الزواج
أتمنى من الدوله يكثرون ويركزون على المراكز الإنجابية صحيح بيد الله لكن على الدوله أن تسعى في إنشاء مثل هالمراكز الطبية لان وضع القطريين وخاصه في هالجيل ما يطمئن أقلية بنصير
وبخصوص الموقف الثالث أتمنى من الدوله تشجع على الإنجاب وتوفر لهم متطلبات اسوه بالدول المجاورة

القصد من الموضوع والله أني خائف من السنين الجايه نصير أقيله في بلادنا

[العلم]

اتوقع احنا اقليه الآن ..:secret:

[موظف ((حكومي]

موتتوقع الا اكيد

[يوسف0]

يارجل الدوله ليست بحاجه للمواطنين عندهم اكتفاء

[عشق الوطن]

اصلا احنا ١٧٪ في بلادنا

تعتقد مو اقليه ؟؟

[أم نواري1]

زدنا وإلا مازدنا
إذا الحين صراع عشان لقمة العيش والتوظيف
اللي بكره بيقعدونهم فالبيوت

من جذيه من الحين يضيقون علينا ونفنقش عشان مانجيب عيال يضيقون عليهم
بسم الله على عيالنا

[ام ناصر1]

مافي مانع نصير اقلية بس مع امتيازات ....غالبية دول الخليج المواطنين اقلية
بالسابق كان المتجنسين يزاحمونا مع المقيمين على الخدمات
الحين المجنسين ومواليد الدوحة داخلين بالحسبة مع ضغط المقيمين والزائرين على خدماتنا
والله اعلم ايش الي باقي ...
خوفي ننتهي لوضع جاليات لها لوبي ومواطنين اقلية مع دعم المتجنسين ومواليد قطر لعددنا
مافي عوامل للتفاؤل لزيادة العدد في عوامل كبيرة ومتسارعة لحدوث تغير في التركيبة السكانية ....
المشكلة تأثير ذلك ع الابناء بعد كم سنة محد عارف شكله ولا نوعه ...سواء في مجال الخدمات والحصول ع الاراضي
والتوظيف والعادات والتقاليد والتنشئة ..

[رفيق الصحراء]

من اول ماتدفق البترول بقطر واحنا اقلية والاجانب قاموا يجون ويشتغلون عندنا واكثروا بالبلد فصرنا اقلية

[Right]

بعد فترة زمنية .. سيصبح القطري القطري .. نادر الوجود !!!



أتوقع بنشوف برنامج عنه على " قناة ناشيونال جيوجرافيك " لأنه مهدد بالإنقراض

[مضارب دوسري]

الموقف الاول
محد قاله روح فوشر قدام الناس عن طريق قرض
200 الف تكفي لعرس كامل
قاعه ريجنسي ب 35000 وعرس الرجاجيل يكلف 35000 بالكثير اذا خيمه
و30 لتجهيز قاعة الحريم
وحاليا قاعة ازدان مايحتاي وب 1000 ريال للقطري
والدوله قاعده تبني قاعات اعراس باسعار رمزيه
ولكن
هل بيسوون فيها اعراس! الله اعلم

[الجوكر90]

الموقف الاول
محد قاله روح فوشر قدام الناس عن طريق قرض
200 الف تكفي لعرس كامل
قاعه ريجنسي ب 35000 وعرس الرجاجيل يكلف 35000 بالكثير اذا خيمه
و30 لتجهيز قاعة الحريم
وحاليا قاعة ازدان مايحتاي وب 1000 ريال للقطري
والدوله قاعده تبني قاعات اعراس باسعار رمزيه
ولكن
هل بيسوون فيها اعراس! الله اعلم

الشيخ مب جي الحسبه
رجينسي ب65000 مع كل شي
بس عرس الرجاجيل تقدر فنادي الاهلي او العربي ب5000

بس لو كل واحد مب مقتدر مايسوي عرس وﻻ هم يحزنون يعني بس ينزل عشى حق ربعه وهله
وبنزل عشى ثاني حق ربع العروس واهلها المقربين
كنا بنشوف العرس مايكلف الا 150 الف

والخاسر الاكبر فهل الامور البنيه واهلها
ﻻنها بتقعد عند اهلها لين مايصير عمرها 28 وﻻ 30 واخر شي راح تقبل باي شي
انزين لو من البدايه قبلتي باي شي جان فكيتي عمرج من القيل والقال

وبالتوفيق

[مضارب دوسري]

يعطيك العافيه يا الجوكر
وعلى ماظن فيه خيام لاعراس الحريم
يعني اي شاب يقدر يتزوج بدون ماياخذ ديون او عالاقل بدل ماياخذ 400 ياخذ ميتين او اقل
لو تنتشر عندنا ثقافة مد رجولك على قد لحافك كان اشياء وايد ارتحنا منها
في شباب ياخذون قروض عشان تضبيط سياره
وفي شباب ياخذون قروض عشان يسافر يفتل هو وربعه او هو واهله
وفي وفي وفي
ولكن بعد ذلك ؟
من الخسران ؟
اعرف واحد كل سنه يسحب سلفه 80 الف بسددها على سنه
عشان السفر
قلت له حلو يعني مرتب نفسك
بس ليش ماتمنع نفسك من السفر سنه وحده بس
واللي بعدها تجمع كل شهر مبلغ القسط اللي ياخذونه منك
وتريح نفسك
قال لا ماعرف اوفر جذي اريح واحسن

[عيون الدوحة]

