للنقاش :)

[al.jernas]

السلام عليكم ورحمة الله وبركاته :)

في الفتره الأخيره الكثير من الناس أنجرت ورا تصاميم فيها دوائر (سداسية) مثل هالتصميم :)
http://im34.gulfup.com/NwiMZ.jpg

ماهي فوائد وعيوب هذي الدائرة السداسية أم أنها مجرد ذوق دارج هالايام :)

أنا ما أتكلم على أنها بتكون غرفة أقصد كجلسة في الصاله الأرضيه والعلويه إيش رايكم :)

أنا بصراحه عاجبتني الفكره وشكلي بتوكل على الله وبسويها وأتمنى من الأعضاء يحطون كم تصميم على ذوقهم يساعدوني في الاختيار :)

وجزاكم الله خير :)

[اللوز]

تكلف كثير في التشطيب وتستهلك كثير من الزجاح
حرارة مرتفعة داخل المبنى
لا يمكن ضبط قياس النوافذ 100%

[الـخـور]

حرارة البيت بتكون مرتفعه نظرا لكثرة الزجاج

انصحك تصرف النظر وقلل الزجاج لانه مايمشي لجونا

هذا غير مشاكل البناء لان قليل الي يقدرون يضبطون هالتصميم

والاهم انه كاشف فالليل وبتظطر تسوي ستاير وشغلات تستر وراح تخترب السالفة وتحس ان مايسوى عليك

[khaldoon]

الاتجاه للمباني الزجاجية جميل جدا و لكن يستهلك 70% طاقة اكثر على المدى البيعد....يعني لحق عليه تكييف و كهرباء من اجل انه يكون دافي بالشتاء و بارد بالصيف.....

[مواقف النجادة]

اضيف الى ما ذكروه الاخوان .. صعوبة التنظيف من الخارج ..
خصوصا الجزء العالي .. بيتم مغبر و بيشوه البيت لان الشغالة ما راح تقدر توصل له.

[al.jernas]

السلام عليكم ورحمة الله وبركاته :)

بصراحه أشكركم على التوضيح :)

اللحين اللي عرفته ان مو كل من يضبط الدائرة يعني يبيلها حرفنه ومشاكل الحرارة والبروده بتكون مشكله ثانية بسبب الدرايش يعني مشكلتين :)

اما بالخصوص الدرايش انا مشكلتي ماوضحت أنا ما أبغي أسوي الدائرة كلها زجاج اللي ابغيه مجرد درايش عاديه مثل هالدائره :)

http://im40.gulfup.com/966C5.jpg

يعني أعتقد مشكلة التنظيف والحرارة انحلت :)

طيب ماتكلمتوا عن فوائد الدائرة كيف بتكون الجلسة اعتقد بتكون روعه :)

وبعدين هل تفصيلها صعب على الدائرة :)

أسف على ثقل دمي بس صج أبغي اوصل لقرار بخصوص الدائرة :)

[الـخـور]

مرحبا اخوي ..

عادتا الصالات الدائرية تاكل مساحات .. ولكن يمكن استغلالها بشكل جميل ..

لفت انتبهائي طريقة الصالة الدائرية وحولها مثل بلكونه دائرية .. تنفع لغسيل الزجاج الخارجي

وارفقت لك بعض الافكار لكيفية الصالات الدائرية

[رآعي موآجيب]

انت بخاطرك التصميم بأي حال من الأحوال ، وما الومك الصراحه :nice:

من الناحيه الماديه الموضوع مكلف ، إذا نفس التصميم عندك قبه فوق و6 عمدان من الخارج وزجاج بكامل الدائره

وهذي كلها تكاليف ماراح تعرف حجمها إلا وقت التشطيب

اذا تحاتي هالجانب لكن التصميم بخاطرك ، الغي القبه والعمدان ولا تخلي الدائره كلها زجاج ، افصل بينهم بطابوق من الأسفل للأعلى وتكون الدرايش طواليه بعرض لا يقل عن متر ونص وتكون 3 لاينات ، يعني دريشه كامله من الأسفل للأعلى وبعدها طوفه كامله بعدين دريشه وطوفه ودريشه ، وتقدر تلعب في الدرايش وماتخليها كلها بأرتفاع واحد مثل المباني الإداريه ، يعني دريشه اطول من الثانيه أو بأشكال هندسيه مثل الأندلسيه أو الأنجليزيه

موفق ان شاء الله

[شموخ دائم]

,

,


مرحبا


اخوي الكريم

هذا التصميم تقريبا يشبه بيتي
انا مسوي فيه اشكال سداسيه للصاله و ايضا للمجلس
ولغرفه النوم الرئيسيه
شغل الجماليات والديكور فيه من الداخل يطلع ممتاز جدا
واجمل من الشكل العادي
بيكون مختلف وفيه تغيير عن البيوت العاديه
وكل من يدخل يعجبه الشكل الجمالي للديكور
للسقف والجبس والزجاج
مو شرط تخلي الزجاج كثير او كامل
انا مسوي 6 شبابيك بكل حيطه سداسيه شباك
والستائر تطلع ممتازه جدا من الداخل
لانها تغطي اكثر المساحات قماش
اكثر من الصبغ

توكل على الله

من الناحيه التكلفه اكيد بتزيد شوي عن النوع العادي
لكن الجماليات ايضا بتكون اكثر

,

,


اخوك


شموخ دائم

[al.jernas]

السلام عليكم ورحمة الله وبركاته :)

أولاً مشكورين جميعاً على تفاعلكم :)

بالنسبه لأخواني راعي مواجيب وشموخ دائم أو لكل من بنى دائره سداسيه في بيته ممكن تخبروني عن هذي التجربه مثلا تكلفتها وتكلفة درايشها وتفصيل جلساتها وشنو هي فوائدها وأضرارها خصوصاً أن في اعضاء يقولون أن مو كل مقاول بيضبط الدائرة ومشاكل الحرارة والبروده والغبار سببها الدائرة السداسيه وشكراً :)