شباب مترف

[هسلان]

السلام عليكم ورحمة الله وبركاته

العنوان شوي قاسي على البعض بس هذا تفسيري لما يحدث هالايام

لول تبنشر السيارة ونفسر الذرعان ونظرب جيك في عز الحر
واليوم الاخ يبنشر ويمشي على التاير لين يتقطع وبدل مايدفع مبلغ بسيط اتلف التاير بالكامل والبعض يتصل بالبنشري يجيه ويدفع زيادة وللأسف اسبير السيارة جديد

لول نستحي نوقف نسولف في الشارع ونعطل السير واليوم تظرب هرن ويطالعك بالمراية ويطنش

لول نجتمع بالمجالس والاماكن العامة واليوم نجتمع عند وقت الشاي ونعرقل السير

لول انكس لعقال واليوم نستلف توكة من خواتنا نربط الشعر

تحياتي للجميع

[همر]

لول الرجال يربون رجال

الحين الخدامات يربون لعيال

[أبوهيا]

جيل هالايام من كثر الخير والفلوس مهب تعبان فيها تحصله الغدى بفندق والعشى بفندق
ولا يجتمع على وجبه اكل مع هله
وبالعيد من اول يوم مسافر
وبرمضان مطيح بشيشه. ولا كوفي

[حسن]

اااه

تضرب على الاوتار الحساسه عندي
وين القدوه

قبل قليل كنت في مستشفى الخور وانا طالع من العياده الا ذاك الجي
صاف قدام وفي واحد من هل الجيل نزل الدريشه وحذف الفاين على الباب
جيته وقلت له ليش هذا التصرف وقدام الوافدين وش بيقولون
اذا ولد البلد يقط الوصاخه بنفسه

ذكرني ولدي ناصر اللي في الروضه واحنا في البر في طريقنا الى المخيم
بعد صلاه الجمعه ولا يقول يبا ابي الله يعزكم درام زباله
قلت له ليش قال ابي اقط العلوك

التربيه التربيه التربيه

ودام الحين انشوف التربيه من فلته مالك الا تنتظر الساعه

[الحسام]

موضوع مهم
المفروض يكون في أولويات المواضيع المجتمعيه .

متابعين ونتمنى تفاعل اكبر

[عقار]

ايـــــــــــــــــه
ها الجيل فرق بينه وبين الجيل السابق ، الحين في شباب ماعندهم حتى الغيره ، تحصله مع اخته ولا زوجته
وهي بكامل تبرجها ، كأنه يكشخ بعرضه قدام الناس ، هذا هو اللي يسمى ( ديوث )
ولا البنت تطلع من بيتها تدق سلف رايحه شيشه ( الخرمه ضاربه حدها ) وبعد الشيشه الله العالم وين !!
احنا يبيلنا يرجعون ايام العسكريه لطلاب المدارس في الصيف نفس ايام قبل ( جندي طالب )
او يسوون مدارس اعداديه وثانوية عسكرية مثل ابوظبي
الولد اذا ما انحك والله ما يطلع رجال شوف عيني في المولات شباب كثيييير صاروا مايعين متشبهين بالبنات حتى في كلامهم
الله يستر على المسلمين

[ms-qtr]

للأسف هذا مب ترف هذا تخلف
اثنين صافين سياراتهم في نص الشارع ويسولفون والناس تتعطل
وله شباب يسدون الشارع عند مطاعم معينة لأنهم ما يبون ينزلون من السيارة والناس تتعط
والمشكلة انهم ما يحسون ان الي يسوونه غلط

[التيما]

لأنهم تربية خدم مب تربية ابهاتهم .. لو كل اب ربى عياله ماشفنا هالمناظر .. لو الاب يأخذ عياله الميلس يتعلمون قعدة الرياييل وسنع الرياييل ماشفنا هالاشكال ..

[عقار]

لأنهم تربية خدم مب تربية ابهاتهم .. لو كل اب ربى عياله ماشفنا هالمناظر .. لو الاب يأخذ عياله الميلس يتعلمون قعدة الرياييل وسنع الرياييل ماشفنا هالاشكال ..


اي والله وين ابهاتهم عنهم

[khalid525]

كل جيل فيه الزين والشين ، والمسؤول عن الجيل هو الجيل اللي قبله ،

[الرويـس]

للحين الدنيا بخير
ماعليكم من الكم واحد

[حكآية آحسآس]

موضووع صريح وجاد ..شبابنا ماتعودو على تحمل المسؤلية والاعتماد على النفس.. وهذا اكبر خطر ممكن يواجة المجتمع..الانسان لازم يتعود على كل الاحوال مو بكرة ينصدم..
وعلى فكرة الكلام هذا مو للشباب بس وبعد للبنات..

تحياتي للجميع..

[بن مفتاح]

لا تقارنون الجيل السابق بالجيل الحالي ..