من ناحية مواعيد قسم الانابيب لازم فوق ال 6 شهر وتحصل موعد
ضغط الجنسيات الاجنبية في هذا القسم وايد كبيرً
ولاتوجد الا غرفة عمليات واحدة يتناوبون عليها الدكاترة
ومكان انتظار النساء وايد ضيق ومش من الاقسام الى تم تحديث كراسيها
في كراسي مبقعة الله يعزكم
هذا القسم يبغي له اهتمام كبير من الدولة

[عيون الدوحة]

ياريت الدولة تتجة مثل تصرف دولة الامارات عرس الرجاجيل يكون العصر
لتوفير البذخ في الاكل الي يصير

وليت زواج الجريم يكون مثل زواج الانكليز زواج بسيط

[Doha 2016]

مافي مانع نصير اقلية بس مع امتيازات ....غالبية دول الخليج المواطنين اقلية
بالسابق كان المتجنسين يزاحمونا مع المقيمين على الخدمات
الحين المجنسين ومواليد الدوحة داخلين بالحسبة مع ضغط المقيمين والزائرين على خدماتنا
والله اعلم ايش الي باقي ...
خوفي ننتهي لوضع جاليات لها لوبي ومواطنين اقلية مع دعم المتجنسين ومواليد قطر لعددنا
مافي عوامل للتفاؤل لزيادة العدد في عوامل كبيرة ومتسارعة لحدوث تغير في التركيبة السكانية ....
المشكلة تأثير ذلك ع الابناء بعد كم سنة محد عارف شكله ولا نوعه ...سواء في مجال الخدمات والحصول ع الاراضي
والتوظيف والعادات والتقاليد والتنشئة ..





ا[b]

اقليه شنو مع امتيازات الله يرحم والديج
وبعدين شنهو اللي مضايقج في المجنسين يعني اللي يسمعج عندنا يجنسون مليون شخص في السنه
ولا كنهم حق اعداد معينه وبالعشرات
وبعدين المجنسين اللي تتكلمين عنهم صار لهم 50 و 60 و70 سنه في هالبلاد
وعيالهم وعيال عيالهم مواليد قطر
والتجنيس امر سيادي واميري في نفس الوقت مالج حق تتكلمين فيه

ولا تحاتين الدوله تعرف تفكر تجنس من وتخلي من واول مره اعرف ان المجنسين ضايقوا المواطنين في الخدمات
يعني المجنسن ما كنهم مواطنين


والمواليد . . . شلمشكله لو حصلو خدمات تعليميه وطبيه دام الدوله فيها خير
لاتكوني قاسيه عليهم بهالطريق المواليد الي تتكلمين عنهم قدموا الكثير لخدمه هذا البلاد


يا ريت لو نبعد عن التفكير بالهطريقه المجنسين والاصليين خلنا نرتقي
بعض الناس تكتب ردود وتعطي انطباع عنصري للاخرين
الناس تناقش قضايا العماله الوافده وتاثيرها على البلاد من ناحيه اقتصاديه وثقافيه واجتماعيه
وانتي تناقشي ناس متجنسه وكنها طايحه علينا من سطح القمر او جايه من المريخ

الفقره الاولى تنتقدين على المجنسن
وفي نفس الوقت تبينهم يدعمونج في الفقره الثانيه [/b

[ام ناصر1]

لا زلت اعتقد إنه المتجنسين زاحموا القطريين ع حقوقهم منذ البداية وبعدين هلوا علينا الباقي...وماداموا تجنسوا سيكون النسيج القطري اختلف ومحتاج ننظرله نظرة أخرى أننا بتنا في الحقوق والواجبات واحد ..وهذا شيء طبيعي
وبعدين ..لاتحتاتي اعرف مايحق لي الحديث فيه ومالايحق ...

[bos3eed]

استغفر الله , بعض العقليات محتاجة تحديث

[عاشق العديد]

محد ودى البلد في داهيه الا هالتفكير ..
ولاكنه هذا المجنس الي تتكلمين عنه ولا هذا الي ع قولتج زاحمج هو بشر مثله مثلج درس هنيه وانولد هنيه وتعلم هنيه ..

ياريت لو في نقاش يكون على حدود الادب

[محسن العجي]

بغض النظر عن التفكير السلبي وسالفه الزبو والمفوشر بالأعراس

إلا أن الوضع ما يطمن

وأتمنى من الدوله تحاول تطلع حلول لحل ألازمه قبل لا نتحسف

وللعلم أختي أم ناصر التجنيس وخاصه لأبناء الفطريات يعتبر حل

ولا مانع من تجنيس العرب الي له أكثر من ٣٥ ولا ٤٠ سنه أيضاً احد الحلول

[تحداني]

خفوا من الطلبات يا البنات .. ما خذتوا من هالحياه غير الديون لو التفتوا لاخوانكم
او الي مروا بتجارب سابقه .. اشحلاتها الاعراس البسيطه
الناس ما عادت اتروح اعراس مثل اول .. وكلها مظاهر خداعه
اهم شي الله يرزقكم الزوج الصالح واتعيشون مرتاحين وبيت يضمكم
متى راح اتفكرون وتستوعبون وتتجاوزون عن الاشياء السطحيه


تعبتوا ازواج المستقبل .. وراح اتعبون حياتكم الجايه


جملكم الله برضاه

[بصمة قطرية]

بعض الردود غريبة ....!!!

[R 7 A L]

الدولة مو مقصرة
في بعض دول الجوار ماعندهم شي اسمة علاوة اجتماعية تزيد اذا تزوج الواحد