كيف تقنع عيالك بالدراسة !!!!!!!!! ؟

[فريج النجادة]

المعادلة الصعبة

كيف تقنع عيالك بالدراسة

هل عندك طرق حدثة

ومنكم نستفيد ونتعلم

كيف نقنع المراهقين بالدراسة

[بريق الحق]

بالضرب








لا امزح .... امممم قول حق الولد اذا نجحت راح نسافر اذا يبت درجه عاليه راح اسجلك في نادي او راح اوديك اكوبارك الي ماذري عنها المهم هاي حق اليهال

[شيخ الديرة]

عقوبات منع الإنترنت و مصادرة الموبايلات والعاب الفيديو الى أن يحصلون العلامات اللي تعجبك. الدراسة ليست هدف، وإنما العلامات. أما إذا كان الهدف الدراسة وقت الامتحانات فقط، فقد خسرت المعركة من زمان، وشد حيلك عالسنة الدراسية القادمة. المشكلة الأولى هي الدلع الزايد وقلة المتابعة اليومية.

[مهره]

بالتفاهم والتحفيز بما يحصل عليه بعد الامتحانات وحصوله علي تقدير يرضيه ويرضينا وبطوله البال واختيار الوقت المناسب له وليس لولي الأمر لان الدراسة مزاج في هذا الزمان

[حمد 2002]

المعادلة الصعبة

كيف تقنع عيالك بالدراسة

هل عندك طرق حدثة

ومنكم نستفيد ونتعلم

كيف نقنع المراهقين بالدراسة

الدراسه الكل يكرها الكبار والصغااار ، ،، وصدقني الي ايقولك ايحب الدراااسه كذاب ،،،

اما الطريقه الي تخليهم يحبون فيها الدراسه ،،، (( ااذا حبيتها انت الدراسه عيالك بيحبونها )) اذا قدرت اتفسر هالمعادله بتحاول تقنع عيالك بالدراسه ،،،

الله يوفقك ،،،

[Class - Qtr]

الدراسه الكل يكرها الكبار والصغااار ، ،، وصدقني الي ايقولك ايحب الدراااسه كذاب ،،،




السلام عليكم

بعض الاحيان تكون في ظروف صعبه عندك في دوامك تخليك اتشجع للدراسه سوء

كورس طويل مدته 3 شهور او دراسه لغه .. الخ

يعني بعض الاحيان الدراسه طوق نجاة

خاصه اذا دوامك في الشمال ولا دخان

ولا في منطقه ام سعيد الدورات هذي

تعطيك راحه غير طبيعيه

بالنسبه لسوال راعي الموضوع / طبعا بالتوجيه بالكلمه الطيبه بالتحفيز بهديه

وغيرها بالكلام عن اهميه الدراسه في حياة الشخص بعد الانتهاء منها

[روح الاطلس]

اخشى ما اخشاه ان هالسؤال متزامن مع وقت الامتحانات !!!

يعني طول السنه مانفتكر في الدراسه ووقت الامتحانات يلا نفكر شلون نهتم فيها


محد يحب يمسك كتاب ويدرس فيه خاصه المراهقين لان ملهيات الحياه وايد

لكن لابد ان يكون هناك نظام واهتمام من الوالدين من بدايه السنه ومن اول مرحله نرتب لهم جدول واوقات للدراسه ونزرع فيهم مسؤليه ان العلم واجب مش بس مدرسه بل لحياته كلها
غلط نعلم الطفل ادرس عشان تنجح
ادرس عشان يقولون عنك شاطر
ادرس عشان اوديك هناك ولا هناك
ادرس عشان اشتري لك فراري

لازم ينقال له ادرس عشان تكون فاهم الحياه
ادرس لان العلم اول شيء حثنا عليه ديننا
ادرس عشان تبني مستقبلك ومستقبل امتك
ادرس لانك ما خلقت عبث

بناء همة وطموح الطفل وربط العلم بأنه شي واجب مثل الاكل والشرب لحياه الانسان

والرعايه المستمره حتى لو الوالدين مشغولين وتدري هالوقت مافي ابو او ام مهتمين بدراسه عيالهم ع الاقل لو سؤال يحسس الولد ان اهله مهتمين
يسأله عن مدرسته شنو اخذ شنو تعلم ذاكر او لا
حل واجباته او لا
مابتاخذ ربع ساعه من وقت الاباء