احنا عشنا بين بر وبحر .. صدنا بالمساكر .. لعبنا على القار في الصيف وفي عز الظهر .. عشنا اعزكم الله في الشارع اكثر من بيوتنا .. وشوارعنا كانت أمان وتربي .. لعب كورة وعظيم اللواح وظلالوه وخاجه ..
رحلات بالبر وعلى الشاطئ والكثير منها كان مشي .. وان حصل سيارة كانت سوزوكي ولا بيكم حجري وبدون مكيف ويخضخضك عدل لين توصل مكانك .. وأخدم نفسك بنفسك وإذا أنت ما تحط يدك محد بيفيدك ..

زمن تغير .. لا تلومونهم .. بس ندعوا لهم الله يهديهم .. وكما قالوا اخواني وخواتي التربية التربية التربية ..

[بريق الحق]

لا تقارنون الجيل السابق بالجيل الحالي ..

احنا عشنا بين بر وبحر .. صدنا بالمساكر .. لعبنا على القار في الصيف وفي عز الظهر .. عشنا اعزكم الله في الشارع اكثر من بيوتنا .. وشوارعنا كانت أمان وتربي .. لعب كورة وعظيم اللواح وظلالوه وخاجه ..
رحلات بالبر وعلى الشاطئ والكثير منها كان مشي .. وان حصل سيارة كانت سوزوكي ولا بيكم حجري وبدون مكيف ويخضخضك عدل لين توصل مكانك .. وأخدم نفسك بنفسك وإذا أنت ما تحط يدك محد بيفيدك ..

زمن تغير .. لا تلومونهم .. بس ندعوا لهم الله يهديهم .. وكما قالوا اخواني وخواتي التربية التربية التربية ..

ههههه ايام الكوره كنا نقول لا مااطلعت علخط ولا في خط ولا فرق العارضه واحنا حاطين نعال الله يعزكم حتى كور قبل اخشن من الحين مادري شلون كنا نشوتها

[bos3eed]

كل شي يهون الا موضوع وقت الشاي والزحام اللي يسببه والعالم اللي تصكر الشارع علشان يسولفون مع بعض وتلاقي بعضهم شايل كرك فيده ويمشي 10 علشان لاينكت

[أبو راكان]

البيئة المحيطة هي من تصقل الإنسان
فلو توفرت وسائل الوقت الحاضر في الوقت الماضي لوجدت شباب الأمس مثل شباب اليوم

اذا تبون الصج ...
الانتقاد الحقيقي للشياب اللي تغيروا تغيّر سلبي على كبر
الانتقاد الحقيقي للي يأمر بالمعروف وينسى نفسه

[قطري92]

ههههه ايام الكوره كنا نقول لا مااطلعت علخط ولا في خط ولا فرق العارضه واحنا حاطين نعال الله يعزكم حتى كور قبل اخشن من الحين مادري شلون كنا نشوتها

ههههههه والله اذكر ايام كنا نلعب كوره فل الفرجان لين مانقول بس وقت الصلاه نروح المسجد حتى غذا وعشى مافي... اول ماترجع من المدرسه كوره ف عز الشمس :omen2:

الصراحه احلى موضوع مر عليه.. موضوع عجيب !

[Buxton]

الله يهديهم ويصلحهم وينفع بهم الامة
وليه من الاساس اهلهم يخلون الخدم يربونهم؟
المفروض الشيبان يعلمون عيالهم السنع ويودونهم المجالس
والام لازم تكون مع بناتها فالبيت وتسنعهم وتعلمهم وتعلم العيال بعد
حن نلوم شباب ذا الجيل ونلوم قبلهم والديهم اللي ما علموهم التعاليم الصحيحه
المشكلة اول شي من الوالدين وبعدين من الشباب نفسهم

[SULTAN1]

الجيل الحالي فيهم خير ، أحسنوا الظن ، اللى قبلكم كان عنده نفس الظن فيكم ،فقط لانه الوقت مختلف

[هسلان]

اشكر الجميع على المشاركة في الموضوع واتمنا التوفيق للجميع

[قطري !]

لأنهم تربية خدم مب تربية ابهاتهم .. لو كل اب ربى عياله ماشفنا هالمناظر .. لو الاب يأخذ عياله الميلس يتعلمون قعدة الرياييل وسنع الرياييل ماشفنا هالاشكال ..





لو الأم ربت عيالها ماشفنا هالمناظر


التربيه تبدأ وهو يرضع حليب امه هي التربيه الصحيحه ... الان الام عندها خادمه هي اللي ترضع الطفل وتبدل ملابسه وترقده والام مشرفه ( سوبر فايزور) ,,,,,


الأب ياتي دورة بعد الام ,,,,,,, لاكن للأسف الامهاااااااااااااات غافلات عن تربية اولادهم