اما الاطفال المهملين من قبل والديهم ولا فيه متابعه لهم ويتم استخدام طرق غلط معاهم صعبه نقعدهم قبل الامتحانات ونقول لهم ذاكروا!
فنصيحتي هي

الاهتمام والرعايه من اول يوم دراسي
زرع حب العلم في نفوسهم حتى وقت الاجازات نحفزهم للقراءه المتنوعه ونسوي لهم مسابقات والعاب تعليميه
نتابع وين نقاط ضعفهم وشنو المشاكل الي عندهم والي تحتاج معالجة ونساعدهم فيها
نؤمن ان كل انسان عنده قدرات خاصه لكن تحتاج من يرعاها
نبعد عن التحبيط والكلام السلبي اللي يجر للفشل

[Right]

بالعقال



http://im31.gulfup.com/Z6Kdm.jpg

[فريج النجادة]

بالعقال



http://im31.gulfup.com/Z6Kdm.jpg






:shy: :shy: :shy:

[ابوعلي]

اسلوب الضرب ما راح يفيد

اسلوب التحفيز والتذكير بالحرمان في حالة عدم النجاح او نزول الدرجات

[intesar]

بصراحة لا العقاب ولا الضرب.. لكن بالنصيحة.. على مر الأيام والسنوات.. والتحفيز مع كل شهادة سنوية.. كلها تساعد الطالب..
مالقيت أن الحرمان أو الضرب يساعد..

ابحث عن سبب عدم تقبله للدراسة.. وعالج المشكلة.. أحياناً المشكلة لا تكون لخلل في الطالب..

ودمتم بحفظ الرحمن..

[<اضرب واشرد>]

امممممممممممم


عندي اقتراح أننا نسوي زيادة لوقرثمية للجوايز حسب الدرجات

كالتالي :

الدرجة = المكافأة ( مصروف آخر السنة )
تحت الـ 60 = صفر ريال
60-65 = 50 ريال فقط
65-70 = 200 ريال
70-75 = 600 ريال
75-80 = 2000 ريال
80-85 = 5000 ريال
85-90 = 12000 ريال
90-95 = 25000 ريال
95-100 = 100000 ريال

ملاحظة : الأرقام على السريع - نسبة الزيادة ، كذلك نعدل الارقام حسب مستوى ذكاء الطالب ، وحسب قدرات الوالد المادية ، وحسب السنة الدراسية للطالب ، وممكن نحط مبلغ زائد هدايا ومكافآت ثانية مثل طلعة رحلة سفرة .. شي يحبه.

مثلا :

60-65 = 50 ريال فقط + عشاء في مطعم هندي :nice:
65-70 = 200 ريال + ..........
70-75 = 600 ريال + بوفيه محترم
75-80 = 2000 ريال + .........
80-85 = 5000 ريال + اسبوع في شاليهات
85-90 = 12000 ريال + ...............
90-95 = 25000 ريال + سفرة للمكان الفلاني
95-100 = 100000 ريال + سفرة للمكان الفلاني الأجمل

طبعا هذي تصلح أكثر لعيال التجار والأغنياء اللي تخربهم الفلوس !

قول له بعطيك فلوس وهذي شروطها ........

المصروف اليومي والأساسي ثابت ماله خص ....

واذا كان شاطر وجمع فلوس افتح له حساب وعلمه يدخر ......

[R 7 A L]

بالتعب في التربية منذ البداية

ما يجي الواحد وينصح بس على شان الدراسة
في كل امور الحياة من قبل لا يدخل المدرسة يتعب ولي الامر
والنتائج ان شاء الله راح تكون ممتازة

[ام ناصر1]

في كتاب رائع عن تحفيز الطلاب ..للدراسة اذا قدرت نقلت لكم بعض من سطوره
بس أنا من مؤيدين العين الحمرة والعقال ...

[روح الاطلس]

ماشاء الله عليكم

عقال وضرب وعين حمراء


ياربي وانا اقول ليه المجتمع نصه قاسي وعنيف ونصه خجول ويعاني اضطرابات نفسيه


لا مكان للمبدعين :(
لا مكان للنوابغ :(

المراهق لما ينضرب بيزيد كره للدراسه
بيزيد عناد
بيتولد عنده رد فعل عكسي

رباااه :(

[بريق الحق]

ماشاء الله عليكم

عقال وضرب وعين حمراء


ياربي وانا اقول ليه المجتمع نصه قاسي وعنيف ونصه خجول ويعاني اضطرابات نفسيه


لا مكان للمبدعين :(
لا مكان للنوابغ :(

المراهق لما ينضرب بيزيد كره للدراسه
بيزيد عناد
بيتولد عنده رد فعل عكسي

رباااه :(

للاسف مدارس الدوحه تكره الطالب فالدراسه

[<اضرب واشرد>]

في كتاب رائع عن تحفيز الطلاب ..للدراسة اذا قدرت نقلت لكم بعض من سطوره
بس أنا من مؤيدين العين الحمرة والعقال ...

الحين قريتي كتاب بكبرة اختي ام ناصر
وفي الأخير تقولين : بس أنا مع العين الحمره والعقال :eek5:
الطالب ينضرب ويتهزأ من ابوه ، ومن المدرسين ، ماتغير شي ..

انزين ماعجبتج فكرتي :omen2:

[ضوى]

مارست العقاب والحرمان والتأنيب واحيانا الضرب مع الكبير وندمت بالزور عدا الثانوية ، تداركت هالشي مع اللي تحته درسوا وبس درسوا خير وبركة مادرسوا كل شي ينخش ومافي طلعات يايدرسون يا ينامون ، مرة على مرة تعودوا على اسلوبي والحمد لله من نفسهم يدورون التفوق من غير اي ضغط مني سوى وجودي بالبيت اثناء الدراسه يبون مشجع لهم البنت الحمد لله بروحها من غير لا اتكلم تتابع نفسها الولد اشد شوي وارخي شوي والحمد لله مستوياتهم مقبولة جدا ، اللي ينجح ويجيب معدل بياخذ اللي يبيه من المباحات طبعا واللي معدله ينزل يلوم نفسه

[vip-30003]

من تحديات التعليم تدني الدافعية لدى الطلاب

خصوصاً في الخليج

لو فكرت فيه اعيالنا كل شي عندهم فا مافي حافز او مكافئة اتجيب راسهم

والسبب ثقافة مجتمع ونظرة الناس

اليهال كل واحد بيده بلاك بيري ولو كلمت اي رجال عن ولده قال ولد فلان عنده

بالنسبه لي هذا مرض البلاك بيري اليهال ذهنهم مشتت منه

ويسهر الطالب يومياً مع الجوال وهله مايدرون عنه

من جانب ثاني اذا ولدك في الثانويه وتعطيه موتر

تتوقع بيدرس ؟؟؟

هالموضوع كبير وتغير فهم او فكرة لازم في تكاتف جميع الاطراف

المدرسه والاسرة والمؤسسات والاعلام وجهات حكومية

فا مختصر الكلام ممكن ولدك تمنع منه كل اللي ميسر له

وهذا من مصلحته واذا نجح رجع له هالمميزات

جوال فلوس طلعات وموتر

[Bin Hood]

الدراسه الكل يكرها الكبار والصغااار ، ،، وصدقني الي ايقولك ايحب الدراااسه كذاب ،،،

اما الطريقه الي تخليهم يحبون فيها الدراسه ،،، (( ااذا حبيتها انت الدراسه عيالك بيحبونها )) اذا قدرت اتفسر هالمعادله بتحاول تقنع عيالك بالدراسه ،،،

الله يوفقك ،،،

ممكن جدا انك تحب الدراسة

[Bin Hood]

الحل الامثل من وجهة نظري اقناع الابن ان الدراسة مفتاح النجاح والحياة الكريمة

وضرب المثل بناس مقربين يعرفهم ( شوف فلان ما شاء الله عليه درس وصار ... )
ولا اقصد المقارنة السلبية بينه وبين اقرانه

اكثار المديح في حالة تحقيق نتيجة طبية

وصف الابن دوما دوما بالذكاء وان عليه ان يحافظ على هذا المستوى بالعلم والدراسة

اعطائه الثقة بالنفس ان ما انجزه غيره يستطيع ان ينجزه بل ان يأتي بأفضل منه

[بصمة قطرية]

أكره إسلوب الضرب
لأنه راح يكره الطالب في الدراسة

إسلوبي اللي أتبعه مع عيالي
بالذات الكبير اللي إن شاء الله السنه الجاية توجيهي
للأسف ما يحب الدراسة
و كله يلقي اللوم على المجلس الأعلى
و المناهج و المدرسين وووووو إلخ
يعني أعذاره جاهزة ..
أقول له حتى لو ما تحب الدراسة لازم تدرس و ترص على عمرك
عشان تكمل و تاخذ شهادتك
شهادتك سلاحك
شهادتك هي اللي راح تخليك تتشرط و تطلب الوظيفة اللي تبيها
مب بس تاخذ لي الثانوية و تدور على حي الله شغل
الأشغال موجودة و تقدر اليوم تترك الدراسة و تشتغل بكل سهولة
لكن فكر بعد سنين
اللي أصغر منك راح يتفوقون عليك
و يصيرون أفضل منك و إنت راح تظل مكانك
لأنك بدون شهادة
و غيرك كمل
و أضرب له مثال بأقرب الناس له
إثنين من خواله و عمه
تركواالدراسة و إشتغلوا
الحين عقب ما كبروا و اللي تزوج منهم يكملون دراستهم
و خاله ينصحه كل مرة و يقول له شوف حالتي
الحين عقب ما كبرت رجعت أكمل دراستي
لأن الواحد بدون شهادة ما يسوى
الوالد الله يحفظه دوم ينصحه
يعني أفضل من إسلوب النصح ما في ..
الحين فترة الإمتحانات مافي بي بي لين يخلصون ..
هاي إتفاق بيني و بينهم ..
الصغار أقول لهم إذا حبيتوا الدراسة بتصيرون متفوقين
و إذا كنتو متفوقين المدرسة راح تكرمكم
و أنا راح أكافئكم
إسلوب المكافئة ينفع كثير مع الصغار ..

[ام السعف]

تبي عيالك يحبون الدراسة خلهم متأسسين صح ،،

الطالب اللي يتأسس صح يقدر يواجه صعوبات الدراسة
ويسهلها بالمذاكرة واثبات النفس ،،

اما الطالب اللي مب متأسس صح تلقاه يكره الدراسة
ويدور له اعذار يمين ويسار علشان يتخلص من هم الدراسة ،،

حب الدراسة ما يكون بدراسة مواد المنهج ايام المدرسة
حب الدراسة لما يستغل وقت فراغه في الصيف انه يتأسس في المواد
اللي هو ضعيف فيها ،، عن تجربة لاحظت تغيير في حبهم للدراسة
لما يكونون على قدر معقول من التأسيس ،،

اما بخصوص الضرب مع اني سيدة الضرب الأولى في العالم
الا انني ما لجأت للضرب في ترغيب عيالي في الدراسة

لأنهم تبرمجوا على قاعدة
على قد ما تعطي تاخذ ،،

وهناك سقف لازم يوصلون له علشان يحصلون الهدية او السفرة
او الشي اللي يبونه ،، اما غير جذيه ما في شي والحرمان هو اكبر هدية
يحصلونها ،،

لكن في مرات كنت اضطر افتح صفحة يديدة لتعزيزهم ونسيان الماضي


اهم شي يا اخوي انك توقف مع ولدك او بنتك وتساندهم بكل الطرق
علشان يحبون الدراسة او يكملونها وان ما كانوا يحبونها ،،

وجودك بالقرب منهم يشعرهم بأهمية الدراسة لو مب لهم ارضاء لك
ومع الايام بيكونون هم الرباحانين ،،

[ام روز]

اللي مايحب الدراسه من نفسه ماراح يحبها بالضرب بالعكس طريقه فاشله ونتايجها سلبيه وتدمر النفسيه


حب الدراسه بالترغيب ووضع هدف للطفل من مرحلة الروضه لا تقول صغير ومايفهم بالعكس بالعكس شجعه عالمنافسه على المراكز الاولى والتفوق وكافئه على كل شئ ينجزه وذكره دايما بهدفه وانه بينفع نفسه وبلاده وقول له بتصير نفس فلان اذكر له الاشخاص الناجحين اللي حوله اذا تفوقت وخلصت دراستك

[راشد محمد]

التحفيز والهدايا

[خالد_قطر]

عن نفسي وبدون ضرب

المكافأت التي يحصلون عليها عند الإمتياز تحتلف عن الجيد جداً
المراجعة لو نصف ساعة يوميا للمراجعة غير الواجبات

والآن مصيبة الإمتحانات الوطنية
التحفيز يكون أكبر مع تهديد بعقوبات إذا نزلت درجاتهم عن المعتاد وطبعا التهديد بحرمانهم من الشياء الي يحبونها غير إن أخوانه بيحصلون على هدايا وهو لا.

[هسلان]

نجتهد قدر الامكان ونقدر ان هناك قدرات خاصة لكل شخص والتوفيق بيد الله سبحانه فربما تجد طالب مميز والاهل خبر خير وبالمقابل طالب بليد والاهل مهتمين ومتابعين
تحياتي للجميع

[باراكودا]

بالبقالة

[لاجل QT]

بخصوص الريايل اللي مشتطين ويقولون بالضرب

هل فعلا انت درس عيالك ؟؟؟ولا المسكينة

عيالي اعلمهم اذا كسلو بالضرب والعقاب.. واذا انا بنشرت اغريهم بالهدايا

[حسن]

اللهم لك الحمد

عيالي عمري ماتعاملت معاهم بالقوه في الدراسه
عقب الغدا على طول المره جزاه الله خير تدرسهم وبهدوء واحيانا اذا استعصى من
حمود شوي كلمته بالهدو وكمل دراسته
التعليم ياجماعه الخير من الصغر

[تغلبية]

هي تربية أساساً .. مو اقناع على كبر بس

+

تعريفه وتمييز له بين العلم والجهل .. والعالم والمتعلم والجاهل

+
تبين له عواقب الامور اذا درس وكمل .. واذا مادرس وماكمل ...

+

سير الناجحين والفاشلين .. من اقارب عمام خوال ومعارف علشان يختار مثل اعلى يقتدي به اذا غرته اللعبة

[مراد2015]

الضرب اللي يخليه يحب القاع

وعقب تسحبه في الحوووش

[كحيلآن]

بالنسبة لي كـ طالب جامعي حالياً انا صرت أدرس لآن الوالد والوالدة الله يحفظهم مب عندي ههههههههه

ولكن ايام المدارس الثانوية والاعدادية والابتدائية ... كليت ضرب لين قلت بس ..

الدلع الزايد ما يفيد .. وانت لا تضرب هدد اذا ما سمعوا الكلام اضرب عقبها بيسمعون الكلام .. ولازم تسوي شي الي هو . لآزم تسمع لهم تشوفهم حافظين ولا لا .. لآنك لو قلت لهم اجلسوا بـ غرفكم وادرسوا ما راح يدرسون .. ولكن لو قلت لهم راح اسمع لكم .. يبون يحفظون ....

هذي نصيحة إضافية ...

طريقة إعداد الخيزرآنه الجيدة ..

جيب خيزرآنه من النوع الي لها عكفه فوق على شآن تعلقها بالجدار ويشوفونها ويخآفون ..
الخيزرآنه هذي حطها بالحوش وحط تحتها كيس .. وصب عليها زيت عافيه ولا اي زيت أهم شي حق طبخ وخلها يومين .... عقب جيب الحناء حق الحريم وحن الخيزرآنه ...

راح تطلع لك خيزرآنه ما تنكسر ولها صوت يخرع هههههههههههههههه


بس مثل ما قالوا الاخوه الي قبلي ... ما تحس أنك متأخر (حيل) شوي ..؟ يعني حتى الخيزرآنه ما يمديها تجهز قبل يوم الامتحان الاول هههههههههههههههههه